लुका 13
13
1ओउःतोक् बेलाहाङः मान्तालम् येसुकःताङ् वाङ्ती “लौ यात्नीस्चाक् गालीलकोः मान्तालम्इ परमेस्वर्कायः स्याः मेत्छ्याः ल्हाती बयःतोक्हाङः पीलातस् त तोओ अन्चलादीस्इ ओउःमयःकायः पाल्ती सात्ती ओउःमयःकोः वयः ओउः ल्हाओ स्याःकोः वयःकुस् ल्याव्ह्ताक्आकान्” त दाय्ह्ती ल्हाक्ती तोथातो 2“ओउः गालीलकोः मान्तालम्पाय् अरु गालीलकोः मान्तालम्सै रेव्तो हायःओ खेःइतो त झ्यान्ते ओउःमयः इतलेः सात्ओ खेःइतो ततेः ताःतेःचनै। 3खेःल लःलयःकोः रेव्तो काम्लम् फेती परमेस्वर्कोः पेओ कुरा नीङ्इ ङ्हाम्मादीक् नीङ्मा ओउः गालीलकोः मान्तालम्लो लेखालेः वाय्तोलेः स्याव्तेःनै बा। 4ओहाङःसै सीलोम् त तोओहाङः धराहारइ ओल्ती अथारजनकायः क्रामःती सात्तोक्हाङः ओउः अथारजनपाय् अरु यरुसालेम्हाङः मुओ मान्तालम्सै रेव्तो हायःओ खेःइतो तमा ताःतेःनैया। 5खेःल लःलयःकोः रेव्तो हायःओ फेती नीङ्इ परमेस्वर्कोः पेओ कुरा ङ्हाम्मादीक् नीङ्मा ओउःमयःलो लेखालेः वाय्तो स्याव्तेःनै बा”।
6ओहाङःसैको येसुइ फेरी वीनःराय् ताती स्यान्आथास “लयःकोः राङ्हाङः यात्चाक्इ दुम्बुरी सीङः सुक्आकान्। सुक्आक्तीको ओउः सीङः ताङ्ह्तो स्याव्आक्तीको ओउः मान्तापाय् ‘लौ तेन्पाय् सायः काव्ह्सा’ दाय्ह्ती राङ्कःताङ् सायः काव्ह्लाङ् आल्तो ओउः दुम्बुरी सीङःहाङः सायःपाय् दोह्मा च्यवःल। 7सीङःहाङःपाय् सायः नाःमाःत झ्यान्ते ओउःकोः काम् जाङ्ह्ओ मान्ताकायः गोत्ती ‘लौ इ सीङःकोः सायः ङाइ सुम् बर्स स्याव्ओ बोङःङोतो सायःपाय् दोह्मा च्यवःङल ओउःत झ्यान्ते इ सीङःपाय् खाम्ह्ती ओल्उ। आह्रेलेः राङ्कायः ग्रानःती वाय्ओ ह’ त दाय्ह्ती ओउः राङ्कोः धनी तोआकान्। 8‘खेःल न्याम्पुःच्युक्कायः मुआक्पाः। सीङःकोः तुङःहाङः ङाइ द्यावःती मल् काचाङः 9ओहाङःसैको योनी। पेतो सायःनौ त खेःया इ सीङःपाय् जुगाङ् मुपाः खेःल सायःल त खेःया वाय्सा लेःआः’ त दाय्ह्ती ओउः काम् जाङ्ह्ओ मान्ता त्याङ्तीलेः तोनौ” त दाय्ह्ती येसुइ स्यान्ती तोआथास।
10ओहाङःसैको सन्चर्बार्कोः धोओ दीन्हाङः येसुइ थनःओ कीम्हाङः आल्ती पोक्ती ओउःहाङः हुम्ती मुओ मान्तालम्कायः स्यान्ओ खेःतो। 11ओउःहाङः स्यान्तोक्हाङः यात्चाक् अथार बर्स जीक्ती स्याव्ओ मोमःचोः खेःतो। ओउः मोमःचोःपाय् गीङ् गोङःतो स्याव्ती झ्यान्ते चीङ्सा खाय्उलु। 12ओहाङःसैको ओउः मोमःचोःकायः च्यवःआक्तीको येसु ओउःकायः गोःती “लौ दीदी नाङ्कोः आङ्हाङः जीक्ओ द्याह् स्याक्आ” त दाय्ह्ती येसुइ तोआथै। 13इत तोतोक्हाङः येसुइ ओउः जीक्ओ मोमःचोःकायः क्रुत्इ झाम्ह्ती कुस्ब्रक्त ओउःकोः गीङ् धेङ्तो चीङ्ती स्याव्माआ। इत गीङ् धेङ्तो स्याव्आक्तीको ओउः मोमःचोःखेइ आन चोङाय्तीलेः परमेस्वर्कायः ताङ्ह्ताक्ती लुङ्ती तोआकान्। 14ओउः थनःओ कीम्कोः ताङ्ह्ओ मान्ताखे “धोओ दीन्हाङः मान्ताकायः इत स्याक्ताक्सा स्याव्ल” त म्हर्ती ल्हुङ् मल्ह्तो स्याव्आ। “ङीकायः यात् सातहाङः छगोता काम् जाङ्ह्सा स्याव्ओ दीन्लम् मुलेःनाः। ओउः दीन्लम्हाङः स्याक्ताक्साकायः काःहाल्लाङ् वाङ्न। इ धोओ दीन्हाङः काःहाल्लाङ् वाङ्लाम्” त दाय्ह्ती सबै हुम्ओलम्कायः ओउः ताङ्ह्ओ मान्ताइ जान्ती तोआथास। 15इत जान्ती तोओ सायःती “खेःल नीङ् ले ब्रेह्ती नोःओलम् धोओ दीन्हाङः स्याःलम् गोरुलम् नीङ्इ फान्ती तीः तुङ्लाङ् ल्होक्तेःनानी माःर। 16इ आब्राहाम्कोः मोमःदानेकायःपाय् सैतान्इ अथार बर्सकायः पानःओलो लेखा गोङःती जीक्ताक्ती झ्यान्ते न्हाङ्तोलेः इ धोओ दीन्हाङः फान्सालेः स्याव्नाः माःर” त दाय्ह्ती येसुइ तोआकान्। 17ओउःत तोतोक्हाङः येसुकोः काम् योगार्मालो मान्तालम्खे त्याङ्ती नोःसा खाय्माःत झ्यान्ते रास्आकाय्। अरु मान्तालम्खे येसुकोः पेओ ताङ्ह्ओ काम् च्यवःती आन चोङाय्तो खेःइतो।
18ओहाङःसैको येसुइ फेरीलेः परमेस्वर्कोः राजीकोः कुरा वीनःराय् ताती स्यान्ती तोआथास। “परमेस्वर्कोः राजी दोह्लो खेःओ मुनाः दाय्ह्सा। 19ओउःपाय् अरुसै मीस्ओ सायःलो लेखा मुलेःनाः। ओउः सायःपाय् मान्ताइ लात्ती आलःती राङ्हाङः सुक्नाः सुक्आक्तीको ओउः सायः दुङ्ती लन्ह्दा लन्ह्दा जुगाङ् ब्राव्ओ सीङः स्याव्नाः। ब्राव्आक्तीको अरु सीङःसै छोङ्ह्ती ओउःकोः केङ्काहाङः वाःलम् न्यास्सा खाय्नानी” त दाय्ह्ती येसु तोआथास। 20ओहाङःसैको “लौ परमेस्वर्कोः राजी दोह्लो लेखा दाय्ह्सा। 21ओउःपाय् लाङ् फताक्सा ओखोत्लो लेखालेः मुआनाः। ओउः फताक्सा ओखोत्पाय् मोमःचोःइ रोत्ती तीन् पाथीकोः ओय्क्कुस् क्राक्नौ ओहाङःसैको लाङ् सबै फनाः” त दाय्ह्ती येसुइ स्यान्ती तोआथास।
22ओहाङःसैको इत तोआक्तीको येसु यरुसालेम्ताङ् आल्दा आल्दा सहर्गन गाव्गन वाह्ती आल्आकाय्। 23ओउःत वाह्तोक् बेलाहाङः यात्चाक् ओउःकःताङ् वाङ्ती “अ प्रभुय रेव्ओसै दल्ती रौ जीङः दोःओ मान्तालम्पाय् नाःतो नाःनाःया नाःतो नाःलया” त दाय्ह्ती येसुकायः व्हत्आथै। 24“नाःतो मान्तालम्इ परमेस्वर्कोः राजीहाङः पोक्सा बोङःनानी नाःतोखे पोक्सा दोःइली। नीङ्खेइ परमेस्वर्कोः कुरा पेतो त्युस्ती जाङ्ह्ती ओउःकोः राजीकोः मीतो उमःओ धोकाहाङः पोक्सा बोङःनु दा। 25यात् दीन्हाङः प्रभुइ ओउः धोकापाय् राक्ती गम्नौ। ओउः दीन्हाङः नीङ् धोका बाहीरताङ् वाङ्ती ‘अ प्रभु फोल्ताङी दा। ङी पोक्सा दोःपाङी’ त नीङ् दाय्ह्ती तेतेःनै त खेःया ‘खेःल नीङ्पाय् गाःहाङःकोः ङाइ तय्ह्नाङ्सल’ त दाय्ह्ती ओउः त्याङ्लेःनाः। 26इत त्याङ्तोक्हाङः ‘ङीकायः तय्ह्तेःनाःताङी बा। ङीपाय् नाङ्कुस् जेःती तुङ्ती मुआलाङी। ङीकोः गाव्लम्हाङः वाङ्ती नाङ्इ स्यान्तेःआताङी’ त दाय्ह्ती तोतेःनानी 27‘खेःल नीङ् सुलो गाःहाङःलो ङाइ तय्ह्नेःनाङ्सल। पाय्ह्अ नीङ् रेव्तो हायःओलम्तेः ङाकःताङ् वाङ्लाम्’ त दाय्ह्ती ओउःइ तोलेःतेःनै बा। 28ओहाङःसैको आब्राहाम् इसाक् याकुब्मा सबै परमेस्वर्कोः कुरा छ्यानःओमयःमा परमेस्वर्कोः राजी भीत्रहाङः मुओ नीङ् बाहीरताङ् ल्होक्ओलम्इ च्यवःतेःनानी त झ्यान्ते नीङ् आन लीह्ती र्याःतेःनै। 29ओहाङःसैको इसैकोः उःसैकोः चार् दोवाकोः लोक्तो देस्लम्सै मान्तालम् वाङ्ती परमेस्वर्कोः राजीहाङः जेःती तुङ्ती दोह्ती मुलेःनै। 30कोय् ङ्हा पोक्सा बोङःओलम्खे लोन्ताङ् ह पोक्सा दोःनै अरु लोने वाङ्सा मान्तालम्खे ङ्हालेः पोक्सा दोःनै” त दाय्ह्ती येसुइ त्याङ्ती तोआथै।
31ओहाङःसैको ओउःत तोतोक् बेलाहाङः यात्नीस् फरीसीलम् येसुकःताङ् दाह्ती वाङ्ती “लौ इसै ग्ल्युङ्ह्ती ज्याल्अ हेरोद् राजाइतेः सात्सालेः बोङःतेःनाः” त दाय्ह्ती येसुकायः गानाक्तीलेः तोआथै। 32“लौ ओउः स्याल्कोः काम् जाङ्ह्ओ हेरोद्कायः इत तोनु दा ‘तेन्मा स्याङ्ह्मा ङाकायः बयःओ काम् जाङ्ह्ती ङाइ लान्लम् ल्हेस्तीलेः वाय्मानाङः जीक्ओ मान्तालम्कायः स्याक्ताक्मानाङः। चीत्सैहाङः ह ङा काम् दप्साकायः यरुसालेम्ताङ् दाह्सा खेःनाङः’ त दाय्ह्ती तोनु। 33ओउःत झ्यान्ते तेन् स्याङ्ह् चीत्सैमा वाह्ती आल्नाङः दोह् हायःती दाय्ह्सा परमेस्वर्कोः कुरा छ्यानःओमयःपाय् यरुसालेम्हाङः सात्ओलेः स्याव्सा खेःतो अरु गाःहाङःमा सात्सा स्याव्ल। 34अ नीङ् यरुसालेम्कोः मान्तालम्य परमेस्वर्कोः कुरा छ्यानःओमयःकायः नीङ्इ आनतेः सात्तेःनानी। नीङ्कःताङ् ल्होक्ओ मान्तालम्कायःतेः आनतेः बाङ्इ आप्ती थोःतेःनानी। ओउःत हायःतेःनानी आमा वाःइ लयःकोः चोःलम्कायः गोत्ती ओम्पायःती गम्ओलो लेखा ङाइमा नीङ्कायः गोत्ती ओम्पायःती झाक्झुङ्ङोतो नीङ्तेः ङाकःताङ् वाङ्सा ग्यातेःइली। 35ओउःत झ्यान्ते नीङ्कोः मन्दीर्पाय् लोनेः ओस्तोक्रोङ्त हाःतो स्याव्लेःनाः बा। द्याह्हाङःसै ङाकायः नीङ्इ च्यवःतेःनाङ्सल। परमेस्वर्इ ल्होक्ओ मान्ताकायः ‘लौ भालातेः वाङ्तेःआकाय् नाङ् परमेस्वर्सै वाङ्ओ चाक्तेःआः’ त दाय्ह्ती नोःतोक् बेलाहाङः ह ङाकायःतेः फेरी च्यवःसा दोःतेःनै” त दाय्ह्ती येसु दाय्ह्आ।
Currently Selected:
लुका 13: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
