Matteyo 24

Ekyana Yesu ta Etatturyo Aji Imojit Eneittok

Mk 13:1-2; Lk 21:5-6

1Obusak Yesu aji imojit eneittok ette leten. Attati leyiyanak honyi fwanna jihonyi ifiyere inyi ta asik hutto ŋati haji imojit eneittok. 2Itarraŋ inyi jihosi ojo, ?Igonyuna so itai erre huna daŋ? Eramak ni itai ahode jo, obeŋ adi obo amorwo arasa ihorwoŋ obo nyo itatturi adi isi daŋ.

Etteri ono Ettigemita

Mk 13:3-13; Lk 12:7-19

3To obo oloŋ hetoŋo inyi idoŋe Oliveto ofwonni leyiyanak honyi jihonyi hama ette ifiyo inyi jo, ?Iramak hohoi baya adi ihanie erre huna? ?Bwo fe anyo adi etamijani an itahutak’to hohoi attuna hoi iko esidi ono afau ana? 4Itarraŋ Yesu jihosi ojo, Ihumata irrirrya, helaha obo atulo itisyaba itai. 5Nyo ofwonni adi enyabak arryai ta afure hoŋ hul ojori jo, Ani alya Kristo, bwo itisyabari adi isi laati arryai. 6Itaniŋuna adi itai jo owon narrem bwo fe ikyanai laati jo erem adi hohoi, ati helafuhoti. Oŋida erre huna daŋ ofwonni ati hobeŋ esidi fau. 7Nyo ofwoi adi laati hutto miji obo jyo obo irryomoniere bwo fe ofwoi adi laati hutto lobye obo jyo obo. Owon adi ahure iko ekikiro fau imasik arryai. 8Arai erre huna daŋ etteri ono ettigemita hun obolori.

9Isyori adi isi itai jyo ettigemita bwo fe ottohori adi isi itai. Oliwarik adi laati daŋ itai nyo iruhoto tai afure hoŋ. 10To oŋitek huna ipali adi laati arryai to hiruk addi, bwo isyori adi isi illarak hosi ittohori bwo fe oliwarik adi isi illarak hosi. 11Odyotoi adi ebwanak arryai hul inyobye’to ette itisyabara laati arryai. 12Bwo omumutararo adi namuno wati hun olwaji’to nyo obobolororoi adi arrohojita. 13Ati lya ol odihu’to many isidi, italahuni adi. 14Bwo fe ittittoye adi asayyo hun oyiji’to huno olobye ono Hollum many ifauhyen daŋ te etamijani jyo laati daŋ bwo ihalu ottu adi esidi fau.

Afwanna huno Ettigemita hun Obolori

Mk 13:14-23; Lk 21:20-24

15-16Al igonyuna tai arrohoji an itamura’to amaji on owotya’to jyo amaji on odwa’to, oŋida hul owoni’to Yudea ofuhoi lidoŋyok. Inyi arrohoji ninya ikyanari eyani sayyo Daniele. Ijara lya al ihenio hetetaniŋu. 17Ijara lya ol owon’to lihide haji hotobyaŋa isuru ifau iduhuniere obo ariŋ ta haji honyi. 18Bwo fe ijara lya ol owon’to limana hotobyaŋa acaharu iyamari aboŋo honyi. 19Orroho bebe jyo aŋorwo hun oyeduri’to iko hun itadasye’to to noŋitek hwa. 20Omojoti jo oŋida oŋitek hwa obeŋi ofwonni to oŋitek hacoro kuyya bu to sabato. 21Nyo to noŋitek hunia owoni adi ettigemita hun obolori hun agalihini ettigemita daŋ t’etteri fau many iko ahana. Ahode obeŋi adi omuk ettigemita agalihini isi. 22Kuyya obeŋ dwo Hollum ihanak oŋitek hunia hun omutari obeŋ dwo tulo italahuno, ati ihanani adi isi hun omutari nyo to hya hul onyimuni. 23To oŋitek hwa kuyya ojo obo atulo jihatai jo, Imijyete, Kristo olo, kuyya bu, Kristo alya, heruhoto. 24Nyo odyotoi adi Kristohyen lenyabak iko ebwanak lenyabak hul ihanie adi etamijanita hun obolori iko nedwariti ikemyere hul onyimuni itisyabari isi. 25Imijyete, eramak ni itai erre huna hobeŋi isi ofwonni. 26Tania kuyya ojori isi jihatai jo, Imijyete, owon inyi limur, hefwatta dia. Kuyya ojori isi, Imijyete, owon inyi lihaji, heruhoto. 27Nyo al imedek ahilai t’ettedwoŋi holoŋ ette faŋan many iddorro holoŋ, ara adi attuna ono Lonyi tulo ihwo nya. 28Ottubanie adi attaruha jyo namaji an awanari ahwan hayani.

Acohuno ono Yesu

Mk 13:24-27; Lk 21:25-28

29Teyya teyya kokwak ihalu ettigemita hunia oye adi oloŋ bwo fe nayafa ette ilak faŋan, ette elelyefi douna t’edou, bwo fe ikikiroi adi negoliti hutte dou. 30Attati etamijani ono Lonyi tulo leyo t’edou. Iholoŋ ania inninnaŋye adi laati daŋ hutta fau asuhyara hosi nyo igonyuni isi Lonyi tulo al isuru t’edou lihidi idisi iko nadwaran bwo nakwatan on obolo. 31Ifak adi inyi anjelohyen honyi ta aforojo on okwat’to ittuttubaniere lonyimot honyi to fauhyen daŋ.

Narryamara ono Aŋaboli

Mk 13:28-31; Lk 21:29-33

32Omijana awoyo hiram to ŋaboli. Al ofwonni atanata honyi janan bwo fe oyisuni abene aŋejuho, omijana jo ilyaha atahas. 33Ihwania bu al igonyuna tai erre huna daŋ idwoŋi, omijana jo ilyaha attuna honyi. 34Ahode ahode, ajo ni jihatai jo, obeŋ adi elahaji ana oye many ihanierek erre huna daŋ. 35Obyaŋarani adi nedou iko afau ati nekyanita hoŋ obeŋi adi olitohini ’tuŋ.

Abyaŋan Obo Mijana Attuna ono Lonyi Tulo

Mk 13:32-37; Lk 17:26-30, 34-36

36Ati to oloŋ ania iko asaa on ottuniere inyi obeŋ obo omijak, dwadi bu anjelohyen hutte dou iko Lonyi Hollum, obeŋ obo omijak arari Monye hama omijak. 37Ihwa ninya ihanie laati to noŋitek huno Noa, ihanie adi bwo fe isi ihwo nya ta attuna ono Lonyi tulo. 38Ihwa ninya to noŋitek hwa hobeŋ ebulyo hari ottu, oŋiye isi, amatai isi bwo fe ayamai, many jo oloŋ ninya ojiŋaniere Noa itogol. 39Bwo fe obeŋi bu isi igigiloi omuk erre many ottuniere ebulyo hari iyari isi daŋ addi. Tania ara adi attuna ono Lonyi tulo ihwo nya. 40Owoni adi alyawa arrihai imana. Iyarai adi abotye bwo idyaharai adi abotye. 41Iryeye adi aŋorwo arrihai ibak. Iyarai adi abotye bwo idyaharai adi abotye. 42Tania ihumata mijo nyo ibyaŋata tai imijana anani oloŋ on ottuniere adi Hobu hatai. 43Ati omijana ana jo, hara dwo omijak monye haji asaa on ottuniere adi olohoho, omijo dwo inyi bwo fe obeŋ inyi obusak aji honyi owur olohoho ta arwe. 44Tania ihumata ’ra nyo ilunyu adi Lonyi tulo lunyuna.

Apit Oloyijo Kuyya bu Olorroho

Lk 12:41-48

45Imijyete lapit ol oyyu’to bwo fe ilofyoro. Ihanak hobu inyi ihaji honyi isyoryere aŋiyo jyo laati ta asaa ono aŋiyo. 46Hotomunoi lapit alya al ottu hobu honyi nyurana inyi ihanio egyama ania. 47Ahode ajo ni jihatai jo ihanak adi inyi apit alya eleittok hirre honyi daŋ. 48Ati kuyya orroho apit alya ette igigilo itaji honyi jo illiŋya hobu honyi, 49ette inyi itteryo bahyo apiti hul igyamai’to ikonyi bwo oŋiye ette mata iko arumak, 50ilunyu adi hobu olo apit alya lunyuna ta asaa on obeŋ inyi omijak. 51Abak adi inyi apit bebe ette ŋotonia jihonyi abahyo ono lenyabak. Owon adi ayyo iko aŋutta hala jyo amaji ania.

Currently Selected:

Matteyo 24: LOT1969

Highlight

Copy