Behadi 2

1O buhwa boa Pěntikost bo pâdi, bâ běhěpi ba diyakindi o ikando iboko viâkâ. 2O mbenjě pâkâ joyi i viyendi oba, o na ja ngombe e vungaka, ka jâ‐ja yambiya ndabo ’abu e diyakidi. 3Ka bemi bea paha ona veya, bea pumiya o bâ‐ba jadi, ka viâ via kokaniya bâ. 4Bâ běhěpi ba bě londango n‘ Ilina Iyamu, ba ka kalaka na bemi bepâkwě, panika Ilina i věki bâ ukalo.

5Na Jiu i diyaki tepě, i diyaka o Jěrusalěmi, bamo bayamu, ba betomba beěhěpi be did‘ o he. 6O ekae e yokanidi, ka ebimba ya yolaně ba kubakindi, ’kabojana moto uěhěpi a yokaki bâ‐ba kalaka etomb‘ ’aju mětě. 7Ba mamakindi umamo uněně ba ka uwanaka, na, Yěněkěteni ba ’bě ba kalakě ekaba běhěpi, ba Galili? 8Ndi e lě nde eahu e yokakě moto uěhěpi na emi ’ahu mětě, eahu e janakudwě? 9Ba Partia, na ba Media, na ba Ilim, na badiya ba Měsopotamia, na o Judea, na Kapadosia, 10na o Pontos, na Asia, O Fligia, na Pamfilia, o Ijipt, na pělě ya Libia o pělě ’a Sireni, na bangi ba Roma, Jiu, na ba ulwakudwě. 11Ba Kriti, na ba Arebia, ho yokaki bâ ba kalaka belombo bea Anyambě be mamanakwě na bemi beahu mětě. 12Ba ka mamaka ba ka butaka bâ mětě, na bâ mětě, na, Ekae e lě na ě? 13Bapâkwě ba ma kyebaka bâ, bâ na, Bamo tě ekaba ba vulango ivě j‘ usasa.

14Ndi Pitě a těměkindi na jomu n‘ umbâkâ, ka mâ‐a betě joyi, ka mâ‐a vâ na bâ, na, Inyi bamo ba Judia, na inyěni ba diyakě o Jěrusalěm, yowakěni ekae, n‘ inyěni wa yoka tepě ni ndaga jamě. 15Ikabojana ekaba ba ’bě peyango k‘ inyěni o yebakiyěni, ’kabojana buhwa bo ngite mawěla ibuwa. 16Ndi ekae, ndi ya usâki Joěl e kalakidi, na,

17Anyambě a vâki, na, E ka diyandi o hwi ja madikanido, mbi ka hovandi bato běhěpi Ilina jamě: na bana banyu ba bamo na ba bajo ba ka sâkâkâ, na mawanja manyu ma ka yěněkě behihila, na batodu banyu ba ka yâtâkâ ndâtâ:

18Mbi ka hoviděndi bahayi bamě ba bamo na ba bajo, Ilina jamě o hwi tědině; na bâ‐ba ka sâkâkâ:

19Mbi ka leviděndi belombo be mamanakwě o hěvěn oba, na ndembo o he mětě; makiya, na veya, na bengumbi bea itutu:

20Joba i ka uluwandi ivititi, na ngândě makiya, na buhwa tě boa Anyambě boněně boa yowaněngo na ta ka pâ.

21E ka diyi na moto ka moto uěhěpi a ka dakiyě dina ja Jěhova, te a ka yongě.

22Inyěni bamo ba Israěl, yokakani ndaga tě ekadi; Jisus ya Nasarět, momo ua Anyambě a yějěněkiyedi inyěni na megoma, na belombo be mamanakwě, na ndembo ja Anyambě i haki na Mâ o hanganě ’anyu, te ka inyěni mětě o di teni yowěngo: 23Mâ uanyu a bweyakudwě, n‘ upango mua Anyambě u diyakite ovyo leniyango n‘ iyowě jaju ja bea bohoboho, k‘ inyěni wa nângâni, na kâmâkidi o krâs na benâ bebe na weyakani: 24Ua Anyambě a pumbudě, o Mâ‐a bědi mehiyo mea iwedo unjuwango; ’kabojana yu diyaka na ngudi ya diya na i hukake Mâ. 25Ikabojana Devidi a kalakate o pěl‘ ’aju, na,

Mbi takite o yěně Jěhova o boho boamě; ’kabojana a ndi o enâ ’amě eyomi, na banga mba ninganě.

26Ovaně nd‘ o ulema muamě u peyakidi, na emi ’amě e ka yěněkě mbya; tepě mehoni meamě me ka yâjândi na ipitě:

27Ikabojana wa dike ilina jamě o hěl, na nâvě wa huludě tepě Uâvě ua holi a bâkâ.

28O ’mba yowuděngo njea ja eměna; o ka londi ’mba na mbya o pwanja ’âvě.

29Bamo na banabina, mbi t‘ o kala n‘ inyěni o pělě ’a hangwě ’ahu Devid, na a wendi, na mâ‐a tongudwě tepě, na malonga maju ma tepě na hwě na boa buhwa tě ekabo. 30O mâ‐a diyakidi usâki, yowěngo na Anyambě a kanakiyi mâ, na ebuma ya ukuba muaju o pělě ya nyolo, ndi eaju e ka pumě Kraist ka diya o eka ’aju. 31O mâ‐a tidi o yěně ekae, ka mâ‐a kala o pělě ya ipumbuwa ja Kraist, na Ilina jaju ju dikakwě o hěl, na mehoni meaju meu bâkâ. 32Jisus tě ekadi ndi ja Anyambě i pumbudě, yâ ndi eahu e di tali. 33O Mâ‐a betudwě na enâ ya Anyambě eyomi na Mâ‐a ’la ka duwa oviya Hangwě a jadi panga ’a Ilina Iyamu, ka Mâ‐a hubě eanyu e yěněkě, na eanyu e yokakě ekae. 34Ikabojana Devid a ’bě betango oba, ndi mâ mětě a vâki, na,

Jěhova a vâki n‘ Upangiyi muamě, na, Diyaka o ’nâ eamě eyomi,

35Kabo Mba ta panga ndoba jâvě ebonga ’vě e pitakiyě.

36Ndabo ya Israěl e yowakě pâkwěpâkwě na Anyambě a pangi Jisus tě, eanyu e kâmâkidě o krâs, ekaně, Upangiyi na Kraist.

37Nd‘ o bâ‐ba yokakidi ekabe, ba pěhěkiyendi yokakidi muabu, ka bâ‐ba vâ na Pitě na metodu mepâkwě, na, Bamo, na banabina ho ka ha lě na ě? 38Jâ ndi ja Pitě ja vâ na bâ, na, Ulwakani, na inyeni běhěpi wa baptaiswěni na dina ja Jisus Kraist, o ivěngidě ja bobe, n‘ inyěni wa pahiyani ivěwě ja Ilina Iyamu. 39Ikabojana mohano u ndi umuanyu na bana banyu, na ba di yaviděngo běhěpi, tango ya Jěhova Anyambě ’ahu e ka ndiyě. 40Na ndaga ipâkwě iitě nangudi ijaju i kalakiyi bâ bokelevakidě, na, Yongakěni nyolo janyu o igona tě ibe ekadi. 41Jâ ndi ja ba pahakiyi ndaga jaju na mbya, ja baptaiswě; buhwa tě bo badakudwi bâ, ka tâjen ja malina ilalo. 42Ba lilimakiděndi iyokwanidi via metodu n‘ ulato, n‘ ipěhě ja pěmbě, na makaliya.

43Ka jângâ ja bweya ilina jěhěpi; na belombo be mamanakwě na ndembo iitě ja metodu i hakidi. 44Ba kamakidě běhěpi ba diyakindi ta, na bâ‐ba diyaki tepě belombo beěhěpi ta; 45Ka bâ‐ba hamba behiki beabu na hika ’abu, ka bâ‐ba kaba na moto uěhěpi, nyanga ya moto uěhěpi e ma nyamaka. 46Ba diyakindi buhwa boěhěpi ikando jabu jâkâ o těmpěl, ba pěhěkě pěmbě o mandabo, ba jaka beja beabu na mbya n‘ ulema ’mbâkâ. 47Ba bendakě Anyambě, n‘ unyěvěno na bato běhěpi. Ka Upangiyi a badiya ikando ba ka yongě, buhwa boěhěpi.

Currently Selected:

Behadi 2: BNG1895

Highlight

Copy