Matteyo 23

Esiŋyo Yesu Legyorok iko Farisei

Mk 12:38-40; Lk 11:37-54; 20:45-47

1Attati Yesu ikyana jyo eluluŋ wati iko jyo leyiyanak honyi ojo, 2Orutani legyorok iko Farisei imaji Mose. 3Tania ihaniete erre daŋ hun iramani isi jihatai ihaniere, ati hejifatyete ehanita hosi nyo ittiyenie isi, ati obeŋi isi ihanie. 4Ifitani isi erre hun odiŋi’to, ette italoronia ilohoho wati ati obeŋi isi akafuni obo ariŋ dwadi ta aani abotye. 5Ihanie isi egyamita hosi daŋ jo oŋida laati igonyuni. Itabolori isi egyerita hun iyyafani#23:5 egyerita hun iyyafaniIfitani isi ihas hosi awaragat hun omutari hun igyoroni omuk ekyanita huno Hollum. isi bwo fe italati isi esidita boŋojin hosi. 6Omunoi isi itoŋori imasik huno etahabuyo ta akarama hosi bwo fe omunoi isi itoŋori ihosyere wati ihasik imojiti hosi. 7Bwo fe omunoi isi efonya wati hutto suk bwo fe eloŋo wati isi ahettiyanak. 8Ati itai, heruhoto eloŋo wati itai ahettiyanak nyo iwanata tai iko ettiyanani abotye bwo fe irata tai illarak. 9Heloŋoti obo atulo amonye jyo afau ana, nyo iwanata tai iko Monye abotye ette dou. 10Bwo fe heruhoto al iloŋoi laati itai eleittaha nyo iwanata tai iko eleittok abotye inyi Kristo. 11Ijara eleittok hatai hetera ahegyamani hatai. 12Lya al itabolo’to ahwan honyi itamutari adi, bwo fe lya al itamuta’to ahwan honyi itabolori adi.

13Orroho bebe jihatai legyorok iko Farisei, itai lenyabak, nyo ihyanana tai ekat lobye Hollum jyo aati. Ibyaŋata tai ijiŋana ta ahwattek hatai bwo itihoto tai hya hul awahi’to jiŋana. 14Orroho bebe jihatai legyorok iko Farisei, itai lenyabak, nyo ihorotyete tai asik ihidahi bwo dwadi ihaniete tai on orroho ihwa ana imojoti tai emojiti hun obolori’to ihosyere wati. Te eram ana inyurana adi itai aŋoco on orroho’to agalik. 15Orroho bebe jihatai legyorok iko Farisei, itai lenyabak, nyo illaŋata tai arryak idahari ifauhyen daŋ ituruhyere dwadi atulo abotye te ettiyenita hatai. Ati al iruk obo ettiyenita hatai itarrohojata tai inyi agalik itai; itai laati hul osiru eema on osyo fur.

16Orroho jihatai arihok hul iŋodoti’to nyo ijatta tai, Al ittuŋo atulo ta aji imojit eneittok ara inyi ettuŋo asai, ati kuyya ittuŋo atulo ta nayyel ono aji imojit eneittok ara inyi ettuŋo ahode. 17Itai abuyaŋak hul iŋodoti’to. ?Anani on odwa’to agalik, nayyel kuyya bu aji imojit eneittok an itajak’to nayyel? 18Ijatta tai bwo fe, Lya al ittuŋo’to te etityek ara ettuŋo honyi asai ati kuyya ittuŋo inyi te ehuma on owon ihide itityek ara inyi ettuŋo ahode. 19Itai aŋodok. ?Anani on odwa’to agalik, ehuma kuyya bu etityek an itajak’to ehuma? 20Lya al ittuŋo’to te etityek, ittuŋo inyi tenyi iko te erre daŋ hun owoni ihide honyi. 21Bwo fe lya al ittuŋo’to ta aji imojit eneittok, ittuŋo inyi tenyi bwo fe to lya al amanya’to itwa honyi. 22Bwo fe lya al ittuŋo’to te edou, ittuŋo bu inyi ta akurus Hollum bwo to lya al itoŋo’to dia.

23Orroho bebe jihatai legyorok iko Farisei, itai lenyabak, nyo isyatta tai aŋati etattomoni ono ema hatai iko aful bwo anyim, ati itapwahata tai erre hun obolori’to huno efahita; isi huna, aŋoco on obis bwo amehino iko neruk. Oŋida ihaniete erre huna daŋ iko hodwo. 24Itai arihok hul iŋodoti’to. Imituna tai ajaŋati ati idiloro tai akonnikonni.

25Orroho bebe jihatai legyorok iko Farisei, itai lenyabak, nyo italiboryete tai orwoŋ kos iko asahan ati ifuti atwajin hosi iko adaya bwo fe ahorotyo. 26Iye olo Farisei al iŋodo’to. Ahosyere italiboro atwa kos iko atwa sahan bwo fe olibori adi orwoŋite hosi.

27Orroho bebe jihatai legyorok iko Farisei, itai lenyabak, nyo irata tai ihwa atobwaha hatai hun iyalani te eyali. Ilamani isi to let ati ifuti atwajin hosi iko ahoi hayak bwo omuyahi daŋ. 28Bwo fe ihomomite wati irata tai ihwa laati hul oniŋye’to Hollum ati ifuti atwajin hatai iko enyobita bwo emesiti.

29Orroho bebe jihatai legyorok iko Farisei, itai lenyabak, nyo ihuhumana tai elumyo huno eyak sayyo bwo fe iduhonia tai akukuhyen huno ahoi yijok. 30Bwo fe ijatta tai, Kuyya emanya nya hohoi beryen iko hohonyok hohoi, ebeŋ nya hohoi eruk ehanita hosi ninya ottohorik isi eyak sayyo. 31Ati itahutana tai ta ahwattek hatai jo irata tai lonyirok hulo lattok eyak sayyo. 32Tania otuhonie erre hunya ihanie hohonyok hatai. 33Irata tai ihwa amunok, ihwa epakidaŋi; ?aŋai adi irisata tai ebironio ihima? 34Tania efak ni jihatai eyak sayyo bwo alofyorojok iko legyorok. Ittohoro adi itai isi bwo isihonia adi itai omuk. Ibahyete adi itai laati omuk ihasik imojiti hatai, ittata tai ittigemyo isi imisihi daŋ. 35Tania oŋoti adi jihatai naye ono aati hulo daŋ hul oyiji’to. Isi laati to ye ono Abele ayijoni many jyo naye ono Sakaria lonyi Barakia, linya ittohoro tai tehiji itityek iko aji imojit eneittok. 36Eramak ni itai ahode jo ofwonni adi erre huna daŋ jyo elahaji ana.

Ayyo Yesu ta Amiji Yerusalem

Lk 13:34-35

37Yerusalem, Yerusalem, iye amiji an ittohyo’to leyak sayyo bwo fe irwoŋyo hul ifak Hollum jihoi. Ahode ahode awak ni ’tubana aduri hoi jihoŋ enyyahita arryai ihwa on ottubaniere ahohoro akiyehi honyi itwa hiwa honyi, ati iha iye. 38Imijye, idehi Hollum aji hoi jihoi ahania. 39Nyo eramak ni iye jo, ibeŋ adi iye inyyak igonyuna ani many iholoŋ an ijo iye jo, “Hotohwo lya ol ottu’to ta afure ono Hobu.”

Currently Selected:

Matteyo 23: LOT1969

Highlight

Copy