Luk 18

1Ka Mâ‐a kaniya bâ ukanakâdi, nana bato ba lukakand‘ o kaliya egombe eěhěpi, ba vâhâme; 2na, O diyakindi na uyěkidi o mboka, u ha bangakidi Anyambě, na mâ‐a tangine tepě moto. 3O diyakindi na mwalika o mboka tě; ka mâ‐a viya o mâ‐a jadi, na, Kundaka ’mba ndoba ’amě. 4Nd‘ à bâbâkâ o ’gombe: ndi na mbuhwě mbuhwě a vâki n‘ ulema, na, Tombe k‘ umba mbi ha bangaka Anyambě, n‘ umba mbi tangine tepě moto; 5ndi ‘kabojana mwalika těkamu u haki ’mba njuke, mbi ka kundi mâ, o banga a vâhidě ’mba na bovaka na bovaka. 6K‘ Upangiyi a vâ, na, Yokakateni ka uyěkidi ube u vâkě. 7Ndi Anyambě a kunde ibaju ba di pânângo, ba yakiyě Mâ bulu na mwehe, tombete Mâ‐a vengakate ulingo uyaba? 8Mbi langwakiyandi inyěni, na, A ka hunganandi o kunda bâ. Mětě, o Mwana moto a ka pâyě, a ka duwate ikamidě o he?

9Ka Mâ‐a kaniya ukanakâdi těkamu o ba ma pitakidě bâ mětě na ba diyakindi bwamu, ndi ba pějěkě bapâkwě: 10Bato babale ba betakind‘ o těmpěl ka kaliya; umbâkâ ua Farisi, upâkwě uyoli pago. 11Ka Farisi a těmě ka mâ‐a kaliya na nyol‘ ’aju kakana, Anyambě, mbi věkěnd‘ Âvě akeva, ’kabojana mbi ’bě ka bato bapâkwě ba jadi, ka bapambalanidi, ke ba ha haka hohonganěngo, ka ba ihonde, tepě bwěsě k‘ uyoli‐pago těkamu. 12Mbi hindinakandi nja o wiki pâkâ njo ibale, mbi věkě mběi ea jom‘ o ungumba muamě. 13K‘ uyoli pago, mâ‐a těmě yaviděngo, a diye na ngudi o betě tombe na mihâ maju oba, a kumbaka ngong‘ ’aju, na, Anyambě, yokakiya ’mba ngâtâ, mbi mot‘ ube. 14Mbi langwakiyandi inyěni, na, momo těkaně a hubakindi na vala o ndabo ’aju huwudwěngo wa n‘ upâkwě: ’kabojana a ka betidě nyolo ’aju uěhěpi nd‘ a ka hubudwě; nd‘ a ka hubidě nyolo ’aju nd‘ a ka betudwě.

15Ka bâ‐ba vana tepě Mâ mekěkě, nana A kupanakě meâ: nd‘ o beyokwedi beaju be yěnidi, ka bâ‐ba kandidě bâ. 16Ndi Jisus a ndakiyi bâ o Mâ‐a jadi, na vâ, na, Dikakani ba nděmbě ba vake o ’Mba‐mbi jadi, o kandakidi bâ ni, ‘kabojana jâ jângâ tědině ndi j‘ ipangiya ja Anyambě. 17Pakwěpâkwě Mbi vâki n‘ inyěni, na, A ka měndě a věhělidě ipangiya ja Anyambě ka mwa nděmbě a ngiye omě na vilolombo.

18K‘ upangiyi n‘ uhuhu mâ‐a uwa Mâ, na, Uyokwidi uyamu, mbi hake lě nja ’lombo ě o ijiga ja eměnâ ea egombe eěhěpi? 19Ka Jisus a vâ na ju, na, O tubaka lě ’Mba na uyamu na nde? o ’bě na uyamu, kabo Umbâkâ, Mâ ndi Anyambě. 20O te yowěngo belekanako, O hake ihonde, O weyake moto, O ibake, O langwanakiye evela, Hekakidě hângwě na nyângwě. 21Ka mâ‐a vâ, na, Mbi tatite ekabe beěhěpi oviya nděmbě ’amě. 22Nd‘ o Jisus a yokidi belombo těkabe, ka Mâ‐a vâ na ju, na, O ngite o nyamaka elombo eâkâ: hambakidě ibeâvě be janidi beěhěpi, o ka kabaka na mekuge, vâkâna oa bi na hika o Hěvěn: oa viya, ka vitě ’Mba. 23O mâ‐a yokidi ekae, a yěněkindi ngěbě eitě, ’kabojana a diyakindi na boněně boitě. 24O Jisus a yěni na a yěněkindi ngěbě eitě, ka Mâ‐a vâ, na, e ndi bokolo boitě na ba di na hika eitě ba ngakiya o ipangiya ja Anyambě! 25Ikabojana e bobâbu na kaměl e ngakiya o ubana mua tombo, wa na moto a di kenango a ngakiya o ipangiya ja Anyambě. 26Ka ba yokakidi ba vâ, na, Nandi a lě nja a ka yâlě o yonga? 27Ka Mâ‐a vâ, na, Belombo be ha ’bě na ngudi o hama na bato be te be hamaka na Anyambě. 28Jâ ndi ja Pitě ja vâ, na, Yěněkěte, ho senji beěhěpi, na vit‘ âvě. 29Ka Mâ‐a vâ na bâ, na, Pâkwěpâkwě Mbi vâki n‘ inyěni, na, O ’bě na moto a di senjango ndabo, tombe hangwě na nyangwě, tombe bana ba nyangwě, tombe mwajo, tombe bana, o nyanga ea ipangiya ja Anyambě, 30A ka měndě a pahiye wa kya těkaně okava, na o ehe e vakě eměnâ ea egombe eěhěpi.

31Ka mâ‐a nângâ jomu na babale, ka Mâ‐a vâ na bâ, na, Hilakěteni, ho betakandi o Jěrusalěm, o belombo bea basâki be lěnděkidi o pělě ea Mwana moto beěhěpi be ka timwě. 32Ikabojana a ka kândudwěndi bato ba ’tomba epâkwě, A ka věhwěndi, na A ka hakwě bobe boitě, na A ka tuwakwě malě; 33ba ka bomi Mâ, na bâ‐ba weya Mâ; o buhwa boa hwi ’lalo vâkâna A pumbuwendi. 34Ndi bù bweyakidě belombo těkabe na ea eâkâ: ndaga těkaně e diyaki kutamango o bâ‐ba jadi, na ba bù, yowakě belombo be ma kalakwě.

35E diyakindi, o Mâ‐a diyakidi a bě baka na Jěriko, ka pâgu na ’huhu a diyakidi diya o pěpěkě ’a njea a jombanaka: 36O mâ‐a yokidi ebimba e tombaka, ka mâ‐a uwa, na, ekae e lě na? 37Ka bâ‐ba languwa mâ, na, Jisus ea Nasarět nd‘ a tombakě. 38Ka mâ‐a yama, na, Jisus, Mwana Devid, yokakiya ’mba ngěbě. 39Ka ba kěkidi o bohoboho ba kandidě mâ, nana a diyake dâ: nd‘ a yamaki pě wa, na, Mwana Devid yokakiya ’mba ngěbě. 40Ka Jisus a těme, ka Mâ‐a sombiyě na a vanakwě o Mâ‐a jadi: o mâ‐a bakamidi, ka Mâ‐a uwa mâ, 41na, O vahaka lě ’Mba‐mbi, haka ’vě na ě? Ka mâ‐a vâ, na, Upangiyi, mbi pahakiye iyěně. 42Ka Jisus a vâ na ju, na, Pahakiya iyěně: ikamidě jâvě i yongiděnd‘ âvě. 43Ka mâ‐a hungana o pahiya iyěně, ka mâ‐a vitě Mâ, a kěkě a bendakě Anyambe: o bato běhěpi ba yěněkidi, ka bâ‐ba vě Anyambě ibendě.

Currently Selected:

Luk 18: BNG1895

Highlight

Copy