Behadi 3

1Ka Pitě na Jân ba vala o těmpěl o iwěla ja ikaliya, ja malalo. 2Momo umbâkâ a diyakidi ebokě oviya jemi ja nyangwě a bapakudwěndi, ka mâ‐a nangudwě o jâmbě j‘ ugomba mua těmpěl i tubakwě, na Iyamu, o ijomba ja ba ngakiyě o těmpěl. 3O mâ‐a yěni Pitě na Jâni ba ’mbaka o ngiya o těmpěl, ka mâ‐a jomba. 4Ka Pitě a hilě mâ dihâ sii, na Jâni na, Umbwakiya hwě. 5Ka mâ‐a yokolidě bâ, a yanaka na a ka duwandi elombo o bâ‐ba jadi. 6Jâ ndi ja Pitě ja vâ, na, Ho ’bě na hika etano tombete ya veve, ndi eamě e janidi, ndi eamě e ka věyě âve. Na dina ja Jisus ya Nasarět těměkě, o ka tamwaka. 7Ka mâ‐a bweya mâ o enâ eyomi, ka mâ‐a tědě mâ; ka matambi na matingilingo ma duwa ngudi o njo pâkâ. 8O mâ‐a sodidi, ka mâ‐a těmě de, a ka tamwaka, ka mâ‐a ngiya na bâ o těmpěl, a tamwaka, a sodaka, a bendakě Anyambě. 9Ka bato běhěpi ba yěně mâ a tamwaka, a bendakě Anyambě. 10Ka bâ‐ba yowě na a diyakite mâ‐a diyakidi a jombanaka o jâmbě j‘ ugomba mua těmpěl Iyamu; ba ka mamaka e hamakid‘ o mâ‐a jadi n‘ umamo uněně.

11O momo tě ua ’bokě a yongakudwě a hukite Pitě na Jân hukango, ka bato běhěpi ba pumanidě umbila nala o bâ‐ba diyakidi o elěmbě e tubakwě, na, ya Sâlâmân, ba mamaka nangudi. 12O Pitě a yěnidi, ka mâ‐a vâ na bato, na, Inyěni bamo ba Israěl, o mamaka lě ni ekae na nde? e lě nde eanyu e ’mbwakiyě hwě dengedenge, ona na ngudi ’ahu, na bwamu boahu ndi be pangidi momo tě ekaně a tamwaka? 13Anyambě ya Ebreham na Aisak, na Jekâbu, Anyambě ya bahangwě bahu ndi a bendidě Mwana ’aju Jisus, uanyu a hulakidě, ka inyěni wa hâhâ Mâ ni o boho boa Pailat o mâ‐a yanakidi na a hulakidi Mâ. 14Ndi o hâhâkindini ua Holi, Uyamu, o ka vahakani na eweyi bato na e věkwě inyěni. 15Ka inyěni wa weyani Upolo mua eměnâ, ua Anyambě a pumbwakidě oviya bawewe, yâ ndi eahu e didi tali. 16Ndi dina jaju, na ikamidě ja dina jaju, ndi i yâdidě momo tě, uanyu a yěněkě, uanyu a ha dimbakiya ekaně; e, ikamidě jaju ndi i vi mâ iyongě tě ja hânjâbiyěngo ekadi o boho boanyu boa běhěpi. 17Ndi banabina mbi te yowěngo, na o hakindini n‘ ipuhwa ja iyowě, te ka bapangiyi banyu ba hakidi. 18Ndi belombo tě, bea Anyambě be levakidě o vyo na udumbu mua basâki baju, na Kraist a ka yěněndi betuniya, a hohonganidě tepě nonaně. 19Yěněkěni ngěbě, wa uluwani, ovaně nd‘ o mabe manyu ma ka buludwě, o ’gombe ya iyâdiyě e ka viyě o pwanja ya Upangiyi. 20Ndi a ka lomandi Jisus Kraist, a kalakudwě inyěni o vyo: 21Ua hěvěn a ka pahiyě kabo o begombe bea itimbě ja belombo beěhěpi, bea Anyambě be di kalango na medumbu mea basâki baju oviya jali ja he. 22Ikabojana Mosěs a vâkite na bahangwě bahu pâkwěpâkwě, na, Jěhova Anyambě ’anyu a ka betěndi bana ba banyangwě banyu Usâki u ka kwaně ’Mba: mâ ndi uanyu a ka yokiyě, belombo beěhěpi ibeaju be ka vâyě n‘ inyěni. 23E ka diyi na ilina jěhěpi i ka měndě i yokiyě usâki těmuně, i ka weywěndi oviya bato ba jadi. 24E, basâki běhěpi oviya Samuěl, kwanga nala ba vitakidě, tango e di kalango yěhěpi, te langwakidi o pělě ’a hwi tě ekadi. 25Inyěni ndi bana ba basâki, na ba panga ya Anyambě e panganakidě bahangwě bahu, na Ebreham, Na, ibângâ jâvě ndi ja miyâ ma he tě ekaně yěhěpi ma ka vambanwě ibâtâ. 26Inyěni ndi ba Anyambě ba betidě mwan‘ ’aju Jisus, o bohoboho, ka Mâ‐a loma Mâ ka vambiya inyěni ibâtâ, j‘ iludě j‘ inyěni běhěpi oviya mabe manyu.

Currently Selected:

Behadi 3: BNG1895

Highlight

Copy