लुका 12
12
1ओउःतोक् बेलाहाङः नाःतो मान्तालम् हुम्ती झ्यान्ते न्हेङःकाय्तो लमःकाय्तो खेःइतो। ओउःमयः इत हुम्तोक् बेलाहाङः येसुइ लयःकुस् वाह्ओमयःकायः स्यान्ती तोआथास। “लौ नीङ्पाय् धय्तीलेः योसा खेःतेःइतो। फरीसीलम्कोः माःती स्यान्ओ कुरा सायःलाम्। 2फेरी दोह् दोह्लो तेन्छ्याङ् नुस्ती मुलेःनाः लोनेः सबैकायः छ्यानःतोलेः स्याव्नाः। दोह् दोह् कुरापाय् मान्तालम्कायः द्याह् छ्यान्ह्माःत मुलेःनाः लोनेः सबैकायः चीःतोलेः स्याव्नाः। 3दोह् दोह् कुरालो नीङ्इ च्याक्ओहाङः नोःतेःआकाय् ओउः कुरालेः लोनेः थोङ्ओहाङः सबै सायःसा दोःनै। दोह् दोह् कुरालोतेः लयःकोः कीम् मुतोक्हाङः छाङ्ह्तीलेः नोःकाय्तेःआकाय् ओउः कुरालेः लोनेः सबैकायः थोल्ह्ती छ्यान्ह्ओलेः स्याव्नाः।
4लौ साथीलम् नीङ्कोः आङ्कायः ह ह्र्योङःती वाय्सा खाय्ओ मान्तालम्कः रैतेःचनै ओउःमयःखेइ नीङ्कोः रुआङ्कायः ह्र्योङःती वाय्सा खाय्नीली। 5ओउःमयःकः रैतेःचनै ओउः गोबाङ्हाङः आङ्मा रुआङ्मा ब्रक्तलेः वाय्सा खाय्ओ परमेस्वर्कः रैन। माः है ओउःकः रैसा खेःतो बा। 6दोङ्सीलेः पोङाज्योः चोःवाःपाय् नीस् रुपीयाहाङः लेःसा दोःलेःनाः माःर। ओउःच्युक् मोल् नाःमालो वाःखेपाय् परमेस्वर्इ स्यास्ती झ्यान्ते ओउःइ आःताः चीःमाःत याज्याङ्मा वाय्ल बा। 7नीङ्खेकायः याज्याङ् म्याङ्ला मीह्आ त खेःयाकायः परमेस्वर्इपाय् चीःलेःनौ ओउःत झ्यान्ते नीङ् वाःसै परमेस्वर् आन राप्ती स्यास्ओ मान्तालम्पाय् जुगाङ् रैसा परतेःइली।
8सुसुखेइ अरु मान्तालम्कःताङ् ‘ङापाय् ख्रीस्कोः मान्ता लेःआः ङ’ त दाय्ह्ती सबैकायः फुतीलेः तोनानी ओउःकायःलेः ‘लौ इपाय् ङाकोः लेःआः बा’ त दाय्ह्ती ङा मान्ताकोः चोः त तोओइलेः परमेस्वर्कोः लाङ्कासै ल्होक्ओमयःकोः मीक्हाङः छ्यानःती तोलेःनाङः। 9सुसुखेइ मान्तालम्कःताङ् ‘ङापाय् ख्रीस्कोः खेःङल’ त दाय्ह्ती सबैकायः तोचानी ओउःकायःलेः ‘लौ इपाय् ङाकोः मान्ता खेःबाय्ल’ त दाय्ह्ती परमेस्वर्कोः ल्होक्ओमयःकायः तोलेःनाङः बा। 10सुसुखे ओउः मान्ताकोः चोः त तोओकायः रेव्तोलेः नोःनै ओउःकोः रेव्तो हायःझ्याङ्कोः क्युम्ह्सा दोःलेःनाः सुसुखे परमेस्वर्कोः ग्वालामःकायः रेव्तोलेः नोःचै ओउःकोः रेव्तो हायःझ्याङ्कोःपाय् क्युम्ह्सा दोःल। 11ओहाङःसैको ङाकायः ङ्हाम्ओत झ्यान्ते नीङ्कायः अरुलम्इ थनःओ कीम्ताङ् लात्ती आलःती ताङ्ह्ओ मान्तालम्कःताङ्मा हाकीम्लम्कःताङ्मा वानःतेःचै। वानःतोक् बेलाहाङः ‘दोह्त नोःसा गत त्याङ्सा’ त ल्हुङ्हाङः रुःतेःचै 12दोह् हायःती दाय्ह्सा ओउः बेलाहाङःपाय् परमेस्वर्कोः ग्वालामःइ पेतो नोःसा त्याङ्सा कुरा नीङ्कायः स्यान्तेःनै ओउःत झ्यान्ते नीङ् रुःसा परतेःइली” त दाय्ह्ती येसुइ तोआकान्।
13ओहाङःसैको हुम्ओ मान्तालम्कःहाङः यात्चाक् येसुकःताङ् वाङ्ती “लौ गुरुय ङीकोः सीओ आपाकोः माल्ताल्लम् राङ्लम् ङाकोः पुःकायः ङाकुस् पेतो वेताक्उ दा” त दाय्ह्ती येसुकायः तोथातो 14“खेःल इ कुरा तात्साकायः ङाकायः बयःओ काम्पाय् खेःल बा” त दाय्ह्ती येसु त्याङ्आ। 15ओहाङःसैको येसुइ सबैकायः स्यान्ती “लौ धय्ती मुन दा। अरुकोः थोक्लम्कायः ल्हुङ्हाङः लतेःचनै। पैसालम् माल्ताल्लम् राङ्लम् नाःतो क्युधार्नालेः दोङ् पेओ जीङःपाय् दोःताक्उलु” त दाय्ह्ती येसुइ तोआथास। 16ओहाङःसैको ओउःइ यात्ज्योः वीनःराय् स्यान्साकायः ताआकान् “लौ यात्चाक् आन साहु मान्ता खेःतो। ओउःकोः राङ्लम्सै ओउःइ नाःतो चुय्लम् सायःलम् दोह्लम् हुम्ह्ती वानःआकान्। 17चुय्लम् सायःलम् हुम्ह्ती वानःतोक्हाङः ‘लौ ङाइ दोह् हायःचाङः ङाइ दोह् हायःचाङः। इ चुय्लम् सायःलम् गाःताङ् हेप्चाङः। हेप्ती गम्सा थाव्पाय् नाःल बा’ त दाय्ह्ती ओउः मान्ता म्हर्ती 18‘लौ इत हायःचाङः रैस। इ कीम्पाय् ङाइ य्हास्ती ताङ्ह्तोलेः जाङ्ह्नाङः। ओहाङःसैको ओउःहाङः ङाकोः चुय्लम् सायःलम् माल्ताल्लम् य्होक्ती गम्सा खाय्लेःनाङः। 19ताङ्ह्ओ कीम् जाङ्ह्आक्तीको सबै हेप्ती गम्ओहाङःसैकोः “लौ इ हेप्ती गम्ओ चीस्पाय् नाःतो साल्कायः गाह्नाः। काम् जाङ्ह्ओसै धोती खाले जेःती तुङ्ती बाय्तीलेः मुसा खाय्नाङः” त दाय्ह्ती तोनाङः बा’ त दाय्ह्ती ओउः मान्ता ताःसतो 20‘लौ नाङ् जुगाङ् चीःमालो मान्तातेःआः बा। द्याह्मयःलेः नाङ्कोः जीङःपाय् द्योक्लेःनाः। जीङः द्योक्ती सीआक्तीको नाङ्इ सेती गम्ओ थोक्लम्पाय् अरुलेः दोःनै बा’ त दाय्ह्ती परमेस्वर्इ ओउः साहु मान्ताकायः तोआथै। 21सुसुइ परमेस्वर्कोः पेओ कुरा गम्माःत लयःकायः ह कीम्कोः थोक्लम् सेती गम्चानी ओउः मान्तापाय् ओउः सीती वाय्ओ साहुलो लेखा चीःमालो मुलेःनै” त दाय्ह्ती येसुइ तोआथास।
22“लौ स्याङ्ह्लोकायः ‘लौ दोह् जेःचाङः दोह् नाय्लम् लावचाङःस’ त दाय्ह्ती ल्हुङ् रुःतेःचनै। 23जेःगासै नीङ्कोः जीङः ताङ्ह्ओ लेःआः नाय्लम्सै नीङ्कोः आङ् ताङ्ह्तोलेः मुनाः माःर। 24लौ कावाःलम्कायः योनु दा। ओउःमयःइपाय् दोह्मा सुक्नीली दोह्मा राःती त्युम्ह्नीली ओउःमयःकोः थोक्लम् हेप्सा थाव् नाःल। ओउःतलेः मुइतो ओउःमयःकायः परमेस्वर्इ पेतोलेः स्यास्नौ बा। दोङ्सीलेः वाःसै नीङ्खेपाय् ताङ्ह्तोलेः खेःतेःनै माःर। 25नीङ्कःगन सुइमा ल्हुङ्हाङः म्हर्ती लयःकोः आङ्कायः यात् क्रुच्युक्कायः च्योन्ह्ताक्सा खाय्तेःनीली। 26इत मीओ काम्पाय् नीङ्इ जाङ्ह्सा खाय्तेःनीली त खेःया नीङ् ल्हुङ् र्याङःती मुधार्नालेः काम्पाय् दोह्मा लोल आह्रे लेःआः बा। 27जङ्गल्हाङः मुओ रोलम्मा योनु दा। ओउःमयःपाय् लयःलेः दुङ्नाः दुङ्आक्तीको काम् जाङ्ह्मामाःत नाय् क्याह्मामाःत लयःलेः पेतो ओर्नाः। इ रोलम्पाय् लयः ओर्सापाय् ओर्लेःनै दोङ्सीलेः इ रोच्युक्मा ओउः आन मुह्ओ सुलेमान् राजाकोः नाय्लम् योसा पेआक्ल बा। 28यात् दीन्च्युक्कायः ओर्ओ यात् दीन्हाङः झ्योम्ह्ती वाय्ओ रोखेकायः परमेस्वर्इ आन पेतोलेः लावताक्नौ त खेःया दोङ्सीलेः ओउःइ नीङ् मान्तालम्खेकायः न्हाङ्तोलेः लावताक्मातेःनै बयःमातेःनै बा। नीङ्पाय् ङ्हाम्चोःचाक्लेःतेः इ। 29लौ उया जेःगा तुङ्गा दोःसाकायः ल्हुङ् र्याङःतेःचनै। 30इ थोक्लम्कायः सबै ल्हाव्ह्दैबाङ्कोः मान्तालम्खेइ ल्हुङ् रुःतीलेः बोङःनानी इत खेःओ थोक्लम्कायः नीङ्खे ल्हुङ् रुःसा परतेःइली नीङ्कायःमा चाहनाः त नीङ्कोः परमेस्वर् आपाइ चीःलेःनौ। 31अरु दोह्कायःमा रुःमाःत परमेस्वर्कोः काम् जाङ्ह्ती ओउःकोः राजी पोक्सा बोङःनु दा ओहाङःसैको इ अरु थोक्लम्पाय् लोने नीङ् सबै दोःतेःनै। 32लौ ङाइ स्यालःओ मान्तालम्य ओउःकोः राजीकोः पेओ थोक्लम्पाय् परमेस्वर् आपाइ बयःसा आन झाक्लेःनाः। 33नीङ्कोः ल्हाव्ह्दैबाङ्कोः थोक्लम् माल्ताल्लम् वीनःती ओउःकोः मोल्कोः पैसालम् नाःतो नाःमालो मान्तालम्कायः बयःनु दा। ओउःत हायःतीलेः नीङ्कायः लाङ्काहाङः परमेस्वर्इ लोनेः न्हाङ्तोलेः नाःतो बयःतेःनै बा। ओहाङःसै ओउःहाङःकोः थोक्लम्पाय् गलमा ह्र्योल गलमा मीह्ल। ओहाङःपाय् सुमा कुःलाङ् वाङ्इली घुन्इमा दोह्इमा माक्ती वाय्उलु। 34गाःहाङःलो नीङ्कोः माल् सामान् मुचै ओउःहाङःलेः नीङ्इमा ल्हुङ् झाह्ती छ्युप्तेःनौ।
35-36लौ घीःती मुन दा कमा वानःओ दीन्हाङः ओउः कमा त्याक्सा थेङा भाव्कोः कीम्हाङःपाय् ओउःकोः मान्तालम् आन चन्तायःती मुसा खेःतो ओहाङःसैको भाव् वाङ्ओ बेलाहाङः ओउःकायः पेतो रोम्सा खाय्नानी। ओउःलो लेखालेः नीङ्कोः प्रभु वाङ्सा बेलाहाङःकायः ओउःकायः त्याक्सा थेङा नीङ्मा चीङ्ती र्ययःती मुन। 37सुसु मान्तालम् प्रभु वाङ्तोक्हाङःपाय् चीङ्ती र्ययःती मुलेःनै ओउःमयःलेः चोङाय्तो स्याव्लेःनै। दोङ्सी दाय्ह्भनाङ् ओउः मान्तालम्कायः ओउः प्रभुइ लयःलेः चीङ्ती जेःगा जेःसाकायः दोल्कावःआथास। 38ओउः प्रभुपाय् सारो एनःच्युक् बेलाहाङः दाह्नाःया दोङ् याह्दीङ्हाङः दाह्नाःया दाह्तोक्हाङः ओउःकोः काम् जाङ्ह्ओलम् एनःमाःत चीङ्तीलेः मुनै त खेःया ओउः मान्तालम् चोङाय्तोलेः स्याव्नै। 39फेरी चोर्लम् गुच्युक् बेलाहाङः वाङ्नै त कीम्कोः मान्ताइ चीःनीली। चीःसा दोःनाः त खेःया ओउः कीम्कोः मान्तापाय् ल्युङ्ह्ती मुती झ्यान्ते चोर्लम्कायः पोक्सा दोःताक्उलु इत नीङ्इ चीःतेःनानी। 40ओउः कीम्कोः आपालो लेखालेः नीङ्मा ल्युङ्ह्ती मुसा खेःतेःइतो दोह् कायःती दाय्ह्सा ङा ओउः मान्ताकोः चोः त तोओपाय् नीङ्इ ताःमालो बेलाहाङः वाङ्लेःनाङः” त दाय्ह्ती येसुइ लयःकुस् वाह्ओमयः स्यान्ती तोआथास।
41इत तोआक्तीको “लौ प्रभुय इ नाङ्इ स्यान्ओ कुरा सुकायःलो तोओलेः ङीकायःया सबै मान्तालम्कायःया” त दाय्ह्ती पत्रुस्इ व्हत्आथै। 42“पेओ काम् जाङ्ह्सा नोकरी सु मान्तालो खेःनाः। ओउःइ दोह् हायःनौ दाय्ह्सा। ओउः नोकरीकायः ओउःकोः मालीक्इ सबै कीम्कोः नोकरी योसा काम्कायःमा जेःगा ज्याला बोसा काम्कायःमा ग्वम् बयःलेःनौ। 43ओहाङःसैको ओउः मालीक्पाय् लोक्तो आल्आक्तीको लोने द्यान्ह्ती पाय्ह्तोक्हाङः ओउः नोकरी काम् पेतो जाङ्ह्धै मुओ च्यवःनौ त खेःया ओउः नोकरीकः मालीक्पाय् आन झाक्ती म्रोनाः त झ्यान्ते 44दोङ्सीलेः ओउः नोकरीकायः मालीक्इ लयःकोः कीम्कोः सबै माल्ताल्लम् योसाकायः जुगाङ् ल्हीनःतीलेः बयःनाःथै। 45ओउःत पेतो हायःओ खेःल त खेःया ओउः नोकरीपाय् ल्हुङ् पेमालो स्याव्ती ‘लौ ङाकोः मालीक्पाय् रेन्ह्तोलेः पाय्ह्ल बा’ त म्हर्ती मालीक्कोः थोक्लम् जेःती तुङ्ती ङोतीलेः अरु नोकरीलम्कायः घान्नौ त खेःया 46ओउः नोकरीइ तय्ह्सा चीःमालो बेलाहाङःपाय् ओउःकोः मालीक् पाय्ह्ती दाह्ती लयःकोः नोकरीइ पेमालो काम् जाङ्ह्धै मुओ च्यवःनौ। एत च्यवःती झ्यान्ते ओउः नोकरीकायः आन जोक्तोलेः न्युम्ह्ताक्ती अरु काम् जाङ्ह्सा ग्यामालोलम्कुस् मुसा ल्होक्नाःथै। 47सुसु नोकरीखेइ काम् जाङ्ह्सा चीःउतो बुरु ओउः काम् पेतो जाङ्ह्नीली ओउःकायःलेः मालीक्इ जोक्तोलेः न्युम्ह्ताक्नाःथास 48सुसुखेइ काम् जाङ्ह्सा चीःमाःत ओउः काम् पेतो जाङ्ह्नीली ओउःकायःलेः मालीक्इ बल बल ह न्युम्ह्ताक्नाःथै। सुसुइ आनलेः चीःनानी ओउःइपाय् आन पेतो जाङ्ह्सा खेःतो। सुसुकायः ग्वम्पाय् आन बयःओ लेःआः ओउःइपाय् आनलेः जाङ्ह्सा खेःतो बा।
49ङापाय् ल्हाव्ह्दैबाङ्हाङः म्हेः ल्होक्लाङ् वाङ्आलाङः ओउः म्हेःपाय् तय्क्ओलेः मुपाः त आन झाक्तोलेः म्हर्नाङः। 50ङाइ आन लीह्सीःओ च्यवःसा बाप्तीस्मा त्याक्सालेः खेःनाङः ओउः त्याक्धाङ्माखाहाङः ङा ल्हुङ्हाङः आन लीह्ती मुनाङः। 51ङा ल्हाव्ह्दैबाङ्हाङः मान्तालम्कायःपाय् काय्काय्ओमा मीन्ह्काय्ओमा फेताक्लाङ् वाङ्ओ ततेः ताःतेःचानी। खेःल ओउःमयः न्हाङ्तोलेः काय्काय्मानै मीन्ह्काय्मानै। ङाकोः कुरा सायःआक्तीको मान्तालम् वेङ्काय्नै कोय् मान्तालम्खेइ ङ्हाम्नानी कोय्खे ङ्हाम्नीली। 52यात्ज्योः कीम्हाङः पोङाज्योः मान्तालम् मुनै त खेःया नीस्चाक्खे ङ्हाम्नीतो सुम्चाक्खे ङ्हाम्नीली अरु कीम्हाङः सुम्चाक्खेइ ङ्हाम्नीतो नीस्चाक्खेइ ङ्हाम्नीली ओउःत झ्यान्ते ओउःमयः प्र्याक्ती काय्काय्लेःनै। 53नीस् आपाचाःमा आमाचाःमा आय्चाःमा लयःमयःकुस् काय्काय्ओलेः स्याव्आनाः” त दाय्ह्ती येसुइ तोआथास।
54ओहाङःसैको हुम्ओ मान्तालम्कायःमा “लौ गोत्सीबाङ्हाङः मुस् लन्ह्नाः त खेःया नीङ्पाय् ‘लौ तेन्पाय् गाय्ध वाङ्नाः’ त दाय्ह्ती नोःतेःनै। 55फेरी ब्लक्न्याम्सै मारुः वाङ्नाः त खेःया ‘लौ तेन्पाय् न्याम् राव्लेःनाः’ त दाय्ह्तीमा नोःतेःनै ओहाङःसैको नीङ् इत नोःओ कुरापाय् ताप्लेःनाः। 56नीङ्पाय् ओउःतलेः मुस् न्याम्कोः कुरा तय्ह्सा खाय्तेःनानी त खेःया दोह् हायःतीतेः तेन्छ्याङ् स्याव्ओ परमेस्वर्कोः राजी वाङ्सा खेःओ कुरातेः तय्ह्तेःनीली। 57‘इत हायःसा पेलेःनाः ओउःत हायःसा पेल’ त तय्ह्ती चीःसालेः खाय्सापाय् खाय्तेःनानी रैस ओउः नीङ्इ चीःओ कुरा जाङ्ह्सातेः ग्याइली। 58सुलाङःइ नाङ्कायः मुत्ध जाङ्ह्सा बोङःतेःनाः त खेःया मुत्ध जाङ्ह्धाङ्माखाहाङः ओउःकःताङ् ब्राङ्काय्ती होम्लाङ् आल्न ओहाङःसैको ओउःइ मुत्ध जाङ्ह्साकायः फेलेःनौ। ओउःकुस् नाङ् ब्राङ्काय्तेःचल त खेःया ओउःइ नाङ्कायः अदालात्ताङ् लात्ती आलःआक्तीको ओउःहाङःकोः ताङ्ह्ओ मान्ताइ नाङ्कायः हवल्दार्कःताङ् ल्हाती झ्याल्खानहाङः थुनताक्तेःनाः। 59ओहाङःसैको दन्दकोः पैसा सबै पाय्क्धाङ्माखाहाङः नाङ् ओहाङःलेः थुनती मुसा खेःतो बा। एतलेः परमेस्वर्कुस् ब्राङ्काय्न नीङ् ओउःकुस् ब्राङ्काय्तेःइली त खेःया न्युम्ह्तोलेः मुधाङ्तेःनै” त दाय्ह्ती येसुइ गानाक्तीलेः तोआथास।
Currently Selected:
लुका 12: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
