लुका 10
10
1ओहाङःसैको येसुइ अरु बहत्तर्जन छ्युङ्ह्आकान्। छ्युङ्ह्आक्तीको ओउःमयःकायः येसुइ ओउःकोः ङ्हासै ओउः लयः दाह्सा खेःओ सहर् सहर्ताङ् गाव् गाव्ताङ् नीःनीस्चाक् ल्होक्आथास। 2ल्होक्तोक् बेलाहाङः “लौ राङ्हाङः भुङ्ह्ती मीन्ओ सायःलो लेखालेः ङाकःताङ् वाङ्सा खेःओ मान्तालम् नाःतोलेः मुइतो ओउःमयःकायः ङाकःताङ् त्युम्ह्ती वानःसा मान्तालम्पाय् नाःतो नाःइली ओउःत झ्यान्ते ‘अ प्रभुय वानःसा मान्तालम्पाय् ल्होक्चाक्उ दा’ त दाय्ह्ती परमेस्वर्कायः तेती तोनु दा” त दाय्ह्ती येसुइ लयः छ्युङ्ह्ओ मान्तालम्कायः तोती 3“लौ द्याह् आल्न पारःकुयःकःगन ल्होक्ओ भेदामेत्छ्याःलो लेखा नीङ्कायः ङाइ रेव्तो हायःओलम्कःताङ् ल्होक्नेःनाङ्सु। 4आल्तोक् बेलाहाङः पैसा कासा थैलोमा हास्ती लात्ओ झोलामा जुत्तामा लावचाःइसी ल्याम्हाङः सुलाङःकुस्मा नोःकाय्तीतेः भेक्तेःचै। 5ओहाङःसैको गाव्खेलो कीम् नीङ् पोक्तेःनै कीम्कोः मान्तालम्कायः ‘पेतोतेः स्याव्तेःपै’ त दाय्ह्ती तोनु। 6ओहाङःसैको ओउः कीम्कोः मान्तालम् पेनै त खेःया नीङ्इ तोती बयःओ आसीक् मुपाः ओउःमयः पेइली त खेःयाकायः नीङ्इ बयःओ आसीक्पाय् क्युम्ह्नु। 7कीम्कोः मान्तालम्इ नीङ्कायः रोम्ती त्याक्आक्तीको ओउः कीम्हाङः मुन ओउःमयःइ बयःओ जेःगा तुङ्गा सोकार्तोलेः अह्र्माःत जेःनु दोह् हायःती दाय्ह्सा नीङ्इ तोती स्यान्झ्याङ्कोः ओउःमयःइ जेःगा तुङ्गा बयःसा खेःलेःनै। यात्ज्याङ् गाव्हाङः कीम् कीम्ताङ् थोक्तीलेः वाह्लाम्। 8ओहाङःसैको सहर्ताङ् दाह्आक्तीको नीङ्कायः रोम्ती त्याक्आक्तीको दोह् दोह् जेःगालम् ओउःमयःइ बयःतेःनै ओउःलेः अह्र्माःतोलेः जेःनु 9ओउःहाङः मुओ जीक्ओलम्कायःमा स्याक्ताक्नु फेरी ओउःमयःकायः स्यान्तोक् बेलाहाङः ‘लौ तेन्पाय् परमेस्वर्कोः राजीकोः कुरा नीङ् दोःतेःखेःतेःनै’ त दाय्ह्ती स्यान्ती तोनु। 10ओहाङःसैको गाव्खेलो सहर्हाङः मान्तालम्इ नीङ्कायः रोम्तेःइली त खेःया ओउः सहर्कोः ल्याम्लम्हाङः वाह्ती 11‘लौ नीङ्कोः सहर्कोः फुत्साः ङीकोः दोम्सै काह्ती वाय्नाङःसु इतलेः नीङ्मा वाय्तेःनै बा। दोङ्सीलेः तेन्पाय् परमेस्वर्कोः राजीकोः कुरा ग्यामाःत झ्यान्ते नीङ्इ भेल्ह्तेःताक्तेःआकायःइसी बा’ त दाय्ह्ती तोनु। 12दोङ्सीलेः दाय्ह्भनाङ् परमेस्वर्इ सबै तय्छनःती योसा दीन्हाङःपाय् ओउः सहर्कोः मान्तालम्इ आन न्युम्ह्नानी बा। ओउःमयःपाय् उय्ह्लेकोः ह्र्योङःती वाय्ओ सोदोम् सहर्कोः मान्तालम्सै न्हाङ्तोलेः न्युम्ह्नानी” त दाय्ह्ती येसुइ ओउः बहत्तर्जनकायः तोआथास।
13“लौ नीङ् खोराजीन् बेथ्सैदा नीस् सहर्कोः मान्तालम्य नीङ्पाय्तेः न्युम्ह्तोतेः स्याव्सा खेःतेःनै बा दोह् हायःती दाय्ह्सा नीङ्कोः सहर्हाङः जाङ्ह्ओ ग्याङ्ह्राय्लम् ङाइ तायर् सीदोन् त तोओ नीस् सहर्हाङःमा जाङ्ह्ओ खेःतो त खेःयाकायः ओहाङः मुओलम्इपाय् आन ज्याङःतोहाङःसै जुगाङ् ल्हुङ् द्यान्ह्ती लयःकोः रेव्तो जाङ्ह्साकायः फेचानी खेःतो। 14दोङ्सीलेः परमेस्वर्इ न्युम्ह्ताक्ती तोसा दीन्हाङःपाय् ओउः तायर् सीदोन् नीस् सहर्कोः मान्तालम्सै नीङ् खोराजीन् बेथ्सैदा नीस् सहर्कोः मान्तालम्पाय् न्हाङ्तोलेः न्युम्ह्तोतेः स्याव्तेःनै। 15आने कफर्नाहुम्कोः मान्तालम्य नीङ्कोः सहर्पाय् ‘लाङ्काकोः सहर्लो ताङ्ह्लेःनाः’ ततेः तोतेःनानी सबै कामः नालाताङ् क्लाःती ह्र्योङःती वाय्तो स्याव्लेःनाः बा” त दाय्ह्ती येसुइ तोआकान्। 16“सुसुखेइ नीङ्इ स्यान्ती तोओ कुरापाय् ग्यातीलेः सायःनानी ओउःलेः ङाकोः कुरापाय् ग्याती सायःलेःनानी। सुसुखेइ नीङ्इ स्यान्ती तोओ कुरापाय् ङ्हाम्तेःइली ओउःलेः ङाकायःमा ङ्हाम्ताङःल ङाकायः ल्होक्ओ परमेस्वर्कायःमा ङ्हाम्लेःनीली” त दाय्ह्ती येसुइ ओउःकोः बहत्तर् छ्युङ्ह्ओमयःकायः तोआथास।
17ओहाङःसैको ओउः बहत्तर्जन ल्होक्आक्तीको ओउःमयः आल्ती लोनेः आन चोङाय्ती चोङाय्तीलेः येसुकःताङ् द्यान्ह्ती वाङ्आकाय् “लौ प्रभुय नाङ्कोः मय्ङ् पेह्ती ङीइ लान्लम्कायःमा तोती ल्हेस्ती वाय्सा खाय्आलाङःसु” त दाय्ह्ती येसुकायः तोआथै 18“ओउः सैतान् त तोओ लान्कोः राजापाय् लाङ्कासै जोक्तोलेः क्लाःओ च्यवःआलाङः” त दाय्ह्ती येसु त्याङ्आ। 19“लौ रुलम्कायः नेःकोस्लम्कायः नीङ्इ लैतेःनानी त खेःया नीङ् जीक्तेःइली इ ग्वम्पाय् ङाइ बयःनेःआलाङ्स। 20लौ लान्लम्कायः नीङ्इ गानाक्ती तोसा खाय्तेःनानी त झ्यान्ते नीङ् द्याह् म्रोतेःइतो ओउःत हायःओसै लाङ्काहाङः नीङ्कोः मय्ङ् लेखती गम्ओ लेःआः त चीःसाकायःलेः न्हाङ्तोलेः म्रोतेःपै” त दाय्ह्ती येसुइ तोआकान्। 21ओउःत तोतोक् बेलाहाङःपाय् येसुकायः परमेस्वर्कोः ग्वालामःइ दोःती आन चोङाय्ताक्आथै। येसुपाय् एत चोङाय्तो स्याव्ती “लौ परमेस्वर् आपाय नाङ्पाय् ल्हाव्ह्दैबाङ् फेल्बाङ्कोः राजा लेःतेःआः ङाकोः कुरापाय् नाङ्इ व्हाय्ती चीःओ मान्तालम्खेकायः छ्यान्ह्माःत इ मीओ व्हाय्आक्मालो मान्तालम्खेकायः ह छ्यान्ह्तेःआकान् ओउःत हायःओपाय् नाङ्कोः लयः झाक्ओ कुरा लेःआः बा। ओउःत झ्यान्ते नाङ्कायः ङाइ आन ‘च्युता’ त लुङ्तीलेः तोनेःनाङ्। 22ङाकोः परमेस्वर् आपाइ सबै कुरालेः स्यान्साकायःमा जाङ्ह्साकायःमा बयःआताङः। चोःकायः आपाइ ह तय्ह्नाःथै ओउः चोःइ ह परमेस्वर् आपाकायः तय्ह्नौ। अरुइ आपाकायःमा चोःकायःमा तय्ह्नीली। सुसुखेकायः ओउः चोःइ लयः झाक्ती छ्यानःनाःथास ओउः मान्तालम्इ ह परमेस्वर् आपाकायः तय्ह्नानी” त दाय्ह्ती येसु दाय्ह्आ। 23ओहाङःसैको येसुइ लयःकुस् वाह्ओमयःकायः लयःकःताङ् गोत्ती “लौ नीङ्कोः मीक्हाङः आन ताङ्ह्ओमा ग्याङ्ह्सीःओ कुरामा जाङ्ह्ओ खेःतो। ओउःत च्यवःओ मान्ताकायःपाय् परमेस्वर्इ आन पेतो हायःआकान्। 24इत नाङ्खेइ च्यवःओ कुरामा नाःतो उय्ह्लेहाङः मुओ परमेस्वर्कोः कुरा छ्यानःओमयःमा राजालम्मा च्यवःसा आन झाक्इतो ओउःमयःखे च्यवःसामा दोःइली नीङ्खेइ सायःओ कुरामा ओउःमयः सायःसा आन झाक्इतो ओउःमयःखे सायःसामा दोःइली” त दाय्ह्ती येसुइ अरु मान्ताकायः सायःताक्माःत तोआथास।
25ओउःतलेः येसुइ तोआथास ओहाङःसैको यात्चाक् परमेस्वर्कोः ऐन् स्यान्ओ मान्ता चीङ्ती “लौ गुरुय ङा सीआक्तीको लाङ्काताङ् आल्सा गलमा द्योक्मालो रौ जीङः दोःसाकायः दोह् हायःचाङः ती” त दाय्ह्ती येसुकायः ल्हुङ्तुक् योसाकायः व्हत्थातो 26“लौ नाङ्इ परमेस्वर्कोः ऐन् पह्रओ बेलाहाङः दोह् दोह् स्यान्तेःआकास” त येसु दाय्ह्ती 27“ ‘नाङ्कोः प्रभु परमेस्वर्कायः नाङ्इ दोङ् झाह्ओ क्रोङ्ओ ग्याओ ल्हुङ्इ वाय्क्तोलेः राप्नु दा’ त दाय्ह्ओमा ऐन्हाङः मुनाः फेरी ‘नाङ्कोः ब्रेङःकाय्ती याक्ओ मान्तालम्कायः लयःकायःलो धेःती राप्ती स्यास्उ’ त दाय्ह्ओमा मुलेःनाः” त दाय्ह्ती ओउः मान्ता त्याङ्आ। 28“नाङ्इ चीःतोलेःतेः त्याङ्तेःआ रैस। ओउःत हायःसा नाङ्इ जाङ्ह्तेःनौ त खेःया नाङ् गलमा द्योक्मालो जीङः दोःतेःनाः बा” त दाय्ह्ती येसुइ तोआथै। 29ओहाङःसैको ओउः मान्ता “इइ ङाकायः कुराइ क्लीमःचाःताङः” त म्हर्ती झ्यान्ते “लौ ङाकुस् ब्रेङःकाय्ती याक्ओ मान्ता त तोसा सुकायःलो तोसा स्याव्लेःनाः” त दाय्ह्ती ओउः मान्ता फेरीलेः व्हत्थातो 30त्याङ्साकायः येसुइ वीनःराय्लो ताआकान्। “यरुसालेम्सै यात्चाक्इ यरीखो सहर्ताङ् आल्सा बोङःआकान्। ओहाङः एकान्लेः आल्ती वाह्तोक् बेलाहाङः ल्याम्हाङः फाती मुओ दाकुलम्इ ओउःकायः ङायःती थोःती घान्ती ओउःइ लात्ओ सबै थोक्लम् नाय्लम्मा लाती आलःआकानी। सबै थोक्लम् लाती आल्आक्तीको ओउः मान्तापाय् चीङ्काना सोह्लेः सीखेःओ स्याव्ओ खेःतो। 31ओउःपाय् सीखेःओ मुतोक्हाङः ओउः दाकुलम् क्रव्आक्तीको यात्चाक् पुरोहीत्लेः ल्याम्हाङः वाह्ती दाह्ती वाङ्ती ओउः वाय्ती गम्ओ सीखेःओ मान्तापाय् च्यवःथातो ओउःकायः द्याङ्तोसै लाय्मामाःत न्यास्मामाःत ल्याम्कोः उसै च्योल्ती आल्आ। 32ओउः पुरोहीत्पाय् आल्आक्तीको यात्चाक् मन्दीर्हाङः काम् जाङ्ह्ओ मान्तामा ल्याम्हाङः वाह्ती दाह्ती ओउः सीखेःओ मान्ताकायः योसाकायः लाय्उतो न्यास्मामाःत आल्आ। 33ओउःखे आल्आक्तीको यात्चाक् यहुदी खेःमालो समारीया देस्कोः मान्ताखेमा ल्याम्हाङः वाह्ती दाह्ती ओउः सीखेःओ मान्ता कोन्ह्ती मुओ च्यवःआकान्। 34ओउः मान्ताकायः च्यवःआक्तीको ओउः समारीया देस्कोः मान्ता ओउः कोन्ह्ती सीखेःओ मान्ताकायः योनःती योती ओउःकःताङ् वाङ्ती ओउःकोः चालम्कायः सातीइ ल्यानःती नाय्इ पोतोलःआकान्। चा पोतोलःआक्तीको ओउः जीक्ओ मान्ताकायः लयःकोः घोराहाङः लन्ह्ताक्ती आलःती लाजताङ् वानःती ओउःहाङः पेतो एङ्तीलेः स्यास्आथै। 35ओहाङःसैको ओउःनम्कोः स्याङ्ह्लोहाङः आल्सा चीङ्ओ बेलाहाङःपाय् ओउः समारीया देस्कोः मान्ताइ ओउः जीक्ओ मान्ताकोः होन्त लाजकोः साहुकायः जेःगाकोः पैसामा एनःसा थाव्कोः पैसा ल्हाआकान् ‘लौ ओउः जीक्ओ मान्ताकायः पेतो एङ्ती स्यास्उ दा। ओहाङःसैको ङा इहाङः द्यान्ह्ती वाङ्तोक्हाङःपाय् दोह् दोह् बयःती स्यास्झ्याङ्कोः पैसा राह्ती मुचाः ओउःपाय् ङाइ पाय्क्चेःनाङ्’ त दाय्ह्ती ओउः साहुकायः तोआक्तीको आल्आ। 36ओउःत झ्यान्ते ङाकायः तोची दा ल्याम्हाङः वाह्ओ सुम्चाक्हाङः ओउः जीक्ओ मान्ताकायः सुखेलो ब्रेङःती याक्ती मुओ मान्ताकोः काम्लो लेखा जाङ्ह्आकान्” त दाय्ह्ती येसुइ व्हत्आथै। 37“ओउः जीक्ओकायः योनःती स्यास्ओ मान्ता माःर” त दाय्ह्ती ओउः ऐन् स्यान्ओ मान्ता त्याङ्आ। “लौ उया नाङ्इमा ओउःतलेः योनःती योसा काम् जाङ्ह्लाङ् आल्अ दा” त दाय्ह्ती येसुइ तोआकान्।
38ओहाङःसैको येसुमा ओउःकुस् वाह्ओमयःमा वाह्ती आल्तोक् बेलाहाङः यात्ज्योः गाव्ताङ् दाह्आकाय्। ओउः गाव्ताङ् दाह्आक्तीको यात्चाक् मार्था त तोओ मोमःचोःइ येसुलम्कायः लयःकोः कीम्ताङ् रोम्ती गम्आथास। 39कीम्हाङः रोम्ती गम्आक्तीको कीम् पोक्आक्तीको येसुइ कीम्कोः मान्तालम्कायः स्यान्ती मुओ खेःतो। स्यान्ती मुतोक्हाङः मार्थाकोः हौद्याङ् मरीयम् त तोओ प्रभु येसु द्याङ्तो च्युङःती ओउःइ स्यान्ओ कुरापाय् सायःती मुओ खेःतो। 40ओहाङःसैको मार्था नाःखेइ कीम्कोः उयुम् त्युयुम् काम् जाङ्ह्ती झ्यान्ते आन सावःती मुओ खेःतो। ओउःत झ्यान्ते ओउः नाःपाय् येसुकःताङ् वाङ्ती “अ प्रभुय इ कीम्कोः काम्पाय् ङाइ ह जाङ्ह्तीलेः मुनाङः ङाकोः हौद्याङ्इ दोह्मा जाङ्ह्उलु। इत हायःसाकायः नाङ्इ दोह्मातेः म्हर्तेःल यादो। लौ ओउःकायः लव्ह्लाङ् ल्होक्ची दा” त दाय्ह्ती येसुकायः काय्ह्ल्ह्याव्ती तोआथै 41“अ मार्था नाङ् आन काम्कायःतेः ल्हुङ् रुःतेःनाः बा। 42नाङ् नाःतो काम्कायः ल्हुङ् रुःतेःतो यात्ज्याङ् काम् ह जाङ्ह्सालेः खेःतो। इ जाङ्ह्सा खेःओ काम्पाय् नाङ्कोः मरीयम् हौद्याङ् द्याह् जाङ्ह्धैलेः मुनाः। ओउः पेतो काम् जाङ्ह्साकायः मरीयम्कायः फेताक्ङल” त दाय्ह्ती प्रभु येसुइ मार्थाकायः तोआकान्।
Currently Selected:
लुका 10: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
