लुका 18
18
1ओहाङःसैको येसुइ लयःकुस् वाह्ओमयःकायः “लौ नीङ्पाय् ल्हुङ् घ्युम्तो स्याव्माःत परमेस्वर्कायः गलकायःमा तेती तोसा परनाः” त दाय्ह्ती यात्ज्योः स्यान्सा वीनःराय् तातीलेः तोआथास। 2“लौ यात्ज्योः सहर्हाङः यात्चाक् मुत्ध तात्तो हाकीम् खेःतो। ओउः मान्तापाय् सुकःमा एङःल परमेस्वर्कःमा एङःल। 3ओउः सहर्हाङःमा यात्चाक् बुधा सीओ मोमःचोःमा मुओ खेःतो। ओहाङःसैको ओउः मोमःचोःपाय् दीन्का दीन्लेः मुत्ध जाङ्ह्साकायः ओउः हाकीम्कःताङ् युङ्ती तेती ‘लौ ङाकोः राङ्लम् दोह्लम् आलःसा बोङःओ मान्ताकायः मुत्ध जाङ्ह्ती ङाकायः पेतो हायःताक्ची दै’ त दाय्ह्ती वाङ्झुङ्तो 4ओउः हाकीम्पाय् ङ्हापाय् ओउः मोमःचोःकायः सायःसा ग्याआक्ल। ग्यासापाय् ग्याआक्मालो खेःतो ओउः मोमःचोःपाय् दीन्का दीन् वाङ्ती युङ्तीलेः तेती झ्यान्ते लोन्ते ‘दोङ्सीलेः ङापाय् परमेस्वर्कःमा सुकःमा एङःङल बा। सुकोःमा कुरा सायःसा खेःङल। 5इत खेःसापाय् खेःङल इ मोमःचोःपाय् इच्युक् छ्युह्तीलेः ङाकः आन युङ्ती तेदा तेदा ङा ब्ल्योआलाङः बा। लौ उया छ्यो ओउःकोः मुत्ध ङाइ द्याह् जाङ्ह्लेःनाङः। ङाइ जाङ्ह्माःदीक्पाय् ओउःइ ङाकायः आन सावःताक्नाःताङः बा’ त दाय्ह्ती ओउः हाकीम् म्हर्आ। 6लौ ओउः हाकीम्इ तोओ कुरापाय् पेतोलेः सायःनु दा। 7ओउःच्युक् पेमालो हाकीम् मान्ताकायः अरु वाङ्ती युङ्ती तेआक्तीको ओउः तेओ कुरा लोने जाङ्ह्सा ग्यालेःनाः त खेःया दोङ्सीलेः परमेस्वर्इ लयःकोः मान्तालम्इ ‘ङीकोः बीरोत्लम्सै दल्ताक्ताङी’ त न्हीदीङ् याह्दीङ् तेती तोओ कुरा न्हाङ्तोलेः ग्याती जाङ्ह्नौ। 8माः है ओउःइ रेन्ह्तोलेः जाङ्ह्लेःनौ बा। ओउःइ रेन्ह्तोलेः जाङ्ह्सापाय् जाङ्ह्नौ ओउः मान्ताकोः चोः ल्हाव्ह्दैबाङ्हाङः द्यान्ह्ती वाङ्तोक् बेलाहाङः ओउःकायः ङ्हाम्ओ मान्तालम्पाय् गुच्युक् नाःतो मुधाङ्चै” त दाय्ह्ती प्रभु येसुइ तोआथास।
9यात्नीस् मान्तालम्पाय् “लौ ङाइ पेओ काम् जाङ्ह्सा चीःलेःनाङः” त दाय्ह्ती लयःकोः नेह्रो ओर्ताक्ती नोःओ खेःतो। ओउःमयःपाय् अरु मान्तालम्कायः “रेव्ओलम् लेःआः इ” त म्हर्ती ओउःमयःकः अह्र्नै। इ लयःकोः नेह्रो ओर्ताक्सा बोङःओलम्कायः येसुइ यात्ज्योः वीनःराय् ल्हाक्ती स्यान्आथास। 10“लौ नीस्चाक्पाय् मन्दीर्हाङः परमेस्वर्कायः लुङ्ती तोलाङ् आल्आकाच। यात्चाक्खे फरीसी खेःतो ओउः अरुखे रोमी देस्कोः राजाकायः माल्पोत् उथावओ जीमदार् खेःतो। 11-12ओहाङःसैको ओउः नीस्चाक् मन्दीर्ताङ् दाह्आक्तीको ओउः फरीसीखे चीङ्ती ‘अ परमेस्वर्य ङापाय् अरु मान्तालम्लो लेखालेः रेव्तो काम् जाङ्ह्ओ खेःङल। ङाइ अरुकोः पैसा माःती जेःङल। अरु मान्तालम्कोः बुधीलम्कुस् वाह्ङल। ङापाय् इ जीमदार्च्युक् रेव्तो खेःङल। यात् सातहाङः ङाइ नीस् पल्त उपाङ् काःनाङ्स। ङा दोःओ थोक्लम्कोः दस् भाक्कोः ङाइ याआःज्योः नाङ्कायःलेः बयःनेःनाङ् बा। इच्युक् पेओ काम् जाङ्ह्साकायः ङाइ चीःलेःनाङः त झ्यान्ते नाङ्कायः ङाइ लुङ्तीलेः तोनेःनाङ्’ त दाय्ह्ती ओउः मान्ताखेपाय् लयःकायः तोआकास। 13ओउः जीमदार्खेपाय् लोक्तो मुओ थाव्हाङः चीङ्ती लाङ्काताङ् त्याव्ती योसा रास्ती झ्यान्ते कय्क् क्लय्ह्ती मुआ। ‘अ परमेस्वर्य ङापाय् आन रेव्तो हायःओ मान्ता लेःआः ङ। ङाकायः योनःती योती ङाकोः रेव्झ्याङ्कोः क्युम्ह्ती वाय्बत्चाक्ची दै’ त दाय्ह्ती परमेस्वर्कायः तेतीलेः तोआकान्। 14दोङ्सीलेः ओउः जीमदार्इपाय् परमेस्वर्कायः म्रोताक्ती झ्यान्ते परमेस्वर्कोः मीक्हाङः पेतोलेः स्याव्नाः ओउः फरीसीपाय् परमेस्वर्कायः म्रोताक्माःत लयःकोः मीक्हाङः ह पेतो स्याव्आ। सुखेलो लयःकायः अरुसै ताङ्ह्ताक्सा बोङःनाःइसी ओउःलेः अरुसै मीतो स्याव्लेःनै सुखेलो मीओ काम् जाङ्ह्नानी ओउःलेः अरुसै ताङ्ह्तोलेः स्याव्नै” त दाय्ह्ती येसुइ तोआथास।
15ओहाङःसैको येसुकः “आसीक् तेलाङ् आल्इ” त दाय्ह्ती आमा आपालम्इ लयःकोः चोःलम् येसुकःताङ् वानःसा बोङःनीतो इत च्यवःती येसुकुस् वाह्ओमयःखेइ “हौलम्पाय् वानःलाम्” त दाय्ह्ती जान्ती येसुकःताङ् वानःसा ताक्थासल 16येसुखेइ ओउः हौलम्कायः लयःकःताङ् गोत्ती “खेःल इ हौलम्कायः त्याःमाःत ङाकःताङ् वाङ्पै। इलो खेःओलम्पाय् परमेस्वर्कोः राजीहाङः मुसा दोःनै। 17दोङ्सी दाय्ह्भनाङ् परमेस्वर्कोः राजी पोक्साकायः नीङ्इ इ हौलम्लो लेखालेः स्याव्ती ङ्हाम्सा खेःतेःनै बा खेःतेःल उया पोक्सा दोःल” त दाय्ह्ती येसुइ ओउःकुस् मुओलम्कायः तोआथास।
18ओहाङःसैको यात्चाक् यहुदीलम्कोः ताङ्ह्ओ मान्तापाय् येसुकःताङ् वाङ्ती “अ नाङ् जय्कुमःओ गुरुय ङा सीआक्तीको गलमा द्योक्मालो रौ जीङः दोःसाकायः ङाइ द्याह् दोह् हायःसा खेःनाङः ती” त दाय्ह्ती व्हत्थातो 19“दोह् हायःतीतेः ङाकायःपाय् ‘जय्कुमःओ’ त तोतेःनाःची परमेस्वर्कायः झुङ्आले जय्कुमःओलेः खेःनाः बा। 20लौ परमेस्वर्इ उय्ह्लेहाङः गानाक्ती बयःओ ऐन्कोः कुरा नाङ्इ चीःतेःनौ। अरुकोः बुधीकुस् जार् जाङ्ह्लाम्। मान्ताकायः सात्लाम्। अरु मान्ताकोः थोक्लम् कुःलाम्। माःती गाल्तुम्ती नोःलाम्। लयःकोः आमा आपाइ तोओ कुरापाय् पेतो वाय्क्तीलेः जाङ्ह्उ। इ सबै जाङ्ह्ती गम्सा खेःतो” त दाय्ह्ती येसुइ तोआथै। 21“इपाय् ङाइ हौलम् खेःतोक्हाङःसैकोः जुदालेः सायःती गम्आलाङः” त दाय्ह्ती ओउः मान्ता त्याङ्आ। 22“लौ नाङ्इ यातै कुरा ह जाङ्ह्तेःधाङ्तेःउलु। नाङ् नाःओ गह्र्पाय् दोह् गुच्युक् मुलेःनाः ओउःच्युक्लेः जुदालेः वीनःउ दा। वीनःआक्तीको ओउःकोः मोल्कोः पैसापाय् जेःसा दोःमालो ह्र्यात्लम्कायः वेःती बयःउसु ओहाङःसैको सबै फेती ङाकुस् वाह्अ। ओउःत हायःआक्तीको लाङ्काहाङः नाङ्पाय् आनतेः दोःतेःनाः बा” त दाय्ह्ती येसुइ तोआथै। 23ओउःत तोओ कुरा सायःती ओउः मान्तापाय् ल्हुङ् झ्योम्ह्ती आन लीह्तो स्याव्आ दोह् हायःती दाय्ह्सा ओउःकोः पैसालम् माल्ताल्लम् नाःतो खेःतो ओउःपाय् वीनःसा ग्याल। 24ओउः मान्तापाय् लीह्ती मुओ येसुइ च्यवःती “लौ ओउःच्युक् नाःतो नाःओ मान्तालम्कायः परमेस्वर्कोः राजीहाङः पोक्सा आन चाक्तो लेःआः बा। 25माः है नाःतो नाःओ मान्ता परमेस्वर्कोः राजीहाङः पोक्साकायः आन चाक्तो लेःआः ओउःत हायःओसै यात्ज्योः उत्स्याः ग्याप्कोः घाङ्हाङः योल्ह्ती ज्याल्सा ङोस्आनाः बा” त दाय्ह्ती येसु दाय्ह्आ। 26ओउःत दाय्ह्ओ सायःती येसुकुस् वाह्ओमयः ग्याङ्ह्ती “ओउःत खेःया सुलो ओउःकोः राजी पोक्ती रौ जीङः दोःचै” त दाय्ह्ती नोःकाय्आकाय् 27“लौ मान्ताइ जाङ्ह्सा खाय्मालो कुरापाय् परमेस्वर्खेइ जाङ्ह्सा खाय्लेःनौ बा” त दाय्ह्ती येसुइ तोआथास। 28“ङीपाय् लयःकोः कीम्लम् दोह्लम् फेती नाङ्कुस् वाह्ओ लेःआः ङी” त दाय्ह्ती पत्रुस् दाय्ह्आ। 29“दोङ्सी दाय्ह्भनाङ् परमेस्वर्कोः राजीकोः काम् जाङ्ह्साकायः सुसुइ लयःकोः कीम्लम्मा लयःकोः आमा आपालम् बुधीचोङ्लम् पुःचोङ् हौचोङ्लम्कायःमा फेनानी 30ओउःकायःलेः इ ल्हाव्ह्दैबाङ्हाङः वाह्तोक्हाङःमा ओउःकोः फेझ्याङ्कायः न्हाङ्तोलेः दोःनै लोने लाङ्काहाङः गलमा द्योक्मालो रौ जीङःमा दोःलेःनै” त दाय्ह्ती येसुइ तोआथास।
31ओहाङःसैको येसुइ ओउः बारजन लयःइ छ्युङ्ह्ओमयः गोत्ती वानःती “लौ दा ङी द्याह् यरुसालेम्ताङ् आल्नाःतय्ही। ओहाङः दाह्आक्तीको ओउः उय्ह्लेकोः परमेस्वर्कोः कुरा छ्यानःओलम्इ ओउः मान्ताकोः चोः त तोओकायः लेखओ कुरा सबै ताप्तोलेः स्याव्नाः। 32इतलेः ओउः मान्ताकोः चोःकायःपाय् अरुलम्इ यहुदी खेःमालो मान्तालम्कःताङ् सात्साकायः दाक्लेःनानी। ओउःमयःकःताङ् दाक्आक्तीको ओउःकायःपाय् रेव्तो हायःती हेला क्लाःती द्युर् द्युरःतीमा लाइ स्राप्आक्तीकोमा सात्लेःनानी। 33सात्सापाय् सात्नीतो सुम् दीन् पुत्आक्तीको ओउःपाय् उह्ती च्योक्लेःनाः” त दाय्ह्ती येसु लयःकायः स्याव्सा खेःओ कुरा छ्यान्ह्थासतो 34ओउःइ तोओ कुरापाय् ओउः बारजनइ तय्ह्सा खाय्नीली। ओउः कुराकोः माने ओउःमयःकायः दोःताक्थासल ओउःत झ्यान्ते चीःसा खाय्नीली।
35ओउःत तोआक्तीको येसुपाय् यरुसालेम्ताङ् आल्ओ ल्याम्हाङः वाह्ती यरीखो त तोओ सहर्ताङ् दाह्आकाय्। ओहाङः दाह्तोक् बेलाहाङः यात्चाक् मीक् लोक्ओ मान्ता ल्याम्कोः छेव्हाङः तेधै मुओ खेःतो। 36ओहाङःसैको ओउःइ नाःतो मान्तालम् वाह्ओ सायःती झ्यान्ते “लौ इच्युक् नाःतो मान्तालम् दोह् हायःलाङ् इतलेः वाह्ती मुओ” त दाय्ह्ती अरुकायः व्हत्आकान्। 37“ए नासरेत् गाव्कोः येसुलेः वाङ्आनाः” त दाय्ह्ती छ्यानःआथै। 38इत सायःआक्तीको “अ येसुय नाङ् दावुद् राजाकोः प्लोमःदानेतेः ङाकायः योनःतीलेः सायःचाक्ची दै” त दाय्ह्ती ओउः मीक् लोक्ओ मान्ताइ आन सोतोलेः गोःआकान् 39इत गोःतोक्हाङः ओउःकोः ङ्हाहाङः हुम्ती मुओ मान्तालम्इ “लौ ङैमाःत मुअ” त दाय्ह्ती जान्तीलेः तोथातो ओउःइ न्हाङ्तोलेः “अ नाङ् दावुद् राजाकोः प्लोमःदानेतेः ङाकायः योनःतीलेः सायःचाक्ची दै” त दाय्ह्ती गोःआकान्। 40इत गोःओ सायःती येसु न्यास्ती “ओउः गोःओ मान्ताकायः ङाकःताङ् वानःउ” त दाय्ह्ती येसुइ हुम्ओ मान्तालम्कायः तोआकान्। ओहाङःसैको ओउः मीक् लोक्ओ मान्ताकायः येसुकःताङ् द्याङ्तो वानःआक्तीको 41“लौ नाङ्कायः दोह् हायःचेःनाङ्” त दाय्ह्ती येसुइ व्हत्थातो “अ प्रभुय ङाकोः मीक् स्याक्ताक्बत्ची दै” त दाय्ह्ती ओउः मान्ता तेआ। 42“लौ उया नाङ्इ इतलेः ङ्हाम्तेःनाःची नाङ्कोः ङ्हाम्झ्याङ्कायः मीक् स्याक्तेःआ बा” त दाय्ह्ती येसु दाय्ह्ओ 43कुस्ब्रक्त ओउः मान्ताइ मीक्इ पेतो च्यवःती झ्यान्ते परमेस्वर्कायः लुङ्ती ताङ्ह्ताक्ती तोधै येसुकायः गुल्ह्आथै। इत योती ओउः अरु हुम्ओ मान्तालम्इमा परमेस्वर्कायः लुङ्तीलेः ताङ्ह्ताक्आथै।
Currently Selected:
लुका 18: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
