Matteyo 26

Aŋoco ono Attohoro Yesu

Mk 14:1-2; Lk 22:1-2; Yn 11:45-53

1Latuhok Yesu nekyanita hunia daŋ ojo inyi jyo leyiyanak honyi ojo, 2Imijana tai jo ihalu oŋitek arrihai owon neyom an ifurani Allaŋan ono Anjelo bwo fe isyori adi Lonyi tulo isihoniere.

3To oloŋ to nya ottubanie ehumak eleittaha iko amarwak ihaŋ ehumani ol obolo’to al anya’to Kaifa, 4ette isi iwwaha inefuniere Yesu ta enyobyo ittohori inyi. 5Ati ojoro isi jo, Obeŋ oyyu inefuniere inyi ta neyom eneittok ŋadi laati iwuwoŋitai bebe.

Ejuhonia Maria Eyali on Oŋwo’to Gir Gir jyo Yesu

Mk 14:3-9; Yn 12:1-8

6To obo oloŋ owon Yesu imiji Betania, itoŋo inyi ihaji Simone atulo ’tallulu. 7Hoŋiye isi attati aŋotte ’tuna jihonyi iko akarajaja ono eyali on ogol bebe te enyyaŋa, ette juhonia ihou Yesu. 8Al igonyuni leyiyanak ania, ijoryai isi ette jaran, Jai, ?nyo ijuhoni eyali asai? 9Oremik arya ania itinyyaŋaniere ta agurusi arryai ette harana jyo alocaŋak. 10Omijak Yesu ekyanita hosi ette jaran, ?Nyo ittigemyete tai aŋotte? Ihanio inyi ariŋ on oyyu’to jihoŋ. 11Iwanata tai iko alocaŋak oŋitek daŋ, ati abeŋ adi ni etoŋo ikatai fur. 12Ijuhok inyi eyali ana ihwan hoŋ ihuhumaniere ani ta anuhana. 13Ahode eramak ni itai jo, imasik daŋ hun ittittoyerek asayyo hun oyiji’to, iramani adi bu odwo hiram an ihanio aŋotte ana itagiluniere inyi.

Etinyyaŋana Yuda Yesu

Mk 14:10-11; Lk 22:3-6

14Ta asaa ania alo Yuda Iskariote lobo olo ’tomon harrihai jyo ehumak eleittaha, 15ette jaran, ?Isyatta adi itai anyo jihoŋ al esyo ni inyi jihatai? Ette isi duma inyi ta arobia atomwana hunihoi. 16To noloŋ nya ottifyatyo Yuda amaji an isyoriere inyi Yesu jihosi.

Aŋiyo Yesu iko Leyiyanak Honyi

Mk 14:12-21; Lk 22:7-14, 21-23; Yn 13:21-30

17Ofwonni leyiyanak jyo Yesu to oloŋ etteri ono neyom ono Emunio hun Obeŋi Bula ette jaran, ?Anani maji adi iwak iye ehuhumyo hohoi teye iŋiyere ta neyom ono Allaŋan Anjelo? 18Ojo inyi jo, Ifwatta imiji jyo atulo lya iramana inyi jo, ojo ettiyanani jo, ilyaha oloŋ hoŋ, aŋiyo adi ni iko leyiyanak hoŋ ta neyom ono Allaŋan Anjelo ihaŋ hoi. 19Ihanie nya leyiyanak ihwa ifak Yesu isi bwo fe ihuhumani isi aŋiyo ono neyom.

20Ta attari oŋiye inyi iko leyiyanak honyi ’tomon harrihai. 21Hoŋiye isi ojo inyi, Ahode ahode eramak ni itai jo obo alatai itinyyaŋak adi nani. 22Ijiriŋai isi bebe ette isi daŋ ababo ifiyo inyi ojori, ?Hobu ani adi alya? 23Itarraŋ Yesu ojo, Alya el eduto’to ikoŋ arrany abotye itinyyaŋak adi nani. 24Oye adi Lonyi tulo ihwa igyoroni nya tenyi ati orroho bebe jyo atulo alya al itinyyaŋak’to Lonyi tulo. Obeŋi dwo isiuni inyi oyyu dwo jihonyi. 25Ifiyo Yuda al itinyyaŋak’to Yesu ojo, ?Hettiyanani, ani adi alya? Ojo Yesu jihonyi jo, Ikyana iye ahode.

Ateremeja Hobu

Mk 14:22-26; Lk 22:15-20; 1 Kor 11:23-26

26Hoŋiye isi, iduhu Yesu emune, ette mojo ojo humo jyo Hollum ette beny bwo fe ette isyo jyo leyiyanak honyi ojo, Hibetina, oŋiyete, ara ana ihwa ahwan hoŋ. 27Ette inyi duhuna akos ette mojo ojo humo jyo Hollum, ette isyo jihosi ojo, Itai daŋ amatata tenyi, 28nyo ara ana ihwa nooto hoŋ on owouno’to addi ta aati hul olwaji ifufusori eyyata. Itagol nooto hoŋ ecorit aŋejuk. 29Ahode ajo ni jihatai, abeŋ adi ni enyyak mat aari ajalaŋi fur many iholoŋ an amatari adi ni aari ajalaŋi aŋejuho ilobye Monyoŋ.

30Idoloi isi afure itahabuyere Hollum ette isi fwatan many idoŋe Oliveto.

Ekiluna Yesu Ehara Petro Inyi

Mk 14:27-31; Lk 22:31-34; Yn 13:36-38

31Ojo Yesu jihosi, Ibaŋata adi itai daŋ te eram hoŋ ette itai fuho ta attari ana nyo igyoroni nya jo, Ojo Hollum jo, “Attoho adi ni leyyahani bwo fe isarrahini adi akyoro daŋ.” 32Ati ihalu nebuhuna hoŋ alo adi ni Galilea ahosyere hatai. 33Itarraŋ Petro jihonyi ojo, Ara dwo bu ofuhoi hulo daŋ te eram hoi abeŋ adi ni afuho ’tuŋ. 34Ojo Yesu jihonyi, Ahode eramak ni iye, ahana ta arwe ana hobeŋ ahohoro ilok iha adi iye ani eharita hunihoi. 35Ojo Petro jihonyi, Dwadi ottohori nani ikoye abeŋ adi ni eha iye ’tuŋ. Ikyanai leyiyanak daŋ ihwo nya.

Amojo Yesu Limana

Mk 14:32-42; Lk 22:39-46

36Attati Yesu fwatan ikosi jyo amaji an ifurani Jetsemani ette jaran jyo leyiyanak honyi, Itoŋoti do dini, alo ni dia imojori. 37Iyaro inyi Petro iko lonyirok arrihai hulo Sebedeyo. Ijiriŋa inyi bebe bwo fe ataji honyi odyaha. 38Ette inyi jaran jihosi ojo, Ijiriŋa ataji hoŋ bebe, ajo adi ni aye. Owotyati dini bwo fe omijyete, hejototi. 39Ihut inyi alamarai kai ette ruboho ifau imojori ojo, Monyoŋ, al oyyu jihoi, iyai akos#26:39 akosIkyana Yesu ta nadyaha iko naye honyi. ana addi jihoŋ. Ati obeŋ ara ihwa ani awak, ara ihwa iwak iye. 40Ottu inyi jyo leyiyanak honyi ette rumana isi ojotoroi ette jaran jyo Petro, ?Ittallihoto tai mijo ta asaa abotye? 41Omijyete bwo fe omojoti jo oŋida itai ibyaŋata iruhoto nesusuyo. Ogol ataji ahode ati ofyaha ahwan. 42Inyyak inyi leten enyyahi etarrihi imojori ojo, Monyoŋ, kuyya obeŋ oyyu jihoi iyarai akos ana jihoŋ arari al amat ni, ijara ihanie awahan hoi. 43Inyyak inyi cohuno ette nyurana isi ojotoroi nyo ijoŋitai isi bebe. 44Idyaharu inyi isi ette leten imojori enyyahi etahunihi ette mojo ihwa odwo. 45Ottu inyi jyo leyiyanak honyi ette jaran jihosi ojo, ?Herasati tai joto bwo fe heyiryata tai? Imijyete, attuba asaa bwo fe itinyyaŋani Lonyi tulo ihas heyyak. 46Ottena, attu lya al itinyyaŋak’to ani. Hafatta irwaŋaniere ikonyi.

Esyarana Yesu jyo Amyorok

Mk 14:43-50; Lk 22:47-53; Yn 18:2-11

47Hekyana inyi ottu Yuda obo olo ’tomon harrihai iko eluluŋ wati arryai iko afyara bwo elluhi. Ofwonni isi jyo ehumak eleittaha bwo amarwak. 48Lya al itinyyaŋa’to Yesu iramak jihosi netamijani ojo, Lya al ajur ni, inyi lya, inefuna inyi. 49Ette inyi boco jyo Yesu ette jaran, Moŋ, Hettiyanani, ette jur inyi. 50Ifiyo Yesu inyi jo, ?Illa nyo ittu iye? Tania ofwonni isi inefuniere Yesu. 51Abotye jyo hul owoni’to iko Yesu inef ademi honyi ette sutuna inyi ette yef apit olo ehumani ol obolo’to ette isaluna neyyok honyi fyal. 52Attati Yesu jaran jihonyi, Oruhok ademi hoi isohobo honyi nyo laati daŋ hul osutuni’to ademi oyei adi ta ademi. 53?Ibeŋ iye imijak jo aremik ni mojo jyo Monyoŋ bwo isyo adi inyi anjelohyen hul olwaji bebe ilwahyere ani? 54Ati kuyya ofwonni anjelohyen ilwahyere ani, ?aŋai adi itasiruni egyerita hun ojori jo oŋida ihanie ihwo nya? 55Ta asaa ania ojo Yesu jyo eluluŋ wati jo, ?Ifwanna tai iko afyara bwo elluhi inefuniere ani ihwa olohoho? Oŋitek daŋ ewon nya ni ikatai ihaji imojit eneittok ittiyeniere bwo ibyaŋata tai ani inefuna. 56Ihanie erre huna daŋ itasiruniere egyerita huno eyak sayyo. Teyya obusarai leyiyanak daŋ inyi ette fuho.

Eyaro Yesu Ihosyere Okikoi

Mk 14:53-65; Lk 22:54-55, 63-71; Yn 18:12-14, 19-24

57Inefuni isi Yesu ette rihoro inyi jyo Kaifa inyi ehumani ol obolo’to, bwo fe ottubanie legyorok iko lamarwak dia. 58Ijifatyo fe Petro inyi alamarai, many lihiloŋoni haji ono ehumani ol obolo’to ette inyi jiŋana ette itoŋo iko oseŋer imijyere esidi hiram. 59Ottifyai ehumak eleittaha iko lewwahak daŋ omuk nerre irrosoniere Yesu ittohori inyi. 60Ati obeŋi isi onyurani omuk erre dwadi bu ofwonni omuk etamijanak arryai hul ogesemi’to. Ihalu ofwonni omuk arrihai, 61ette jaran, Ojo atulo olo jo, Aremik ni itattur aji imojit eneittok ono Hollum ette duhonia inyi to oŋitek hunihoi. 62Odyoto ehumani ol obolo’to ette jaran, ?Ibeŋ iye itarraŋ errositi hosi hun arrasani isi iye? 63Ati odwahino Yesu tania ojo ehumani ol obolo’to jihonyi jo, Ajo ni jihoi ahode ta afure Hollum al isu’to, kuyya ira iye Kristo Lonyi Hollum iramak hohoi. 64Ojo ati Yesu jihonyi, Ihwa ijo iye, ani alya. Ati eramak ni itai jo ihalu igonyuna adi itai Lonyi tulo al itoŋo ihani iŋet ono Adwarani, bwo fe igonyuna adi itai inyi ol ottu ihide idisi huno edou. 65Tania ogwas ehumani ol obolo’to aboŋo honyi ette ŋiŋanya ojo, Onyo monyoŋ nani, ogesem atulo olo. ?Anyo nyi ettifya hohoi etamijanak omuk? Hetehata bu itai itaniŋuna agesemita honyi. 66?Igigiloti tai anyo jihonyi? Itarraŋi isi ojori, Osiru naye jihonyi. 67Tania imimice isi amilak lihomom honyi ette bahyo inyi bwo fe omuk anaŋye inyi, 68ette jaran, Kristo ottenu, ?ŋai al anaŋ’to iye?

Ehara Petro Yesu

Mk 14:66-72; Lk 22:56-62; Yn 18:15-18, 25-27

69Hetoŋo Petro ihiloŋoni ottu nobo napit jihonyi ette jaran, Iwon dwo bu iye iko Yesu Agaliletanani. 70Ati orisa inyi ihosyere wati daŋ ette jaran, Abeŋ ni amijak anyo ikyana iye. 71Holo inyi ilet igonyu obo odwoti inyi ette jaran jyo hulya hul owoni’to dia ojo, Owon dwo atulo olo iko Yesu Anasaratanani. 72Inyyak inyi risa ta agolon ojo, Abeŋ ni amijak atulo lya ’tuŋ. 73Ihalu kai ofwonni laati hul owotyai dia jyo Petro ikyanari ojo, Ahode ira iye olosi, nyo italeyeu nekyana hoi iye. 74Tania ipita inyi bwo fe ittuŋo ette jaran, ’Tuŋ ahode, abeŋ ni amijak atulo lya. Teyya teyya ilok ahohoro. 75Attati Petro giluna nekyanita huno Yesu hodwo ojo, Hobeŋ ahohoro ilok iha adi iye ani eharita hunihoi. Teyya alo inyi ilet ette ’yo bebe.

Currently Selected:

Matteyo 26: LOT1969

Highlight

Copy