John 11

Kemake Lazarus

1Kela hekama elavea enoho i kemakaꞌina Bethany iloko Judea, kanamale Lazarus. Mary laua ma kaina aia la Martha enoho ilaa hoi. 2(Mary nei o kehine kela ninini kelo manoni iluna nakapuae Kealiꞌi, kena ihapaupaꞌu nakapuae kama la ma keloulu aia. Kela keꞌave aia Lazarus elavea la.) 3Hanau la eꞌave kakala laua ia Jesus pela, “Kealiꞌi, kesoa laoi aꞌoe nei ulavea.”

4Keualoko Jesus nilono nakakala nei, ko kama la ime aꞌe, “Kama na selavea kemahana la pela imake. Kemea na mehuli aku pela Keakua elavaa kekonaꞌi kama na. Ia kena okou meihamaha kekama Keakua.”

5(Jesus elaoi haikaina Martha laua ma Mary, ia ma keꞌave laua Lazarus.) 6Niaina Jesus elono nakakala pela ma Lazarus elavea, kama la enoho oia, nokae saaho. 7Kena iko Jesus ime aꞌe nakama kaukali aia la, “Kakou ivaꞌai muli i Judea.”

8Ia nakama la eme aꞌe, “Rabai. Na{Jiu} iloko Judea la ehihai imaꞌa aꞌoe nahaku ikaa aꞌoe imake, ia aꞌoe ehakaꞌoko ma ivaꞌai muli keꞌina la?”

9Ko Jesus ikakala haiauna aꞌe, “Kelaa la esopo aꞌe kahaka, kena ihaele nosulu keiahi. Kena oai kekama ehaele keao la*f10* mesepoꞌu. Mai kelaa la ehamasina iꞌike kama la. 10Ia oai kekama ehaele kepo mepoꞌu oia. Mai kelaa la sehamasina keꞌina aia ehaele la.”

11Jesus ekakala penei, kena iko ihapaa aꞌe, “Kesoa laoi kakou la Lazarus usili kana kumoe. Ia anau meihaele nohano kama la imahulu.”

12Ko nakama kaukali la ime aꞌe, “Kealiꞌi. Poi kama na esili kana kumoe, kama na memaakala keualoko aia memahulu.”

13Ia Jesus emea pela Lazarus emake. Ia nakama la ehakaꞌoko ma kama la ekakala aꞌe pela Lazarus emoe oia. 14Kena iko Jesus ikakala hamakahua aꞌe nakama la, “Lazarus umake. 15Niaina anau senoho nokonaꞌi kama la, anau ehihia oia. Maikinimea okou meꞌike kehaꞌaku imea okou ihakina hamaoni. Kakou ikaꞌa i Judea nomaka kama la.”

16Kena iko Thomas Keoꞌoa ime aꞌe nakama kaukali Jesus la, “Niaina kakou memake ma kama na, kakou io hoi.”*f11*

Jesus o keola kehamasiꞌe ikaha ma kemake

17Keualoko Jesus nisasaika aꞌe kemakaꞌina Bethany, kama la ulono pela ma Lazarus namake mai avale keluaoa naaho ulaꞌa. 18Bethany ekuu semao*f12* ikaha ma Jerusalem. 19Ia kena komaꞌi nakama i Jerusalem eo aꞌe nomaka haikaina Martha laua ma Mary, nohapoꞌi aꞌe koꞌolua la kela kemake keꞌave laua la.

20Keualoko Martha nilono pela ma Jesus ukae aꞌe, ko kama la ihaele nokili laua. Ia Mary oinoho iloko hale. 21Martha ekakala aꞌe Jesus, “Kealiꞌi. Koaꞌe aꞌoe inoho inei, keꞌave anau la amesemake.*f13* 22Ia anau emakino pela Keakua meiau aku hea aꞌoe eainoa aꞌe i aia.”

23Ko Jesus ime aꞌe kama la, “Keꞌave olua la meiola muli.”

24Kena Martha eme aꞌe, “Anau makino pela kama la meiola muli keualoko Keakua meihamasiꞌe naonohenua ikaha ma kemake i keaho haoki la.”

25Ko Jesus ime aꞌe kama la, “Anau sonau mehamasiꞌe nakama la ikaha ma kemake noola. Oai kekama ehakina i anau meiola, niaina kama la emake. 26Ia nakama eola vahonei kela ehakina i anau meiselavaa kemake. Aꞌoe ehakina nakakala nei?”

27Ko Martha ime aꞌe, “Ei, Kealiꞌi! Anau hakina pela aꞌoe keMesaea, kekama Keakua kela ehaele iho i kemaalama nei.”

Jesus ekani

28Martha ekakala penei, kena ivaꞌai muli nome aꞌe kaina aia la Mary, “KeRabai ukae mai inei, kena evasili i aꞌoe.” 29Keualoko Mary nilono nakakala nei, kama la ehaialualu nohaele nokili laua. 30Keualoko la, Jesus seikae aꞌe iloko kemakaꞌina la, ia oinoho i keꞌina Martha nikili aia la. 31Na{Jiu} kela enoho iloko hale nohapoꞌi koꞌolua la eꞌike Mary umasiꞌe iluna nohaele vave ikaha, kena ikaukali aꞌe vamuli kama la. Nakama la ehakaꞌoko ma Mary ehaele i keꞌava nokani kani valaa.

32Ia Mary ehaele i keꞌina Jesus enoho la. Mary eꞌike Jesus, kena ikoukuli imua kama la nome aꞌe, “Kealiꞌi, koaꞌe aꞌoe inoho inei, keꞌave anau la amesemake.”

33Jesus uꞌike pela Mary ekani, kena na{Jiu} kela eo aꞌe ma kama la ekani hoi. Kena Jesus ualoha haeꞌo, 34kena ivasili aꞌe nakama la, “Okou ehamoe kama la ihee?”

Ko nakama la ime aꞌe “Hamai nomaka, Kealiꞌi.”

35Kena Jesus ekani.

36Ko na{Jiu} la ime aꞌe, “Ila aꞌe. Jesus ualoha kama la.”

37Ia alakama na{Jiu} la ume aꞌe, “Jesus ekonaꞌi kama alemaka seni noꞌike, ia sekonaꞌi Lazarus pela isemake.”

Jesus ehaola Lazarus

38Jesus ualoha haeꞌo, kena ihaele i keꞌava. Ia kehaku elahi epui kaluma la. 39Kena iko Jesus ime aꞌe, “Hakaꞌape kehaku la ikaha.”

Ia Martha keꞌave kama umake la eme aꞌe, “Kealiꞌi. Kama la namake mai avale keluaoa naaho ulaꞌa. Kinokama la mesauna pulau.”

40Kena iko Jesus ime aꞌe kama la, “Anau name aku aꞌoe avale. Poi aꞌoe ehakina, kena aꞌoe meꞌike namahi Keakua.”

41Ko nakama la ihakaꞌape kehaku la ikaha ma kaluma la. Kena iko Jesus iꞌila iluna noloku, kena ime aꞌe, “Kamana. Anau ehihia pela aꞌoe ehalono keloku anau. 42Anau makino pela aꞌoe elono kahi mai anau. Ia anau ekakala penei, pela nakama kela ekuu makou inei la mehakina pela aꞌoe soꞌoe ehaunalia mai anau.”

43Jesus eloku penei, kena ianaa aꞌe hamaloa keleo aia, “Lazarus. Hamai i makahale.” 44Ko kama emake la ihaele iho i makahale. Nalima ma navae kama la eminimini napamalo. Ia namaisu aia la emini kama pamalo hoi.

Ko Jesus ime aꞌe nakama la, “Hana napamalo la ikaha ma kama la, ikana kama la kehaele.”

Nakama hamakua na{Jiu} la ehakaꞌoko ma ikaa Jesus imake

(Mat 26.1-5; Mrk 14.1-2; Luk 22.1-2)

45Komaꞌi na{Jiu} kela nio aꞌe nohapoꞌi aꞌe kevahi Mary uꞌike hea Jesus epena la, kena ihakina kama la. 46Ia alakama na{Jiu} la ukaꞌa nomaka naFarasi, nokakala aꞌe nakama la hea Jesus epena. 47Kena iko nakama hamakua na{Jiu} la iꞌuku ma naFarasi la.*f14* Kena ikakala solakou, “Kakou emea pehe? Kama la ehuli aꞌe komaꞌi nahaꞌaku. 48Poi kakou ekiaꞌi kama la ikauhano pela, keonohenua la hakoa meihakina kama la. Kena nakama haRome la meo mai nosui kesao kakou, kena iau aꞌe keonohenua kakou nei ilolosi alakama.”*f15*

49Kela hekama enoho ilaa, kanamale Caiaphas. Kama la pohoulu hamakua namaakua hekau la. Kama la eme aꞌe, “Okou sehimea ailoa! 50Okou makino. Ame kaualeꞌa pela kama hokahi la memake ma ikonaꞌi keonohenua la, aoki nakama la memaseu hakoa.”

51Ia Caiaphas seme aꞌe kehakaꞌoko aia soia. Kama la ehakae nakakala Keakua pela ma Jesus meimake ikonaꞌi keonohenua la. 52Ia seai ma nakama la solakou. Kela nakama Keakua nimaseu mai imua, isuꞌui poi heonohenua hokahi.

53Nakama hamakua na{Jiu} la eꞌamaka keaho la nopenapena hakaꞌoko ma ikaa Jesus imake. 54Kena Jesus sehahaele hua valoko namakaꞌina na{Jiu} la. Kama la ehaele kemakaꞌina Ephraim, kapili aꞌe keꞌina kukuaha la, nonoho lakou ma nakama kaukali aia la.

55Keualoko keꞌai kePasova na{Jiu} la ukapili, kena komaꞌi naonohenua namakaꞌina valaa eo i Jerusalem, nohakea naola lakou i kevahi nakuaa. 56Keonohenua la esesee Jesus, kena ikuu iloko hale kapu la novasisili solakou, “Okou ehakaꞌoko pehe? Kama la mehamai iloko keꞌai nei?” 57Ia namakua hamakua lakou ma naFarasi eꞌave nakakala pela, poi hekama emakino keꞌina hee Jesus enoho, kama na ihaꞌali aꞌe lakou, ilavaa lakou kekaohi Jesus.

Currently Selected:

John 11: ojv

Highlight

Copy