Behadi 4

1O bâ‐ba diyaki ba kalaka na bato, ka prist na upangiyi mua těmpěl, na Sajusi, ba pâ o bâ‐ba jadi. 2Linguwango na na ba yokwakidi bato, na ba kalakiyendi ipumbuwa j‘ iwedo na Jisus baka. 3Ka bâ‐ba bweya bâ, ka bâ‐ba vamě bâ o ndabo ivititi na buhwa bopâkwě bo t‘ o ya; ’kabojana e diyakindi ya bě epedi ya kolo. 4Tombekete ka beně be diyakidi, ba yokakidi ndaga baitě, ba kamakiděndi; tango ya bamo e diyakindi ka tâjen itano.

5E diyakindi bea bwe ka bapangiyi, na batodu, 6na balěndi, Na Anas prist ya molo, na Keefas, na Jân, na Alěxanda, na tango e diyakidi jawěngo na prist ya molo, ba yolaně o Jěrusalěm. 7O bâ‐ba tědě bâ o hanganě, ka bâ‐ba uwa bâ, na, E lě nja ngud‘ ě, tombe nja din‘ ě, ijanyu i hanidini ekae? 8Jâ ndi ja Pitě, londango n‘ Ilina Iyamu, ja vâ na bâ, na, Inyi bapangiyi ba bato na batodu ba Israěl, 9Oningě na ho kâtâkwěndi o buhwa tě ekabo na ehavu eyamu e hakudwě ebokě, tina ’aju e yonganidi; 10Ndi inyi běhěpi yowakěni na bato ba Israěl běhěpi, na dina ja Jisus Kraist ya Nasarět, uanyu a kâmâkidě o krâs; ua Anyambě a pumbwâkidě; Mâ ndi a tědě momo těkaně o boho boanyu okava upeha. 11Ilale tě ijanyu ja balongi i ha yěněkidi elombo, ndi ja bě molo mu‘ itududu ekadi. 12Iyonga i ’bě pě n‘ upâkwě, Ikabojana o ’bě na dina ipâkwě o he i di vangudwěngo bato, ijahu i ka yonganě.

13Ndi o bâ‐ba yěněkidi na Pitě na Jâni bu bangaka, na bâ tepě yowěngo na bu yokwaka, ba diyakite bamo ba ha diyakidi n‘ iyowě, ba ka mamaka, ka bâ‐ba yowě na ba diyakindi na Jisus. 14Hilěngo momo a yongakidi na bâ těměngo, bu diyaka na ngudi ya boma penda. 15Ndi o bâ‐ba sombidě bâ na ba t‘ o puma o ’hoka, ka bâ‐ba hohonganě bâ mětě na bâ mětě, 16Na, Ho hake lě bamo těkaba na? ’kabojana ba hango ugoma u di yowaněngo, mua ba Jěrusalěm běhěpi u ha dimbakiya, na hwě ho ’bě na ngudi o dimba yâ. 17Ndi o banga ya yavidě pě o bato ba jadi, ho hihake bâ i pâni, na ba kalake pě na moto ka moto na dina těkadi. 18Ka bâ‐ba ndiya bâ, ka bâ‐ba kandidě bâ na ba kalakiye na ba yokwakidě pě na dina ja Jisus na vilolombo. 19Ndi Pitě na Jân ba timbwanaki bâ, na, Ipě e hohonganěngo o boho boa Anyambě, na ho yokakiya inyěni wa na Anyambě, hohonganakěni. 20Ikabojana ho ’bě na ngudi ya diya ho kale belombo beahu be yěněkidi n‘ ibeahu be yokakidi. 21Ndi o bâ‐ba hihi pě bâ, ka bâ‐ba hulidě bâ, ba duwe elombo ya vomwanidě bâ, na tina ’a bato, ’kabojana bato běhěpi ba bendakiděndi Anyambě o nyanga e hamakidi. 22Ikabojana momo tě a levakidě ugoma tě mu‘ iyonga ekamu, a diyakindi a tomba igona ja mabo ma mepuma manai.

23O bâ‐ba huludwě ka bâ‐ba vala o njamb‘ ’abu, ka bâ‐ba languwa bea prist na batodu be vâki na bâ beěhěpi. 24O bâ‐ba yokidi ka bâ‐ba betě moyi mabu o Anyambě a jadi, bâ běhěpi ta, na, Jěhova âvě ndi Anyambě, e velakidi oba na he na manga, na be did‘ omě beěhěpi. 25A vâki n‘ udumbu mua uhayi muâvě Devid, na,

Bato ba ha ’wě Anyambě ba yokaki lě ngambi ya nde, na bato ba yebakiya beyebiyěyebiyě? 26Mepolo mea he me těměkindi ka bapangiyi ba yolaně ihimbidě ja Jěhova n‘ ihimbidě ja Kraist ’aju.

27Ikabojana Hěrod, na Pontius Pailat, na Jěntail, na bato ba Israěl, ba latanakiyendi mbambai ihimbidě ja mwan‘ ’âvě uyamu Jisus, uâvě a di papuděngo, 28Iha ja ya enâ ’âvě, na ehoka ’âvě be lenakidě na be ka hamandi. 29Ndi Upangiyi hilakěte ka bâ‐ba hihakě: pangaka bahayi bâvě ba kalaka ndaga jâvě, ba diye na jângâ, 30N‘ ihambidě ja ’nâ ’âvě iyonganě, na ovaně nd‘ o ndembo na megoma be ka hamě na dina ja Mwan‘ ’âvě ua holi Jisus. 31O bâ‐ba kaliyedi, iboko viabu vi diyakidi lataniyango, via ninganakiděndi, ka bâ běhěpi ba londa n‘ Ilina Iyamu, ba ka kalaka ndaga ja Anyambě, ba bange pě.

32Ebimba e kamakidě yěhěpi, e diyakindi ulema umbâkâ, ilina jâkâ: bu diyaka na a ma vâkâ na belombo beaju be ma pigaka be diyakindi ibeaju mětě, ndi ba diyakite belombo beěhěpi ta. 33Metodu me levakiděndi ipumbuwa ja Upangiyi Jisus na ngudi eněně: na ehekwě eněně e diyaki tepě na bâ běhěpi. 34Bu diyaka na a ma nyamaka; ’kabojana tango e ma pigaka behiki na mandabo ba ma hambakidi beâ, ba vanaka mahambe ma belombo be ma hambakudwě, 35Ka nangidě mâ o beko bea metodu, ngabo e ka kabakwě na moto uěhěpi, nyanga ’aju e ma nyamaka.

36Josěs ua metodu a vangakidě na Barnabas, (i didi na, Mwana a hombakě) ua diya ja Livai ya ehe ya Saiprâs, 37A diyakindi na ehiki ka mâ‐a hambidě yâ ka mâ‐a vana dâlě, ka nangidě jâ o beko bea metodu.

Currently Selected:

Behadi 4: BNG1895

Highlight

Copy