लुका 2
2
1ओहाङःसैको युहनापाय् हौ मुतोक्हाङः रोमी देस्कोः राजाइ “लौ सबै मान्ताकोः मय्ङ् लेखपै” त दाय्ह्ती हुकुम् बयःआकान्। ओउःत झ्यान्ते रोमी राजाइ क्लीमःओ देस्लम्हाङः सबै मान्तालम्कोः मय्ङ् लेखती थेङ्सा खेःतो। 2इ मय्ङ् लेखओकोः तोहा जाङ्ह्तोक् बेलाहाङः औगुस्तस् त तोओ रोमी देस्कोः सीजर् राजा खेःतो फेरी क्युरीनीयस् त तोओ सीरीयाकोः अन्चलादीस् खेःतो। 3ओहाङःसैको मय्ङ् लेखसाकायः मान्तालम् लःलयःकोः ओत्ओ जील्लाताङ् आल्सा खेःतो। 4ओउःत हायःसा थेङा मरीयम्कायः धयःती गम्ओ गोय्चोः युसेफ् त तोओ लयः याक्ओ गालील जील्लाकोः नासरेत् गाव्सै आल्ती लयःकोः तोकानः दावुद् राजाकोः दोःओ बेथ्लेहेम् गाव्ताङ् मय्ङ् लेखलाङ् वाङ्आ। 5मरीयम्मा ओउःकुस् मय्ङ् लेखलाङ् आल्आ। आने मरीयम्पाय् चोःतुक् लात्ती मुओ खेःतो। 6ओहाङःसैको बेथ्लेहेम् गाव्ताङ् दाह्ती मुतोक्हाङः मरीयम्कोः चोः ओत्सा बेला स्याव्ती गोय्चोःचोः दोःआकाच। 7ओउः जेथा चोः दोःतोक्हाङः नीस् पय्क्चाःकायः कीम्कोः कोथाहाङः एनःसा दोःचल आमाखेइ चोःकायः नाय्इ पोतोलःती स्याःकोः खोल्माहाङः पोस्ती गम्आकान्।
8ओहाङःसैको ओउः चोः ओत्नम् दीन्कोः याह्दीङ्हाङः बेथ्लेहेम् गाव्कोः चवर्हाङः भेदामेत्छ्याःकायः ल्युङ्ह्ती मुओ ह्रामःओ मान्तालम् खेःइतो। 9ओउःमयः ल्युङ्ह्ती मुतोक्हाङः यात्चाक् परमेस्वर्कोः लाङ्कासै ल्होक्ओमयः द्याङ्तोलेः थाआ। थाआक्तीको योती मुओलम्कोः थाराय्हाङः परमेस्वर्कःसै आन पेतो अङ्ग थङ्गत थोङ्ओ खेःतो एत च्यवःती ओउः मान्तालम् जुगाङ् रैआकाय्। 10ओउःमयः रैतोक्हाङः “लौ रैतेःचानाः ङाइ सबै मान्ताकायः म्रोताक्सा पेओ समचार् वानःनेःआलाङ्स। 11लौ दावुद् राजाकोः लयः दोःओ गाव्हाङः तेन्पाय् यात्ज्योः गोय्चोःचोः ओत्ओ लेःआः। ओउःइ मान्तालम्कायः ओउःमयःकोः रेव्झ्याङ्कःसै दल्ताक्लाङ्लेः वाङ्ओआः बा। ओउःपाय् परमेस्वर्इ तोती गम्ओ वाङ्सा खेःओ प्रभु ख्रीस् त तोसालेः। 12ओउः चोःकायः गत तय्ह्सा त दाय्ह्सा आल्आक्तीको नीङ्इ यात्ज्योः तोहा ओत्ओ चोःपाय् नाय्इ पोतोलःती खोल्माहाङः एनःती मुओ च्यवःतेःनानी। ओउः च्यवःआक्तीको ‘लौ इपाय् ओउः ल्होक्ओमयःइ तोओ चोः लेःआः’ त चीःसा खाय्तेःनानी” त दाय्ह्ती ओउः ल्होक्ओमयःइ तोआथास। 13-14ओउःत तोती रोमो तोकोलेः ओउः ल्होक्ओमयःकुस् नाःतो अरुलम् थाती “लौ ‘परमेस्वर्पाय् सबैसै ताङ्ह्लेःनाः सबैसै पेलेःनाः’ त सबै लुङ्ती तोपानी। ल्हाव्ह्दैबाङ्कोः मान्तालम्कायः योनःतीलेः योती परमेस्वर्इ ओउःमयःकायः धोमाय्ओ ल्हुङ् बयःलेःनौ” त दाय्ह्ती सबै ल्होक्ओमयःइ परमेस्वर्कायः झाह्ती तोआकानी।
15ओहाङःसैको ओउः ल्होक्ओमयः पाय्ह्आक्तीको “लौ बेथ्लेहेम्ताङ् आल्इ दा इ प्रभु परमेस्वर्इ छ्यानःओ कुरापाय् योलाङ् आल्इ” त दाय्ह्ती ओउः भेदा मेत्छ्याः ह्रामःओ मान्तालम् लयःमयः नोःकाय्आकाय्। 16ओउःत नोःकाय्आक्तीको ओउःमयः बेथ्लेहेम्ताङ् रेन्ह्तोलेः दाह्ती वाङ्ती युसेफ् मरीयम् नीस्पय्क्चाः खोल्माहाङः क्रुस्ती ओउः तोहा ओत्ओ चोः ओहाङः एनःती मुओ च्यवःआकानी। 17ओउः चोः च्यवःआक्तीको ओउः ल्होक्ओमयःइ ङ्हा तोओ चोःकोः कुरापाय् चोःकोः आमा आपाकायः सबै ल्हाक्ती छ्यानःआकानी। 18फेरी ओउःमयःइ ल्हाक्ती छ्यानःओ कुरा सायःआक्तीको सबै मान्तालम्खे ग्याङ्ह्आकाय् 19मरीयम्खेइ इ कुरा ल्हुङ्हाङः सेती आन लाय्आकान्। 20ओहाङःसैको ओउः भेदा ह्रामःओ मान्तालम् आल्ती नोःकाय्ती “दोङ्सीलेः गतलो ओउः ल्होक्ओमयःइ तोआतय्ही ओउःतलेः ङीइ च्यवःआकानी” त दाय्ह्ती ओउःमयः परमेस्वर्कायः लुङ्ती तोती चोङाय्तीलेः पाय्ह्आकाय्।
21ओउः भेदा ह्रामःओ मान्तालम् पाय्ह्आकाय्। ओहाङःसैको ओउः चोः ओत्ओहाङःसै आत् दीन् पुत्आ। आत् दीन् पुत्आक्तीको ओउः चोःकायः पुन् तात्सा जवओ जाङ्ह्सा बेलाहाङः “येसु” त मय्ङ्आकानी। इ मय्ङ्पाय् मरीयम्कायः चोः ओत्धाङ्माःखाहाङः परमेस्वर्कोः ल्होक्ओमयःइ तोती बयःथातो ओउःत झ्यान्ते आमा आपाइ येसु त मय्ङ्आकाचु। 22मय्ङ् बयःआक्तीको लोन्ते ओउः चोःकोः आमाकोः छय्ङ्ताक्सा दीन्लम् पुत्आक्तीको मोसाइ गानाक्ती तोओलो लेखा ओउःनीस्इ चोःकायः परमेस्वर्कोः मन्दीर्ताङ् लात्ती आलःआथै 23दोह् हायःती दाय्ह्सा परमेस्वर्कःसै दोःओ उय्ह्लेकोः मोसाइ लेखओ ऐन्हाङः “लौ नीङ्कोः जेथा गोय्चोःचोःपाय् परमेस्वर्कायः छ्यानःती तोती गम्सा खेःतो” त लेखती मुनाः। 24फेरी “लयःकोः चोः तोहा ओत्ओहाङः आमाइ नीस्ज्याङ् धुकुर्वाःया परेवाःकोः चोःया परमेस्वर्कायः ल्हासा खेःतो” तमा लेखती मुनाः। ओउःत झ्यान्ते येसुकोः आमा आपाइ ओउःकायः यरुसालेम्हाङः मुओ मन्दीर्ताङ् आलःआथै।
25मन्दीर्ताङ् आलःतोक्हाङः यात्चाक् परमेस्वर्कोः कुरा आन झाह्ती जाङ्ह्ओ मान्ता मुओ खेःतो। ओउःकोः मय्ङ् सीमीयोन् त तोओलेः खेःतो। सीमीयोन्पाय् इस्राएल् जात्कोः मान्तालम्कायः दल्ताक्सा दीन्कायः आन ल्युङ्ह्ती मुआ। फेरी परमेस्वर्कोः ग्वालामः दोःती 26“लौ नाङ्कोः सीमाःखाहाङः परमेस्वर्कोः ङ्हा तोती गम्ओ ख्रीस् त तोओकायः नाङ्इ च्यवःसा दोःतेःनाः” त दाय्ह्ती परमेस्वर्कोः ग्वालामःइ सीमीयोन्कायः छ्यानःती तोआथै। 27इत तोआक्तीको परमेस्वर्कोः ग्वालामःइ सीमीयोन्कायः मन्दीर्ताङ् आलःआथै। मन्दीर्हाङः वाङ्ती मुतोक्हाङः येसुकोः आमा आपाइ चोःकायःमा ऐन्इ तोओलो लेखा मन्दीर्ताङ् छ्यानःलाङ् लात्ती वानःआकाचु। 28आमा आपानीस्इ येसु चोःकायः लात्ती वानःओ च्यवःती सीमीयोन्इ ओउः चोःपाय् आमाकःसै त्याक्ती लयःकःताङ् खोलःती गम्आथै 29-31“लौ प्रभु परमेस्वर्य नाङ्इ ङाकायः तोती गम्ओ कुरा द्याह् स्याव्ओआः बा। इ सबैकोः मीक्हाङः दल्ताक्लाङ् वाङ्सा खेःओ मान्तापाय् ङाइमा लयःकोः मीक्इ च्यवःआलाङः बा ओउःत झ्यान्ते ङापाय् सीयामा स्याव्नाङः। 32इ चोःइपाय् लोन्ते यहुदी खेःमालो जात्कोः मान्तालम्कायः नाङ्कोः पेओ वाङ्सा खेःओ ल्याम् हवःती छ्यानःनाःथास। ओहाङःसैको नाङ्कोः इस्राएल् जात्कोः मान्तालम्कायः ओउःइ ताङ्ह्ताक्लेःनै” त दाय्ह्ती सीमीयोन्इ परमेस्वर्कायः झाह्ती तोआकान्। 33ओउःत तोओ सायःती येसुकोः आमा आपानीस् आन ग्याङ्ह्आकाच। 34-35ओहाङःसैको ओउःनीस्कायः सीमीयोन्इ आसीक् बयःती “लौ लोन्ते इ नाङ्कोः चोःइ स्यान्ती तोओ कुरा नाःतो इस्राएली मान्तालम्खेइ ओउः कुरा ङ्हाम्माःत झ्यान्ते सीती वाय्लेःनै अरुलम्खे ओउःकोः कुरा ङ्हाम्ती झ्यान्ते पेओ रौ जीङः दोःनै। ओउःकोः कुरा सायःतोक्हाङः मान्ताकोः ल्हुङ्तुक् पेनाःया पेलया त छ्यानःओलेः स्याव्नाः। माः रैस लोन्ते नाङ्कोः लयःकोः ल्हुङ्पाय् आन लीह्तोतेः स्याव्तेःनाः” त दाय्ह्ती सीमीयोन्इ मरीयम्कायः तोआथै।
36ओउःत सीमीयोन्इ तोआथै ओहाङःसैको ओउःहाङःमा यात्चाक् परमेस्वर्कोः कुरा छ्यानःती स्यान्ओ बुधी मोमःचोः मुओ खेःतो। ओउः मोमःचोःपाय् आसेर् खलक्कोः फनुएल् त तोओकोः चोःद्याङ् खेःतो। 37बुधाकः पाय्ह्आक्तीको सात् बर्सहाङः ओउः बुधाखे सीआ। ओउः हाना त तोओखे चौरासी बर्सकायः स्याव्ओ फेरी न्हीदीङ्मा याह्दीङ्हाङःमा परमेस्वर्कायः झाह्धै तोधै मुतो बेला बेलाहाङः उपाङ् काःधैमा मुतो। 38ओहाङःसैको येसुकायः वानःतोक्हाङः हानामा मन्दीर्ताङ् दाह्आ। मन्दीर्ताङ् दाह्ती येसु चोःखेकायः च्यवःती हानाखेइ परमेस्वर्कायः चोङाय्तीलेः लुङ्ती तोआकान्। ओहाङःसैको सबै “लौ यरुसालेम्कायः दल्ताक्सा चाक्पाय् वाङ्पाः” त दाय्ह्ती ओउः वाङ्सा खेःओ ख्रीस्कायः ल्युङ्ह्ती मुओलम्कायः “लौ ओउः ख्रीस् वाङ्ओपाय् ङाइमा च्यवःआलाङः बा” त दाय्ह्ती हानाइ ल्हाक्ती छ्यानःआथास। 39ओहाङःसैको मन्दीर्कोः कुरा सबै जाङ्ह्ती खाय्आक्तीको मरीयम् पय्क्चाः येसु चोः लात्ती लयःकोः गालील अन्चल्कोः नासरेत् सहर्ताङ् द्यान्ह्ती पाय्ह्आकाच। 40ओहाङःसैको येसु त तोओपाय् ब्राव्ती ताङ्ह्ती ल्हुङ् व्हक्ती व्हाय्तो स्याव्आ। ओउःकायः परमेस्वर्इ योनःती योतीलेः पेतो स्याव्ताक्आथै।
41ओहाङःसैको यहुदी मान्तालम्कोः च्योल्ओ दीन् त तोओ छ्यात्हाङः येसुकोः आमा आपापाय् यरुसालेम्ताङ् साल् साल्हाङः आल्ओ खेःचतो। 42ओउःत झ्यान्ते येसु बार बर्स स्याव्तोक्हाङः ओउः साल्कोः च्योल्ओ दीन्कोः छ्यात्हाङः येसुकोः आमा आपाइ ओउःकायः यरुसालेम्ताङ् लात्ती आलःआथै। 43यरुसालेम्ताङ् आलःआक्तीको ओउः छ्यात्कोः जवसा खेःओ कुराकायः सबै जाङ्ह्ती द्योक्आक्तीको आमा आपानीस् कीम्ताङ् द्यान्ह्ती पाय्ह्आकाच। ओउःनीस्खे द्यान्ह्ती पाय्ह्तोक्हाङः येसु चोःखे आमा आपाइ चीःमाःत यरुसालेम्हाङः मुधाङ्लेःआ। 44“नीचीकोः साथीलम्कुस् वाङ्ती मुनाः” त म्हर्ती येसुकोः आमा आपापाय् चीङ्ती आल्ती पाय्ह्ओ ल्याम्हाङः यात् दीन्कायःच्युक् वाह्आकाच। यात् दीन्कायःच्युक् वाह्आक्तीको राम्हसैलोहाङः येसुकायः लयःकोः मान्तालम्कःहाङः बोङःचुतो च्यवःथाल। 45ओउःत झ्यान्ते ओउःनीस् यरुसालेम्ताङ् बोङःलाङ् द्यान्ह्ती आल्आकाच। आल्ती यरुसालेम्ताङ् दाह्आक्तीको सुम् दीन् पुत्आ। 46सुम् दीन् पुत्आक्तीकोलेः ओउःनीस्इ येसुकायः परमेस्वर्कोः मन्दीर्हाङः च्यवःआकाचु। ओहाङः येसु धर्मा स्यान्ओमयःकुस् मुती ओउःमयःइ स्यान्ओ कुरा सायःतीमा मुओ ओउःमयःकायः व्हत्तीमा मुओ खेःतो। 47“लौ इच्युक् दीन् ज्याङःधाङ्मालो मान्तापाय् गत हायःती इलो खेःओ कुरा व्हाय्तोलेः चीःसा खाय्नौ र” त म्हर्ती ओउः स्यान्ओ मान्तालम् ग्याङ्ह्आकाय्। 48ओहाङःसैको येसु एत हायःती मुओ च्यवःती ओउःकोः आमा आपानीस्मा ग्याङ्ह्आकाच। “अ चोः दोह् हायःतीतेः एतलेः लीह्ताक्तेःआताङ्च। ङामा नाङ्कोः आपाइमा नाङ्कायः बोङःती नीची आन ल्हुङ् र्याङःआकाच” त दाय्ह्ती येसुकायः आमाइ तोआकान्। 49-50“अ ङाकायः एत बोङःसा परतेःजल। ङाइपाय् लयःकोः परमेस्वर् आपाकोः काम् जाङ्ह्ती ओउःकोः कीम्हाङः मुसा खेःतो त नीङ्जीइ चीःतेःनाङ्जलया” त दाय्ह्ती येसु त्याङ्तो ओउः त्याङ्ओ कुराकोः माने ओउःकोः आमा आपानीस्इ तय्ह्चुलु। 51ओहाङःसैको येसु आमा आपाकुस् नासरेत् सहर्ताङ् द्यान्ह्ती पाय्ह्आकाय्। ओउःहाङः पाय्ह्आक्तीको येसुइ लयःकोः आमा आपाइ तोओ कुरा पेतो सायःती जाङ्ह्आकान्। ओहाङःसैको ओउः चोःकायः स्याव्ओ कुरापाय् ओउःकोः मरीयम् आमाइ लयःकोः ल्हुङ्हाङः सेती गम्आकान्। 52येसुपाय् ताङ्ह्ती ब्राव्ती ल्हुङ् व्हक्ती व्हाय्तो स्याव्आ ओउःकः परमेस्वर्मा मान्तालम्मा सबै म्रोआकाय्।
Currently Selected:
लुका 2: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
