John 13

Jesus esolo nakapuae nakama kaukali aia la

1Imua keꞌai kePasova, Jesus umakino pela aia mekiaꞌi kemaalama nei ivaꞌai muli Kamana. Jesus elaoi nakama kaukali aia iloko kemaalama nei, kena kama la ehuli aꞌe kelaoi hamaoni aia la nokae kehaoki.

2Ia Satan eusuusu aꞌe Judas Iscariot kama Simon ihaꞌali aꞌe Jesus i nakama hamakua la. Keiahi la, Jesus enoho noꞌai lakou ma nakama kaukali aia la. 3Kama la emakino pela Kamana eau aꞌe aia namahi iluna namea hakoa. Kama la emakino hoi pela aia ehamai i Keakua, ia mevaꞌai muli Keakua. 4Ia kena Jesus emasiꞌe iluna, noui keuahu aia la ikaha, kena iko pamalo nosai hakiꞌe kemanava aia. 5Kena inini kevai kea iloko {pesoni}, kena iꞌamaka nosolo nakapuae nakama kaukali aia la, ia ihapaupaꞌu nakapuae nakama la pamalo la.*f17*

6Jesus ukae aꞌe i Simon Peter, ia kama la eme aꞌe Jesus, “Kealiꞌi. Aꞌoe mesolo nakapuae anau hoi?”

7Ko Jesus ime aꞌe kama la, “Aꞌoe semakino hea anau ehuli aku vahonei, ia imuli, aꞌoe memakino.”

8Ia Peter eme aꞌe, “Sekau pela aꞌoe isolo nakapuae anau!”

Ko Jesus ime aꞌe, “Poi anau sesolo aꞌoe nomakahua, kena aꞌoe mesehikama kaukali anau.”

9Ko Simon Peter ime aꞌe, “Kealiꞌi. Aꞌoe isesolo nakapuae anau oia. Solo nalima ma pohoulu anau hoi.”

10Ko Jesus ime aꞌe, “Poi hekama eꞌauꞌau, kinokama kama la emakahua. Kapuae aia la eꞌele oia. Okou emakahua, ia seai okou hakoa.”

11Jesus namakino avale kekama meihaꞌali aꞌe aia i nakama hamakua. Kela hea kama la emea ma, “Ia seai okou hakoa.”

12Jesus esolo nakapuae nakama la nooki, kena iꞌahu muli keuahu aia la, kena ivaꞌai muli keꞌina aia enoho la, kena ime aꞌe, “Okou makino hea anau ehuli aku okou? 13Okou emea pela anau eaoaꞌo okou, ia ma anau o Kealiꞌi okou. {Kenei anau} nei. Kena nakakala okou na ekonu. 14Anau Kealiꞌi okou. Ia niaina anau eaoaꞌo okou, anau esolo nakapuae okou. Kena okou ekau kesolo nakapuae alakama okou hoi. 15Anau ehuli aku okou nakipukipu kekonaꞌi alakama, kena okou ikau keme pela hoi. 16Anau eme aku okou kehamaoni. Kama hamakua la ehananiu iluna kama heheaꞌu aia la. Ia kama kela ehaunalia alakama iꞌave nakakala aia la ehamakua iluna kekama aia ehaunalia la. 17Okou uailoa nakakala nei. Ia poi okou ekaukali namenei, okou mehakapu lia Keakua.

18“Anau seme pela okou hakoa ekaukali nakakala nei. Anau makino laoi nakama anau nikini la. Ia nakakala kelauniu kapu meihuli mai nohamaoni, ‘Niaina kama la eꞌai naꞌai anau, kama la eliloko anau.’ 19Anau ekakala aku okou namea nei vahonei, imua kela namea nei meapihi mai. Pela okou meihakina pela {Kenei anau}. 20Anau eme aku okou kehamaoni. Poi hekama ehihai nakama kela anau mehaunalia la, kama la ehihai anau hoi. Ia ehihai kekama kela ehaunalia iho anau.”

Judas mehaꞌali aꞌe Jesus i nakama hamakua la

(Mat 26.20-25; Mrk 14.17-21; Luk 22.21-23)

21Jesus ekakala penei, kena ialoha haeꞌo nome aꞌe, “Anau eme aku okou kehamaoni. Hekama okou mehaꞌali aꞌe anau i nakama eliloko anau la.”

22Nakama kaukali la ukipuaina, kena uꞌilaꞌila solakou. Ia nakama la semakino oai kekama Jesus ekakala la. 23Kekama Jesus elaoi la*f18* enoho kapili aꞌe Jesus. 24Kena iko Simon Peter iꞌani aꞌe kama la nomea ma, “Vasili aku kama la maia ekakala na oai.” 25Ko kama la ihakiꞌe nohapale aꞌe, kena ivasili aꞌe, “Kealiꞌi, kena oai?”

26Ko Jesus ime aꞌe, “Anau meihui halaoa, kena uau aꞌe kama la.” Kena Jesus eko kemuli halaoa la ihasuu, kena iau aꞌe Judas, kama Simon Iscariot. 27Keualoko Judas eꞌai halaoa la, kena Satan ukau iloko kama la. Ko Jesus ime aꞌe Judas, “Haikaalualu!” 28Ia nakama kaukali la semakino aiea Jesus kakala penei laea. 29Alakama ehakaꞌoko pela ma Jesus emea Judas ihaele nosui hea lakou hihai keꞌai la. Ia ehoꞌi aꞌe nimea ma nakama haaloha la. Mai Judas elolosi kemuli opu namoni lakou. 30Judas eko halaoa la, kena ihaele imaka hale. Kela keualoko kepo.

Kuaa vahonei

31Judas uhaele, kena iko Jesus ime aꞌe, “Keualoko nei, Keakua meihuli aku namahi {kama ekipu kama}. Ia kama la mehuli aku namahi Keakua. 32Ia Keakua soia meihuli aku namahi kama la vahonei oia.

33“Aukama. Anau menoho ma okou kamaualoko oia. Okou meisesee i anau. Ia anau ekakala aku okou vahonei hea anau nikakala aꞌe nakama hamakua na{Jiu} la. Okou selavaa keo i keꞌina anau mehaele la.

34“Kena vahonei anau eme aku kuaa vahonei. Laoi alakama. Okou ilaoi alakama ehau poi anau elaoi okou soꞌokou. 35Poi okou elaoi alakama, kena nakama hakoa meimakino pela okou ekaukali anau.”

Peter meipula aꞌe pela aia semakino Jesus

(Mat 26.31-35; Mrk 14.27-31; Luk 22.31-34)

36Kena Peter evasili aꞌe Jesus, “Kealiꞌi. Aꞌoe mehaele ihee?”

Ko Jesus ime aꞌe, “Vahonei aꞌoe selavaa kekaukali mai anau i keꞌina anau mehaele la. Ia aꞌoe meikaukali mai anau imuli.”

37Ia Peter eme aꞌe, “Kealiꞌi. Aiea anau selavaa kekaukali aku aꞌoe vahonei naea? Anau ukanakana imake maꞌoe!”

38Ko Jesus ime aꞌe, “Aꞌoe ukanakana hamaoni imake manau? Anau eme aku aꞌoe kehamaoni. Imua kemoa kane la mekani, aꞌoe meipula koukolu naualoko pela aꞌoe semakino i anau.”

Currently Selected:

John 13: ojv

Highlight

Copy