Luk 17

1Jâ ndi jaju ja vâ na beyokwedi beaju, na, ibaku ikâbânâkidě ja diye i pâyě ndi maguga na a ka pâdě jâ! 2E ndi bwam‘ wa na ju n‘ ilale i kâkânâkwě i tingakwě mâ o ibâlu jaju, na mâ‐a uhwě o manga, nana a kâbâkidě umbâkâ o bahâlě ekaba. 3Bandamakiděni inyi mětě n‘ inyi mětě: Oningě mwana nyângwě a beviya âvě, kandakidě mâ; oningě a ’luwa, iyakidě mâ. 4Nd‘ oningě a beviya ’vě njo hěmbwědi o buhwa, na mâ‐a timba těpě o âvě‐o jadi njo hěmbwědi o buhwa, na, Mbi ’luwendi; na nâvě oa ’yidě mâ.

5Ka metodu mea vâ n‘ Upangiyi, na, Badakiya hwě ikamidě. 6K‘ Upangiyi a vâ, na, O jakani n‘ ikamidě ka utonga mua ’buma ea mustard, te o t‘ o vâkâni na ele tě ea sikamain ekae, na, Pumbwanakiya na metamba, oa ’la ka liyaniya o manga; na eâ‐e ka yokiyate inyěni. 7Ndi nja a jadi o inyěni o jadi, a běkě mâ n‘ uhayi u pudwaka na plou tombe u jakidě bembe, a pâkâte oviya mwanga, na mâ na ju, na, Egombe te ’gombe ka diyake ija? 8Hanga na a ka vahand‘ o vâ na ju, na, Kenjakě ibeamě iboko viamě vi ka jě, oa tinga utumba, o ka vengaka ’mba, mba ta ja, n‘ umba‐mba ta mâtâ; běngě o jake na nâvě o mâtâke. 9A věkěndi uhayi těmuně akeva ’kabojana a haki belombo be sombiyakudwě mâ? 10Mba piviyaka. Eâ nyanga tě te eanyu, oningě o hangěni belombo beanyu be di sombyuwěngo beěhěpi, vâkâteni, na, Ho ndi bahayi ba ha ’bě na evângâ: ho te hango nyang‘ ’ahu e luki na ha.

11E diyakindi, o Mâ‐a běkidi a kěkě na ’la o Jěrusalěm, ka Mâ‐a tomba o hanganě ea Sameria na ea Galili. 12O Mâ‐a betakidi o ibâkâ n‘ ihuhu, ka jomu ja bamo ba diyakidi begâlani ja lata na Ju, ka bâ ba těmě yaviděngo: 13ka bâ‐ba betě moyi mabu, na vâ, na, Paia, Jisus, yokakiya hwě ngěbě. 14Nd‘ o Mâ‐a yěni bâ, ka Mâ‐a vâ na bâ, na, Kěkěni, oa leviděni nyolo janyu prist. E diyakindi, o bâ‐ba diyakidi ba kěkě, ka bâ‐ba yonga. 15Umbâka, o mâ‐a yěněkidi na a yongindi, ka mâ‐a timba, a ka bendakě Anyambě na joyi oba. 16Ka mâ‐a kwa na boho boaju o beko beaju, a ka věkě Mâ akeva: na mâ‐a diyakindi ua Sameria. 17Ka Jisus a yavwana ka Mâ‐a vâ, na Bu yongakwě jomu? ndi ibuwa ja bě l‘ ove? 18Bu duwaniya ba timbidi ivě ja ibendě o Anyambě a jadi kabo mwěngi těkamu. 19Ka Mâa vâ na ju, na, Těměkě, kěkě pělě na eâvě: ikamidě jâvě i hunginind‘ âvě.

20O Farisi ba uwi Mâ, na, Ipangiya ja Anyambě i ka viya lě nja ’gombe‐ě, ka Mâ‐a yavwana bâ, na, Ipangiya ja Anyambě ja vaka ona ’lombo e yěněněkě: 21Na bâ‐ba vâye, na, Hilakěni okava! tombete, na, Hilakěte okavaně! ’kabojana ipangiya ja Anyambě i n’ inyěni.

22Ka Mâ‐a vâ na beyokwedi beaju, na, Hwi i vakandi, ijanyu i ka vahě o yěně buhwa bâkâ boa Mwana moto, ndi oa yěni boâ ni. 23Ba ka diyi ba ka vâkâ n‘ inyěni, na, Yěněkěte okava; tombete, Yěněkěte na okavaně. O vitaki bâ ni, o bengaki bâ ni. 24Ikabojana bwěsě te ka epělupělu, e pělumakě o ihuku ja oba jâkâ, e panyakate na ’la ihuku ja oba ipâkwě; eâ nyanga tě te ’a Mwana moto e ka diyě o buhwa boaju. 25Nd‘ a ka lukandi a ta yěně belombo beitě, na igona těkadi ja ta kiya Mâ kiyango. 26Bwěsě ka eâ e diyakidi o hwi ja Noa, nonaně tepě ka eâ e ka diyě o hwi ja Mwana moto. 27Ba jaka, ba mâtâkâ, ba baka, ba věněkě o maba, kwanga nala buhwa boa Noa bo ngakiyedi o Ak, boa tonda bo pâkidi, na jilidě bâ běhěpi. 28Pani ka eâ ě diyakidi o hwi ja Lât; ba jaka, ba mâtâkâ, ba hambaka, ba hambanaka, ba liyaka, ba longaka; 29ndi buhwa tě boa Lât bo pumakid‘ o Sâdâm te boa veya na sulfěr bo nâkidi oviya ’ba, na jilidě bâ běhěpi. 30Nonaně tepě o eâ e ka diyě o buhwa boa Mwana moto bo ka puliyě. 31O buhwa těboně, a ka diye o ndabo oba, na mâ na belombo beaju o ndabo, à hubake ka věngidě beâ: na a ka diyě o ’hiki, à timbake tepě o bea mbuhwa. 32Yongakiděni mwad‘ ’a Lât. 33Uěhěpi a ka vahě a yongě emenâ ’aju a ka nyangi eâ; na uěhěpi a ka nyangě emenâ ’aju te a ka tatě eâ. 34Mbi langwakiyandi inyěni, o bulu těboně bamo babale ba ka diyandi ikondo jâkâ; umbâkâ a ka nângwěndi, n‘ upâkwě a dikana. 35Bajo babale ba ka diyandi ba nyingaka ta; umbâkâ a ka nângwěndi, n‘ upâkwě a dikana. 36Bamo babale ba ka diyand‘ o ’hiki; umbâkâ a ka nângwěndi, n‘ upâkwě a dikana. 37Ka bâ‐ba yavwana Mâ, na, Ove lě Upangiyi? Ka Mâ‐a vâ na bâ, na, Iboko via ekengo vi jadi, viâ te via mbela vi ka yolwě ta.

Currently Selected:

Luk 17: BNG1895

Highlight

Copy