लुका 17
17
1ओहाङःसैको येसुइ फेरीलेः लयःकुस् वाह्ओकायः स्यान्ती तोआथास। “लौ ङाकायः ङ्हाम्ओ मीओ मान्तालम्कायः अरु मान्तालम्इ रेव्ताक्लाङ् वाङ्सापाय् वाङ्नै बा। अरु मान्तालम्इ इत रेव्तो हायःसा खेःसापाय् खेःलेःनै सुसुइ अरुकायः रेव्ताक्चानानी ओउःपाय् लोने आन न्युम्ह्नानी बा। 2माः है ओउःमयःइ ङाकायः ङ्हाम्ओ मीओ मान्ताकायः रेव्ताक्ओसै ओउःमयःकायः कय्क्हाङः ग्रायःबाङ् योकोःती छीत्आक्तीको ज्युम्ह्ओ तीःहाङः ल्होक्ती वाय्सालेः पेनाः। 3ओउःत झ्यान्ते ङाकोः मान्तालम्कायः पेमालो काम् जुगुलाङःहाङः जाङ्ह्ताक्लाम्। ओहाङःसैको यात्चाक् नाङ्कुस् मुओ मान्ताइ नाङ्कायः पेमालो काम् जाङ्ह्तेःनाः त खेःया ओउःकायः पेताक्साकायः स्यान्ती तोउ। नाङ्इ तोओ कुरा ओउःइ सायःनौ त खेःयाकायः ओउःकः ब्राङ्ती ल्हुङ् मल्ह्तेःचानाः। 4ओउःइ यात्दीन्हाङः सात् पल्तकायः नाङ्कायः पेमालो जाङ्ह्नौ त खेःया ओउःत जाङ्ह्आक्तीको ओउःपाय् ल्हुङ् द्यान्ह्तीलेः ‘लौ ङाइ इत पेमालो हायःओ स्याव्ल द्याह् फेलेःनाङः’ त दाय्ह्ती नाङ्कुस् ब्राङ्काय्लाङ् वाङ्नाः त खेःया ओउःकुस् सात् पल्तकायः ल्हुङ् मल्ह्माःत ब्राङ्तेःपाः” त दाय्ह्ती येसुइ तोआथास। 5ओउःत सायःआक्तीको “लौ ङीकायः न्हाङ्तोलेः पेतो ङ्हाम्ताक्ताङी दा” त दाय्ह्ती प्रभु येसुकोः ल्होक्ओमयः ओउःकः तेआकाय्। 6“नीङ्इ बल बल ह ङ्हाम्ओ त खेःया इ कीम्बु सीङःकायः नीङ्इ ‘लौ च्योङ्ती ओउः द्युम्मालो तीःहाङः प्लेत्तेःपाः’ त दाय्ह्ती गानाक्ती तोआक्तीको नीङ्इ तोओपाय् ताप्तोलेः स्याव्नाः बा।
7नीङ्कोः काम् जाङ्ह्ओ मान्ताकायः गत तोतेःनानी दाय्ह्सा। ओउःइ राङ्कोः काम् स्याः मेत्छ्याः ह्रामःओ काम् जाङ्ह्ती दप्आक्तीको कीम्ताङ् पाय्ह्आक्तीको गत तोसा दाय्ह्सा। ‘लौ द्याह् ङाकुस् च्युङःती इ जेःगा जेःचु दा’ ततेः तोतेःनीली। 8खेःल ओउःपाय् पाय्ह्ती वाङ्आक्तीको ‘लौ आम्ह् क्यानः खाङ्उ ओहाङःसैको ङाकायः दोल्कावःती बयःआक्ची। ङापाय् जेःती कोस्आक्तीको नाङ्इ लयःकोः जेःगा जेःउ’ त दाय्ह्ती तोतेःनानी माःर। 9ओहाङःसैको नाङ्कोः काम् जाङ्ह्ओ मान्ताइ सबै जाङ्ह्ती द्योक्आक्तीको ‘लौ ङाइ तोओ कुरापाय् नाङ्इ पेतोलेः जाङ्ह्तेःआबत्ची’ ततेः लुङ्ती तोतेःनीली। 10इतलेः नीङ्इमा लयःकायः गानाक्ती तोओ काम् सबै जाङ्ह्ती दप्आक्तीको ‘लौ ङी नाङ्कोः काम् जाङ्ह्ओ मान्तालम्कायःपाय् लुङ्ती तोसा परल। ङीइ लयःकायः गानाक्ती तोओ काम् ह जाङ्ह्आलाङःसु’ त दाय्ह्ती तोनु दा” त दाय्ह्ती येसुइ लयःकोः ल्होक्ओमयःकायः स्यान्ती तोआथास।
11ओहाङःसैको यरुसालेम्ताङ् आल्ती वाह्तोक् बेलाहाङः येसुपाय् समारीया गालील नीस् अन्चल्कोः फाःओहाङः दाह्आकाय्। 12ओउःहाङः दाह्आक्तीको येसु यात्ज्योः गाव्हाङः पोक्ओ बेलाहाङः दस्गोता कोह्र् जीक्ओ मान्तालम् ओउःकःताङ् क्रुस्लाङ् वाङ्आकाय्। 13ओउःमयःपाय् लोक्तोसै चीङ्ती मुती “अ प्रभु येसुय ङीकायः योनःताङी दै” त दाय्ह्ती गोःती तोआकानी। 14इत गोःती तोतोक्हाङः येसुइ ओउः दस् कोह्र्इ जीक्ओ मान्तालम्कायः च्यवःती “लौ मन्दीर्कोः पुरोहीत्लम्कःताङ् आल्ती ओउःमयःकायः ‘लौ ङाकोः आङ्पाय् द्याह् सेलः मुलेःनाः’ त दाय्ह्ती लयःकोः आङ् छ्यानःनु दा” त दाय्ह्ती येसुइ तोआथास। इत तोओ सायःआक्तीको ओउः दस्जन आल्इतो ल्याम्हाङः वाह्वाह्बाले सबै सेलः स्याव्आकाय्। 15सेलः स्याव्आक्तीको यात्चाक् “लौ सेलः स्याव्आलाङः रैस” त दाय्ह्ती येसुकःताङ् द्यान्ह्ती वाङ्ती परमेस्वर्कायः लुङ्ती तोतीमा 16येसुकायः बाःती स्यवआथै। ओउः द्यान्ह्ती वाङ्ओ मान्ताखे समारीया देस्कोः मान्ता खेःतो। 17इत च्यवःती “लौ ङाइ दस्गोताकायःच्युक् कोह्र् जीक्ओ मान्तालम्कायः स्याक्ताक्ङोतो माः दै। 18ओउः अरु नौजन गाःताङ् आने। इ यहुदी खेःमालो मान्ताआले ह परमेस्वर्कायः लुङ्ती तोलाङ् द्यान्ह्आ रैस” त दाय्ह्ती येसुइ ओउःकुस् मुओलम्कायः तोआकान्। 19ओहाङःसैको ओउः यातैज्योः द्यान्ह्ती वाङ्ओ मान्ताकायः ल्हेःती “लौ च्योक्ती पाय्ह्अ दा। नाङ्इ ङाकायः पेतो ङ्हाम्ती झ्यान्ते सेलः स्याव्तेःजेःनाः बा” त दाय्ह्ती येसुइ तोआथै।
20ओहाङःसैको फरीसीलम् येसुकःताङ् वाङ्ती “परमेस्वर्कोः राजीकोः कुरा गल दाङ्नाः” त दाय्ह्ती व्हत्थातो “परमेस्वर्कोः राजी दाङ्ओपाय् नीङ्इ कनःती योओलम्इपाय् च्यवःसा दोःतेःइली। 21फेरी मान्तालम्इ परमेस्वर्कोः राजीकायः ‘लौ इहाङःलेः मुनाः’ ‘ओहाङःलेः मुनाः’ त दाय्ह्ती तोसा सुइमा खाय्नीली। नीङ् मान्ताकःहाङःपाय् सुसुइ परमेस्वर्कोः कुरापाय् ग्यातीलेः सायःनानी ओउःलेः परमेस्वर्कोः राजीकोः मान्ता लेःआः बा” त दाय्ह्ती येसु त्याङ्आ। 22ओहाङःसैको लयःकुस् वाह्ओमयःकःताङ् ल्हेःती “लौ लोने ओउः मान्ताकोः चोः त तोओ फेरी वाङ्सा दीन्पाय् नीङ् योसा आन झाह्तेःनै ओउः दीन्पाय् बुरु नीङ्इ च्यवःसा दोःतेःइली। 23ओहाङःसैको यात्नीस् मान्तालम्इ ‘लौ ओउः वाङ्सा खेःओ चाक्पाय् ओहाङः लेःआः’ त दाय्ह्ती ‘इहाङः लेःआः’ तमा दाय्ह्ती तोलेःनानी इत तोओ कुरा नीङ्इ सायःतेःनानी त खेःया ङाकायः इताङ् उःताङ् बोङःलाङ् आल्लाम्। 24दोह् हायःती दाय्ह्सा ङा मान्ताकोः चोः त तोओखे वाङ्ओपाय् दाह्न्याम्सै ब्लक्न्याम्ताङ् प्लीङ्ह्ओ न्याम्लो लेखालेः सबै च्यवःसा दोःलेःनै। 25ओउःत स्याव्लेःनाः ओउःनम् दीन्कोः ङ्हासै ङा मान्ताकोः चोः त तोओकायःपाय् नाःतो तेन्छ्याङ्कोः मान्तालम् ङ्हाम्सा ग्याइली ओहाङःसै ङाइपाय् आन लीह्सीःओ गोरःसा खेःतो। 26ङा फेरी वाङ्सा बेलाहाङःपाय् उय्ह्लेकोः नोआह् त तोओकोः बेलाहाङःलो लेखा स्याव्नाः। 27नोआह् मुतोक्हाङःपाय् मान्तालम्इ जेःधै तुङ्धै बीहा जाङ्ह्धै मुइतो नोआह्पाय् तीः जहास् पोक्नम् दीन्च्युक्हाङः अरु ल्हाव्ह्दैबाङ्कोः मान्तालम् ओउःत हायःदा हायःदा तीःलम्लेः लय्ङ्ती लन्ह्ती वाङ्ती झ्यान्ते सबै ज्युप्तीलेः सीआकाय्। 28ओहाङःसैको लोत् त तोओ मुतोक्हाङःमा सोदोम् गोमोरा नीस् सहर्कोः मान्तालम्इमा जेःधै तुङ्धै लेःधै वीनःधै सुक्धै मुती सबैइ लःलयःकोः काम् जाङ्ह्धै मुओ खेःतो 29ओउःमयःइ ओउःत हायःदा हायःदा लोत्पाय् सोदोम् सहर्सै क्रव्नम् दीन्हाङः परमेस्वर्इ रोमो तोकोलेः त्यावःसै म्हेः ल्होक्ती ओउः नीस् सहर्कोः मान्तालम्कायः सबै झ्योम्ह्तीलेः वाय्आथास। 30ओउःलो लेखालेः ङा फेरी द्यान्ह्ती वाङ्सा बेलाहाङःपाय् मान्तालम्इ जुगाङ् चीःमाःत लःलयःकोः काम्लम् जाङ्ह्तीलेः मुलेःनै। 31ओउः दीन्हाङःपाय् आङ्गन्हाङः मुओ मान्तालम् लःलयःकोः माल्ताल्लम् रोत्सा थेङा कीम्ताङ् द्यान्ह्ती पोक्लाम्। फेरी राङ्हाङः मुओ मान्तालम्पाय् कीम्ताङ् पाय्ह्सा म्हर्लाम्। 32ओउः पाय्ह्सा बोङःओ लोत्कोः बुधीकोः कुरा नीङ्इ चीःतेःनानी माःर ओउःपाय् वाय्तोलेः स्याव्ओआः। 33सुसुखे ङाकोः काम् जाङ्ह्साकायः ‘लौ ङा झाक्ओ कुरापाय् फेसामा ग्याङल ङा सीसामा ग्याङल’ त म्हर्चै ओउःलेः लोने सीती वाय्सालेः स्याव्नै। सुसुखे ङाकोः काम् जाङ्ह्साकायः सीबत्नाःताङः ओउःलेः लोनेः रौ जीङः दोःलेःनै। 34दोङ्सीलेः ओउःनम् दीन्कोः याह्दीङ्हाङः नीस्चाक् ब्रेङःकाय्ती यातै न्हाप्लावःहाङः एनःती मुनाःच त खेःया यात्चाक्खेकायः वेङ्ती आलःनाःथै अरुखे फेती गम्नाः। 35ओहाङःसैको नीस् मोमःचोःपाय् ग्रायःबाङ्हाङः ब्राङ्ती ग्रायःती मुनाःच त खेःयामा यात्चाक्खेकायः आलःनाःथै ओउः अरुखे फेती गम्नाः। 36राङ्हाङः नीस् गोय्चोः काम् जाङ्ह्ती मुनाःच त खेःयामा यात्चाक्खेकायः आलःआथै ओउः अरुखे फेती गम्नाः” त दाय्ह्ती येसुइ लयःकुस् वाह्ओमयःकायः स्यान्ती तोआथास। 37ओउःत स्यान्ओ कुरा सायःती “लौ प्रभुय ओउः आलःसा खेःओ मान्तालम्पाय् गाःताङ् आलःसा” त दाय्ह्ती ओउःमयःइ व्हत्थातो “गाःहाङःलो सीओ मायः मुलेःनाः ओहाङःलेः चार्दोवासै गीधलम् हुम्ती वाङ्नै इलो लेखालेः गाःहाङःलो ङा मुनाङः ओहाङःलेः ङाकोः मान्तालम् हुम्ती वाङ्नै” त दाय्ह्ती येसु त्याङ्लेःआ।
Currently Selected:
लुका 17: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
