लुका 15
15
1ओहाङःसैको यात् दीन्हाङः नाःतो पैसा उथावती जेःओ मान्तालम्मा अरु रेव्ओ जाङ्ह्ओलम्मा येसुइ स्यान्ती तोओ कुरा सायःलाङ् हुम्ती वाङ्आकाय्। 2ओउःमयःपाय् येसुकःताङ् वाङ्ओ च्यवःती फरीसीलम्मा धर्मा स्यान्ओमयः “लौ इ मान्तापाय् दोह् हायःतीलेः इलो लेखा रेव्तो हायःओलम्कायः रोम्मानौ ओउःमयःकुस् जेःमानौ। एत हायःओपाय् स्याव्ल” त दाय्ह्ती लयःमयःकुस् नोःकाय्आकाय्। 3ओउःमयः इत नोःकाय्ओ चीःती येसुइ यात्ज्योः स्यान्ओ वीनःराय् तातीलेः तोआथास। 4“नीङ्कःहाङः यात्चाक् यात्सै भेदामेत्छ्याः नाःती ह्रामःलाङ् आल्तोक् बेलाहाङः यात्ज्योः मीह्आ त खेःया ओउः मान्ताइ दोह् हायःनौ दाय्ह्सा। ओउः मान्ताइपाय् ओउःकोः अरु उनान्सै मेत्छ्याःलम् फेती ओउः मीह्ओ मेत्छ्याः च्यवःधाङ्माःच्युक्कायः बोङःलाङ् आल्नाः। 5ओहाङःसैको ओउः मान्ता बोङःदा बोङःदा लोने च्यवःआक्तीको ओउः मेत्छ्याःकायः बुस्ती लात्ती आन चोङाय्तीलेः पाय्ह्ती वाङ्नाः। 6पाय्ह्ती वाङ्ती कीम्हाङः दाह्आक्तीको ‘लौ ङाकुस् चोङाय्न दा। इ ङ्हा मीह्ओ मेत्छ्याःजा ङाइ बोङःती च्यवःआलाङः बा’ त दाय्ह्ती ओउःकोः मान्तालम्कायः तोनाःथास। 7दोङ्सीलेः ओउःलो लेखालेः यात्चाक् रेव्ओ काम् जाङ्ह्ओ मान्ताइ ओउःकोः रेव्ओ काम् फेती परमेस्वर्कःताङ् द्यान्ह्ती वाङ्नाः त खेःयाकायः लाङ्काहाङः परमेस्वर् ओउःकोः लाङ्कामयःकुस् आन म्रोती चोङाय्तीलेः मुनै माःहै उनान्सै पेओ मान्तालम् ओउःकःताङ् मुओसै परमेस्वर्इ चोङाय्तो स्याव्ती इ द्यान्ह्ती वाङ्ओ मान्ताकायः रोम्नौ बा। 8फेरी यात्चाक् मोमःचोः दस्गोता चान्दी रुपीया नाःती यात्ज्याङ् मीह्आ त खेःया ओउः मोमःचोःइपाय् दोह् हायःनौ दाय्ह्सा। ओउः मोमःचोःइपाय् रुपीया च्यवःधाङ्माच्युक्कायः बत्ती हवःती कीम् जुदालेः सर्ती बोङःती बोङःती मुलेःनाः। 9ओहाङःसैको पैसा च्यवःआक्तीको ओउः मोमःचोःइ लयःकोः कीम् ब्रेङःकाय्ती याक्ती मुओ मान्तालम्कायः चोङाय्तोलेः छ्यानःनौ ‘लौ इ ङाइ ङ्हा मीह्ती वाय्ओ पैसाजा च्यवःआलाङः रैस। लौ ङाकुस् चोङाय्न’ त दाय्ह्ती नोःनाः। 10दोङ्सीलेः इलो लेखालेः यात्चाक् रेव्ओ काम् जाङ्ह्ओ मान्तापाय् ओउःकोः रेव्ओ काम् फेती परमेस्वर्कःताङ् द्यान्ह्ती वाङ्नाः त खेःया परमेस्वर्कोः लाङ्काहाङः मुओ ल्होक्ओमयःपाय् आन चोङाय्नै बा” त दाय्ह्ती येसुइ तोआथास।
11ओहाङःसैको येसुइ यात्ज्योः अरु वीनःराय् ताआकान्। “लौ यात्चाक् आपा खेःतो ओउःपाय् नीस् पुःचाःमा गोय्चोः नाःओ खेःतो। 12ओहाङःसैको यात् दीन्हाङः ओउः हौखे आपाकःताङ् वाङ्ती ‘लौ आपाय ङाकायः लोनेः बयःसा खेःओ राङ्लम् थोक्लम्कोः भाक्पाय् द्याह् तेन् बयःची दा’ त दाय्ह्ती लयःकोः आपाकायः तेती तोआकान्। ओउःत तेती तोआक्तीको ओउः आपाइ नीस् पुःचाःकायः राङ्लम् थोक्लम् वेःती बयःआथाच। 13इत वेःती बयःआक्तीको नीस्सुम् दीन् पुत्आक्तीको ओउः हौखेपाय् लयःकोः राङ्लम् थोक्लम् पैसाकायः वीनःती लोक्तो मुओ देस्ताङ् क्रव्आ। लोक्तो मुओ देस्ताङ् क्रव्ती दाह्ती वाङ्आक्तीको ओउः हौपाय् लयःकोः पैसाइ पेओ न्युम्ओ ङ्हीक्ओ जेःगा जेःती हान् तुङ्ती लुङ्ह्जेःती मुदा मुदा ओउःकोः पैसा सबै जेःती द्योक्ताक्आकान्। 14ओहाङःसैको पैसा द्योक्आक्तीको ओउः देस्हाङः आन जोक्तो अनीकाल् स्याव्आ। अनीकाल् स्याव्तोक्हाङः ओउः हौखेपाय् जेःगा तुङ्गा दोःमाःत आन योङ्क्राय्ओ खेःतो। 15ओउःपाय् योङ्क्राय्ती झ्यान्ते यात्चाक् ओउः देस्कोः मान्ताकःताङ् काम् सायःलाङ् आल्आ। ओउः मान्ताइ ओउःकायः प्याक् ह्रामःलाङ् ल्होक्आथै। 16ओउः हौपाय् प्याक् ह्रामःओ काम् ह दोःओ खेःतो ह्रामःझ्याङ्कोः दोह्मा बयःल ओउःपाय् आन योङ्क्राय्ती झ्यान्ते प्याक्कोः जेःगा रोक्लेः जेःसा झाक्ओ खेःतो। 17ओउःत हायःदा हायःदा यात् दीन्हाङः ओउः हौइपाय् व्हक्तीलेः चीःआकान् ‘लौ ङाकोः आपाकोः काम् जाङ्ह्ओलम्खेइ कोस्तोलेः जेःनानी बा। जेःआक्तीको ओउःमयःकोः जेःगा वेतोलेः मुनाः ङाखेपाय् इहाङः आन योङ्क्राय्ती सीखेःआलाङः। 18लौ ङा द्याह् आपाकःताङ् द्यान्ह्ती पाय्ह्ती “लौ आपाय ङाइ नाङ्कायःमा परमेस्वर्कायःमा आन रेव्तो हायःती इच्युक् पेमालो वाङ्आलाङः 19ओउःत झ्यान्ते ङाकायः चोः ततेः तोसा स्याव्ल। द्याह् ङापाय् नाङ्कोः नोकरी स्याव्पाङः” त दाय्ह्ती ङाकोः आपाकःताङ् तोलाङ् आल्नाङः रैस’ त म्हर्ती ओउः मान्तापाय् चीङ्ती लयःकोः देस्ताङ् पाय्ह्आ। 20ओहाङःसैको पाय्ह्ती आल्तोक्हाङः बल लोक्तोसै ओउःकोः आपाइ च्यवःआथै। लयःकोः चोःकायः च्यवःआक्तीको ओउः आपाइ तय्ह्ती योनःती चोःकःताङ् तन्ती वाङ्ती ओउःकायः ग्रोम्तीलेः पेतो रोम्आथै। 21आपाइ रोम्सा बोङःतोक्हाङः ‘अ आपाय ङाइपाय् परमेस्वर्कायःमा नाङ्कायःमा आन रेव्तोलेः हायःआलाङः बा। ङाकायःपाय् “चोः” ततेः तोतेःचाःची’ त दाय्ह्ती ओउः चोःखे दाय्ह्तो 22इत तोओ कुरा आपाखे सायःमाःत लयःकोः नोकरीलम् गोत्ती ‘पेपेओ नाय्लम् जुत्तालम् वानःती इकायः लावताक्पाःथै क्रुत्हाङःमा मुन्रो लावताक्पाःथै। 23ओहाङःसैको ङाकोः पेओ द्युन्ओ स्याः सात्ती इकायः भोस् जाङ्ह्नी। 24इ ङाकोः चोःजा सीओ खेःतो द्याह् स्याक्ती दाह्ओआः। ङ्हापाय् मीह्ती वाय्ओ खेःतो द्याह् दाह्ती वाङ्ओआः बत्ताङःआः ङ। ओउःत झ्यान्ते ओउःकायः चोङाय्ती त्याक्सा खेःनाःतय्ही’ त दाय्ह्ती ओउः आपामा सबै कीम्कोः मान्तालम्मा चोङाय्ती स्याह्ती मेती मुओ खेःइतो।
25ओहाङःसैको ओउःत हायःती मुतोक् बेलाहाङः जेथा पुःखे राङ्सै पाय्ह्ती वाङ्ओ खेःतो। 26जेथा पुःखे ओउः मेओ स्याह्ओलम्कायः सायःती नोकरी गोत्ती ‘लौ ओउःमयः तेन् दोह् हायःओ लो’ त दाय्ह्ती व्हत्आकान्। 27‘नाङ्कोः हौपाय् तेन् पेतो सेलः स्याव्तीलेः दाह्ओआः रैस। ओउःत झ्यान्ते नाङ्कोः आपाइ चोङाय्तीलेः ओउः द्युन्ओ स्याः सात्ताक्ती भोस् जाङ्ह्ताक्ओआः। नाङ्कोः हौकायः राप्ती त्याक्सा थेङा जाङ्ह्ती मुनै’ त दाय्ह्ती ओउः नोकरीइ छ्यानःआथै। 28इत तोओ सायःआक्तीको पुःखेपाय् लती ल्हुङ् मल्ह्तो स्याव्ती कीम् पोक्सा ग्याल। ओउः जेथा चोः पोक्सा ग्याल त चीःती ओउःकोः आपापाय् बाहीरताङ् ग्ल्युङ्ह्ती ‘लौ जेःलाङ् वाङ्अ’ त दाय्ह्ती जेथाकायः होम्ती पोक्ताक्सा बोङःउतो 29जेथा ग्यामाःत ‘लौ नाःतो साल्कायः ङाइ नाङ्कोः काम्पाय् पेतो जाङ्ह्ओलेः खेःमाङोतो नाङ्इ तोओ कुरा ङाइ गलमा सायःती ग्यातीलेः जाङ्ह्माङोतो ङाकायःपाय् साथीलम्कुस् जेःसा मेत्छ्याः दोह्मा सात्तीलेः भोस्पाय् बयःतेःचीली। 30ङाखेकायः दोह्मातेः बयःतेःचीली इ नाङ्कोः चोःखेपाय् पेमालो ल्हास्याकुस् वाह्ती नाङ्कोः पैसा जेःओलेः दाह्आ ओउः दाह्तोक्हाङः ओउःखेकायः नाङ्इ पेओ स्याः सात्ती भोस् जाङ्ह्तेःनौ बा’ त दाय्ह्ती पुःखेइ आपाकायः यव्ह्ती तोआकान्। 31‘अ चोः नाङ्खेजा ङाकुस् गलकायःमा मुतेःआ। ङाकोः थोक्लम्पाय् सबै नाङ्कायःलेः स्याव्नाः। 32इ नाङ्कोः हौजा सीओ स्याव्आक्तीको द्याह् स्याक्तीलेः दाह्ओआः। ङ्हापाय् मीह्ओ खेःतो द्याह् च्यवःओ लेःआः बा ओउःत झ्यान्ते तेन् चोङाय्ती भोस् जेःती मुसा स्याव्नाः’ त दाय्ह्ती ओउः आपा त्याङ्आ” त दाय्ह्ती येसुइ तोआथास।
Currently Selected:
लुका 15: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
