John 10

Kakala hulihuli kama lolosi na{sipisipi}

1Kena Jesus eme aꞌe, “Anau eme aku okou kehamaoni. Kela hekama seulu konu kokoꞌa kamahale na{sipisipi}. Emeia kama na eulu iloko navasihale. Kama na eailalao kahi, ia ekaa kama. 2Ia kela kama eulu konu kokoꞌa. Kama na elolosi hamaoni na{sipisipi} la. 3Kekama lolosi kokoꞌa la mekalaꞌi aꞌe kama na kokoꞌa la. Na{sipisipi} la emakino keleo kama na. Kama na meanaa aꞌe namale na{sipisipi} aia la, pela ihakaꞌi namanu la ikaha. 4Keualoko kama na ehakaꞌi na{sipisipi} la ikaha, kama na mehaele imua lakou. Na{sipisipi} la emakino keleo aia, kena ikaukali kama na.

5“Ia na{sipisipi} la sekaukali kekama lakou semakino la. Ame na{sipisipi} la semakino keleo kama la, kena namanu la meihulo ikaha ma kama la.” 6Niaina Jesus ekakala haiauna aꞌe nakama kaukali la, nakama la oiseailoa kehakaꞌoko nakakala aia la.

Jesus o kekama elolosi hakaualeꞌa na{sipisipi}

7Ko Jesus ikakala aꞌe hoi, “Anau eme aku okou kehamaoni. Anau ehau poi kokoꞌa kama hale na{sipisipi} la. 8Nakama kela elolosi na{sipisipi} imua, nakama la eailalao ia ekaa kama. Ia na{sipisipi} la sehalono aꞌe nakama la. Ia vahonei anau elolosi na{sipisipi} la. 9Anau ehau poi kokoꞌa la. Alakama meio mai i anau, kena anau meikonaꞌi nakama la iola. Nakama la meikana keo mai i hale, kena io imaka hale nosee naꞌai. 10Ia kama ailalao la ehaele aku nokaa kama, ia noseu okou. Ia anau ehamai pela iau aku keola hamaoni, pela naola okou la meꞌakoa.

11“Anau o kekama kela elolosi laoi na{sipisipi} la. Kama kela elolosi laoi na{sipisipi} la eaunahie kemake ma ikonaꞌi namanu la iola. 12Ia kelaa kama amelolosi na{sipisipi} alakama. Ia kama la elolosi namanu la noko kesui oia. Kena keualoko kama la eꞌike kepoi leikama uhaele hakapili aꞌe i aia, kama la ekiaꞌi na{sipisipi} la nokele ikaha. Kena iko kepoi leikama la ioso aꞌe namanu la nomaseu. 13Kama na elolosi na{sipisipi} la iko kesui la oia, kela hea kama na sealoha namanu la.

14“Anau o kekama kela elolosi laoi na{sipisipi} la. Anau emakino nakama anau la, ia nakama la emakino anau hoi. 15Maua ma Kamana eme pela hoi. Kama la emakino anau, ia anau emakino kama la. Anau eaunahie kemake ma ikonaꞌi nakama la. 16Alakama anau senoho iloko keukulana nei. Anau mehakaꞌi mai nakama la hoi. Nakama la emakino keleo anau, kena meisuꞌui mai poi haleaina hokahi, ilolosi hekama hokahi.

17“Kamana ehaikama laoi anau, maikinimea anau eaunahie kehoꞌi aꞌe keola anau. Imea pela anau ilavaa keko muli keola anau. 18Sehikama meko keola anau nei ikaha manau. Anau eaunahie sonau kehoꞌi aꞌe keola anau. Anau eisi namahi kehoꞌi aꞌe keola anau. Ia anau eisi namahi hoi keko muli keola la. Kenei hea Kamana anau la me mai anau ipena.”

19Na{Jiu} la elono nakakala nei, kena ihakaukau solakou nohavaꞌee. 20Komaꞌi nakama eme aꞌe, “Kama la eisi kipua saꞌino, kena ekakala vale oia! Okea okou ehalono aku kama na?”

21Ko alakama ime aꞌe, “Nakama eisi nakipua saꞌino selavaa kekakala penei! Nakama la selavaa kekonaꞌi nakama alemaka seni la iꞌike.”

Keonohenua sehakina ia Jesus

22Keualoko keꞌina la esamalio, keonohenua iloko Jerusalem eꞌai keꞌai esui ma Hakapu.*f9* 23Kena Jesus ehaele hakapili aꞌe hale kapu i keꞌina emale ma Haseꞌe Solomon. 24Keualoko la, nakama hamakua na{Jiu} la emumui aꞌe Jesus, kena ivasili aꞌe, “Makou ekali aku aꞌoe saika loloa haeꞌo. Hamakahua mai makou. Ea, aꞌoe o keMesaea?”

25Ko Jesus ime aꞌe, “Anau name aku okou avale. Ia okou sehakina nakakala anau la. Anau ehuli aku namahi Kamana anau la i kemale aia, imakino okou nakipukipu anau. 26Ia okou oisehakina, maikinimea okou seai ni{sipisipi} anau. 27Na{sipisipi} anau la emakino keleo anau, kena ekaukali mai anau. Anau eailoa laoi nakama la, 28kena ihoꞌi aꞌe nakama la keola eola kahi, iselavaa nakama la imake. Selavaa hekama kehakeꞌi noko nakama la ikaha ma nalima anau. 29Kamana anau la eau mai nakama la ilolosi anau. Kama la ehamakua namea hakoa. Kena selavaa hekama ehakeꞌi noko nakama la ikaha ma nalima kama la. 30Kamana esuꞌui manau poi hekama hokahi.”

31Kena na{Jiu} la eko nahaku ma imaꞌa Jesus. 32Kena iko Jesus ime aꞌe nakama la, “Anau ehuli aku komaꞌi namea kaualeꞌa Kamana anau la. Aiea okou eko nahaku la ma imaꞌa anau naea?”

33Ko nakama la ime aꞌe, “Makou seloko namea kaualeꞌa aꞌoe ehuli mai na. Makou memaꞌa aꞌoe nahaku, maikinimea aꞌoe ekakala hamemea Keakua. Aꞌoe hekama oia. Ia aꞌoe soꞌoe emea pela ma aꞌoe Keakua!”

34Ko Jesus ime aꞌe, “Nakakala Keakua nei emau iloko nakuaa okou, ‘Anau eme aku okou pela okou niakua.’ 35Kakou emakino pela nakakala kelauniu kapu la ehamaoni naualoko hamau. Keakua eau iho nakakala aia la ilono alakama, kena ikapa nakama na ma ‘niakua.’ 36Kamana ekini anau, kena ihaunalia mai anau iloko kemaalama nei. Kena anau eme aku okou pela ‘Anau hekama Keakua.’ Kena okou sekau keme mai anau pela ma anau ekakala hamemea Keakua. 37Poi anau sepena namea Kamana anau la hihai anau ipena, kena okou amekau kesehakina mai anau. 38Hano anau epena namela, okou ihakina pela anau ehuli aku okou namahi Keakua, niaina okou sehakina mai anau. Ia okou meimakino pela Kamana la esuꞌui manau. Ia anau esuꞌui ma kama la hoi.”

39Nakama la ehaꞌike ma ikaohi Jesus. Kena iko kama la ihalahi ikaha ma nakama la.

40Kena iko Jesus ivaꞌai muli i kelaa vahi ke{liva} Jordan, nonoho i keꞌina kela John Baptist nihaauꞌau kapu keonohenua imua la. 41Komaꞌi nakama eo aꞌe Jesus, kena ime aꞌe, “John sehuli mai makou nahaꞌaku. Ia kama la ekakala mai hamaoni nakipukipu kama nei.” 42Kena komaꞌi nakama keꞌina la uhakina ia Jesus.

Currently Selected:

John 10: ojv

Highlight

Copy