Behadi 7

1Jâ ndi ja prist ya molo ja vâ, na, Belombo těkabe be nonaně? Ka mâ‐a vâ, 2na,

Bamo, banabina, na bapaia, ta yokani; Anyambě y‘ ivenda e pumakiyedi hangw‘ ’ahu Ebreham o mâ‐a diyakidi o Měsopotemia ovaně a t‘ o diya o Karan. 3Ka Mâ‐a vâ na ju, na, Umwaka o ehe ’âvě, dikaka majawě mâvě, na nâvě wa viya o ehe ’amě e ka levid‘ âvě. 4Ka mâ‐a ’muwa o ehe ya Kaldia na diyaka o Karan, o hangwě a bědi wango na mâ na umwaka pě omě na vaka ka diya o ehe tě eanyu ya bě ekae. 5Au věkě mâ ekuha omě na vilolombo via tědě itambi jaju; ndi a yohanakiděte mâ na A ka vi mâ yâ eabu, na bana baju, e ka longě, ovaně a t‘ o pâ na mwana. 6Ka Anyambě a kala kakana na, ibângâ jaju i ka diyandi bangi o ehe ya ngani, ba ka luki bâ na bâ‐ba ka jongolakidě tepě bâ, kama ja mepuma inai. 7Ka Anyambě a vâ pě, na, Mbi ka yěkiděndi etomba tě e ka lukě bâ yeně, nandi běngě ba vake ka kaliya ’Mba o iboko těkavi. 8Ka Mâ‐a vě mâ panga ya ihěbwě, ka Ebreham a ja Aisak, ka mâ‐a hěbě mâ na hwi lowambi, ka Aisak a ja Jekâb, na Jekâb na jaka jomu ja mejâmbi na mejâmbi mebale. 9Ka mejâmbi mea viniya Josěf, ka bâ‐ba hamba mâ o Ijipt, nd‘ Anyambě a diyaki na ju, 10Ka Mâ‐a věngidě mâ o njuke jaju jěhěpi, ka Mâ‐a vě mâ unyěvěno n‘ iyowě o boho boa Fero y‘ upolo mua Ijipt, ka Mâ‐a panga mâ gâveni ya Ijipt na ndabo ’aju yěhěpi. 11Ka nja ya usalâku ya kwa o ehe ya Ijipt na Kenan, etuniya eněně; bahangwě bahu be diye pě na ngudi ya duwa bodiyanako. 12Ndi o Jekâb a yokakidi na beja be ndi o Ijipt, ka mâ‐a loma bahangwě bahu o boho. 13Njo y‘ ibale ndi ya Josěf e yowanakidě na bana ba hangwě, ka majawě ma Josěf ma yowaně o Fero a jadi. 14Jâ ndi ja Josěf ja banda, ka mâ‐a ndidě hangwě Jekâb na majawě maju měhěpi, mabo ma bato hěmbwědi na bato batano. 15Ka Jekâb a huba o Ijipt, ka mâ‐a wa, bâ na bahangwě bahu běhěpi. 16Ka bâ‐ba valanwě o Saikěm, ka bâ‐ba nangudwě o budu boa Ebreham bo hambakidi na bana ba Ěmor ya hangwě Saikěm na dâlě. 17Ndi o egombe ya panga ya Anyambě e kanakiyedi Ebreham e bakamidi, ka bato ba tombuwa na vuhaka o Ijipt. 18Kwanga na upolo upâkwě u betakidi u ha yowakidě Josěf. 19U kândâkidi bato bahu, a ka jongolakidě bahangwě bahu, ba ka ’hwaka bana babu na banga ba diya. 20Yâ ’gombe tě ndi ya Mosěs e jakudwě, a diyakindi bwamu boite, ka mâ‐a bongunwě o ndabo ’a hangwě ngândě ilalo: 21O mâ‐a uhwakudwě ka mwana ua Fero ua mwajo a tâlidě mâ, ka mâ‐a tombudě mâ, ka mwan‘ ’aju mětě. 22Ka Mosěs a yokudwě iyowě ja Ijipt jěhěpi, a diyakindi na ngudi ya ndaga na behadi. 23O mâ‐a diyakidi a pâdě igona ja mabo ma mepuma manai, ka yâ‐ya pâ o ulema muaju na a kěkě ka pepuwa bana ba nyangwě ba bana ba Israěl. 24O mâ‐a yěnidi umbâkâ a bevakudwě ka mâ a kamaniya mâ, ka mâ‐a kunda a pambalakudwě ka mâ‐a bweya ua Ijipt: 25Ikabojana a yebakiyi na ipě bana ba hangwě ba ka yowěndi na Anyambě a mbakandi o vengidě bâ na enâ ’aju: ndi bu bwěyakidě. 26Buhwa bopâkwě o bâ‐ba diyaki ba yomanaka ka mâ‐a levidě pě bâ nyolo ’aju mětě, na a lataki bâ, na, Bamo, inyi nyangwě pâkâ, o bevanakiya lěni nande? 27Ka a bevakiyedi upâkwě a tindiya mâ, na, Nja pangid‘ âvě upangiyi n‘ uyěkidi muahu? 28O ’mbaka tepě o weya ’mba, ka âvě o weyakidi moto ua Ijipt vaiko? 29O Mosěs a yokidi ka mâ‐a kweya, ka mâ‐a diya mwěngi o ehe ya Midian, eaju e jaki bana babale. 30O mabo ma mepuma manai ma tombidi ka Enjěl ya Jěhova ya pumiya mâ o nginga ya Saina n‘ ungonyi mua veya o ele. 31O Mosěs a yěnidi ka mâ‐a mama ndaga; a vâye na a bakame ka hilě, ka joyi ja Jěhova ja kâbidě mâ. 32Na, Umba ndi Anyambě ya bahângwě, Anyambě ya Ebreham, Anyambě ya Aisak, na Anyambě ya Jekâb. Jâ ndi ja Mosěs ja likima, a jijiye pě o hilě. 33Ka Jěhova a vâ na ju, na, Věngěkidě makogo mâvě o matambi mâvě; ’kabojana mahě ma iboko tě iviâvě vi di těměngo vině, ma ndi holi. 34Mbi yěněngo, mbi yěněngo majili ma bato bamě ba jadi o Ijipt ma yěněkě, Mbi yokango udaki muabu u dakakě, Mbi pândi ka věngidě bâ. Ndi vaka, Mbi lomi âvě o Ijipt. 35Mosěs tě u muabu u kiyakidi, na, Nja pangid‘ âvě upangiyi n‘ uyěkidi? te mua Anyambě u lomaki pě ka pangiya na ka věngidě bâ na enâ ya Enjěl tě e pumakiyi mâ o ele. 36O mâ‐a bědi belombo be mamanakwě na megoma hango o ehe ya Ijipt, na manga ma veivei, na nginga, o mabo ma mepuma manai, ka mâ‐a věngidě bâ. 37Mâ, Mosěs tě, nd‘ u vâki na bana ba Israěl, na, Jěhova Anyambě ’anyu a ka betěndi ’nyěni Usâki mua bana ba banyangwě banyu u ka kwaně ’mba; mâ nd‘ uanyu a ka yokiyě. 38Mâ ekaně ndi a diyakidi na ikando o nginga na enjěl e kalaki na mâ o ukodi mua Saina na bapaia; a pahakiyi ndaga ja eměnâ ijaju i věki hwě: 39Ua bahangwě bahu a ha yokakiyedi ndi ba tindakiyi mâ, melema meabu me ka timbaka o Ijipt, 40Na Erân, na, Haka hwě bea anyambě be ka ’lě o boho boahu: ’kabojana hwa ’we pě ka Mosěs tě u vanakiyi hwě o ehe ya Ijipt ekamu a hadi. 41Ka bâ‐ba ha etumbě ya nyati o hwi tědině, ka bâ‐ba yambiya ugano, ba ka peyaka na behavu bea benâ beabu mětě. 42Ka Anyambě a vonguwa, ka Mâ‐a vě bâ o ikaliya ja ndumba ya oba; ka yâ didi lěndwěngo o ’janganangobo ya usâki, na,

Inyi ndabo ya Israěl o ndi Mbi dikiděngo tito ja wewe, na benambo, o mabo ma mepuma manai o nginga.

43E, ka inyěni wa nângâni mâkâ mua Molâk na nyětěti ya anyambě ’anyu Rěmfan, megano meanyu me hakidi na me kalakiyě: Mbi ka valanandi ’nyěni tombango Babilon.

44Bahangwě bahu ba diyakindi na mâkâ mua tali o nginga ka Mâ‐a levakidě, o Mâ‐a kalaki na Mosěs, na a hakete mâ hohonganěngo na mbago ’aju e yěněkidi. 45Mu‐a bahangwě bahu ba vakidi o mbuhwa na Jâsua u vanakidi o ehe ya Jěntail, ba Anyambě ba dumakidi o boho boa bahangwě bahu, wě na o hwi ja Devid; 46A duwakindi unyěvěno o boho boa Anyambě, ka Mâ‐a vaha o duwa Anyambě ya Jekâb mâkâ. 47Ndi ka Sâlâmâni a longa Mâ ndabo. 48Tombe ka Ua‐oba‐mětě a ha diyaka o těmpěl i longakwě na benâ; ka usâki u vâkidi, na,

49Hěvěn eka ’amě, he ebong‘ ’amě e pitakě: nja ndabo ě eanyu e ka longiyě ’Mba? ka Anyambě a vâkě; ng‘ iboko ě iviamě vi ka yâjě?

50E ’bě ’nâ eamě e velakidi belombo těkabe beěhěpi?

51Inyěni ba mabâlu yenyeyenye ba ha ’bě hěbwěngo melema na matâ ekaba, o teni Ilina Iyamu kabo bohimbakidě: nyanga ya bahangwě banyu e ma haka, yâ te eanyu e hakě. 52U le nja usâki mwa bahangwě banyu u ha ngongolakidě? ba weyaka ba ma levakidě o pělě y‘ ipâdi via Wa Hohonganěngo; uanyu a diyi bakândi, na baweyi; 53Inyěni ba pahakiyedi belekanako na evědi ya enjěl, nd‘ o tati beâ ni.

54O bâ‐ba yokakidi belombo těkabe, ka bâ‐ba pěhiya melema, ba ka kalakidě mahonga mabu. 55Ndi o mâ‐a diyakidi londango n‘ Ilina Iyamu a hilakiděndi oba sii, ka mâ‐a yěně ivenda ja Anyambě, na Jisus a jadi těměngo o ’nâ ya Anyambě eyomi. 56Ka mâ‐a vâ, na, Hilakěteni, mbi yěněkěndi oba bwe, na Mwana moto a jadi těměngo o enâ ya Anyambě eyomi. 57Ka bâ‐ba yama nangudi, matâ mabu dibango, ka bâ‐ba ’la umbila o mâ‐a jadi njamba pâkâ. 58Ka bâ‐ba pumě mâ o mboka, ba ka bweyaka mâ ko ko ja malale; ka tali ja nangidě ngâi jabu o beko bea iwanja ja momo, dina na Sâl. 59Ka bâ‐ba bweya Stivěn ko ko ja malale, ka mâ a dakiya Anyambě, na, Upangiyi Jisus, nângâkâ ilina jamě. 60Ka mâ a balama, ka mâ‐a yama nangudi, na, Upangiyi, o langake bâ bobe těkabo. O mâ‐a vwi nonaně, ka mâ‐a kwa o viyâ.

Currently Selected:

Behadi 7: BNG1895

Highlight

Copy