Luka 7

Etaŋidaryo Yesu Apit Jafit

Mt 8:5-13

1Latuhok Yesu ettiyenio honyi jyo aati daŋ, ette inyi leten Kapernaum. 2Ihwania owon nya obo jafit iko apit ol omuno inyi bebe. Oŋwai nya inyi ilyaha aye. 3Inya itaniŋu jafit eram Yesu, ifak inyi eleittaha hulo Yudea jyo Yesu jo oŋida inyi ottu itaŋida apit honyi. 4Ninya lafwonni isi jyo Yesu ikyanai isi jihonyi ta amehino ojori, Osiru itaŋida iye lapit honyi ihwo awak inyi. 5Nyo omuno inyi aati hohoi bwo fe oduhok nya inyi aji imojit hohoi. 6Attati Yesu fwatan ikosi. Hobeŋ inyi afany ihaji, ifak jafit orryahat jihonyi hul ojori, Hobu hettigemyo ahwan hoi, nyo obeŋ osiru jihoŋ ittu iye ihaji hoŋ. 7Bwo abeŋ ni asiru ilari jihoi. Ati ikyanai te etuk bwo oŋida adi apit hoŋ. 8Nyo aniŋyo ni eleittok hoŋ bwo oseŋer hoŋ oniŋye ani. Aremik ni jaran jyo obo, Ilo, bwo inyi ette leten; bwo fe jyo lobo, Waŋ, bwo inyi ette ’tuna; bwo ajo ni jyo apit hoŋ, Ihanie ania, bwo inyi ette ihanio. 9Itaniŋu Yesu ana, illilliha inyi ette yito jyo eluluŋ wati ninya ijifatyo’to inyi ojo, Eramak ni itai, ara dwo bu jyo Israele abeŋ ni anyurak obo neruk on obolo ihwa ana. 10Bwo hya hinya ifak inyi ocohunie ihaji, onyurani isi apit laŋida.

Etubuhuna Yesu Lonyi olo Nolobiloŋ

11Ihalu gaa, olo Yesu jyo obo amiji an ifurani Nain bwo leyiyanak honyi iko eluluŋ wati arryai ette fwatan ikonyi. 12Ilyaha Yesu ikat miji, iwwaharai aati atulo ol oye. Ara nya inyi olonyi abotye jyo honyonyi, nolobiloŋ, bwo fe ofwonni eluluŋ wati hutto miji ikonyi. 13Inya igonyu Hobu inyi, ette inyi mehino jihonyi ette jaran jihonyi, Heyyo. 14Attati inyi ’tuna ette ’tir ekafit honyi ette ewwak wotya. Ojo Yesu, Illa ajo ni jihoi, totte. 15Teyya ette ayani alya dyoto ette itteryo ekyana. Bwo Yesu ette isyo inyi jyo honyonyi. 16Abaŋi laati daŋ bebe ette isi itahabuyo Hollum ojori, Adyoto eyani sayyo ol obolo ihiji hohoi bwo fe attu Hollum jyo laati honyi. 17Isarrahi eram ana ifau Yudea daŋ iko ifauhyen daŋ hun onyihai’to dia.

Lefahat Hulo Yoane Batista

Mt 11:2-19

18Iramani leyiyanak hulo Yoane erre huna jihonyi. 19Bwo Yoane ette iloŋuna leyiyanak arrihai ette ifahina isi jyo Hobu ifiyere inyi ojo, ?Iye alya linya ojori eyak sayyo jo ottu adi, kuyya oŋida hohoi etila obo? 20Ofwoi isi jyo Yesu ette jaran, Ifahu Yoane Batista hohoi jihoi ojo, ?Iye alya ol ojori laati jo ottu adi, kuyya oŋida hohoi ettifya obo? 21Ta asaa to nya itaŋida Yesu aati t’eŋwati hosi bwo fe ifuhak inyi ajohin hun orrohoji’to. Jyo hya hul oŋodoi’to isyo inyi amijo. 22Bwo inyi ette itarraŋ jihosi ojo, Ifwatta iramana Yoane erre hun igonyuna tai bwo fe hun itaniŋuna tai. Omijye aŋodok, adahai aŋurak, oŋidari aati ’tallulu, itaniŋye atuhok, ibuhuni ayak bwo fe ittiyenie asayyo hun oyiji jyo alocaŋak. 23Bwo omuno adi lya ol obeŋ’to iha eram hoŋ.

24Acaharai lefahat hulo Yoane, ette Yesu itteryo ikyana ihiji wati te eram Yoane jo, ?Ifwatta nya itai imur imijyere anyo? ?Igonyuna nya itai osiholoti on ohuta oyyami? Obeŋ. 25?Ati ifwatta nya itai imijyere anyo? ?Kuyya ifwatta tai imijyere atulo ol iyyafatyo’to aboŋojin hun ilamani? Ahode hul iyyafani’to aboŋojin hun ilamani amanyai isi ihasik hobwok. 26?Ati ifwatta nya itai imijyere anyo? ?Kuyya eyani sayyo? Afe, eramak ni itai jo agalik Yoane eyani sayyo. 27Nyo igyoroni ekyanita huna tenyi ojo,

“Imijye, efak ni eyani sayyo hoŋ ahosyere hoi,

Al ihuhumak’to nekoi ahosyere hoi.”

28Eramak ni itai jo, Ihiji wati daŋ hul isiuni obeŋ obo agalik Yoane. Ati lya ol omuta’to ilobye Hollum agalik adi inyi Yoane. 29Itaniŋuni aati iko amojok musuru ekyanita honyi ette isi itahabuyo Hollum, nyo ibatisye nya isi ta batisimo ono Yoane. 30Ati ihari nya Farisei iko eleittaha awahan Hollum bwo fe obeŋi isi ifwotuni batisimo jyo Yoane.

31?Etarrijohi adi ni aati hulo iko anyo? ?Arai isi ihwa anyo? 32Arai isi ihwa aduri hul itoŋoi’to lisuk bwo illilloŋoi illarak hosi ojori, Ehut hohoi acuwali jihatai bwo itai ibyaŋata ihyati. Eyyo hohoi atwari bwo itai ibyaŋata iburyete. 33Nyo ottu Yoane Batista ol obeŋ oŋiyo aŋirya bwo fe obeŋ amata aari ajalaŋi, bwo itai ijatta jo orrohoja inyi. 34Ottu Lonyi tulo ol oŋiyo bwo fe amata bwo itai ijatta ara inyi alaŋaru iko arumani bwo fe amotte hamojok musuru iko leyyak. 35Itahutani ehanita Hollum jo obisi ofyoro honyi.

Awanan Yesu Ihaji Simone Afariseitanani

36Iloŋo obo olo Farisei Yesu iŋiyere ikonyi. Attati inyi leten ihaji Fariseitanani ette itoŋo iger teremeja iŋiyere. 37Bwo fe owon nya obo aŋotte ono amiji ania an ara’to aheyyani. Itaniŋu inyi jo oŋiyo Yesu ihaji Fariseitanani, ette inyi iyaŋuno arya ta akarajaja an ara’to ahiyali. 38Ette inyi wotya ihorwoŋ Yesu iger hejek honyi ette ’yo. Oyihi inyi eyyo ihejek Yesu ette ifufus to ofir honyi ette jur ejek honyi bwo ette iyalyo ta arya. 39Tania al igonyu Afariseitanani linya iloŋu’to Yesu, ojo inyi ta ataji honyi, Ara dwo atulo olo eheyani sayyo omijak dwo inyi anani aŋotte an ottir’to ania inyi nyo ara inyi aheyyani. 40Attati Yesu itarraŋ jihonyi ojo, Simone, ajo ni ekyana omuk erre jihoi. Bwo inyi ette itarraŋ ojo, Hettiyanani ikyanai. 41Ojo Yesu, Owon nya obo atulo iko aati horos honyi arrihai, ara ono atulo abotye arobia esiha miet, bwo obo arobia atomwana miet. 42Obeŋi isi oremehini duma ahorosi hosi ette inyi busana isi daŋ. ?Tania alali adi ol omuno’to inyi agalik? 43Ojo Simone, Egigilo ni jo lya ol obusak inyi hun olwaji. Bwo Yesu ette jaran jihonyi, Iŋot iye on obis. 44Oyito inyi jyo aŋotte ania ette jaran jyo Simone, ?Igonyu iye aŋotte ana? Ajiŋak dwo ni ihaji hoi, ibeŋ iye isyo ani aari illillayere ejek hoŋ ati oyihi inyi eyyo ihejek hoŋ ette ifufus to ofir honyi. 45Ibeŋ dwo iye ijur ani, ati many hajiŋak ni ihaji, ojuryo inyi ejek hoŋ. 46Ibeŋ dwo iye iyal ahou hoŋ te eyali ati iyal inyi ejek hoŋ ta arya. 47Ihwania eramak ni iye jo ahohinie eyyata honyi hun olwaji nyo omuno inyi ani bebe. Ati lya al ahohinie eyyata hun omutari omuta namuno honyi bwo fe. 48Attati inyi jaran jyo aŋotte, Ahohinie eyyata hoi. 49Attati hya hul itoŋoi’to iger teremeja ikonyi itteryo ikyana ta ahwattek hosi ojori, ?Ŋai olo ol ohohi’to eyyata? 50Attati Yesu jaran jyo aŋotte, Italahu eruk hoi iye. Ilo te elik taji.

Currently Selected:

Luka 7: LOT1969

Highlight

Copy