Marko 1

Nettittoyo ono Yoane Batista

Mt 3:1-12; Lk 3:1-9, 15-17; Yn 1:19-28

1Ara ana etteri sayyo hun oyiji’to huno Yesu Kristo Lonyi Hollum. 2Igyoroni nya ibuk ono eyani sayyo Isaya ojo, Ojo Hollum jo,

“Efak ni eyani sayyo hoŋ ikyomoro ahosyere hoi.#1:2 hoiIkyana Hollum jyo Yesu.

Ihuhumyo adi inyi nekoi hoi.

3Iloŋo obo atulo to mur,

Ette jaran, Ihuhumana nekoi Hobu,

Itabisana nekota honyi ’tor.”

4Oleyo nya Yoane Batista to mur. Ittittoyo inyi aati ojo, Oŋida isi iloiti atajya hosi ette ifwotuna batisimo ette Hollum busana eyyata hosi. 5Adahatye aati daŋ hutta fau Yudea iko hutto miji Yerusalem jihonyi. Iruhi laati eyyata hosi ette inyi batisyo isi ihari Yordano. 6Iyyafatyo Yoane aboŋojin hun ihuhumi to nofir konnikonni bwo etodit an ara’to amuhunyo iyyafak lihuluk honyi. Oŋiyo bwo fe inyi nebeyo iko nesyo. 7Ette inyi ittittoyo ojo, Ihalu hoŋ ottu adi lobo ol ogol agalik ani. Abeŋ ni asiru lihouniere amuha honyi. 8Ebatisyo ni itai ta aari ati ibatisyo adi inyi itai to Oloyiri ol Olibo.

Batisimo ono Yesu

Mt 3:13-17; Lk 3:21-22

9To noŋitek hwa ottu Yesu to miji Nasaret lifau Galilea, attati Yoane ibatis inyi ihari Yordano. 10Ninya lattu Yesu addi to hari kokwak igonyu inyi nedou obwanya bwo Oloyiri ol Olibo ette isuruna t’edou jihonyi ihwa awolo. 11Ette inyi itaniŋuna nekyana t’edou on ojo, “Iye Lonyi hoŋ, al amuno ni bebe.”

Esusuyo Sitan Yesu

Mt 4:1-11; Lk 4:1-13

12Teyya kokwak ette Oloyiri ol Olibo iyaro inyi limur. 13Ette inyi itoŋo dia oŋitek atomwana aŋwan iko narwejin atomwana aŋwan hun isusuyere Sitan inyi. Owoni bwo fe acaŋi dia attati anjelohyen lwak inyi.

Etteryo Yesu Ettiyenio Honyi

Mt 4:12-17; Lk 4:14-15

14Ninya ifitani Yoane libabus ette Yesu leten ifau Galilea ittiyeniere asayyo hun oyiji’to huno Hollum. 15Ojo inyi, Attuba noloŋ bwo fe ilyaha olobye ono Hollum. Iloitoto atajya hatai, iruhoto asayyo hun oyiji.

Eloŋuna Yesu Ayafohok Aŋwan

Mt 4:18-22; Lk 5:1-11

16Hadaha Yesu ilotifor hari Galilea ette inyi igonyuna Simone iko Andrea illanyi hul ibirotyai aboyo hosi ihari, nyo arai isi ahayafohok. 17Ojo Yesu jihosi, Ifwanna ikoŋ, ehanak adi ni itai ahellilloŋok wati. 18Teyya teyya ette isi busana aboyo hosi ette jifaru inyi. 19Holo inyi kai alamarai ette igonyuna Yakobo iko illanyi Yoane lonyirok Sebedeyo. Owoni isi itogol hosi hul ihuhumye aboyo. 20Teyya kokwak iloŋo inyi isi, ette isi busana monyosi Sebedeyo itwa togol iko legyamak honyi ette jifaru Yesu.

Atulo ol Owon iko Ajok on Orroho’to

Lk 4:31-37

21Teyya ette isi jiŋana imiji Kapernaum. Al ottu sabato,#1:21 sabatoAra inyi neyom ono laati Yudea, oloŋ ono ayiri. teyya ette inyi leten ihaji imojit ette itteryo ittiyenio. 22Illillihai laati bebe ta nettiyenita honyi. Ittiyenio inyi isi ihwa atulo eleittok obyaŋara ihwa legyorok.#1:22 legyorokArai isi laati hul ihenie bwo fe ittiyenie abuk ono Hollum. 23Jyo noloŋ nya owon obo atulo ihaji imojit ol owon iko ajok on orroho’to. 24Ilulwo inyi ette jaran, Yesu Anasaretanani, ?anyo hiram iwak iye jihohoi? ?Ittu iye itarroho hohoi? Amijak ni iye, iye Aliboroni olo Hollum. 25Ette Yesu iŋere jihonyi ojo, Odwai, obusak inyi, ilo addi. 26Attati ajok on orroho’to ihanana ahwe jihonyi, ette jiŋuna addi on olwaha. 27Illillihai laati bwo fe ahahayai ta ahwatek hosi hama ojori, ?Anyo hiram ana? ?Anyo ettiyenio aŋejuk ana? Ifuhak inyi ajok on orroho’to ania ihwa atulo eleittok, ette inyi niŋyo inyi. 28Teyya kokwak ohu eram honyi imisihi daŋ jyo aŋati nya ono afau Galilea.

Etaŋidaryo Yesu Hamoni Simone

Mt 8:14-15; Lk 4:38-39

29Hobusak Yesu aji imojit afwoi isi iko Yakobo ojo Yoane ihaji Simone iko Andrea. 30Teyya oŋwai hamoni Simone iko anahan hwan ette feryoro ijotit. Ette isi iramana inyi jyo Yesu kokwak. 31Ette inyi leten jihonyi, ette nef aani honyi ette itadet inyi. Attati anahan hwan honyi ’turoro kwak ette inyi itteryo igyama aŋiyo hosi.

Etaŋidaryo Yesu Laŋwak Arryai

Mt 8:16-17; Lk 4:40-41

32Ta akikai liddorro oloŋ, iyaŋunie laati jihonyi aŋwak iko omuk hul owoni iko ajohin hun orrohoji’to. 33Ottubanie aati daŋ hutto miji ikat haji. 34Itaŋida inyi aŋwak arryai hul owoni iko neŋwati hosi hun olufaji. Ifuhak inyi ajohin arryai hun orrohoji’to. Ati obeŋ inyi iruk isi ikyanai nyo omijani isi inyi.

Adaha Yesu Ittiyeniere

Lk 4:42-44

35Ta amotye hanyik beryen, ohenyu inyi ette leten ihidyofo imojori dia. 36Ati Simone iko mottyarak honyi ottittifyai inyi. 37Teyya onyurani isi inyi ette jaran jihonyi, Ottifyai laati iye daŋ. 38Itarraŋ inyi jihosi ojo, Efwo jyo omuk amisihi hun ilyahai’to ittiyeniere isi bwo fe. Nyo ara te eram ana an attuniere ni dini. 39Teyya ette inyi leten itwa misihi daŋ huno Galilea ittiyeniere ihasik imojiti hosi iko ifuhatari ajohin hun orrohoji’to addi jyo laati.

Etaŋidaryo Yesu Atulo ’Tallulu

Mt 8:1-4; Lk 5:12-16

40Teyya ottu atulo ’tallulu jihonyi ette rigoŋi, ette mojo jihonyi ojo, Al iwak iye iremik iye itaŋida ani. 41Attati ataji Yesu mehino ette ihanana aani jihonyi ette ’tir inyi ette jaran, Awak ni, toŋidara. 42Ette attallulu ono atulo alya ’turoro kwak, ette nahwan honyi libori. 43Attati Yesu ifuhara inyi addi, 44bwo fe ette jaran, Imijye, heramak obo atulo eram ana ’tuŋ. Ilo, itahutak ahwan hoi jyo ehumani bwo fe isyarak ehumi ono aŋidari hoi ihwa iramak nya Mose jo oŋida laati ihanie ihwa etamijani. 45Ati olo inyi itteryo itisarrahina neram ania jyo laati daŋ. Tania obeŋ Yesu ojiŋak jyo obo amiji ololeyo, ati adaha inyi ta atwa matta bwo laati adahatye motye motye ta aŋaco daŋ jihonyi.

Currently Selected:

Marko 1: LOT1969

Highlight

Copy