लुका 4
4
1-2ओहाङःसैको बाप्तीस्मा त्याक्आक्तीको येसुपाय् परमेस्वर्कोः ग्वालामः मुह्ती योर्दन् खोलासै द्यान्ह्ती वाङ्आ। ओहाङःसैको परमेस्वर्कोः ग्वालामःइ येसुकायः चालीस् दीन्च्युक्कायः याक्गार्सीःमालो बेलाङ्हाङः आलःती गम्लाङ् दाक्आथै। ओहाङः मुतोक्हाङः सैतान् त तोओ अरुसै ताङ्ह्ओ लान्इ येसुकायः थ्योन्ह्ती होम्सा बोङःआथै। चालीस् दीन्च्युक्कायः येसुइ दोह्मा जेःमाःत ओःनम् दीन् पुत्आक्तीको आन योङ्क्राय्ओ खेःतो। 3इत योङ्क्राय्तोक्हाङः सैतान् लान्पाय् येसुकःताङ् थ्योन्ह्लाङ् वाङ्ती “लौ नाङ् दोङ्सीलेः परमेस्वर्कोः चोःलेःतेः खेःतेःनाः त खेःया इ बाङ्कायः ‘लाङ् थाङ्ती स्याव्अ’ त दाय्ह्ती तोउ दा” त दाय्ह्ती येसुकायः तोउतो 4“खेःल ‘मान्ताइपाय् जेःगा जेःओ झुङ्आले स्याक्इली’ त दाय्ह्ती दाय्ह्ओ परमेस्वर्कोः आखरःहाङः लेखती मुनाः” त दाय्ह्ती येसु त्याङ्आ। 5ओहाङःसैको येसुकायः सैतान्इ आन त्यावःअ लात्ती लनःती याव्च्याखाहाङः ल्हाव्ह्दैबाङ्कोः सबै राजाकोः देस्लम् छ्यानःती 6“लौ इ सबै राजालम्कोः ग्वम्मा ओउःमयःकोः देस्कोः पेपेओ गह्र्लम्मा ङाइ सबैलेः बयःनेःनाङ् बा। ओउः सबैलेः ङाकायः ल्हाओ लेःआः ङाइ लयः झाक्ती बयःसा खाय्लेःनाङः 7ओउःत झ्यान्ते नाङ्इ ङाकायः बाःती स्यवतेःआची त खेःया ङाइ सबै बयःनेःनाङ् बा” त दाय्ह्ती सैतान्इ फेरीलेः येसुकायः थ्योन्ह्ती तोथातो 8“लौ ‘नाङ्इ परमेस्वर्कायः झुङ्आले बाःती स्यवसा खेःनाः। ओउःकोः काम् ह जाङ्ह्उ दा’ त दाय्ह्ती दाय्ह्ओलेः परमेस्वर्कोः आखरःहाङः लेखती मुनाः” त दाय्ह्ती येसु त्याङ्आ। 9ओहाङःसैको सैतान्इ येसुकायः लात्ती यरुसालेम् त तोओ सहर्ताङ् आलःती ओहाङःकोः मन्दीर्कोः च्योःहाङः न्यास्ती गम्आथै। ओहाङः न्यास्ती गम्आक्तीको “लौ नाङ्पाय् दोङ्सीलेः परमेस्वर्कोः चोःलेःतेः खेःतेःनाः त खेःया इसै क्लाःती ल्होक्स दा। 10इसै ग्लेःती जीक्तेःल दोह् हायःती दाय्ह्सा परमेस्वर्कोः आखरःहाङःपाय् ‘ “लौ इकायःपाय् पेतो ओम्पायःतीलेः योनु” त दाय्ह्ती परमेस्वर्इ ओउःकोः ल्होक्ओमयःकायः तोआकान्’ त दाय्ह्तीमा मुनाः। 11फेरीलेः ‘ “लौ इकायःपाय् बाङ्हाङः त्योक्ती तोन्ती दोम् क्रुत्मा दोह्मा जीक्सा ताक्लाम्” त दाय्ह्ती ओउः ल्होक्ओमयःइ नाङ्कायः पेतो ओम्पायःती लात्तेःनाः बा’ त दाय्ह्तीमा लेखती मुलेःनाः” त दाय्ह्ती सैतान्इ तोमाथातो 12“खेःल ‘नाङ्इ लयःकोः परमेस्वर्कोः ल्हुङ्तुक् योसा काम् जाङ्ह्सा स्याव्ल’ त दाय्ह्ओमा लेखती मुलेःनाः” त दाय्ह्ती येसु त्याङ्आ। 13येसुपाय् ओउःत त्याङ्आक्तीको सैतान्इ येसुकायः थ्योन्ह्ती होम्सा खाय्माःत झ्यान्ते अरु क्रोःओ बेलाहाङः दाह्धाङ्माःच्युक्कायः येसुकायः फेती ज्याल्आ।
14सैतान् ज्याल्आक्तीको येसु परमेस्वर्कोः ग्वालामः दोःती गालील जील्लाताङ् द्यान्ह्ती पाय्ह्आ। ओउः बेलाहाङः येसुकोः कुरा ओउः देस्हाङः गाःहाङःमा नाम्तीलेः नोःओ खेःतो। 15ओहाङःसैको द्यान्ह्ती पाय्ह्आक्तीको येसुइ ओउः यहुदी मान्तालम्कोः थनःती हुम्ओ कीम्लम्हाङः पोक्ती ओउःहाङः स्यान्ती तोआकान्। ओउःत स्यान्ती तोतोक्हाङः सबै मान्तालम्इ ओउःकायः “लौ इपाय् आन व्हाय्तोलेः स्यान्नौ बा” त दाय्ह्ती लुङ्तीलेः नोःकाय्आकाय्। 16ओहाङःसैको येसु लयःकोः नासरेत् सहर्ताङ् पाय्ह्आ। ओउःहाङः पाय्ह्आक्तीको लयः जवओ जाङ्ह्ती यहुदीलम्कोः सन्चर्बार् दीन्हाङः येसु थनःओ कीम्ताङ् आल्ती पोक्आ। पोक्आक्तीको येसुपाय् परमेस्वर्कोः आखरः पह्रसाकायः चीङ्आ। 17येसु चीङ्तोक्हाङः ओउः कीम्कोः मान्तालम्इ उय्ह्लेकोः एसाया त तोओ परमेस्वर्कोः कुरा छ्यानःओमयःइ लेखओ कीताप् ल्हाआथै। ओउः ल्हाओ कीताप् त्याक्ती फेल्ती येसुइ यात्ज्योः कुरा बोङःती च्यवःआक्तीको पह्रलेःआ। 18“लौ ङापाय् प्रभु परमेस्वर्कोः ग्वालामः दोःआलाङः दोह् हायःती दाय्ह्सा ओउःकोः पेओ समचार् नाःतो नाःमालोलम्कायः थोल्ह्ती तोसाकायःमा छ्युङ्ह्आताङः। थुनती मुओलम्कायः ‘लौ बेन्तेःनाः’ फेरी च्यवःसा खाय्मालोलम्कायः ‘लौ च्यवःतेःनानी’ त तोसाकायःमा अरुइ ग्रक्ओ मान्तालम्कायः फेताक्साकायःमा 19परमेस्वर्इ मान्तालम्कायः दल्ताक्सा दीन्पाय् ‘वाङ्लेःनाः’ त छ्यानःती तोसाकायःमा परमेस्वर्इ ल्होक्आताङः” त दाय्ह्ती दाय्ह्ओ एसायाइ लेखओ कुरापाय् येसुइ पह्रआकान्।
20इ कुरा पह्रआक्तीको येसुइपाय् कीताप् खुम्ती ओउः कीताप् गम्ओ मान्ताकायः पाय्क्लाङ् ल्हाआकान्। ओहाङःसैको येसु फेरी च्युङःआक्तीको ओउः थनःओ कीम्हाङः मुओलम् सबैइ ओउःकायः घीःती योथातो 21“लौ इ नीङ्इ मेस् सायःओ परमेस्वर्इ बयःओ आखरःकोः कुरापाय् तेन्लेः ताप्तो स्याव्ओआः बा” त दाय्ह्ती येसुइ तोआथास। 22ओहाङःसैको येसुइ इतलेः आन व्हाय्ओमा क्लोनःती तोओ कुरा स्यान्ती झ्यान्ते सायःओलम्इ आन ग्याङ्ह्आकाय् “ओउःपाय् इहाङःकोः युसेफ् त तोओकोः चोः लेःआः माःर” त दाय्ह्ती नोःकाय्आकाय्। 23ओउःमयः ओउःत नोःकाय्इतो “लौ ङाकायःपाय् ‘नाङ्पाय् दाक्तर्तेः मुतेःनाः त झ्यान्ते लयःकायः स्याक्स दा’ त दाय्ह्ती दाय्ह्ओ कुरा नीङ्इ तोतेःनानाङ्स यादो। ‘कफर्नाहुम् सहर्हाङः नाङ्इ जाङ्ह्ओ ग्याङ्ह्राय्लम् इहाङःमा जाङ्ह्ती छ्यानःताङी दा’ त दाय्ह्तीमा तोतेःनानाङ्स। 24दोङ्सीलेः परमेस्वर्कोः कुरा छ्यानःओमयःपाय् लयःकोः देस्हाङः सुमा झाक्इली। 25माः है एलीया त तोओ मुतोक्हाङःपाय् इस्राएल् देस्हाङः सुम् बर्स आधाच्युक्कायः तीः जुगाङ् वामाःत झ्यान्ते आन छालःओ अनीकाल् स्याव्आ। ओउः बेलाहाङः इस्राएल् देस्हाङः नाःतो योङ्क्राय्ती सीखेःओ बुधा सीओ मोमःचोःलम् खेःइतो 26ओउःमयःखेकायः स्यास्साकायः परमेस्वर्इ एलीया त तोओ सुकःताङ्मा ल्होक्थाल सीदोन् देस्कोः सारेप्ता त तोओ गाव्कोः बुधा सीओ मोमःचोःखेकःताङ् ह स्यास्साकायः ल्होक्आथै। 27ओहाङःसैको एलीया गुल्ह्ओ एलीस्या त तोओकोः बेलाहाङःमा इस्राएल् देस्हाङः नाःतो कोह्र् चाओ मान्तालम् खेःइतो ओउः कोह्र्इ ङायःओलम्कायः एलीस्याइ सुकायःमा स्याक्ताक्थासल यात्चाक् इस्राएली जात् खेःमालो सीरीया देस्कोः नामान् त तोओपाय् ओउःकायः ह एलीस्याइ स्याक्ताक्आथै” त दाय्ह्ती येसुइ स्यान्ती तोआथास। 28इतलेः परमेस्वर्इ अरु अरु जात्कोः मान्तालम्कायः “पेतो हायःसा बोङःनौ” त दाय्ह्ती स्यान्ओ सायःती ओउः थनःओ कीम्हाङः मुओलम् आन ल्हह्ती येसुकः ल्हुङ् मल्ह्तो स्याव्आकाय्। 29ल्हुङ् मल्ह्तो स्याव्ती झ्यान्ते ओउःमयःइ चीङ्ती येसुकायः बाहीरताङ् क्लाःती ओउः सहर् मुओ बुम्कोः च्योःताङ् लात्ती आलःती वारसै क्लाःती सात्सा बोङःथातो 30येसुपाय् द्यान्ह्ती ओउः हुम्ओलम्कोः माझहाङः च्योल्ती लयःकोः ल्याम्ताङ् पाय्ह्लेःआ।
31ओहाङःसैको येसु गालील अन्चल्कोः कफर्नाहुम् सहर्कःताङ् आल्ती दाह्आ। ओहाङः दाह्ती वाङ्आक्तीको येसु फेरीलेः सन्चर्बार्कोः धोती न्यास्ओ दीन्हाङः यहुदीलम्कोः थनःओ कीम्ताङ् पोक्ती ओहाङः हुम्ओ मान्तालम्कायः स्यान्ती तोआथास। 32ओउःत स्यान्तोक्हाङः “लौ इ येसुपाय् आन पेतो व्हाय्ती नोःसा चीःलेःनौ बा। अरुइ स्यान्माःत परमेस्वर्कोः कुरा स्यान्ती तोसा खाय्नौ” त दाय्ह्ती हुम्ती सायःओलम्इ ग्याङ्ह्तीलेः नोःकाय्आकाय्। 33ओहाङःसैको ओउःतोक् बेलाहाङःपाय् ओउः थनःओ कीम्हाङः यात्चाक् लान्इ ङायःओ मान्ता मुओ खेःतो। 34ओउः मान्ताखेइ सोतो गोःती “आया नाङ् नासरेत्कोः येसुय। नाङ्इ ङीकायः दोह् हायःलाङ् वाङ्तेःआ। ङीकायः ह्र्योङःताक्लाङ् वाङ्ओतेःआः यादो। लौ नाङ्कायः ङाइ तय्ह्नेःआनाङ् बा। नाङ्जा परमेस्वर्कोः लयःकोः जय्कुमःत मुओ चाक् लेःतेःआः बा” त दाय्ह्ती तोथातो 35“लौ ङैमाःत मुअ। ओउः मान्ताकायः ल्हेस्ती फेउ” त दाय्ह्ती येसुइ गानाक्ती लान्कायः जान्ती तोआकान्। ओउःत तोतोक्हाङः ओउः लान्इ सबैकोः मीक्हाङः ओउःइ ङायःओ मान्ताकायः प्लाह्ती तोस्ती फेआथै। फेआक्तीको ओउः मान्तापाय् जुगाङ् सेलः मुओ। 36इत हायःओ च्यवःती सबै हुम्ओलम् ग्याङ्ह्ती “इपाय् दोह् दोह् कुरालो ती। इलो परमेस्वर्कः मुह्ओ ग्वम् दोःती ओउःकोः गानाक्ती तोओ कुरापाय् लान्लम्इमा ग्याती मान्ताकायः फेनानी बा” त दाय्ह्ती नोःकाय्आकाय्। 37इतलेः येसुकोः कुरा ओउः देस्हाङःपाय् गाःहाङःमा तोमःती ल्हाक्ती छ्यानःकाय्आकाय्।
38ओहाङःसैको ओउः लान्इ ङायःओ मान्ता स्याक्ताक्आक्तीको येसु थनःओ कीम्सै ग्ल्युङ्ह्ती सीमोन् त तोओकोः कीम्ताङ् आल्आ। ओउःहाङः आल्तोक् बेलाहाङः सीमोन्कोः आय्लेः आन अय्ती जीक्ती मुओ खेःतो। ओहाङःसैको येसु ओहाङः दाह्ती वाङ्आक्तीको ओउः कीम्कोः मान्तालम्इ येसुकःताङ् काःहाल्लाङ् वाङ्आकाय्। 39ओहाङःसैको ओउः जीक्ओ मान्ताकःताङ् वाङ्ती येसु ओउःकोः छेव्हाङः चीङ्ती “लौ इकायः अय्ओ फेपाःथै” त दाय्ह्ती तोआकान्। इत तोआक्तीको ओउः मोमःचोःकोः अय्ओ जुगाङ् समःआथै। ओउःकोः अय्ओ समःती स्याक्आक्तीको सीमोन्कोः आय् चीङ्ती येसुकायःमा ओउःकुस् वाह्ओमयःकायःमा जेःगालम् दोल्कावःती बयःआथास। 40ओहाङःसैको जेःती भ्याआक्तीको न्याम् ब्लक्खेःओ बेलाहाङः सबै खाल्कोः जीक्ओ मान्तालम् येसुकःताङ् वानःआकानी। ओउः जीक्ओलम्कायः येसुइ क्रुत् झाम्ह्तीलेः स्याक्ताक्आथास। 41ओउः बेलाहाङःमा नाःतो मान्तालम्कायः लान्इ ल्हेस्ती फेआथास। फेतोक्हाङः लान्लम्इ “नाङ्जा परमेस्वर्कोः चोः लेःतेःआः बा” त सोतोलेः दाय्ह्ती फेनीतो ओउःकायःपाय् “ख्रीस् लेःआः” त तय्ह्ती झ्यान्ते येसुइ लान्लम्कायः इ कुरा छ्यानःती नोःसा ताक्उसुलु।
42ओहाङःसैको ओनम्कोः स्याङ्ह्लोहाङः येसुपाय् लयःलेः चीङःचाङःत खेःओ मान्ता नाःमालो थाव्ताङ् आल्आ। ओहाङः आल्आक्तीको मान्तालम्इ ओउःकायः बोङःती गुल्ह्ती “लौ ङीकःसै वेङ्ती आल्लाम् दा” त दाय्ह्ती ओउःमयःइ येसुकायः होम्तीलेः तोथातो 43“खेःल ङापाय् परमेस्वर्कोः राजीकोः पेओ समचार् अरु अरु सहर्लम्गनहाङः ल्हाक्ती छ्यानःसाआः खेःनाङः। इ कुरा सबै मान्तालम्कायः ल्हाक्ती छ्यानःसाकायः परमेस्वर्इ ल्होक्आताङः” त दाय्ह्ती येसु त्याङ्लेःआ। 44ओहाङःसैको यहुदीया अन्चल्हाङः दाह्ती ओहाङः तोमःती वाह्ती थनःओ कीम्लम्हाङः पोक्ती येसुइ परमेस्वर्कोः कुरा थोल्ह्ती तोओ खेःतो।
Currently Selected:
लुका 4: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
