Behadi 6

1O hwi tědině o tango ya beyokwedi e kenindi, ka ba Grisi ba tâkâlâniyě na Hibru, ’kabojana mealika meabu me ma pojakwěndi o ngabo ya buhwa boěhěpi. 2Jâ ndi ja jomu na babale ja ndiya ebimba ya beyokwedi, ka bâ‐ba vâ, na, E ’bě hohonganěngo na ho dikaka ndaga ja Anyambě na hwě‐ho ka hakiya tagulu. 3Ndi bana bina, ’mbwakiyani o tango ’anyu bamo hěmbwědi ba kuma eyamu, ba di londango n‘ Ilina Iyamu, n‘ iyowě, ibahu ba ka tědě o ehavu těkae. 4Ndi hwě ho ka diya kabo b‘ ikaliya n‘ ipakuwa ja ndaga. 5Ka ndaga ya tândidě ebimba yěhěpi, ka bâ‐ba pânâ Stivěn, momo a diyakidi lodango na ikamidě n‘ Ilina Iyamu, na Filip, na Prokorus, na Nikenor, na Timon, na Parminas, na Nikolas, a uluakidi ua Antiâk. 6Ka bâ‐ba tědě bâ o boho boa metodu: o bâ‐ba bědi kaliyango, ka bâ‐ba kahidě bâ makadu.

7Ka ndaga ja Anyambě ja kena ka tango ya beyokwedi ya vuha o Jěrusalěm na ngudi, na njamba ’něně ya prist na kâlâmâkiyě ikamidě.

8Ndi Stivěn a diyakidi ikamidě na ngudi ti, a ma hakandi belombo be mamakwě na megoma o meoho mea bato. 9Jâ ndi ja ba sinegâg e ma tubakwě na ya Libertini, na ba Sirini, na ba Alěxanda, na ba Silisa, na ba Asia, ba ka bomaka na Stivěn penda. 10Ba diye na ngudi ya huka iyowě n‘ ilina jaju i ma kalanaka. 11Jâ ndi jabu ja kâlâ bato ba vâki, na, Ho mâ yokango a kalaka ndaga ja makili o pělě ’a Mosěs na Anyambě. 12Ka bâ‐ba vegudě bato, na batodu, na balěndi, ka bâ‐ba pâ o mâ‐a jadi, ka bâ‐ba bweya mâ, ka bâ‐ba pâdě mâ o ikando. 13Ka bâ‐ba tědě tali ja ’vela, i vâki, na, Moto těkaně a dâkâ ikala ja ndaga ja makili o pělě ’a iboko tě via holi ekavi, na o pělě ’a elekanako. 14Ikabojana ho yokango a vâkâ na Jisus tě ya Nasarět ekaně, a ka buluděndi iboko těkavi, na Mâ a uludě mběmbâ ja Mosěs i dikakiyi hwě. 15O ba diyakidi o ikando běhěpi ba hilidě mâ, ka bâ‐ba yěně boho boaju boa bě o mâ na boa enjěl.

Currently Selected:

Behadi 6: BNG1895

Highlight

Copy