Matteyo 25

Narryamara ono Odwo ’Tomon

1Inyyak fe Yesu ittiyenio ojo, Orrijo adi olobye ono Hollum ihwa nodwo ’tomon hun iyarai allomohyen hosi irraŋuniere layamani. 2Ati ihiji hosi ibuyaŋai omuk miet bwo huno miet ilofyoroji. 3Iyarai nodwo hun ibuyaŋai’to allomohyen hosi ati obeŋi isi iyarai ajas. 4Iyarai nodwo hun ilofyoroji’to allomohyen hosi arabotye iko akarajajahyen huno ajas. 5Illiŋya layamani lya ette nodwo daŋ ibunyita ette jotoro. 6Ta arwe ohosohitai laati ette jaran, Ohenyuna, lattu layamani, ifwanna arraŋuniete inyi. 7Tania odyotoi nodwo daŋ iswahiniere allomohyen hosi. 8Ojori nodwo hun ibuyaŋai’to jyo alofyorojok ojori, Elwahata to obo ajas nyo adunyari allomohyen hohoi. 9Ati itarraŋi alofyorojok jihosi ojori, Ara hobeŋ ajas oremik tohohoi ikatai. Ifwatta idukan inyyaŋuniere hunatai. 10Hofwoi isi inyyaŋuniere ajas ottu layamani. Attati nodwo miet hun owulori allomohyen hosi jiŋana ikonyi ihaji jyo alomone ette ihyanana ekat. 11Ojo gaa afwonni huna miet hodwo ette jaran, Hobu, hobu, aŋahi hohoi ekat. 12Ati itarraŋ inyi jihosi ojo, Ahode abeŋ ni amijak itai ’tuŋ. 13Tania ihumata mijo nyo ibyaŋata tai mijana anani oloŋ kuyya anani saa on ottuniere inyi.

Narryamara ono Arobia

14Ara olobye ono Hollum ihwa atulo ol ojo’to edyaharu ahaŋ honyi ette iloŋuna apiti honyi ette isyarana erre honyi daŋ ihas hosi. 15Isyo inyi agurusi jyo apiti honyi ihwa oremehini isi ifwotuna ette inyi leten. Isyo inyi jyo apit abotye arobia alif ’tomon homiet, bwo jyo obo arobia alif ille, bwo fe jyo obo isyo arobia alif hunihoi. 16Teyya kokwak olo lya al ifwotu arobia alif ’tomon homiet ipocouniere omuk ’tomon homiet. 17Bwo fe alya al ifwotu arobia alif ille olo ipocouniere omuk alif ille. 18Ati lya al ifwotu’to arobia alif hunihoi olo ibwahiniere ifau ette nuhana arobia hun isyo hobu jihonyi. 19Ihalu oŋitek arryai ottu hobu olo apiti hya imijyere eram robia. 20Lya al ifwotu nya arobia alif ’tomon homiet ottu inyi iko omuk ’tomon homiet ette jaran, Hobu isyo nya iye arobia alif ’tomon homiet jihoŋ, ati imijye, apocou ni omuk alif ’tomon homiet. 21Ojo hobu honyi jihonyi ojo, Ihanio iye on oyyu, iye apit al iyyu’to, al ittunio on oyyu. Ittunio iye on oyyu erre hun omutari tania ehanak adi ni iye eleittok olo erre arryai. Ojiŋak jyo amuno ono hobu hoi. 22Ottu bwo fe lya al ifwotu nya arobia alif ille ette jaran, Hobu isyarak nya iye arobia alif ille jihoŋ, imijye, apocou ni omuk alif ille. 23Ojo hobu honyi jihonyi ojo, Ihanio iye on oyyu, iye apit al iyyu’to, al ittunio on oyyu. Ittunio iye on oyyu erre hun omutari, tania ehanak adi ni iye eleittok olo erre arryai. Ojiŋak jyo namuno ono Hobu hoi. 24Ottu bwo fe lya al ifwotu nya arobia alif hunihoi ette jaran, Hobu amijak ni iye, ira iye atulo al igol. Ideŋu iye iyo amaji an ibeŋ iye iyehi bwo fe isuduhak iye hun ibeŋ iye igilya. 25Tania abaŋ nya ni ette leten nuhana arobia hoi ifau. Hibe, arobia hoi huna. 26Itarraŋ hobu honyi jihonyi ojo, Iye, irroho iye bebe bwo fe iboyo. Imijak iye adeŋu ni jyo amaji an abeŋ ni ayehi bwo fe asuduhak ni hun abeŋ ni egilya. 27Tania oŋida dwo iye ittunak arobia hoŋ ihaji on ottunatarik aati arobia, jo oŋida al attu ni anyurak dwo ni arobia hoŋ iko efoniti hosi. 28Iyara arobia honyi addi bwo isyatta isi jyo lya ol owon iko arobia alif ’tomon homiet. 29Nyo ofonik ati Hollum erre jyo lya ol owon iko erre, tania owoni adi hun olwaji jihonyi. Ati jyo lya ol obeŋ iko erre iyari adi erre honyi addi dwadi hun omutari hun owoni’to jihonyi. 30Ibiroro apit ol orroho’to olo addi imaji ono edumele on owon’to ilet. Owon adi ayyo iko aŋutta hala dia.

Aŋoco ono Aati Hutta Fau

31Ottu adi Lonyi tulo ta akwatan honyi bwo fe ofwonni anjelohyen daŋ ikonyi attati inyi itoŋo ikurus honyi ono akwatan. 32Ottubanie adi laati ta awoi hosi daŋ ihosyere honyi, bwo fe igigelu adi inyi isi ihwa igigelu leyyahani akyoro iko edye. 33Ottubak adi inyi akyoro ihani iŋet honyi bwo fe nedye ihani ihorroŋ honyi. 34Ojo adi Hobu jyo hutto hani iŋet honyi jo, Itai hul omuno Monye, ifwanna ojiŋana imaji an ihuhumani tetai many t’etteri fau. 35Nyo aniama nya ni bwo isyatta tai ani aŋiyo. Ebwoto nya ni bwo isyatta tai ani aari. Ara nya ni atamononi ati ifwotuna tai ani. 36Awon nya ni aŋaturoi bwo isyatta tai aboŋojin jihoŋ. Aŋwai nya ni bwo ifwanna tai ilwahyere ani. Awon nya ni ibabus bwo ifwanna tai imijyere ani. 37Tania ojori adi aati honyi jihonyi jo, ?Hobu nya baya egonyu hohoi iye iniama bwo hohoi etaŋiyo iye? ?Kuyya bu ibwoto iye bwo hohoi esyo iye aari? 38?Nya baya egonyu hohoi iye atamononi bwo hohoi efwotu iye? ?Kuyya bu awanan hoi aŋaturoi bwo hohoi esyo iye aboŋojin? 39?Nya baya egonyu hohoi iye iŋwai kuyya bu ibabus bwo fe hohoi efwo jihoi? 40Itarraŋ adi Hobu jihosi ojo, Ahode eramak ni itai jo, al ihaniete tai ihwo nya jyo illarak hoŋ dwadi bu olomuta’to bebe, ihaniete tai bwo fe jihoŋ. 41Tania ojo adi inyi bwo fe jyo hulya hutto hani ihorroŋ jo, Ifwatta addi jihoŋ itai hul irrohojata’to. Ifwatta ihima on osyo’to fur an ihuhumani te etisyahani iko anjelohyen honyi. 42Nyo aniama nya ni bwo ibyaŋata tai isyatta aŋiyo jihoŋ. Ebwoto nya ni ati ibyaŋata tai isyatta aari jihoŋ. 43Ara nya ni atamononi ati ibyaŋata tai ifwotuna ani. Adaha nya ni aŋaturoi ati ibyaŋata tai isyatta aboŋojin jihoŋ. Aŋwai nya ni bwo fe awon ni ibabus ati ibyaŋata tai ifwanna imijyere ani. 44Tania itarraŋi adi isi bwo fe jihonyi ojori, ?Hobu nya baya egonyu hohoi iye iniama, kuyya ibwoto, kuyya bu atamononi, kuyya aŋaturoi, kuyya iŋwai, kuyya bu ibabus bwo hohoi ebeŋ elwak iye? 45Tania itarraŋ adi inyi jihosi ojo, Ahode eramak ni itai jo, al ibyaŋata tai ihaniete ihwo nya jyo obo olomuta’to bebe tehiji hulo, ibyaŋata tai bwo fe ihaniete jihoŋ. 46Ofwoi adi hulo jyo abahyo on osyo’to fur, ati ofwoi adi aati hulo Hollum jyo nesu on osyo fur.

Currently Selected:

Matteyo 25: LOT1969

Highlight

Copy