लुका 14
14
1ओहाङःसैको अरुकोः सन्चर्बार् दीन्हाङः येसुपाय् यात्चाक् फरीसीकोः ताङ्ह्ओ मान्ताकोः कीम्ताङ् आम्ह् जेःलाङ् आल्आ। आम्ह् जेःती मुतोक्हाङः येसुकायः सबै मान्तालम्इ योती मुओ खेःइतो। 2ओहाङःसैको यात्चाक् क्रुत् दोम् माङ्ती जीक्ओ मान्तालेः येसुकःताङ् वाङ्आ। 3ओउः फरीसीलम्मा धर्मा स्यान्ओमयःमा “ङीकोः धोओ दीन्हाङः येसुइ दोह् हायःनौ” त म्हर्ती योती मुओ खेःइतो ओउःत येसुइ चीःती “लौ ङीकोः ऐन्पाय् गत तोनौ। धोओ दीन्हाङः मान्ताकायः स्याक्ताक्सा स्याव्नाःया स्याव्लया इत तोनाङ्स दा” त दाय्ह्ती येसुइ व्हत्थातो 4ओउःमयःइ दोह्मा त्याङ्इली। ओउःत झ्यान्ते येसुइ ओउः जीक्ओ मान्ताकायः चुम्ती स्याक्ताक्आक्तीको ओउःकायः पाय्ह्साकायः ल्होक्आथै। 5ओउः जीक्ओ मान्ताकायः ल्होक्आक्तीको “लौ नीङ्कोः चोः स्याःपाय् धोओ दीन्हाङः इनार् घाङ्हाङः ह्रप्चाः त खेःया ओउःकायः नीङ्इ रेन्ह्तोलेः ओउः दीन्हाङःपाय् घाङ्सै त्युत्ती दल्ताक्तेःनानी माःर” त दाय्ह्ती येसुइ फरीसीलम्मा धर्मा स्यान्ओमयःकायःमा व्हत्थासतो 6ओउःमयःइ दोह्मा त्याङ्सा खाय्नीली।
7ओहाङःसैको ओउः फरीसीकोः कीम्हाङः जेःतोक्हाङः यात्नीस्चाक्इ ताङ्ह्ओ मान्ताकोः च्युङःसा खेःओ थाव्लम् लयःकायः मुसा आन बोङःआकानी। 8ओउःत हायःती मुओ येसुइ च्यवःती झ्यान्ते ओउःइ स्यान्ती तोती “लौ बीहाकोः भोस् जेःलाङ् आल्ओ बेलाहाङः पेओ थाव्हाङः च्युङःसा बोङःतेःचानी। नाङ् पेओ थाव्हाङः च्युङःती मुतेःनाः त खेःया अरु नाङ्सै ताङ्ह्ओ मान्ता वाङ्आक्तीको 9कीम्कोः आपाइ नाङ्कायः ‘लौ चीङ्अ उखे च्युङःतेःपाः’ त दाय्ह्ती अरुसै बल पेमालो थाव्हाङः नाङ् रास्ती च्युङःलाङ् आल्सा खेःतो यादो। 10खेःल भोस्ताङ् आल्ओ बेलाहाङः पेमालो थाव्हाङः च्युङःलाङ् आल्न। ओहाङःसैको ओउः कीम्कोः आपाइ लोनेः वाङ्ती ‘लौ इ पेओ थाव्हाङः च्युङःअ दा’ त दाय्ह्ती नाङ् ताङ्ह्ओ मान्ताकोः थाव्हाङः च्युङःसा दोःतेःनाः बा। एतलेः अरुकोः मीक्हाङः नाङ् ताङ्ह्तोलेः स्याव्तेःनाः। 11सुखेलो लयःकायः अरुसै ताङ्ह्ताक्सा बोङःनाःइसी ओउःपाय् अरुसै मीतो स्याव्लेःनै। सुखेलो मीओ काम् जाङ्ह्नानी ओउःलेः अरुसै ताङ्ह्तोलेः स्याव्नै” त दाय्ह्ती येसु दाय्ह्आ। 12ओहाङःसैको ओउःकायः जेःसाकायः गोत्ओ मान्ताकायः येसु ल्हेःती “भोस् जाङ्ह्ओ बेलाहाङः ‘लौ इमयःइ लोने ङाकायः भोस् द्यानःतीलेः गोत्नाःताङः’ त म्हर्ती लयःकोः मान्तालम् साथीलम् साहुलम्कायः गोत्तेःचानी। ओउःमयःइपाय् दोङ्सीलेः भोस् द्यानःसालेः खाय्नानी। 13ओउःत हायःओ खेःल भोस् जाङ्ह्सा खाय्मालो नाःतो नाःमालोलम्कायःमा क्ल्योय्बाङ्लम् मीक् लोक्ओ मान्तालम् ओउःमयःकायः नाङ्कोः भोस्ताङ् गोत्नौ दा। 14ओउःमयःखेइ नाङ्कायः भोस् द्यानःसा खाय्सापाय् खाय्नीली लोनेः नाङ् आन चोङाय्तोलेः स्याव्तेःनै दोह् हायःती दाय्ह्सा रौ जीङः दोःओलम् उह्ती च्योक्ओ बेलाहाङः नाङ्कोः पेओ जाङ्ह्झ्याङ्कायः नाङ् पेतोलेः दोःतेःनाः बा” त दाय्ह्ती येसु ओउः भोस् जाङ्ह्ओ फरीसीकायः तोआथै।
15इत येसुइ तोआथास यात्चाक् ओउःकुस् जेःती मुओ मान्तापाय् ओउःत तोओ सायःआक्तीको “लौ परमेस्वर्कोः राजीहाङः भोस् जेःती मुओलम् आन चोङाय्तोलेः मुजेःनै” त दाय्ह्ती येसुकायः तोथातो 16त्याङ्साकायः येसुइ वीनःराय् ताती “यात्चाक्इ ताङ्ह्ओ भोस्कायः रान्ओ बेलाहाङः नाःतो मान्तालम्कायः ‘जेःलाङ् वाङ्न’ त दाय्ह्ती भोस्कोः ङ्हासैलेः कुरा ल्होक्आथास। 17ओहाङःसैको भोस् जाङ्ह्नम् दीन्हाङः ओउः ङ्हा गोत्ओलम्कायः ‘लौ द्याह् सबै थोक्लम् रान्ती खाय्आलाङः द्याह् वाङ्न’ त दाय्ह्ती तोलाङ् ओउः भोस् जाङ्ह्ओ मान्ताइ लयःकोः नोकरी ल्होक्उतो 18ओउः गोत्ओ मान्तालम्पाय् सबै ‘ङा वाङ्सा कोरःङल’ त दाय्ह्ती दाय्ह्आकाय्। यात्चाक्खे ‘ङाइ देङी राङ् लेःआलाङः। द्याह् ओउः राङ्कायः पेतो वेलःती योलाङ् आल्सा खेःनाङः भोस्ताङ् वाङ्सा दोःङल। लौ नाङ्कोः मालीक्कायः “ङाकायःपाय् गतमातेः म्हर्तेःचाः” त तोउ दा’ त दाय्ह्ती ओउः मान्ताइ ओउःकायः गोत्लाङ् वाङ्ओ नोकरीकायः त्याङ्ती तोआकान्। 19अरु मान्ताखे ‘ङाइ देङी पास्गोता राङ् याव्सा स्याः लेःआलाङः। ङा द्याह् वेलःती योलाङ् आल्सा खेःनाङः ङा भोस्ताङ् आल्सा दोःङल। लौ नाङ्कोः मालीक्कायः “ङाकायःपाय् गतमातेः म्हर्तेःचाः” त तोउ दा’ त दाय्ह्ती ओउः मान्तापाय् त्याङ्ती तोआकान्। 20अरुखे ‘ङाइ तोहालेः बुधी वानःती गम्नाङः ओउःत झ्यान्ते ङा वाङ्सा दोःङल’ त दाय्ह्ती त्याङ्लेःआ। 21ओउःत झ्यान्ते ओउः नोकरी लयःकोः मालीक्कःताङ् द्यान्ह्ती पाय्ह्ती ओउःमयः त्याङ्ओ कुरापाय् सबै ल्हाक्ती छ्यानःआथै। ओउः नोकरीइ तोओ कुरा सायःआक्तीको ओउःकोः मालीक्पाय् आन ल्हुङ् मल्ह्ती ‘लौ उया रेन्ह्तोलेः आल्अ सहर्कोः रोत्लम् ल्याम्लम्ताङ् आल्ती ओउःहाङःकोः दोह्मा नाःमालो मान्तालम् क्ल्योय्ओ मान्तालम् मीक् च्यवःसा खाय्मालोलम् ओउःमयः सबैकायः भोस् जेःसाकायः वानःउसु’ त दाय्ह्ती नोकरीकायः तोआकान्। 22ओहाङःसैको ओउःकोः मालीक्इ तोओ कुरा सायःती ओउः नोकरीपाय् आल्आ। आल्आक्तीको पाय्ह्ती वाङ्आक्तीको ‘लौ नाङ्इ तोओलो लेखालेः ङाइ जाङ्ह्लेःआलाङः। जाङ्ह्सापाय् जाङ्ह्लेःङोतो भोस् जेःसा मान्तालम्पाय् पुत्धाङ्इली’ त दाय्ह्ती मालीक्कायः छ्यानःआथै। 23‘लौ उया गाव् गाव्ताङ्मा आल्ती ओउःहाङःकोः पाहार्गन जङ्गल्गन मुओ मान्तालम्कायः वानःताक्उसु। ओउःत हायःतीलेः ङाकोः कीम् ब्लीङ्तो पुत्साकायः भोस् जेःसा स्याव्लेःनाः। 24दोङ्सीलेः ओउः ङ्हा गोत्ओ वाङ्सा ग्यामालोलम्पाय् सुइमा ङाकोः भोस् जेःसा दोःइली’ त दाय्ह्ती ओउः मालीक्इ तोआ” त दाय्ह्ती येसुइ ओउःकुस् जेःओलम्कायः तोआथास।
25ओहाङःसैको येसु वाह्तोक् बेलाहाङः ओउःकुस् नाःतो मान्तालम् वाह्आकाय्। 26येसु ओउःमयःकःताङ् ल्हेःती “सुसु ङाकुस् वाह्सा म्हर्नै ओउःइलेः लयःकोः आमाआपा बुधी चोःलम् पुःचोङ् हौचोङ्लम्सै ङाकायःलेः राप्सा खेःतो। माः है लयःकोः जीङःसैमा ङाकायः राप्सा खेःतो। ओउःमयःसै ओउःइ ङाकायः राप्ताङःल त खेःया ओउःपाय् ङाकोः मान्ता स्याव्सा खाय्नीली। 27सुसुखे ङाकोः परमेस्वर्कोः काम् जाङ्ह्साकायः ङालो लेखालेः वाह्ती लीह्सीःओ गोरःसामा ग्याइली सीसामा ग्याइली ओउःइलेः ङाकोः मान्ता स्याव्सा खाय्नीली। 28नीङ्कःहाङः यात्चाक्इ कीम् जाङ्ह्सा म्हर्नै त खेःया ओउःइलेः ‘लौ इ कीम् दप्ती जाङ्ह्साकायः ङाकोः पैसा दाह्नौया दाह्उलुया’ त दाय्ह्ती ङ्हासै पैसा थेङ्तीलेः योनौ माःर। 29ओउःइ ओउःतलेः थेङ्ती योउलु त खेःया ओउःइ कीम् दप्सा खाय्माःत कीम्कोः तोस्बाङ् ह जाङ्ह्सा खाय्नौ यादो। अरुलम्इ एत च्यवःती ओउःकायः ङीःती 30‘लौ इइपाय् दोह् हायःतीलेः कीम् जाङ्ह्खयःउतो दप्ती जाङ्ह्साकायः खाय्जेःउलु रैस’ त दाय्ह्ती नोःकाय्नै। 31फेरी राजामा अरु राजाकुस् मीन्ह्काय्सा बोङःओ बेलाहाङःपाय् ङ्हासै ‘लौ ङाकोः दस् हजार् सीपाहीलम्इ ओउःकोः बीस् हजार् सीपाहीलम्कायः क्लीमःसा खाय्नानीया खाय्नीलीया’ त ल्हुङ्हाङः चीःआक्सा खेःतो। 32ओउःकोः दस् हजार् सीपाहीलम्पाय् अरुकायः क्लीमःसाकायः दाह्इली त खेःया ओउः राजापाय् ओउः अरु राजा लोक्तो मुधाङ्तोक्हाङःलेः ओउःकःताङ् ब्राङ्काय्ओ कुरा ल्होक्सालेः खेःतो। 33इतलेः नीङ्मा ङाकुस् वाह्सा बोङःतेःनानी त खेःया ङ्हासै ‘लौ येसुकुस् वाह्साकायः ङाइ लीह्सीःओ गोरःसामा सबै फेसामा खेःनाङः’ त ल्हुङ्हाङः चीःआक्ती ग्यासा खेःतेःनै बा।
34लौ छेःपाय् क्यानः ल्हाम्ताक्साकायः पेलेःनाः माःर। छेः पेसापाय् पेलेःनाः छेःइ ल्हाम्ताक्सा खाय्उलु त खेःया ओउः छेःकायः दोह्इ ल्हाम्ताक्सा स्याव्नाः र। 35ल्हाम्ताक्सा खाय्मालो छेःपाय् दोह्कायःमा स्याव्ल बा। राङ्कायःमा दोह्कायःमा स्याव्ल ओउःत झ्यान्ते वाय्सालेः खेःतो। लौ इ ङाइ तोओ कुरापाय् पेतो चीःतीलेः सायःनु दा” त दाय्ह्ती येसुइ ओउःकुस् वाह्ओलम्कायः स्यान्ती तोआथास।
Currently Selected:
लुका 14: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
