लुका 16
16
1ओहाङःसैको येसुइ लयःकुस् वाह्ओमयःकायः अरु वीनःराय् ताती इतलेः स्यान्आथास। “यात्चाक् साहुकोः मुल् नोकरी खेःतो। ओहाङःसैको ओउः नोकरीकायः गाल्तुम्ती तोसाकायः अरु मान्तालम् ओउः साहुकःताङ् वाङ्आकाय् ‘लौ नाङ्कोः मुल् नोकरीइ पेमालो हायःती नाङ्कोः पैसा वाय्लेःनौ’ त दाय्ह्ती छ्यान्ह्ती तोआथै। 2इत गाल्तुम्ओ कुरा सायःआक्तीको ओउः साहुइ ओउःकोः नोकरी गोत्ती ‘लौ इ नाङ्कायः गाल्तुम्ओ कुरापाय् दोह्लो। द्याह् नाङ्कोः काम्कोः हीसाप्लम् लेखती थेङ्आक्उ। थेङ्आक्तीको ङाकायः छ्यानःची। ओउःत हायःआक्तीको ङाकोः काम् जाङ्ह्सा परतेःल’ त दाय्ह्ती ओउःकोः नोकरीकायः तोआथै। 3ओउःत तोआक्तीको ओउः नोकरीपाय् ल्हुङ्हाङः लाय्ती ‘लौ द्याह् दोह् हायःचाङः। द्याह्हाङःसै ङाकोः मालीक्इपाय् काम् बयःताङःल। दोह् हायःचाङः द्याह्। खेत्ल्याकोः काम् जाङ्ह्सा खाय्ङल। युङ्ती तेती जेःसाकायः अह्र्लेःनाङः। 4लौ इत हायःचाङः ङाकोः मालीक्कःसै रीन्कोः त्याक्ओ मान्तालम्कायः म्रोताक्लेःनाङःसु बा। ओहाङःसैको इ मालीक्कोः काम्पाय् दोःल त खेःओ ओउः ङाइ म्रोताक्ओ मान्तालम्इ ङाकायः रोम्तीलेः जेःगा तुङ्गा बयःचाःताङः’ त दाय्ह्ती ओउः मुल् नोकरी म्हर्आ। 5ओहाङःसैको ओउःकोः मालीक्कःसै रीन् त्याक्ओ मान्तालम्कायः गोत्ती यात्चाक्कायः ‘लौ नाङ्कोः रीन्पाय् गुच्युक् मुलेःनाः’ त दाय्ह्ती व्हत्थातो 6‘ङाकोः रीन्कायः यात् सै माना साती पाय्क्सा खेःलेःनाङः’ त दाय्ह्ती ओउः मान्ता त्याङ्आ ‘लौ उया नाङ्कोः कागत्पाय् त्याक्उ। ओहाङः “पचास् माना पाय्क्सा खेःतो” त रेन्ह्तोलेः लेखउ दा’ त दाय्ह्ती ओउः मान्ताकोः रीन्कायः आधा वाय्ताक्आकान्। 7अरुकायः ‘लौ नाङ्कोः रीन् गुच्युक्’ त दाय्ह्ती व्हत्ती ‘ङाकोःपाय् यात् सै पाथी गहुङ् लेःआः’ त दाय्ह्ती ओउः मान्ता त्याङ्आ। ‘लौ उया इ नाङ्कोः कागत्हाङः “आसी पाथी” लेखउ’ त दाय्ह्ती ओउः मुल् नोकरीइ तोआकान्। ओउःत हायःदा हायःदा सबैकायः रीन् छीङ्आथास। 8इत चीःआक्तीको ओउः नोकरीकोः मालीक्पाय् ‘ए नाङ् लयःकायः काम् जाङ्ह्सा आनतेः चीःतेःनौ रैस’ त दाय्ह्ती नोकरीकायः तोनाःथै। दोङ्सीलेः तेन्छ्याङ्कोः ल्हाव्ह्दैबाङ्कोः मान्तालम्पाय् ङाकोः मान्तालम्सै लयःकायः काम् जाङ्ह्सा आनलेः चीःनानी बा। 9लौ इत तोनेःनाङ्स ल्हाव्ह्दैबाङ्कोः पैसाइ मान्तालम्कायः म्रोताक्नु ओहाङःसैको नीङ्कोः पैसा द्योक्आक्तीको ओउःमयःइ नीङ्कायः गलकायःमा कीम्हाङः रोम्तेःनै बा। 10लौ सुसुखेइ मीओ काम्लम् पेतोलेः जाङ्ह्नानी ओउःइपाय् ताङ्ह्ओ काम्लम्मा पेतोलेः जाङ्ह्नानी। सुसुखेइ मीओ काम्लम् माःतीलेः जाङ्ह्नानी ओउःइपाय् ताङ्ह्ओ काम्लम्मा माःतीलेः जाङ्ह्नानी। 11नीङ्इ ल्हाव्ह्दैबाङ्कोः गह्र्इलेः इहाङःकोः काम्लम् पेतो जाङ्ह्तेःनीली त खेःया नीङ्कायः ङ्हाम्माःत झ्यान्ते लाङ्काकोः पेओ थोक्लम्पाय् नीङ्कायः बयःसा सुमा ग्याइली ङ्हाम्तेःइली। 12फेरी अरुकोः गह्र्लेः नीङ्इ वाय्तेःनानी त खेःया सुइमा नीङ्कोः लाङ्काकोः दोःसा खेःओ थोक्पाय् बयःतेःइली। 13यात्चाक्इ नीस् मालीक्कायः काम् पेतो जाङ्ह्सा खाय्उलु दोह् हायःती दाय्ह्सा ओउः नोकरीपाय् यात्ज्योः मालीक्खेकायः राप्ती ओउःकोः काम् म्ह्याङ्तीलेः जाङ्ह्नौ अरुखेकायः राप्माःत ओउःकोः काम् म्ह्याङ्तीलेः जाङ्ह्उलु। इलो लेखालेः नीङ्इ पैसा क्युताक्सा काम्मा परमेस्वर्कोः पेओ काम्मा ब्रक्त ग्र्याम्ह्तीलेः जाङ्ह्सा खाय्तेःनीली” त दाय्ह्ती येसुइ स्यान्ती तोआकान्।
14ओउःत स्यान्तोक् बेलाहाङः येसुइ तोओ कुरापाय् फरीसीलम्इ सायःती मुओ खेःतो। ओउःमयःपाय् पैसा क्युसालेः आन झाक्नै ओउःत झ्यान्ते ओउःमयःइ येसुइ स्यान्ओ कुरापाय् ङ्हाम्माःत ओउःकायः ङीःआथै। 15येसुइ इत चीःती “लौ नीङ्इ जाङ्ह्ओ काम्लम्पाय् ‘पेओलेः’ त नीङ्इ अरु मान्तालम्कायः ताःताक्तेःनानी दोह् हायःती दाय्ह्सा मान्तालम्इ नीङ्कोः ल्हुङ्तुक्कोः कुरापाय् पेतो चीःसा खाय्तेःइली। ओउःमयःखेइ चीःसा खाय्तेःइली परमेस्वर्खेइ नीङ्कोः ल्हुङ्तुक्कोः पेतोलेः चीःतेःनै बा ओउःत झ्यान्ते दोह् दोह् मान्तालम्खेइ ताङ्ह्ताक्लेःनानी ओउःकःलेः परमेस्वर्खे अह्र्लेःनाः बा। 16ओहाङःसैको उय्ह्लेकोः मोसाइ तोओ ऐन्कोः कुरामा परमेस्वर्कोः कुरा छ्यानःओमयःइ लेखओ कुरामा ओउःपाय् बाप्तीस्मा बयःओ युहनाकोः बेलाहाङःच्युक्कायः बयःओ खेःतो। बाप्तीस्मा बयःओ युहना वाङ्आक्तीको परमेस्वर्कोः राजीकोः पेओ कुरालेः थोल्ह्ती तोओ लेःआः। द्याह् परमेस्वर्कोः राजीहाङः मान्तालम्इ जोक्तोलेः पोक्सा बोङःनानी। 17परमेस्वर्इ मोसाकायः बयःओ ऐन्कोः हुकुम्लम् वाय्साकायः ङ्हापाय् इ ल्हाव्ह्दैबाङ्मा फेल्बाङ्मा म्हीत्ती वाय्सा खेःतो। 18सुसुइ लयःकोः बुधी फेती अरु मोमःचोःलेः वानःचानी ओउः मान्ताइलेः जार् काओ काम् जाङ्ह्नानी। फेरी सुसुइ अरुइ फेओ बुधीपाय् लयःकायः वानःचानी ओउःइमा जार् काओ काम् जाङ्ह्लेःनानी” त दाय्ह्ती येसुइ तोआथास।
19“लौ इ कुरा सायःनु दा। यात्चाक् आन साहु मान्ता खेःतो। ओउः मान्तापाय् दीन्का दीन् पेपेओ नाय्लम् लावती न्युम्ओ जेःगा तुङ्गा भोरःतीलेः जेःओ खेःतो। 20ओहाङःसैको ओउः साहुकोः कीम्कोः दय्ह्लौहाङः यात्चाक् लाजरुस् त तोओ जुगाङ् ह्र्यात् स्याव्ओ चा जीक्ती मुओ मान्ता एङ्सओ खेःतो। 21ओउःइपाय् ओउः साहुइ वाय्ओ य्हुन्ह् जेःगालम् जेःसा बोङःधै मुओ। कुयःलम्इमा वाङ्ती ओउःकोः चालम् लेम्ह्आथै। 22ओहाङःसैको ओउः लाजरुस् त तोओ ह्र्यात् मान्ता सीआ। सीआक्तीको ओउःकायःपाय् परमेस्वर्कोः लाङ्काकोः ल्होक्ओमयःइ लाङ्काताङ् लनःआथै। ओहाङः ओउःपाय् आब्राहाम्कुस् जेःती मुओ खेःतो। ओहाङःसैको ओउः साहु मान्तामा सीआ। 23सीआक्तीको पाम्ह्आक्तीको ओउः मान्ताखेपाय् क्लीः बोगाङ् आन न्युम्ह्ती मुओ खेःतो। ओउःत न्युम्ह्ती मुतोक्हाङः ओउःइ लाङ्काताङ् त्याव्ती योउतो ओहाङः लाजरुस्पाय् आब्राहाम्कुस् आन लोक्तो मुओ च्यवःआकान्। 24इत च्यवःआक्तीको ‘अ ङाकोः तोकानः आब्राहाम्य ङाकायः योनःती योची दै। इहाङः म्हेःइ ङाकायः आन आङ्ह्ती धाह्ताक्आताङः ङाकायः यात् त्योप् तीःइलेः ङाकोः ले नीक्ताक्साकायः नाङ्कुस् मुओ लाजरुस्पाय् ल्होक्चाक्ची दै’ त दाय्ह्ती ओउः ङ्हा साहु मान्ता तेआ। 25‘लौ चोः नाङ्खेपाय् ल्हाव्ह्दैबाङ्हाङः मुतोक्हाङः पेपेओ थोक्लम् दोःतेःआ ओउःतोक् बेलाहाङः इ लाजरुस्खेपाय् रेव्तो थोक्लम् ह दोःआ इत नाङ्इ चीःतेःनौ। द्याह्पाय् ओउःखे पेतोलेः स्याव्नाः नाङ्खेपाय् लीह्सीःओ च्यवःतेःनौ। 26फेरी ओउःच्युक् घोक्तो घोदुङ् नीचीकायः फाःती मुओ लेःआः। ओउः परमेस्वर्इ गम्ओ घोदुङ्पाय् नाङ्मा ङामा त्यात्काय्ती क्रुस्काय्सा दोःल बा। इसै उःसै त्यात्सा सुइमा खाय्नीली’ त दाय्ह्ती आब्राहाम् त्याङ्आ। 27‘ओउःत झ्यान्ते तोकानःय लाजरुस्पाय् ङाकोः कीम्कोः मान्तालम्कःताङ् ल्होक्उ दै। 28ओहाङः ङाकोः पोङा पुःचोङ्कायः ओउःइ गानाक्तीलेः तोपाःथास ओहाङःसैको ओउःमयःमा इत न्युम्ह्तो स्याव्ओहाङः वाङ्सा परइली’ त दाय्ह्ती ओउः मान्ता तेआ। 29‘दोह् हायःती लाजरुस् आल्सा खेःतो। मोसाइमा परमेस्वर्कोः कुरा छ्यानःओमयःइ गानाक्ती तोओ कुरापाय् मुलेःनाः ओउःमयःइ तोओ कुरापाय् नाङ्कोः पुःचोङ्इ सायःसा खाय्नानी’ त दाय्ह्ती आब्राहाम् त्याङ्आ। 30‘खेःल तोकानःय ओउःमयःइ तोओ कुरापाय् ङाकोः पुःचोङ्लम् सायःसा ग्याइली। मोसाइ तोओ कुरामा परमेस्वर्कोः कुरा छ्यानःओमयःइ गानाक्ती तोओमा ङाकोः पुःचोङ्लम् सायःसा ग्याइली। सीआक्तीको यात्चाक् उह्ती च्योक्नाः त खेःया ओउःइ तोओ कुरालेः ओउःमयःइपाय् ग्याती सायःती लयःकोः रेव्तो काम्लम् फेलेःनानी’ त दाय्ह्ती ओउः मान्ता दाय्ह्आ। 31‘खेःल ओउःमयः मोसाइ तोओ कुरामा परमेस्वर्कोः कुरा छ्यानःओमयःइ तोओमा सायःसा ग्याइली त खेःया सीओसै उह्ती च्योक्ओ मान्ताकोः कुरामा सायःसा ग्याइली’ त दाय्ह्ती आब्राहाम् त्याङ्आ”
Currently Selected:
लुका 16: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
