Jân 9

1O Jisus a tombakidi, A yěněkindi momo a diyakidi pâgu oviya ijawě jaju. 2Beyokwedi beaju be uwaki Mâ, na, Uyokwidi nja haki bobe, momo těkaně, ipě hangwě na nyangwě, eaju e jakudwě pâgu? 3Jisus a yavwanakindi, na, Momo těkaně a ’bě hango bobe, tombe na nyangwě na hangwě: ndi e ndi na behavu bea Anyambě be ka yowaněndi o mâ‐a jadi. 4Mbi hake behavu bea A lomaki ’Mba o mâ, ngite mwehe: bulu bo vakandi, o moto a ka diyě a yâlě pě o ha ehavu. 5Mbi ndi bwe ya he, ulingo muamě u didi o he těkaně. 6O Mâ‐a diyakidi a kala ekae, a tuwaki malě o he, ka Mâ‐a bunda mahě na malě tě, ka Mâ‐a hingila mahě tě o mihâ ma pâgu. 7A vâki na ju, na, Kěkě, ka tukake o ’tima ya Siloam, (e jadi na, Lomwěngo, oningě ja ’ludwě). A kěkindi nandi ka tuka, a timbakindi, a ka yěněkě. 8Bato ba longaki na ju baka na ba yěněki mâ ovyo a jakudwě pâgu, ba vâki, na, A ’bě mâ ekaně a diyaki diya a jombanaka? 9Bâkâ mâ, na, Mâ nd‘ ekaně: bapâkwě mâ na, A kwanaki mâ: ndi a vâki, na, Umbi mâ. 10Ovaně nd‘ o bâ‐ba vâki na ju, na, Mihâ mâvě ma bumwaniyě lě na? 11A yavwanakindi na, Momo, a tubakwě, na, Jisus, a bâhâkiděndi mahě ka Mâ‐a hingila mâ o mihâ mamě, ka Mâ‐a vâ n‘ umba, na, Kěkě, ka tukake o ’tima ya Siloam: k‘ umba‐mba vala na tukaka, k‘ umba‐mba yěně. 12Jâ ndi jabu ja vâ na ju, na, A l‘ ove? A vâki, na, Mba ’wě.

13Ba vanaki mâ a diyakidi pâgu o vyo o Farisi ba jadi. 14Bo diyakindi buhwa bo‘ Iyâjâ o Jisus a bâhâkidě mahě na Mâ‐a bumwakidě mihâ maju. 15Jâ ndi ja Farisi ja uwa pě mâ na a pahakiye lě iyěně jaju na. A vâki na bâ, na, A vamakiděndi mahě o mihâ mamě, k‘ umba‐mba tuka, k‘ umba‐mba yěně. 16Ovaně nd‘ o Farisi jâkâ i vâki, na, Momo těkaně a ’bě ua Anyambě, ’kabojana a tataka buhwa bo‘ Iyâjâ. Bapâkwě ba vâ, na, Moto a jadi ube a l‘ a haka elembo ya jângâ těkadi na‐e? Ipěhě i diyakindi o bâ mětě ba jadi. 17Ba vâki pě na mwa tě ua pâgu, na, O vâkâ lě o pěl‘ ’aju, nana o Mâ‐a bumudě mihâ mâvě na e? A vâki, na, A ndi usâki. 18Ndi Jiu bu kamakidě o pěl‘ ’aju, na a diyaki pâgu nana a pahiyendi iyěně jaju, kabo o bâ‐ba ndakiyedi hangwě na nyangwě ya a pahakiyedi iyěně. 19Ka bâ‐ba uwa bâ, na, Mwan‘ ’anyu nd‘ ekaně, uanyu a vâkě na a jakudwěndi pagu? 20Ndi a yěněkě lě pě nand‘ e? Hangwě na nyangwě ba yavwanaki bâ, na, Ho yowěngo na mwana ’hu nd‘ mwan‘ ’ahu ekaně, tepě na a jakudwěndi pâgu. 21Ndi elombo e pangi mâ‐a yěněkě, hoa ’wě yâ; na A bumudě mihâ maju hoa ’wě: a běndi ijaju igona; uwaki mâni: mâ mětě a ka kalate. 22Hangwě na nyangwě ba kalakindi ndaga těkadi, ’kabojana ba bangakindi Jiu: ’kabojana Jiu ba diyakindi ba lata pâni ta, na moto a ka měmě Mâ na a diyaki Kraist, a ka pumwěnd‘ o sinegâg. 23Ovaně nd‘ o hangwě na nyangwě ba vâki, na, A běndi ijaju igona; uwaki mâni. 24Jâ ndi jabu ja ndiya pě mo‐mo tě a diyaki pâgu, ka bâ‐ba vâ na ju, na, Bendakě Anyambě: ho yowěngo na momo těkaně A moto ube. 25A yavwanakindi ka mâ‐a vâ na, Ipě A ndi mot‘ ube, ipě a ibě mba ’wě: mbi yowěngo elombo yâkâ, mbi diyakindi pâgu, ndi mbi ka yěněkěndi. 26Jâ ndi jabu ja vâ pě na ju, na, A haki l‘ âvě na e? A bumwakidě lě mihâ mâvě na e? 27A yavwanaki bâ, na, Mbi ma languwat‘ inyěni, ndi ou yokani: o vahaka li o yoki njo epâkwě na e? inyěni o ka bâbâtě o diya tepě beyokwedi beaju? 28Jâ ndi jabu ja kila mâ ka bâ ba vâ, na, O ndi eyokwěd‘ ’aju; ndi ho ndi beyokwedi bea Mosěs. 29Ho yowěngo na Anyambě a kalaki na Mosěs; ndi ekaně, hoa ’wě o pěl‘ ’aju e viyedi. 30Momo tě a yavwanaki bâ, na, Okava nd‘ elombo e mamanakwě, eanyu e ha ’wě o pěl‘ ’aju e viyedi, ndi A bumudi ’mba mihâ mamě. 31Ho yowěngo na Anyambě a yokakiya bato babe: nd‘ oningě moto a diyengě ukaliyi mua Anyambě, na mâ‐a haka upango muaju, mâ ndi uaju a yokakiyě. 32Ekae e ha yokane oviya jali ja he, na moto ka moto a bumuděngo mihâ ma a di jawěngo pâgu. 33Momo těkaně a jaka a diye ua Anyambě, t‘ A yâlě o ha elombo ka ’lombo. 34Ba yavwanakindi ka bâ ba vâ na ju, na, Âvě o jakudwě na bobe, na nâvě o ka yokwakidě hwě? Ka bâ‐ba pumě mâ o uhěngě.

35Jisus a yokakindi na ba pumidi mâ o uhěngě: o Mâ‐a diyakidi A duwa mâ, A vâki na ju, na, O kamakiděte Mwana ua Anyambě? 36A yavwanakindi, na, Mâ‐a lě nja, Upangiyi, nana mbi kamakidě Mâ? 37Jisus a vâki na ju, na, O te Mâ yěněngo, Mâ tepě A kalakě na nâvě ekaně. 38Ka mâ‐a vâ, na, Upangiyi mbi kamiděndi. 39Ka mâ‐a kaliya Mâ. Ka Jisus a vâ, na, Mbi pândi o he těkaně o yěkě; na na ba ha yěněkě ba yěněke, na ba yěněkě ba diyake pâgu. 40Farisi jâkâ i diyaki na ju, i yokakidi ndaga těkadi, i vâki na ju, na, Ho tepě pâgu. 41Jisus a vâki na bâ, na, O jakani pâgu, t‘ o ’běni na bobe: nd‘ o vâkândini, na, Ho yěněkěte; ovaně nd‘ o bobe boanyu bo ngitewě.

Currently Selected:

Jân 9: BNG1895

Highlight

Copy