लुका 3
3
1ओहाङःसैको तीबेरीयस् त तोओपाय् रोमी माहाराजा पन्र बर्स स्याव्आक्तीको ओउः बेलाहाङः पोन्तीयस् पीलातस् त तोओखे यहुदीयाकोः अन्चलादीस् खेःतो। फेरी गालील देस्कोः राजापाय् हेरोद् त तोओखे खेःतो। ओउःकोः फीलीप् त तोओ हौखेपाय् इतुरीया देस्मा त्राखोनीतीस् देस्मा ओउःनीस् देस्कोः राजा खेःतो। फेरी लुसानीयस् त तोओखे आबीलेने देस्कोः राजा खेःतो। 2-3ओहाङःसैको यरुसालेम्हाङः आनास्मा कयाफा त तोओमा प्रधान् पुरोहीत् खेःतोक्हाङः जखरीयाकोः चोः युहना त तोओपाय् याक्गार्सीःमालो बेलाङ्हाङः याक्ओ खेःतो। ओहाङः याक्तोक्हाङः परमेस्वर्कोः कुरा ल्हुङ्हाङः दोःती झ्यान्ते युहनापाय् योर्दन् खोलाकोः इःसै उःसै ब्याह्ती वाह्ती परमेस्वर्कोः कुरा थोल्ह्ती तोआकान्। “लौ नीङ्पाय् लःलयःकोः रेव्ओ काम्लम् फेती वाय्ती परमेस्वर्कःताङ् द्यान्ह्न। ओउःत हायःआक्तीको नीङ्कः परमेस्वर्कोः मल्ह्ओ ल्हुङ्पाय् स्याक्नाः। ओहाङःसैको नीङ्इ इत हायःओ त अरुकायः छ्यानःसाकायः तीःहाङः बाप्तीस्मा त्याक्नु दा” त दाय्ह्ती युहनाइ सबैकायः थोल्ह्ती तोआथास। 4इत हायःओपाय् यात्चाक् परमेस्वर्कोः कुरा छ्यानःओ मान्ता एसाया त तोओइ उय्ह्लेहाङः लेखआकान् “लौ मान्ता याक्गार्सीःमालो बेलाङ्हाङः यात्चाक्इ कुरा तोती गोःती मुनाः ‘लौ प्रभुकायः पेतो रोम्साकायः ओउः वाङ्धाङ्माःखाहाङः ओउःकोः वाह्सा खेःओ ल्याम् ङ्हालेः पेतो जाङ्ह्आक्नु दा। 5ल्याम्कोः ह्र्योङ्ह्लम्मा पाम्ह्ती वाय्नु। ल्याम्कोः बुम्लम्मा तव्ह्ती वाय्नु। ओउः ल्याम्पाय् धेङ्ताक्ती वाह्सा दुक्तो थाव्लम् ङोस्तोलेः जाङ्ह्नु दा। 6ओहाङःसैको लोन्ते मान्तालम्कायः रेव्ओसै दल्ताक्सा प्रभु वाङ्ओलेः सबैलम्इ च्यवःनानी’ त दाय्ह्ती ओउः मान्ता दाय्ह्आ” एत एसायाइ तोती लेखआकान्।
7ओहाङःसैको युहनाकःताङ् नाःतो मान्तालम् बाप्तीस्मा त्याक्लाङ् हुम्ती वाङ्तोक्हाङः “लौ नीङ् कुयः युक्कोः चोःतेः खेःतेःनै। नीङ्पाय् इहाङः वाङ्ती ‘रेव्ओ काम् जाङ्ह्झ्याङ्कोः न्युम्ह्ताक्ओसै दल्सा दोःलेःनाः’ त म्हर्तेःनै यादो। इत हायःसा सुइतेः तोतेःआकाय्। परमेस्वर्इ न्युम्ह्ताक्ओसै गत हायःतीतेः क्रव्सा खाय्तेःनानी र। 8‘ङी आब्राहाम्कोः प्लोमःदानेकायःपाय् परमेस्वर्इ गलमा न्युम्ह्ताक्तय्हीली वाय्तय्हीली’ ततेः ताःतेःचनै। दोङ्सी दाय्ह्भनाङ् नीङ्खे मीह्ती वाय्तो स्याव्नै त खेःया दोङ्सीलेः आब्राहाम्कायः परमेस्वर्इ अरु अरु प्लोमःदाने मोमःदानेखे इ साःहाङः मुओ बाङ्लम् थाङ्ताक्ती जाङ्ह्सालेः खाय्लेःनौ बा। लौ नीङ्मा ल्हुङ् द्यान्ह्ती रेव्ओ काम् जाङ्ह्ओ फेसा खेःतेःनै। 9सायः पेतो ग्रान्ह्ती सायःमालो सीङःकायः मान्ताइ खाम्ह्ती ओल्ती तुस्ओ सीङः जाङ्ह्ती वाय्नानी माःर। इलो लेखालेः नीङ्इ पेओ काम् जाङ्ह्तेःनीली त खेःया परमेस्वर्इ द्याह् ह्र्योङःती वाय्तो स्याव्ताक्तेःनै बा” त दाय्ह्ती युहनाइपाय् बाप्तीस्मा त्याक्लाङ् वाङ्ओ मान्तालम्कायः तोआथास। 10ओउःत तोओ कुरा सायःआक्तीको “लौ उया ङीइ दोह् हायःचाङःसु ती” त दाय्ह्ती ओउः हुम्ती सायःओलम्इ व्हत्आथै। 11“लौ नीस्ज्याङ् ग्ल्युप्ओ नाय् नाःओ मान्ताखेइ नाय् नाःमालो मान्ताखेकायः यात्ज्याङ् वेःती बयःकाय्न। जेःगा नाःओ मान्ताखेइ जेःगा नाःमालो मान्ताखेकायःमा बयःकाय्न” त दाय्ह्ती युहनाइ त्याङ्ती तोआथास। 12ओहाङःसैको पैसा उथावओ जीमदार्लम्मा बाप्तीस्मा त्याक्सा थेङा तेलाङ् वाङ्आकाय्। 13वाङ्आक्तीको “अ गुरुय ङीइ दोह् हायःचाङःसु ती” त दाय्ह्ती ओउःमयःइमा व्हत्नीतो “लौ उथावसा खेःओ पैसासै न्हाङ्तोलेः नाःतो त्याक्ती जेःलाम्” त दाय्ह्ती तोआथास। 14फेरी सीपाहीलम्मा वाङ्ती “लौ ङीखेइ आने दोह् हायःचाङःसु” त दाय्ह्ती युहनाकायः व्हत्आकानी। “लौ अरुकोः सामान् लालाम् अरुकायः माःती गाल्तुम्ती नोःलाम्। नीङ्कोः जागीर् य्हवःमाःत त्याक्नु दा” त दाय्ह्ती युहनाइ त्याङ्ती तोआकान्।
15युहनाइ एत तोतोक्हाङः “लौ इपाय् परमेस्वर्इ तोती गम्ओ वाङ्सा खेःओ ख्रीस् लेःआः यादो” त म्हर्ती सायःओ मान्तालम् ल्हुङ्हाङः म्हर्आकाय्। 16ओउःमयः म्हर्ओ युहनाइ चीःती “लौ ङाखेइ तीःइलेः बाप्तीस्मा बयःनेःनाङ्सतो लोन्तेसै यात्चाक् ङासै आन ताङ्ह्ओ चाक्आः वाङ्लेःनाः बा। ओउःकायःपाय् ङाच्युक् मीओ मान्तापाय् ओउःकोः जुत्ता फास्सामा स्याव्ङल। ओउःखेइ परमेस्वर्कोः ग्वालामःइमा म्हेःइमा बाप्तीस्मा त तोओ बयःतेःनै। 17ओउःइपाय् लोन्ते चुय्कोः धान्ह्लो लेखालेः पेओ मान्तालम्कःसै पेमालोलम् पेङ्कलःती चल्नौ। पेओ मान्तालम्खेकायः परमेस्वर्इ चुय्लो लेखा त्युम्ह्ती लयःकःताङ् वानःथासतो ओउः पेमालोलम्खेकायः धान्ह्लो लेखालेः गलमा सीमालो म्हेःहाङः ताती वाय्नाःथास” त दाय्ह्ती युहनाइ स्यान्ती तोआथास। 18एतलेः युहनाइ नाःतो कुरा स्यान्ती “लौ परमेस्वर्कोः काम् पेतो जाङ्ह्नु” त दाय्ह्ती मान्तालम्कायः होम्सा बोङःआकान्।
19ओउः हुम्ती वाङ्ओलम्खेकायः युहनाइ होम्सा बोङःथातो हेरोद् राजाइ लयःकोः हौकोः बुधी हेरोदीयस् त तोओकायः जार् काती वानःओमा अरु पेमालो काम् जाङ्ह्ओ त झ्यान्ते हेरोद्खेकायः युहनाइ जान्आकान्। 20ओउःकायः आन जान्ओ त झ्यान्ते हेरोद् राजाइ ओउःकोः अरु रेव्ओ काम्कायः पाःती लोने युहनाकायः झ्याल्खानहाङः काआथै।
21ओहाङःसैको याक्गार्सीःमालो बेलाङ् मुधाङ्तोक्हाङः युहनाइ अरु मान्तालम्कायः बाप्तीस्मा जाङ्ह्आक्तीको येसुकायःमा बाप्तीस्मा बयःआकान्। 22ओउःकायः बाप्तीस्मा बयःआक्तीको येसुइ परमेस्वर्कायः तोतोक्हाङः फेल्बाङ् वाक्ती फोल्आ ओहाङःसैको धुकुर्वाःकोः रुप्लो थाङ्ती परमेस्वर्कोः ग्वालामःलेः येसुकोः थाराय्सै ग्ल्युङ्ह्ती वाङ्आ “लौ नाङ्पाय् ङाकोः आन राप्ओ ल्हुङ्गोरे चोःलेःतेः खेःतेःनाः बा। नाङ्कः ङा आन म्रोलेःनाङः” त दाय्ह्ती लाङ्कासै यात्ज्योः हाव्नयः दाय्ह्आ।
23ओउःतलेः दाय्ह्ती दाय्ह्आ ओहाङःसैको येसुकोः स्यान्ती तोओ काम् जाङ्ह्खयःतोक् बेलाहाङः येसुपाय् तीस् बर्सच्युक् स्याव्ओ खेःतो। ओउःपाय् युसेफ् त तोओकोः गोय्चोःचोः लेःआः त मान्तालम् म्हर्आकाय्। युसेफ्कोः आपा एली त तोओ खेःतो। 24एलीकोः आपा मतथात् खेःतो। मतथात्कोः आपा लेवी लेःआः। लेवीकोः आपा मेल्की। मेल्कीकोः आपा यान्ना। यान्नाकोः आपा युसेफ्। 25युसेफ्कोः आपा मतथीयस्। मतथीयस्कोः आपा आमोस्। आमोस्कोः आपा नहुम्। नहुम्कोः आपा एस्ली। एस्लीकोः आपा नग्गै। 26नग्गैकोः आपा माथ। माथकोः आपा मतथीयस्। मतथीयस्कोः आपा सेमेयीन्। सेमेयीन्कोः आपा योसेक्। योसेक्कोः आपा योदा। 27योदाकोः आपा युहनान्। युहनान्कोः आपा ह्रेसा। ह्रेसाकोः आपा यरुबाबेल्। यरुबाबेल्कोः आपा सलथीएल्। सलथीएल्कोः आपा नेरी। 28नेरीकोः आपा मेल्की। मेल्कीकोः आपा आदी। आदीकोः आपा कोसाम्। कोसाम्कोः आपा एल्मादाम्। एल्मादाम्कोः आपा एर्। 29एर्कोः आपा यहोस्युआ। यहोस्युआकोः आपा एलीएजर्। एलीएजर्कोः आपा योरीम्। योरीम्कोः आपा मतथात्। मतथात्कोः आपा लेवी। 30लेवीकोः आपा सीमीयोन्। सीमीयोन्कोः आपा यहुदा। यहुदाकोः आपा युसेफ्। युसेफ्कोः आपा योनाम्। योनाम्कोः आपा एलीआकीम्। 31एलीआकीम्कोः आपा मेलीया। मेलीयाकोः आपा मेन्ना। मेन्नाकोः आपा मताथा। मताथाकोः आपा नथान्। नथान्कोः आपा दावुद् त तोओ खेःतो।
32ओहाङःसैको दावुद् राजाकोः आपा येसे लेःआः खेःतो। येसेकोः आपा ओबेद्। ओबेद्कोः आपा बोआस्। बोआस्कोः आपा सल्मोन्। सल्मोन्कोः आपा नहस्योन्। नहस्योन्कोः आपा आमीनादाब्। 33आमीनादाब्कोः आपा आद्मीन्। आद्मीन्कोः आपा आर्नी। आर्नीकोः आपा हेस्रोन्। हेस्रोन्कोः आपा फेरेस्। फेरेस्कोः आपा यहुदा। 34यहुदाकोः आपा याकुब्। याकुब्कोः आपा इसाक्। इसाक्कोः आपा आब्राहाम्। आब्राहाम्कोः आपा तेराह्। तेराह्कोः आपा नाहोर्। नाहोर्कोः आपा सेरुक्। 35सेरुक्कोः आपा रेयु। रेयुकोः आपा पेलेक्। पेलेक्कोः आपा एबेर्। एबेर्कोः आपा सेलाह्। सेलाह्कोः आपा कनान्। 36कनान्कोः आपा आर्फक्साद्। आर्फक्साद्कोः आपा सेम्। सेम्कोः आपा नोआह्। नोआह्कोः आपा लामेक्। लामेक्कोः आपा मेथुसेला। 37मेथुसेलाकोः आपा हनोक्। हनोक्कोः आपा यरेद्। यरेद्कोः आपा महलालील्। महलालील्कोः आपा कनान्। 38कनान्कोः आपा एनोस्। एनोस्कोः आपा सेथ्। सेथ्कोः आपा आदम्। फेरी आदम्कोः आपा त तोओ परमेस्वर्लेः खेःतो।
Currently Selected:
लुका 3: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
