John 9
9
Jesus ekonaꞌi kaupeala ehanau iho naꞌalemaka eseni
1Keualoko Jesus nihaele valoko Jerusalem, kama la eꞌike kekama, naꞌalemaka kama la useni keualoko aia nihanau iho la. 2Ko nakama kaukali Jesus ivasili aꞌe, “Rabai. Aiea naꞌalemaka kaupeala la useni keualoko aia nihanau iho laea? Kela hemea esala kama la? Ma hemea esala namakua aia la?”
3Ko Jesus ime aꞌe, “Kama la sehaisala, ia semea pela ma namakua kama la ehaisala hoi. Naꞌalemaka kama la eseni imea pela namahi Keakua ihuli aꞌe iloko keola kama la. 4Keualoko keao, kakou ikauhano kepena namea kama ehaunalia mai anau la ehihai kakou ipena. Vahonei ukapili ipo. Meselavaa hekama iheheaꞌu kepo. 5Ia kulana anau enoho iloko kemaalama nei, anau ehamasina nakama kemaalama nei la.”
6Jesus ekakala penei, kena isavale iluna kaꞌele nomulu, kena iamusi naꞌalemaka kama la. 7Kena iko Jesus ime aꞌe, “Haele nohui naꞌalemaka aꞌoe iloko punavava Siloam.” (Emea ma Haunalia.) Kena iko kaupeala la ihaele nohui naꞌalemaka aia, kena ivaꞌai i hale, naꞌalemaka aia uꞌike.
8Nakama keuhale la niꞌike kama alemaka seni la eainonoa namoni imua. Ia kena keualoko lakou eꞌike kama la evaꞌai i hale, nakama la umasalo, kena ime aꞌe, “Ea? Kenei kekama enoho noainonoa namoni, seai la?”
9Ko alakama ime aꞌe, “Kena kama na.” Ia alakama ime aꞌe, “Seai. Kama na ekipu poi kama la oia.” Kena iko kama la soia ime aꞌe, “Kenei anau nei.”
10Ko nakama la ivasili aꞌe kaupeala la, “Ia aꞌoe elavaa keꞌike pehe?”
11Ko kama la ime aꞌe, “Kela hekama eko napela iamusi naꞌalemaka anau. Kanamale Jesus. Kena kama la eme mai manau ihaele i Siloam nohui naꞌalemaka anau. Kena iko anau ihaele nohui, kena anau uꞌike.”
12Ko nakama la ivasili aꞌe, “Kehe kama na?” Ia kama la eme aꞌe, “Anau semakino.”
NaFarasi elaulahu kama ehanau iho naꞌalemaka eseni
13Kena keonohenua la ehakaꞌi kama naꞌalemaka aia niseni la noau aꞌe naFarasi. 14(Jesus emulu napela la nokonaꞌi kama la noꞌike i keaho kapu.) 15Kena iko naFarasi ivasili aꞌe kaupeala la hoi, ma kama la eꞌike pehe. Ko kama la ikakala aꞌe nakama la ma, “Kama la emulu napela iamusi naꞌalemaka anau. Kena anau uhui naꞌalemaka anau, kena vahonei anau uꞌike.”
16Kena alakama naFarasi la eme aꞌe, “Kama la sehamai i Keakua, mai kama la sekaukali nakuaa keaho kapu.” Ia alakama eme aꞌe, “Nakama haisala ame selavaa kehuli aꞌe nahaꞌaku penei.” Kena nakama la uhakaukau solakou.
17Kena iko naFarasi la ivasili aꞌe kaupeala la hoi, “Aꞌoe emea ma kama la ekonaꞌi aꞌoe noꞌike. Aꞌoe hakaꞌoko ma kela oai?”
Ko kaupeala la ime aꞌe, “Kama la ame hekama hakakae nakakala Keakua.”
18Nakama hamakua na{Jiu} sehakina pela ma naꞌalemaka kaupeala la nimea la eseni, kena uꞌike. Kena nakama la uanaa aꞌe namakua kaupeala la, 19kena ivasili aꞌe koꞌolua la, “Kenei hekama olua? Olua ekakala pela ma kama la ehanau iho naꞌalemaka aia eseni. Ia vahonei kama la elavaa keꞌike pehe?”
20Ko namakua kama la ime aꞌe, “Maua emakino pela kama na hekama maua, ia kama na ehanau iho naꞌalemaka aia eseni. 21Ia maua semakino pela ma kama na eꞌike pehe. Maua semakino oai ekonaꞌi kama na noꞌike. Vasili aku kama na avale. Kama na umakua, kena elavaa keme aku soia!” 22Namakua kama la ekakala penei, maikinimea laua emakaꞌu nakama hamakua na{Jiu} la. Nakama hamakua la enuu kehakaꞌoko nei. Poi hekama ekakala pela Jesus o keMesaea, kama na meoki ikaha ma hale loku. 23Kela hea namakua kama la eme aꞌe, “Kama maua na umakua. Vasili aku kama na!”
24Na{Jiu} la eanaa aꞌe muli kaupeala hanau naꞌalemaka eseni, nome aꞌe kama la, “Aꞌoe ihamaha Keakua avale. Makou emakino pela kama ekonaꞌi aꞌoe la, hekama haisala.”
25Ko kaupeala la ime aꞌe, “Anau semakino laoi ma kela hekama haisala. Ia anau makino pela imua naꞌalemaka anau eseni, ia vahonei anau uꞌike.”
26Ia nakama la evasili aꞌe, “Hea kama la ehai i aꞌoe? Kama la ekonaꞌi aꞌoe noꞌike pehe?”
27Ko kaupeala la ime aꞌe, “Anau name aku okou avale, ia okou selono. Okou hihai ilono halaoi? Okou hihai ikaukali kama la hoi?”
28Kena nakama la usaꞌali aꞌe kama la, kena ime aꞌe, “Aꞌoe avale ekaukali kama la, ia makou ekaukali Moses. 29Makou makino pela Keakua ekakala aꞌe Moses. Ia makou semakino keꞌina hee kama la ehamai la!”
30Ko kaupeala la ime aꞌe, “Anau emasalo pela okou semakino keꞌina hee kama la ehamai. Ia kama la ekonaꞌi mai anau noꞌike. 31Kakou emakino pela Keakua sehalono nakama kela eahu nahaisala lakou. Kama la ehalono nakama kela ehamalu i aia, kena epena hea aia hihai lakou ipena. 32Sehikama imua lo elavaa kekonaꞌi nakama ehanau naꞌalemaka eseni la noꞌike. 33Poi hekama sehamai i Keakua, kena kama na ameselavaa kehuli aꞌe namahi penei.”
34Ko nakama la ime aꞌe, “Aꞌoe ehanau mai i nahaisala. Aꞌoe sekau keaoaꞌo mai makou!” Kena iko nakama la ihaise kama la ikaha ma hale loku la.
Nakama kela seꞌike
35Jesus elono pela nakama hamakua la uhaise kaupeala aia ekonaꞌi la. Kena Jesus esee nolave kaupeala la, kena ivasili aꞌe kama la, “Aꞌoe ehakina i ke{kama ekipu kama}?”
36Ko kaupeala la ime aꞌe, “Me mai anau oai kama na Kealiꞌi, ilavaa anau kehakina i aia!”
37Ko Jesus ime aꞌe kama la, “Aꞌoe naꞌike avale kama la, kena kekama ekakala maꞌoe vahonei.”
38Kena iko kaupeala la ime aꞌe, “Anau ehakina, Kealiꞌi.” Kena kama la uhamalumalu Jesus.
39Kena Jesus eme aꞌe, “Anau ehamai kemaalama nei ilaulahu ihavaꞌee keonohenua la. Pela nakama alemaka seni la meiꞌike, ia nakama eꞌike la meio noseni.”
40NaFarasi kela enoho ilaa elono nakakala Jesus, kena ivasili aꞌe kama la, “Aꞌoe emea pela ma makou eseni hoi?”
41Ko Jesus ime aꞌe nakama la, “Poi okou eseni, kena nahaisala okou amesili hia. Ia mai okou emea ma okou eꞌike, kena nahaisala okou la emoe oia.”
Currently Selected:
John 9: ojv
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
