लुका 11
11
1ओहाङःसैको यात् दीन्हाङः येसुइ परमेस्वर्कायः तेती तोओलेः मुओ खेःतो। ओउःत तोती द्योक्आक्तीको यात्चाक् ओउःकुस् वाह्ओमयः येसुकःताङ् वाङ्ती “लौ बाप्तीस्मा बयःओ युहनाइ लयःकुस् वाह्ओमयःकायःपाय् ‘प्रभु परमेस्वर्कायः इत तेती तोसा स्याव्नाः’ त स्यान्आथास। युहनालो लेखालेः नाङ्इमा परमेस्वर्कायः गत तेती तोसा त ङीकायःमा स्यान्ताङी दा” त दाय्ह्ती ओउःमयः येसुकः तेआकाय्। 2ओउःमयः तेआक्तीको “लौ परमेस्वर्कायः तोतोक् बेलाहाङः इलो लेखा तोसा स्याव्नाः ‘अ परमेस्वर् आपाय नाङ्कोः मय्ङ्पाय् अरुसै ताङ्ह्ओमा छय्ङ्तोमा स्याव्पाः। नाङ्कोः राजी वाङ्पानाः। 3ङीकायःपाय् दीन्का दीन् जेःगा दोःताक्ताङी दा। 4ओहाङःसै ङी लयः झाक्मालो मान्ताकः ल्हुङ् मल्ह्ओ स्याक्लेःआ ओउःत झ्यान्ते ङीइ रेव्तो हायःओकायः नाङ्कोः ल्हुङ् मल्ह्ओमा स्याक्तेःपाः। रेव्तो जाङ्ह्साकायः ताक्तेःचाःताङी’ त तोसाआः” त दाय्ह्ती येसुइ स्यान्तीलेः तोआथास। 5“लौ दोङ् याह्दीङ्हाङः नीङ् मान्ताकोः यात्चाक् लयःकोः क्वाकोः कीम्ताङ् जेःगा तेलाङ् आल्ती ‘अ क्वाय सुम्केरः लाङ् बयःची दा। 6यात्चाक् अरु क्वापाय् लोक्तो वाह्ती आल्ओहाङः ङाकोः कीम्ताङ् ल्होती दाह्ती वाङ्ओआः ङाकःहाङः दोह्मा नाःल’ त दाय्ह्ती तेतेःनाः त खेःया 7ओउः क्वापाय् ‘ग्याङल इताङ् वाङ्लाम् कीम् राक्आक्तीको ङा चोःकुस् एनःतीलेः मुनाङः। च्योक्ती बयःसा खाङ्ङल’ त दाय्ह्ती त्याङ्साकायः सु क्वा इतलेः त्याङ्चाः र। 8खेःल नाङ्पाय् ओउःकोः क्वातेः मुतेःनाः ह ओउःइ बयःउलु नाङ्इ आन युङ्तीलेः तेतेःनाः त झ्यान्ते ओउःइ लेती च्योक्ती बयःतेःनाः। 9नीङ्कोः क्वालम् इतलेः हायःनानी दोङ्सीलेः परमेस्वर्कः तेन ओहाङःसै ओउःइ बयःतेःनै। ओउःकोः कुराकायः बोङःनु ओहाङःसै नीङ् दोःतेःनै। ओउःकःताङ् धाङ्ती वाङ्न ओहाङःसै ओउःइ रोम्तेःनै। 10सुसुलो परमेस्वर्कः तेलेःनै ओउःकायःपाय् दोःलेःनाः सुसुइ बोङःचानी ओउःइपाय् च्यवःलेःनानी सुसु धाङ्चनै ओउःकायःपाय् रोम्ओलेः स्याव्नै। 11नाङ्कोः चोःपाय् नाङ्कः ङाःखे तेलेःनाः त खेःया सु आपाइमा ‘लौ नोह्अ इपाय् ङाः’ त दाय्ह्ती चोःकायः रुखे बयःचौ र। 12वाःकोः उम्खे तेतोक् बेलाहाङः सुइमा ‘लौ नोह्अ इपाय् उम्’ त दाय्ह्ती नेःकोस्खे बयःचौ र। खेःल नीङ्इ चोःलम्कायः पेतोलेः बयःतेःनानी बा। 13ओउःत झ्यान्ते नीङ् पेओ खेःमालोलम्खेइ लयःकोः चोःलम्कायः पेतो बयःसा चीःतेःनानी दोङ्सीलेः नीङ्कोः परमेस्वर् आपाखेइ ओउःकः तेओलम्कायः लयःकोः ग्वालामः बयःलेःनाःथास।”
14ओहाङःसैको यात्चाक् नोःसा चीःमालो मान्ताकायः येसुइ लान् ल्हेस्ती वाय्ओ खेःतो। लान् ल्हेस्ती वाय्आक्तीको ओउः मान्तापाय् नोःलेःआ। ओउः ङ्हा नोःसा चीःमालोपाय् नोःओ सायःती ओउःहाङः मुओ मान्तालम् आन ग्याङ्ह्आकाय्। 15कोय् मान्तालम्खे ग्याङ्ह्आकाय् अरुलम्खे “इ येसुकायः बाल्जीबुल् त तोओ लान्कोः राजाइ बास्आथै रैस ओउःत झ्यान्ते ओउःकोः ग्वम्इ येसुइ अरु लान्लम्कायः ल्हेस्ती वाय्सा खाय्नौ” त दाय्ह्ती लयःमयःकुस् नोःकाय्आकाय्। 16अरुखेइ “लौ नाङ्कायः परमेस्वर्इ बास्ओ त खेःया परमेस्वर्सै दोःओ ग्याङ्ह्राय्कोः चीन्ह जाङ्ह्ती छ्यानःताङी दा” त दाय्ह्ती येसुकायः ल्हुङ्तुक् योती तोथातो 17ओउःइपाय् ओउःमयःकोः ल्हुङ्तुक् चीःती “राजाकोः मान्तालम् लयःमयःकुस् काय्काय्ती मीन्ह्काय्ती मुचै त खेःया ओउः राजाखेकायः अरु राजाखे वाङ्आक्तीको रेन्ह्तोलेः क्लीमःसा खाय्नाःथै। ओउःपाय् वाय्तोलेः स्याव्नै। ओहाङःसै यात्ज्योः कीम्कोः मान्तालम्मा लयःमयःकुस् काय्काय्ती मीन्ह्काय्ती मुचै त खेःया ओउः कीम्कोः मान्तालम्पाय् मुह्इली। 18इलो लेखालेः ओउः लान्कोः राजापाय् लयःकोः लान्लम्कुस् काय्काय्ती ल्हेस्ताक्चौ त खेःया ओउःमा वाय्तोलेः स्याव्नाः। ङाखेकायःपाय् ‘लौ बाल्जीबुल् लान्कोः ग्वम् दोःतीलेः ओउःइ लान् ल्हेस्ताक्नौ’ त दाय्ह्ती नोःतेःनाङ्सतो 19नीङ्कुस् वाह्ओमयःइमा लान्कायः ल्हेस्ताक्नानी ओउःमयःखेइ सुखेलोकोः ग्वम् दोःती इत हायःसा खाय्नानी र। बाल्जीबुल्खेकोः ग्वम् दोःती ओउःमयःइ इत हायःनानी त खेःयाकायः ओउःमयःकायःमा जान्ती तोसा खेःतो। खेःल ओउःमयःइमा परमेस्वर्खेकोः ग्वम् दोःती लान् ल्हेस्ताक्सा खाय्नानी त खेःया ङाकायःमा जान्सा स्याव्आक्ल। 20-22नाःसुयः लात्ओ ब्राव्ओ मान्ताइपाय् लयःकोः कीम् ल्युङ्ह्ती योनौ त खेःया चोर्लम्पाय् सुइमा पोक्ती ओउःकोः माल्ताल्लम् लाती आलःसा खाय्नीली। खेःल अरु ओउः कीम्कोः मान्तासै छोङ्ह्तोलेः ब्राव्ओ मान्ता वाङ्आक्तीको ह ओउःकायः क्लीमःती ओउःकोः नाःसुयःलम् वाय्ती माल्ताल्लम् लाती आलःसा खाय्लेःनाःथै। इलो लेखालेः ङा परमेस्वर्कोः ग्वालामः दोःती लान्कोः राजाकायः क्लीमःती ओउःकोः लान्लम्कायः ल्हेस्ताक्ती वाय्सा खाय्लेःनाङः। ओहाङःसैको सैतान्कोः राजीखेपाय् क्लीमःओ त खेःया नीङ्कःताङ् परमेस्वर्कोः राजीखे दाह्ती वाङ्लेःनाः। 23सुसुखेलो ङाकुस् वाह्ल ओउःपाय् ङाकायः त्याःसा बोङःओ मान्ता लेःआः। सुसुइ ङाकायः लव्ह्सा काम् जाङ्ह्नीली ओउःइ जाङ्ह्ओ काम्पाय् लोल आह्रे लेःआः।
24यात्ज्योः लान्इपाय् मान्ताकायः फेनौ त खेःया ओउः लान्इपाय् याक्गार्सीःमालो थाव्लम्हाङः ब्याह्ती न्यास्सा थाव्कायः बोङःलाङ् वाह्लेःनाः। न्यास्सा थाव्कायः दोह्मा च्यवःल त खेःया ‘लौ ङा ङ्हा मुओहाङः पाय्ह्लेःनाङः’ त दाय्ह्ती म्हर्ती ओउः ङ्हा ङायःओ मान्ताकःताङ् पाय्ह्लेःनाः। 25पाय्ह्आक्तीको ओउः लान्कोः ङ्हा मुओहाङः पेतो हाःतो मुबाय्ओ त च्यवःती 26ओउः लान्इ सात्गोता न्हाङ्तोलेः रेव्ओ लान् वानःती ओउःमयः सबै ओउः मान्ताहाङः याक्ती मुनै। ओउःत झ्यान्ते ओउः मान्तापाय् ङ्हासै न्हाङ्तोलेः पेमालो स्याव्लेःनाः बा” त दाय्ह्ती येसुइ स्यान्तीलेः तोआथास। 27ओउःत तोतोक् बेलाहाङःपाय् यात्चाक् हुम्ओलम्कुस् मुओ मोमःचोः सोतो गोःती “लौ नाङ्कोः लयः ओत्ओ दुत्आमापाय् गुच्युक् पेलेःजेःनाः रैस” त दाय्ह्ती येसुकायः तोथातो 28“खेःल बा ङाकोः आमाकायः तोओसै परमेस्वर्कोः कुरा ङ्हाम्ती जाङ्ह्ती सायःओ मान्तालम्कायःपाय् न्हाङ्तोलेः ‘पेजेःनै’ त तोसा स्याव्नाः बा” त दाय्ह्ती येसु त्याङ्आ।
29ओहाङःसैको मान्तालम् न्हाङ्तोलेः हुम्ती वाङ्आकाय्। ओउःमयः हुम्ती वाङ्तोक् बेलाहाङः येसुइ ओउःमयःकायः तोती “लौ तेन्छ्याङ्कोः मान्तालम् आन पेमालोमा ङ्हाम्मालो मुनै। ङाकायःपाय् ‘परमेस्वर्कःसै वाङ्ओआः’ त छ्यानःसाकायः ग्याङ्ह्राय् बोङःनानी ओउःत छ्यान्ह्ओ ग्याङ्ह्राय्लेः ओउःमयःकायः दोःइली इ याज्याङ् ग्याङ्ह्राय् ह ओउःमयःइ च्यवःसालेः दोःनै। 30उय्ह्लेकोः योनाह् त तोओपाय् ताङ्ह्ओ ङाःकोः तुक्हाङःलेः पोक्ती सुम् दीन् मुआक्तीको सेलः मुओ खेःतो ओउःलो लेखालेः ओउः मान्ताकोः चोः त तोओमा साःहाङः पाम्ह्आक्तीको उह्ती च्योक्लेःनाः। इ ग्याङ्ह्राय् ह ङ्हाम्ताक्साकायः बयःलेःनाः। 31-32योनाह्खेइ जान्ती तोओ कुरा सायःआक्तीको नीनेवे त तोओ सहर्कोः मान्तालम्इ ल्हुङ् द्यान्ह्ती रेव्ओ काम् जाङ्ह्ओ फेनीतो ओउः मान्ताकोः चोःखेपाय् योनाह्सै ताङ्ह्तो लेःआः ओउःइ तोओ कुरापाय् नीङ्इ सायःतेःनीली ओउःत झ्यान्ते परमेस्वर्इ तय्छनःती योसा दीन् ओउः नीनेवेकोः मान्तालम्इ नीङ्कायः गाल्तुम्तीलेः नोःतेःनै बा। फेरी उय्ह्लेकोः सुलेमान् राजाकोः व्हाय्ती नोःओ कुरा सायःसाकायः ओउः दक्सीन्हाङः मुओ सेबा देस्कोः रानी आन लोक्तोसै वाङ्आ। ओउः मान्ताकोः चोःपाय् सुलेमान् राजासै व्हाय्तोलेः नोःनाः ओउःत झ्यान्ते ओउः तय्छनःती योसा दीन्हाङः ओउः सेबाकोः रानीइ नीङ्कायः गाल्तुम्तीलेः नोःतेःनै” त दाय्ह्ती येसुइ तोआथास।
33“बत्ती हवःआक्तीको सुइमा पाथीइ कोमःती खुप्ती गम्नीली खेःल यास्ओ ओखोय्ह्हाङः गम्नानी ओहाङःसैको कीम्हाङः पोक्ओलम्इ च्यवःसा खाय्नानी। 34फेरी नीङ्कोः ल्हुङ्कायः थोङ्ताक्ओपाय् मीक् लेःआः बा। नीङ्कोः मीक् धेस्लेःनाः त खेःया नीङ्कोः ल्हुङ् थोङ्तोलेः स्याव्नाः। नीङ्कोः मीक् धेस्ल त खेःया नीङ्कोः ल्हुङ् पेमालो च्याक्तोलेः स्याव्नाः। 35ओउःत झ्यान्ते नीङ्कोः ल्हुङ्पाय् पेतो थोङ्तो स्याव्पाः 36ओहाङः पेमालो च्याक्ओपाय् दोह्मा मुताक्लाम्। ओहाङःसैको नीङ्कोः आङ्मा ल्हुङ्मा पेतो ओजायःत स्याव्लेःनाः” त दाय्ह्ती येसुइ स्यान्ती तोआथासा।
37ओहाङःसैको ओउःत तोआक्तीको यात्चाक् फरीसी मान्ताइ येसुकायः लयःकोः कीम्ताङ् जेःगा जेःसाकायः गोत्आथास। गोत्आक्तीको येसुपाय् ओउःकोः कीम्ताङ् पोक्ती ओहाङः च्युङःती जेःती मुओ खेःतो। 38जेःतोक् बेलाहाङःपाय् येसुइ क्रुत्कायः जेस्आक्मामाःत आम्ह् जेःओ च्यवःती ओउः फरीसीपाय् आन ग्याङ्ह्ओ खेःतो। 39येसुइ एत चीःती “लौ नीङ् फरीसीलम्पाय् बाहीरहाङः ह थुत्ओ भान्दालो लेखालेः नीङ्पाय् आङ् बाहीरहाङः जेस्ओलेः मुतेःनै भीत्रहाङः नीङ्कोः ल्हुङ्पाय् जुगाङ् पेमालो लओ ल्हुङ् मुलेःनाः। 40नीङ्इपाय् चीःतेःनीली रैस। नीङ्कोः बाहीरकोः आङ् जाङ्ह्ओपाय् परमेस्वर् लेःआः ओउःइपाय् नीङ्कोः भीत्रहाङः मुओ ल्हुङ्मा जाङ्ह्आकान् माःर। 41नीङ् ल्हुङ् साय्क्ओलेः स्याव्ती दोह्मा नाःमालो मान्तालम्कायः जेःगालम् बयःनु दा। ओहाङःसै बयःआक्तीको नीङ्कोः भीत्रकोः ल्हुङ्मा पेतो ओजायःतलेः स्याव्नाः। 42लौ नीङ् फरीसीलम्य लोने नीङ् न्युम्ह्तोतेः स्याव्तेःनै। मोसाइ तोओलो लेखालेः नीङ्इ जरामरीत्कोः खाल्लम् ददस् मानाकोः याःआः देम्ह् माना परमेस्वर्कायः वेःती बयःसा जवतेःनानी अरु मान्तालम्कायः काम् पेतो जाङ्ह्तेःनीली परमेस्वर्कायः नीङ्इ राप्तेःनीली। ओउः जवती बयःओ फेमामाःत अरुकायः काम् पेतो जाङ्ह्नु परमेस्वर्कायः पेतो राप्नु दा। 43लौ नीङ् फरीसीलम्य लोने नीङ् न्युम्ह्तोतेः स्याव्तेःनै दोह् हायःती दाय्ह्सा लयःकोः नेह्रो ओर्ताक्साकायः थनःओ कीम्कोः मुल् खातीहाङः च्युङःसामा झाक्तेःनै बजार्हाङः आन नमस्ते त्याक्लाङ् वाह्सामा झाक्तेःनै। 44अरु मान्तालम्इ नीङ्कायः ‘पेओआः’ त तोसा झाक्तेःइतो एतलेः तोसापाय् तोनानी ओउःमयःइ चीःमाःत नीङ् भीत्रहाङः ल्हुङ् पेमालो मुतेःनै” त दाय्ह्ती येसुइ तोआथास।
45ओउःत तोओ सायःआक्तीको यात्चाक् धर्मा स्यान्ओमयः मान्ता चीङ्ती “अ गुरुय एत तोतीलेः नाङ्इ ङीकायःमा जान्तेःआताङी” त दाय्ह्ती येसुकायः तोआथै। 46“लौ नीङ् धर्मा स्यान्ओमयः त तोओलम्य लोने नीङ्मा न्युम्ह्तोतेः स्याव्तेःनै दोह् हायःती दाय्ह्सा मान्तालम्कायः ‘लौ इमा जवसा खेःनाः ओउःमा जवसा खेःनाः’ त दाय्ह्ती ओउःमयःकायः आन लीःओ काम्लम् जाङ्ह्ताक्तेःनानी ओउःमयःकायः लव्ह्साकायः जुगाङ् ग्यातेःइली। 47नीङ्कोः आय्कानः तोकानःलम्इ परमेस्वर्कोः कुरा छ्यानःओमयःकायः सात्आकानी ओउःमयःइ सात्ओ मान्ताकोः तेस्लम्पाय् नीङ्इमा पेतो देती जाङ्ह्तेःनानी। 48एत हायःतीलेः परमेस्वर्कोः मान्तालम्कायः सात्ओ कुरा नीङ्मा ग्यातेःनै त छ्यानःओ लेःआः। 49इ कुरा चीःती परमेस्वर्पाय् ङ्हाहाङःलेः ‘लौ ङाकोः कुरा छ्यानःओ मान्तालम्कायःमा ङाइ छ्युङ्ह्ओ मान्तालम्कायःमा ल्होक्ङोतो यात्नीस्कायःलेः ओउःमयःइ सात्नानी अरुलम्कायः आन लीह्सीःओ बयःनानी’ त दाय्ह्ती परमेस्वर् दाय्ह्आ। 50-51ङ्हा हाबेल्कायः सात्ओहाङःसै लोन्ते परमेस्वर्कोः मन्दीर्हाङः सात्ओ जखरीयाकोः बेलाहाङःच्युक्कायः परमेस्वर्कोः मान्तालम् आन सात्आकानी। नीङ् तेन्छ्याङ्कोः मान्तालम्इमा ओउःमयःकोः पेमालो काम्लम् तेःती झ्यान्ते न्युम्ह्तोलेः स्याव्तेःनै। माःहै तेन्छ्याङ्कोः मान्तालम् लोन्ते आन न्युम्ह्तोलेः स्याव्नै। 52नीङ् धर्मा स्यान्ओमयःय नीङ्मा न्युम्ह्तोलेः स्याव्तेःनै दोह् हायःती दाय्ह्सा नीङ्इ परमेस्वर्कोः कुरा चीःतेःनीतो अरुलम्कायः नीङ्इ पेतोलेः स्यान्तेःनीली। परमेस्वर्कोः काम् नीङ्इ लयः जाङ्ह्तेःनीली अरुलम्इ जाङ्ह्सा नीङ्इ ताक्तेःनीली” त दाय्ह्ती येसुइ तोआथास। 53ओउःत तोआक्तीको येसु ओउः थाव्सै आल्आकाय्। येसु आल्आक्तीको ओउः फरीसीलम्मा धर्मा स्यान्ओमयःमा ल्हुङ् मल्ह्तो स्याव्ती येसुकुस् आन तानःकाय्ती नोःकाय्आकाय्। 54“लौ येसुकायः गाल्तुम्ती तोसा कुरा दोःनाःतय्ही यादो” त दाय्ह्ती ओउःकायः आन चाक्तोलेः व्हत्आथै।
Currently Selected:
लुका 11: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
