Behadi 5

1Ndi momo umbâkâ, dina na Ananaia, na mwad‘ ’aju Safaira ba hambakiděndi ehiki. 2Ka mâ‐a kuta epěhi ya ihambe, (mwad‘ ’aju a diyakite yowěngo,) ka mâ‐a vana mběi pâkâ ka mâ‐a nangidě yâ o beko bea metodu. 3Ka Pitě a vâ, na, Ananaia, e lě nde ya Setan e londidě ulema muâvě na jowakiya Ilina Iyamu wa tata epěhi y‘ ihambe ja ehiki? 4O yâ e diyakidi yu diyakate eâvě mětě? o yâ běki hambudwěngo yu diyakate o ngud‘ ’âvě mětě? o lě bondango ndaga těkaně o ulema muâvě na ě? o ’bě jowiyango bato, o jowiyango Anyambě. 5Ananaia a yokakate ndaga těkadi, ka mâ‐a kwa, ka mâ‐a wa: ka jângâ iněně ja bweya ba yokakidi belombo těkabě běhěpi. 6Ka mawanja ba těmě, ka bâ‐ba viha mâ, ka bâ‐ba pumana mâ, ka bâ‐ba tonga mâ.

7O ulingo mua mawěla malalo ka mwad‘ ’aju a ngiya, a yowě be hamidě. 8Ka Pitě a yavwana mâ, na, Langwakiya ’mba ipě nyanga ’anyu e ma hambidě ehiki yěhěpi te ekaně? Ka mâ‐a vâ, na, E, yěhěpi te ekaně. 9Jâ ndi ja Pitě ja vâ na ju, na, E lě nde eanyu e di lataniyango ka yějiyě Ilina ja Anyambě? Hilakěte beko bea ba ma bapě momi ’âvě be‐a běnd‘ ubiyâ, ba ka pumana tepě âvě. 10Jâ tepě ijaju ja kwa o beko beaju o njo pâkâ, ka mâ‐a wa; ka mawanja ma ngiya ka bâ‐ba kâbidě mâ wango, o bâ‐ba bapidě mâ, ka bâ‐ba tonga mâ baka na momi ’aju. 11Ka jângâ iněně ja bweya ikando jěhěpi, na tango e yokakidi belombo těkabe.

12Ka ndembo na megoma beitě bea hawě o bato ba jadi na benâ bea metodu; (bâ běhěpi ba diyakindi lataniyango o elěmbě ya Sâlâmân. 13Bapâkwě bu diyaka pě na moto a jijakiyedi o latě nyolo ’aju na bâ; ndi bato ba kenakidi bâ. 14Ba kamakidě ba badakudwi pě Anyambě, bebimba bea bajo na bamo;) 15Ovaně nd‘ o bato ba ma vanaka mebědi o mehěngě, ba nangakidě bâ o makondo na bebonga beněně, na edingiha ya Pitě a tombaka e ka tâmâ o diba bâ. 16O diyakindi na ebimba e vakiyedi o mamboka ma diyakidi uluaniděngo Jěrusalěm ba vanaka mebědi, na ba ma yěněkě njuke na malina mabe: ka bâ běhěpi ba yonga.

17Jâ ndi ja prist ya molo ja těmě, na ba diyaki na ju běhěpi, (ba pělě ya Sajusi,) ka bâ‐ba yoka jeku iitě. 18Ka bâ‐ba bweya metodu, ka bâ‐ba vamě bâ o ndabo ivititi. 19Ndi enjěl ya Anyambě e dubwakindi mambě ma ndabo ivititi na bulu, ka yâ‐ya pumě bâ, 20na, Kěkěni ka těměkeni, ka kalakeni na bato ndaga ja eměnâ těkae jěhěpi, o těmpěl. 21O bâ‐ba yoki nonaně, ka bâ‐ba ngiya o těmpěl n‘ ubwa mětě ba ka yokwakidě. Ka prist ya molo na ba diyaki na mâ ba pâ, ka bâ‐ba lata ehoka, na batodu ba bana ba Israěl, ka bâ‐ba lomidě o ndabo ivititi ka nângidě bâ. 22O benami be bědi wě, ba kâbidě bâ o ndabo ivititi, ka bâ‐ba timba ka languwa, Na, 23Mbambayě ho ma kâbiděte ndabo ivititi dibamango bwamu, na bevengi těměngo o bwebwe, ndi o hwě ho dubuwedi ho kâbidě moto omě. 24Ndi o prist ya molo, na ngâwě ya těmpěl, na prist iněně ba yokidi belombo těkabe, ba ka mamaka beâ, na, Ekae e ka diya lě na ě? 25Ka moto a viya ka languwa bâ, na, Hilakěteni bamo tě ibanyu ba ngakidě o ndabo ivititi, ba těměngo o těmpěl, ba yokwakidi bato. 26Jâ ndi ja ngâwě na benami ja vala ka bâ‐ba vana bâ, hanga na bwaě, na jângâ ja na o banga bato ba bweya bâ malale. 27O bâ‐ba pâni bâ, ka bâ‐ba diyidě bâ o boho boa ehoka, ka prist ya molo a uwa bâ, Na, 28Hwa ’bo kandakidě inyěni, na, o yokwakidě pěni na dina těkadi? ndi yěněkěteni o londiděndini Jěrusalěm yěhěpi na eyokwanidi ’anyu, na o ’mbakandini o pâdě makiya ma moto těkaně o hwě ho jadi. 29Jâ ndi ja Pitě na metodu mepâkwě ja timbwana bâ, na, Ho lukakandi o yokiya Anyambě wa na bato. 30Anyambě ya bahangwě bahu ndi a betidě Jisus uanyu a weyakidi k‘ inyěni wa kělidi Mâni o ’le. 31Mâ ndi ua Anyambě a betidě na enâ ’aju eyomi, na a diyaki Utumbwani na Uhungini u věkě Israěl iluwa, n‘ iyudwě ja mabe. 32Hwě ndi tali jaju ja belombo těkabe; yâ nyanga tě te Ilina Iyamu, ja Anyambě i věkidi ba yokakiyě Mâ.

33O bâ‐ba yoki nonaně ka bâ‐ba pěhiyě melema, ka bâ‐ba tinga na ba weyaki bâ. 34Ka Farisi pâkâ ya těmě o ehoka, dina na Gameliěl, uyokwidi mua belekanako, ua bato běhěpi a ma yěněkě jambo iněně, ka mâ‐a vâ na metodu me t‘ o bakudwě; 35Ka mâ‐a vâ na bâ, na Inyi bamo ba Israěl, bandamakiděni nyanga ’anyu e hakě o pělě ya bamo těkaba. 36Ikabojana o hwi ja bohoboho, Tudas a těměkindi, a ka měměkě na a běndi uaju moto, ka tango ya bato ka kam‘ inai ya lata na mâ; nd‘ a weyakudwěndi, ka tango e yokakiyi mâ yěhěpi ya pajangana, ba wakindi o ndâyě. 37O moto těkaně a bědi tombango, ka Judas ya Galili a těmě o hwi ja pago, a valanaki tepě bato baitě, ndi a waki tepě, ka tango e yokakiyi mâ yěhěpi ya pajangana. 38Ndi mbi vâki n‘ inyěni, na, Himbamakani, dikakani bamo těkaba mbwe: oningě ehoka těkae tombe ehavu těkae e diyete ya bato, e ka wate o ndâyě. 39Ndi oningě e diyete ya Anyambě, o ’bě na ngudi ya weyidi yâ ni o ndâyě, o banga wa duwaniyani o yanakani na Anyambě. 40Ka bâ‐ba yokiya mâ, ka bâ‐ba ndiya metodu, o bâ‐ba bi bâ bomango, ka bâ‐ba kandidě bâ na ba kalake pě na dina ja Jisus, jâ ndi jâbu ja hulidě bâ. 41Ka bâ‐ba vala o boho boa ehoka, ba kěkě ba peyaka nana ba langudwi na ba bi weyango na o yoka ihâni o nyanga ya dina jaju. 42Bu dâkâ iyokudě n‘ ikaliya ja Jisus Kraist o těmpěl na o mandabo, buhwa ka buhwa boěhěpi.

Currently Selected:

Behadi 5: BNG1895

Highlight

Copy