Jân 8

1Jisus a kěkindi o ukodi mua Âlivi. 2A pâki pě o těmpěl bopundaka n‘ ubwa, o Mâ‐a diyakidi diyango, bato běhěpi ba vakindi o Mâ‐a jadi, ka Mâ‐a yokudě bâ. 3Balěndi na Farisi ba vanaki Mâ mwajo a bweyakudwě n‘ ihonde: o bâ‐ba těkidě mâ o hanganě, 4Ba vâki na ju, na, Paia, mwajo tekaně a bweyudwěndi n‘ ihonde, n‘ ihadi mětě. 5Ndi Mosěs a sombiyakidi hwě o belekanako na manga ka ekama ba ka bweyakwě malale: ndi Âvě o vâkâ lě na? 6Ba kalakind‘ ekae iyějiyě jaju, ovaně nd‘ o bâ‐ba ka duwě eabu e ka tubaně Mâ. Ndi Jisus a balamakindi ka Mâ‐a lěndě o he n‘ upenjo muaju, ona Au yokaka bâ. 7O bâ‐ba diyakite ba batakě Mâ ka Mâ‐a tepuwa ka Mâ‐a vâ na bâ, na, A ha ’bě na bobe o inyěni o jadi, a take na bweya mâ ilale. 8Ka Mâ‐a balama pě, ka Mâ‐a lěndě o he. 9Melema mea ba yokaki yâ mětě me sulakidi bâ, ka bâ‐ba puma umbâkâ n‘ umbâkâ, yalěngo n‘ utodu kwanga nala ua madikanido: ka Jisus a dikana dipâ na mwajo o hanganě de. 10O Jisus a běkidi tepuwango, Au yěněkě moto kabo mwajo, A vâki na ju, na, Mwajo batubi bâvě ekaba ba l‘ ove? o ’bě na moto a ma kwehě âvě? 11A vâki, na, Moto a ’bě, Upangiyi. Jisus a vâki na ju, na, Mba kwehě tepě âvě; kěkě, ndi o hake pě bobe njo epâkwě.

12Jâ ndi ja Jisus ja kala pě na bâ, na, Umba ndi bwe ya he: a vitakě ’Mba a tamuwe n‘ ivititi, nd‘ a ka diyi na bwe ya eměnâ. 13Ovaně nd‘ o Farisi ba vâki na ju, na, Âvě mětě t‘ o pakwakě upako muâvě; upako muâvě u ibě pâkwěpâkwě. 14Jisus a yavwanakindi ka Mâ‐a vâ na bâ, na, Tombekete Mbi pakwaka upako muamě Umba mětě, upako muamě u te pâkwěpâkwě: ’kabojana Mbi yowěngo pěl‘ ’amě e vakiyedi, na pěl‘ ’amě ea ’la: ndi inyěni oa ’wěni pěl‘ ’amě e vakiyedi, na pěl‘ ’amě ya ’la. 15O yěkěkiděndini na mehoni, ndi Mba yěkěkidě moto. 16Ndi oningě Mbi yěkěkidě, yěkě ’amě e ndi pâkwěpâkwě: ’kabojana Mbi ’bě dipâ, kabo Umba na Hangwě e lomaki ’Mba. 17E tepě lěndwěngo o elekanako ’anyu, na upako mua bato babale u ndi pâkwěpâkwě. 18Umba ndi umbâkâ a pakwakě o pěl‘ ’amě mětě; na Hangwě e lomaki ’Mba, a pakwaka tepě o pěl‘ ’amě. 19Ba vâki na ju, na, Hângwě a l‘ ove? Jisus a yavwanaki, na, Inyěni oa ’wi ’Mbani tombe na Paia tepě: o jaka o yowaki ’Mbani, t‘ o yowudě tepěni Paia. 20Jisus a kalaki ndaga těkadi o kundu, o Mâ‐a diyaki a yokwanakidě o těmpěl: moto au bweyaka Mâ ’kabojana iwěla jaju i diyakite i t‘ o pâ.

21Jâ ndi ja Jisus ja vâ pě na bâ, na, Mb‘ ’alandi o njea ’mě, o ka vahandi ’Mbani; o ka wandini na mabe manyu: iboko viamě vi ka ’lě oa yâlěni o pâ. 22Ka Jiu ba vâ, na, A ka weyi nyolo ’aju? ’kabojana a vwi, na, Oa yâlěni o pâ pěl‘ ’amě e kěkě. 23A vâki na bâ, na, O ndini ba he; Mbi ndi ua oba: inyěni o ndini ba he těkaně; 24Mbi ’bě ua he těkaně. Ovaně nd‘ Umba‐mbi vâkě n‘ inyěni na o ka wandini na mabe manyu: ’kabojana oningě o kamiděni na Umb‘ i mâ, o ka wandini na mabe manyu. 25Ka bâ‐ba vâ na ju, na, Âvě lě nja? Ka Jisus a vâ na bâ, na, Mbi nd‘ uamě a vâki n‘ inyěni oviya jali. 26Mbi na belombo beitě be kalakě na be yěkěkidě inyěni: ndi A lomaki ’Mba, A ndi pâkwěpâkwě; Mbi kalakandi na he belombo beamě be di yokango na ju. 27Ndi bu bweyakidě na A kalaki na bâ o pěl‘ ’a Hangwě. 28Jisus a vâki na bâ, na, O inyěni o ka betěni Mwana moto oba, nandi běngě o yowakěni na Umb‘ i mâ, na Mba haka elombo Umba mětě; ndi Mbi kalakandi belombo těkabe panika Paia a yokwakidě ’Mba. 29A lomaki ’Mba a n‘ Umba: Hangwě a ’bě ’Mba dikango dipâ; ’kabojana Mbi hakandi egombe yěhěpi belombo be tândâkidě Mâ. 30Baitě ba kamakidi Mâ, o Mâ‐a diyakidi a kalaka ndaga těkadi.

31Jâ ndi ja Jisus ja vâ na Jiu tě ba kamakidě Mâ, na, Oningě o lilimiděngěni o ndaga ’amě, vâkâna o ndini beyokwedi beamě mbambaě; 32Vâkâna nandi o ka yowěndini pâkwěpâkwě, na pâkwěpâkwě tě e ka pangandi inyěni humu. 33Ba yavwanaki Mâ, na, Ho ndi ibângâ ja Ebraham, moto ka moto a ’bě hwě nivango: ndi e lě ndi eâvě e vâkě, na, O ka pangwěndi humu? 34Jisus a yavwanaki bâ, na, Pâkwěpâkwě mětě, Mbi vâki n‘ inyěni, na, A hakě bobe uěhěpi, a ndi univwi mua bobe. 35Uhayi a diyaka o ndabo egombe yěhěpi, ndi Mwana nd’ a diyakě egombe yěhěpi. 36Nd‘ oningě Mwana a pangingě inyěni humu, vâkâna o diyendini humu mbambaě. 37Mbi yowěngo na o ndini ibângâ ja Ebraham; ndi o vahakand‘ o weyi ’Mbani, ’kabojana ndaga ’amě e ’bě n‘ iboko o inyěni o jadi. 38Mbi kalakandi ibeamě be di yěněngo na Paia: inyěni o hakandini tepě ibeanyu be yěněkidi na hângw‘ ’anyu. 39Ba yavwakindi ka bâ‐ba vâ na ju, na, Hangw‘ ’ahu ndi Ebraham. Jisus a vâki na bâ, na, O jakani bana ba Ebraham, t‘ o hakateni behavu bea Ebraham. 40Ndi kya těkaně, o vahakand‘ o weyi ’Mbani moto a langwakiyě inyěni pâkwěpâkwě, eamě e di yokango na Anyambě: Ebraham a haka ekae. 41O hakandini behadi bea hângw‘ ’anyu. Jâ ndi jabu ja vâ na ju, na, Hu jakwě behila; ho te Hangwě pâkâ, kabo Anyambě. 42Jisus a vâki na bâ, na, Anyambě a jaka Hângw‘ ’anyu, t‘ o tândâkâti ’Mbani: ’kabojana Mbi pumakiyendi k‘ Umba‐mba viya o Anyambě a jadi; Mbu vaka Umba mětě, Mâ nd‘ a lomaki ’Mba. 43E lě ndi eanyu e ha bweyakidě ikalidi viamě? ’kabojana oa yâlěni o yoka ndaga ’amě. 44O ndini ba hângw‘ ’anyu, děvil, idokuwa ja hângw‘ ’anyu t‘ ijanyu i ka bâbě o ha: a diyakite uweyani oviya jali, A diyaka o pâkwěpâkwě; ’kabojana pâkwěpâkwě eu diyaka o mâ‐a jadi. Oningě a kala bojowa, a kalakate ibeaju mětě: ’kabojana a ndi unoki, na mâ‐a tepě hangwě ya bojowa. 45Oa kamakidi ’Mbani, ’kabojana Mbi langwakiyandi inyěni pâkwěpâkwě. 46A lě nja o inyěni o jadi a sulakě ’Mba na bobe? Nd‘ oningě Mbi kalaka pâkwěpâkwě, e lě ndi eanyu e ha kamakidě ’Mba? 47A di ua Anyambě, a yokakandi ndaga ja Anyambě; inyěni oa yokaki jâni, ’kabojana o ’běni ba Anyambě. 48Jâ ndi ja Jiu ja yavwana ka bâ‐ba vâ na ju, na, Hoa vâkâ bwamu, na O ndi ua Sameria, na nâvě o na děvil? 49Jisus a yavwanakindi, na, Mbi ’bě na děvil: ndi Mbi hekakiděndi Paia, inyěni oa hekakidi ’Mbani. 50Mba vahaka tepě ivenda jamě mětě: o n‘ umbâkâ a vahakě, na Mâ‐a yěkěkidě. 51Pâkwěpâkwě měte Mbi vâki n‘ inyěni, na, Oningě moto a tataka ndaga jamě, a yěne iwedo nala egombe yěhěpi. 52Jâ ndi ja Jiu ja vâ na ju, na, Nandi ho yowudi na O na děvil. Ebraham a wendi na basâki; na nâvě mâ, na, Oningě moto a tataka ndaga jamě, a veke iwedo nala ’gombe yěhěpi. 53Âvě nd‘ o di wa na hangw‘ ’ahu Ebraham, a wedi? na basâki ba wedi: o pangaka lě Âvě mětě nja? 54Jisus a yavwanakindi, na, Oningě Mbi hekakidě nyolo ’amě mětě, vâkâna ihekidě jamě i ’bě elombo: Paia nd‘ a hekakidě ’Mba, uanyu a vâkě na A ndi Anyambě ’anyu. 55Ndi oa ’wi Mâni; ndi Mbi yowěngo Mâ: oningě Mba vâ, na, Mba ’wě Mâ, Mbi tepě ujojowa pani k‘ inyěni: ndi Mbi yowěngo Mâ, n‘ Umba‐mbi tataki ndaga jaju. 56Hângw‘ ’anyu Ebraham a peyakindi iyěně ja buhwa boamě: a yěněki boâ, ka mâ‐a yěně mbya. 57Jâ ndi ja Jiu ja vâ na ju, na, O ha pâděte mabo ma mepuma matano utodu, na nâvě mâ na o yěněkindi Ebraham? 58Jisus a vâki na bâ, na, Pâkwěpâkwě mětě Mbi vâki n‘ inyěni, na, Oviya Ebraham a t‘ o diya, Mbi diyakite. 59Jâ ndi jabu ja tâlidě malale ma bweyakě Mâ: ndi Jisus a kutakindi nyolo ’aju, ka Mâ‐a puma o těmpěl, a pudunganakindi hangan‘ ’abu, kâ Mâ‐a tomba kakana.

Currently Selected:

Jân 8: BNG1895

Highlight

Copy