Matteyo 27

Eyaro Yesu Ihosyere Pilato

Mk 15:1; Lk 23:1-2; Yn 18:28-32

1Ninya afaŋ amotye iwwahai ehumak eleittaha daŋ iko amarwak arabotye ittohori Yesu. 2Ifitani isi inyi ette yaru inyi jyo Pilato al ara’to mandir.

Naye ono Yuda

3Tania igonyu Yuda etinyyaŋani Yesu jo oŋoti isi aye jyo Yesu ette inyi iloit ataji honyi te ejiriŋa ette inyyaharu arobia atomwana hunihoi jyo ehumak eleittaha iko amarwak, 4ette jaran, Eyyau ni nyo etinyyaŋak ni lya ol obeŋ’to iyyau. Ati itarraŋi isi ojori, Obyaŋara eram hohoi ania. Ara eram hoi. 5Ibirok inyi arobia ifau haji imojit eneittok ette leten addi ette gororo ahwan honyi hama. 6Ohuruni ehumak eleittaha arobia ette jaran, Obeŋ oyyu ittubaniere arobia hunia iko huno aji imojit eneittok nyo arai isi nedumiti huno naye. 7Iwwahai isi ette inyyaŋa ta arobia hunia amaji ninya obwaharik nefwoto nyo awahi isi nuhatari atamonok dia. 8Tania to noloŋ nya many iko ahana iloŋoi amaji nya amaji ewot hoto. 9-10Attati nekyana ono eyani sayyo Yeremia itasiruna on ojo, “Iyarai isi arobia atomwana hunihoi inyyaŋuniere amaji ninya obwaharik nefwoto nyo arai isi edumiti hunya oŋocerek lonyirok Israele.”

Efiyo Pilato Yesu Nefita

Mk 15:2-5; Lk 23:3-5; Yn 18:33-38

11Itawojihini isi Yesu ihosyere mandir ette mandir ifiyo ojo, ?Ira iye Hobu olo Yudea? Ojo Yesu jo, Ihwa ijo bu iye. 12Arrasatai ehumak eleittaha iko amarwak inyi erre arryai ati obeŋ inyi itarraŋ obo ariŋ. 13Attati Pilato jaran jihonyi jo, ?Ibeŋ iye itaniŋu errositi arryai hun orrosoni isi iye? 14Ati odwa inyi liŋ liŋ, tania illilliha mandir bebe.

Aŋotonia Ye jyo Yesu

Mk 15:6-15; Lk 23:13-25; Yn 18:39—19:11

15Aŋasi daŋ to neyom eneittok ohou mandir obo al ifita ihwa awahi eluluŋ wati. 16Owon nya obo aboloni ibabus al anya’to Baraba. 17Al attubanie laati ojo Pilato jihosi jo, ?Iwahata tai ani ahohi alali jihatai, Baraba kuyya bu Yesu al iloŋoi Kristo? 18Nyo omijak Pilato jo iyaŋunie dwo isi Yesu ta nahaini. 19Hetoŋo Pilato ikurus ono aŋoco ifak ŋorwoi honyi nekyana jihonyi on ojo, Hehanio obo ariŋ jyo atulo ol oyyu’to alya nyo ahana erigya ni on orroho bebe tenyi. 20Isusuye ehumak eleittaha aati daŋ ifiyere Pilato jo oŋida inyi ohou Baraba bwo ottoho Yesu. 21Ifiyo mandir jihosi jo, ?Ahohi adi ni alali jihatai? 22Ojori isi, Baraba. Ojo Pilato jihosi jo, ?Ehanio adi ni anyo jyo Yesu al iloŋoi Kristo? Itarraŋi isi daŋ jihonyi ojori, Ijara isihoni inyi. 23Ojo mandir jihosi ojo, ?Anyo ariŋ on orroho’to an ihanio inyi? Ati iwuwoŋitai isi bebe ojori, Isihonia inyi.

24Igonyu Pilato jo ittallik inyi ihanio obo ariŋ nyo iwuwoŋitai laati bebe. Tania omojo inyi omuk aari ette finia ihosyere wati ette jaran, Obeŋ adi oŋoti naye ono atulo ol oyyu’to olo jihoŋ. Ati ara inyi eram hatai. 25Itarraŋi laati daŋ ojori, Ijara oŋoti naye honyi jihohoi bwo fe jyo aduri hohoi. 26Tania ohohi inyi Baraba jihosi ati isyo inyi Yesu jyo oseŋer ibahyere iko isihoniere.

Asuhotyere Oseŋer Yesu

Mk 15:16-20; Yn 19:2-3

27Attati oseŋer hulo mandir iyaro Yesu ihaji eneittok nyo owoni dwo isi ilet bwo fe ottubanie eluluŋ jihonyi. 28Ohouni isi aboŋojin honyi ette itiyyafana aboŋo an aryet. 29Oyyiri isi egorya hikwa ette isihonia lihou honyi ette isyarana elluk ihani iŋet honyi. Origoŋi isi ihosyere honyi ette suhotyere inyi ojori, Hobu olo Yudea, moŋ. 30Imimice isi amilak jihonyi ette bahyo ahou honyi ta nelluk. 31Latuhi isi asuhotyere inyi, ohouni isi nodwo boŋo ette itiyyafana aboŋojin honyi jihonyi bwo fe orihoroi isi inyi addi isihoniere.

Esihonia Yesu

Mk 15:21-32; Lk 23:26-43; Yn 19:17-27

32Al ojiŋari isi ilet orwaŋanie isi iko obo atulo Acirenetanani al anya’to Simone. Orrosoni isi inyi hotolororo akruce on ofwoi isi isihoniere Yesu. 33Afanyi isi jo amaji an ifurani Golgota on ojo amaji hou. 34Isyarani isi jihonyi aari ajalaŋi hun iharrwahini iko obo ayyani. Ati al iniŋ inyi iha inyi amata. 35Al isihoni isi inyi ette isi hor aboŋojin honyi ta abaha ogumar. 36Attati isi itoŋo irrirryari inyi dia. 37Bwo fe igyoroni ihide kruce honyi nekyana ono nerrositi hosi inyi ojo, Yesu olo, inyi Hobu olo Yudea. 38Iholoŋ ania isihoni ikonyi ahahalak arrihai, abotye etteŋet bwo fe abotye ettehorroŋ honyi. 39Omorye fe adahak Yesu ette huco inyi ta afyala ojori, 40Iye al ijo’to etattur ni aji imojit eneittok bwo fe inyyak duho to oŋitek hunihoi itahoru nahwan hoi bwo isuru ihwania to kruce kuyya ira iye ahode Lonyi Hollum. 41Osuhotyerek bu ehumak eleittaha bwo egyorok iko lamarwak inyi ojori, 42Italahu nya inyi lomuk, ittallik ati inyi italahuna nahwan honyi. Inyi Hobu olo Israele tania ijara inyi isuru ihwania to kruce bwo fe eruk adi hohoi jihonyi. 43Iyihi fe inyi jyo Hollum, ijara Hollum italahu inyi ihwania kuyya omuno inyi inyi, nyo ojo nya inyi jo, Ani Lonyi Hollum. 44Ahahalak hul isihoni ikonyi amorye inyi bwo fe ihwo nya.

Naye ono Yesu

Mk 15:33-41; Lk 23:44-49; Yn 19:28-30

45Ta akilfani many iko otoryai iryok afau daŋ edumele ’tir ’tir. 46Ta asaa hunihoi iloŋo Yesu on okwat bebe ojo, “Eloi, Eloi, ?lama sabacani?” on ojo, “Hollum hoŋ, Hollum hoŋ, ?nyo ibusak iye nani?” 47Al itayiruni aati hul owotyai’to dia nekyana honyi ojori isi, Iloŋo inyi Elija. 48Oŋer bwo fe obo olosi ette ilutonia aboŋo itwa hari hun irwatiŋoi ette ihanana ihide osiholoti itamataniere inyi. 49Ojori omuk, Idehi so, hamijyete, kuyya ottu adi Elija itahoruniere inyi. 50Inyyak fe Yesu iloŋo on okwat bebe ette ye.

51Attati aboŋo ono aji imojit eneittok gwasa hama aŋaco arrihai to hide many ifau bwo fe ikikiro afau, ette amorwoi bwara. 52Aŋai bwo fe elumyo bwo itubuhuni aati hulo Hollum arryai hunya oyei’to beryen. 53Ihalu nebuhuna Yesu ofwonni isi addi te lumyo ette jiŋana Yerusalem bwo igonyuni laati arryai isi. 54Abaŋi eleittok olo oseŋer iko laati honyi hul irrirryai’to Yesu al igonyuni isi ekikiro fau iko erre hun idwoŋi’to. Attati isi jaran, Ahode atulo olo, inyi Lonyi Hollum.

55Owoni fe dia aŋorwo arryai hun irrirryai alamarai. Ijifatye nya isi Yesu to Galilea ilwahyere inyi. 56Ihiji hosi owon Maria Madalena, bwo Maria honye Yakobo iko Yosefo, bwo fe owon honye lonyirok Sebedeyo.

Anuhana ono Yesu

Mk 15:42-47; Lk 23:50-56; Yn 19:38-42

57Al ara akikai ottu abarani otto miji Arimatea al anya’to Yosefo. Inyi leyiyanani olo Yesu. 58Olo inyi jyo Pilato ifiyere ahwan Yesu, attati Pilato ifahina laati isyaraniere ahwan jihonyi. 59Iyaro Yosefo ahwan ette bubunaro inyi ta aboŋo on olibo, 60ette itaferehina inyi ilume honyi aŋejuk an ikyafani ibak. Ittaborok inyi namorwo on obolo ihutuk ilume ette leten addi. 61Itoŋoi Maria Madalena iko Maria obo hama iger ilume.

Errirrya Oseŋer Elume

62To sabato ofwonni ehumak eleittaha iko Farisei jyo Pilato, 63ette jaran, Hobu egilu hohoi jo, ojo nya lenyabani lya hesu inyi jo, Ihalu oŋitek hunihoi ebuhu adi ni. 64Tania ifak oseŋer itagolyere elume many jyo oloŋ itahunihi, ŋadi leyiyanak honyi ofwonni hahalaro ahwan honyi addi. Ŋadi isi ofwonni jaran jyo laati jo, Ibuhu inyi to ye, bwo fe orroho adi enyobyo ania agalik. 65Ojo Pilato jihosi jo, Iwanata tai iko oseŋer, ifwatta itagolyere elume ihwa iremehina tai. 66Attati isi fwatan itagolyere elume ta amorwo on otyohini dia bwo fe arasai oseŋer dia irrirryari.

Currently Selected:

Matteyo 27: LOT1969

Highlight

Copy