John 12

Kehine eamusi Jesus

(Mat 26.6-13; Mrk 14.3-9)

1Eono naaho imua keꞌai kePasova, Jesus evaꞌai i Bethany, keꞌina Lazarus enoho la. Kela kekama Jesus nihaola muli ikaha ma kemake. 2Nakama keꞌina la ukanakana keꞌai ihamaha Jesus. Kena Martha evavae naꞌai la iꞌai Jesus lakou ma Lazarus ma nakama enoho ilaa.

3Kena Mary eko aꞌe kelo manoni hamaoni esuinakaa lo, kela ekapa ma {Nard}, kena iamusi nakapuae Jesus, kena ihapaupaꞌu nakapuae kama la keloulu aia. Kena kemanoni kelo la ukaꞌai valoko hale hale la.

4Kelaa kama kaukali Jesus enoho ilaa hoi, kanamale Judas Iscariot. Kena o kekama meihaꞌali aꞌe Jesus i nakama hamakua la. Ko Judas ime aꞌe, 5“Aiea kama la seau aꞌe kelo manoni nei isui kelaa kama laea? Kena uvavae aꞌe namoni la ikonaꞌi nakama haaloha la. Kesui kelo manoni la amehau ma kesui kekama kela eheheaꞌu hekau hokahi.” 6Ia kama la sealoha hamaoni nakama haaloha. Kama la ekakala penei maikinimea kama la elolosi kemuli opu moni ihailavaꞌa soia noailalao namoni la.

7Kena iko Jesus ime aꞌe, “Sepui kehine na! Kama na elolosi kelo manoni la iamusi anau i keaho anau meimake. 8Nakama haaloha la meinoho kahi ma okou, ia anau meisenoho kahi ma okou.”

Keonohenua himaka Lazarus

9Komaꞌi na{Jiu} elono pela ma Jesus ukae i Bethany, kena ikaꞌa i kemakaꞌina la. Ia seai pela ma iꞌike Jesus soia, ia ma iꞌike Lazarus hoi, kekama kela Jesus nihaola muli ikaha ma kemake. 10Kena iko namaakua hamakua la ipena hakaꞌoko ikaa Lazarus imake hoi. 11Ia alakama na{Jiu} la elono pela Lazarus uola muli, kena ikiaꞌi nakama hamakua lakou la nohakina ia Jesus.

Jesus uhaele aꞌe Jerusalem poi hekuꞌu

(Mat 21.1-11; Mrk 11.1-11; Luk 19.28-40)

12Kela aho, keonohenua la eo aꞌe i Jerusalem noꞌai keꞌai kePasova. Nakama la ulono pela ma Jesus usasaika aꞌe, 13kena ikuu nalauniu ikaꞌa apipihi valo nokili kama la,

“Hamaha i Keakua.

Keakua hakapu kama nei.

Kenei kekuꞌu nakama Israel,

Kela ehamai i kemale Kealiꞌi.”

14Jesus elave punua ke{donki}, kena iꞌae iluna kemanu la. Nakakala nei emau i kelauniu kapu ma,

15“Okou nakama kemakaꞌina Zion,

Okou isemakaꞌu.

Kekuꞌu okou la ehamai,

Iluna ke{kolt}, punua ke{donki}.”

16Ia nakama kaukali aia la semakino kehakaꞌoko nakakala nei. Ia keualoko Jesus nimasiꞌe muli noola, nakama la umanaku nakakala kelauniu kapu la pela keonohenua la mehamaha kama la ehau poi hekuꞌu.

Keonohenua ehaꞌali aꞌe nakipukipu Jesus

17Keonohenua kela ekaꞌa ma Jesus la eme aꞌe nakama kemakaꞌina la pela, “Kenei Jesus nianaa aꞌe Lazarus ihamai ikaha ma kaluma haku, ihaola kama la ikaha ma kemake.” 18Kena komaꞌi nakama elono nakakala keonohenua la, pela ma Jesus ehuli aꞌe haꞌaku la, kena io aꞌe nomaka kama la. 19Kena iko naFarasi la ikakala solakou, “Ila aꞌe! Nakama kemaalama nei hakoa ukaukali kama la. Kena kakou ukosao oia.”

Jesus ekakala aꞌe kemake aia

20Kela nikama haGreek eo aꞌe keꞌai la nohamalumalu Keakua. 21Nakama la eo aꞌe nomaka Philip, hekama i kemakaꞌina Bethsaida iloko Galilee. Nakama la eme aꞌe, “Makou hihai iꞌike Jesus.” 22Kena iko Philip ihaele nokakala laua ma Andrew, kena koꞌolua la eo nokakala aꞌe Jesus.

23Ko Jesus ime aꞌe koꞌolua la, “Vahonei Keakua mesau ke{kama ekipu kama} ialuna. 24Anau eme aku olua kehamaoni. Poi kehua sekeiho iluna kaꞌele nomake, kena kehua la amekaꞌoko pela ia. Ia poi kehua la ekeiho nomake, amekomaꞌi nalaꞌau mesomo. 25Oai kekama ehakekele ilolosi kanaola, meilano keola hamaoni. Ia oai kekama esehakekele maha keola aia iloko kemaalama nei, meiko keola eola kahi. 26Oai kekama hihai iheheaꞌu manau, kama la ekau kekaukali mai anau, kena menoho i keꞌina anau meinoho la. Kena Kamana anau la meihamaha aꞌe kama la.

27“Anau ualoha haeꞌo. Ea? Anau amekakala pela, ‘Kamana. Hasao anau ikaha ma kehalono lihu nei.’ Seai. Anau ehamai inei nohalono lihu oia. 28Kamana, huli mai namahi kemale aꞌoe.”

Kena Keakua ukakala iho ikaha ma kevaelani, “Anau nahuli aku avale namahi kemale anau, ia anau mehuli aku namahi pela hoi.”

29Nakama kela ekuu ilaa elono keleo la, kena imea ma kela hakuli. Ia alakama emea ma “Seai. Kela he{enselo} avale ekakala aꞌe kama la!”

30Ko Jesus ime aꞌe nakama la, “Keleo la ekakala iho imakino okou oia. Ia anau namakino avale. 31Vahonei Keakua meihakonukonu nakama kemaalama nei hakoa. Kena mehaise kekuꞌu kemaalama ilalo nei ikaha. 32Ia keualoko Keakua meisau anau ialuna ikaha ma kemaalama nei, kena anau mehakaꞌi mai nakama naonohenua hakoa.” 33Jesus ekakala penei ihaꞌali aꞌe kipukipu kemake aia.

34Ko keonohenua la ime aꞌe, “Nakuaa kakou emea mai ma ‘keMesaea la menoho ma kakou naualoko hamau.’ Ia aꞌoe ekakala pela Keakua meisau {kama ekipu kama} la ialuna. Kena oai {kama ekipu kama} na?”

35Kena Jesus ekakala haiauna aꞌe, “Kemasina la meinoho ma okou kamasaika oia. Okou ihahaele keualoko kemasina la oinoho ma okou, imua kela kepouli la mekae aku okou. Nakama kela ekaꞌa keꞌina pouli la mesemakino keꞌina hee lakou ekaꞌa la. 36Okou ihakina kemasina la keualoko kama la oimasina iluna okou. Pela okou imemo kama kemasina la.”

Na{Jiu} la oisehakina

Jesus ekakala penei, kena ihaele ikaha soia. Pela keonohenua la amesemakino keꞌina aia enoho la. 37Niaina Jesus ehuli aꞌe nahaꞌaku imua namaisu nakama la, kemahi ana nakama la oisehakina i aia. 38Kena nakakala Isaiah nei ehuli mai nohamaoni,

“Kealiꞌi. Niaina aꞌoe ehuli aꞌe namahi aꞌoe,

Sehikama ehakina nakakala kaua.”

39Nakama la oisehakina oia. Poi Isaiah ekakala mai ma,

40“Keakua ehaseni naꞌalemaka nakama la.

Kena ipui nahakaꞌoko nakama la.

Pela naꞌalemaka nakama la meiseꞌike

Ia nakama la mesemakino laoi,

Ia meisevaꞌai i Keakua

Aoki kama la amekonaꞌi lakou.”

41Isaiah ekakala penei, maikinimea kama la eꞌike namahi Jesus imua lo,*f16* kena ikakala aꞌe nakipukipu kama la.

42Komaꞌi nakama hamakua na{Jiu} la ehakina ia Jesus. Ia nakama la ehuu kehakina lakou. Maikinimea nakama la emakaꞌu naFarasi, aoki naFarasi la amehaoki lakou ikaha ma hale loku la. 43NaFarasi la ehakekele pela alakama ihamaha lakou. Ia sehakekele pela Keakua soia ihamaha lakou.

Kipukipu kehakonukonu

44Jesus ekakala hamaloa ma, “Poi hekama ehakina ia anau, kama la ehakina i kekama kela ehaunalia mai anau la hoi. 45Poi hekama eꞌike anau, kama la eꞌike kekama kela ehaunalia mai anau la hoi. 46Anau ehamai iloko kemaalama nei poi heahi. Nakama kela ehakina i anau selavaa kenoho iloko kepouli.

47“Poi hekama elono nakakala anau, ia sekaukali nakakala la, anau mesehai aꞌe kama na. Anau sehamai nohai aꞌe nakama kemaalama nei. Anau ehamai nokonaꞌi nakama la avale. 48Poi hekama sehihai anau, ia sehihalono nakakala anau, kena nakakala anau meihakonukonu kama na i keaho haoki. 49Anau sekakala aku nahakaꞌoko anau sonau. Ia Kamana kela ehaunalia mai anau la eme mai hea anau ikakala. 50Ia anau emakino pela nakakala kama la eau aꞌe keola eola kahi. Ia kena anau ekakala aku hea Kamana eme mai manau ikakala aku la.”

Currently Selected:

John 12: ojv

Highlight

Copy