Luka 6

Agila Heyiyanak Ema to Sabato

Mt 12:1-8; Mk 2:23-28

1To oloŋ sabato addaddaharai Yesu iko leyiyanak honyi ta atwa matta hima ette leyiyanak honyi giluna omuk nema ette fofo ette niŋa. 2Ifiye omuk Farisei isi ojori, ?Nyo ihaniete tai ariŋ on odwa’to ihaniere to noloŋ sabato? 3Bwo Yesu ette itarraŋ ojo, ?Ibyaŋata tai ihenuna erre hunya ihanio Davide iko laati honyi laniamai isi? 4Ojiŋak nya inyi ihaji ono Hollum ette duhuna emunio ette ŋiyo bwo fe isyo inyi omuk jyo laati honyi. Isi emunio hun odwari’to hun obeŋ tulo oŋiyo arari ehumak hama. 5Attati inyi jaran jihosi, Ara Lonyi tulo Hobu olo sabato.

Atulo ol Oye Hani

Mt 12:9-14; Mk 3:1-6

6To obo sabato ojiŋak inyi ihaji imojit ittiyeniere. Owon dia obo atulo ol oye aani iŋet honyi. 7Bwo egyorok iko Farisei ette ikikorihina jyo Yesu imijyere kuyya itaŋida adi inyi atulo to oloŋ sabato nyo awahi isi rasana inyi. 8Ati omijak inyi egigilita hosi ette jaran jyo atulo ol oye hani, Otte, owotya ihiji wati. Bwo inyi ette dyoto ette wotya dia. 9Attati Yesu jaran jihosi ojo, Efiyo ni itai, ?oyyu ihaniere on oyyu to oloŋ sabato kuyya ihaniere on orroho? ?Anani on oyyu’to, etahoruna atulo kuyya attohoro? 10Attati inyi mijo jihosi daŋ attati jaran jyo atulo lya, Onitok aani hoi. Bwo inyi onitok ihwo nya ette aani honyi ŋidari. 11Ati ifuti nya isi daŋ iko ajore ette itarisa ta ahwattek hosi ojori, Ehanio adi hohoi anyo jyo Yesu.

Onyimu Yesu Aati ’Tomon Harrihai

Mt 10:1-4; Mk 3:13-19

12Jyo oŋitek hunia attati Yesu leten idoŋe imojori, bwo fe ta arwe daŋ omojo inyi jyo Hollum. 13Lafaŋ amotye iloŋu inyi eyiyanak honyi ette nyimuna jihosi ’tomon harrihai hul ifurak inyi lefahat#6:13 lefahatIsi laati hinya ifak Yesu ittiyeniere eram honyi.. 14Simone inya ifurak inyi Petro, iko illanyi Andrea, Yakobo, Yoane, Filipo, Bartolomeo, 15iko Matteyo, Tomaso, Yakobo lonyi Alufayo, Simone Selot#6:15 SelotArai isi laati hul igyamai bebe ihouniere afau hosi jyo Roma., 16bwo Yuda lonyi Yakobo bwo fe Yuda Iskariote letinyyaŋani Yesu.

Ettiyenio Yesu Aati Arryai

Mt 4:23-25

17Isuru Yesu ikosi ette wotya igum doŋe iko eluluŋ heyiyanak arryai iko eluluŋ wati hul ofwonni’to to Yudea, to Yerusalem, bwo fe to masik hutteger Turo iko Sidon. Ofwonni laati daŋ itaniŋyere jyo Yesu iko itaŋidaryere ahwattek hosi t’eŋwati hosi. 18Bwo fe hya hul ittigemye ajohin hun orrohoji’to aŋidari daŋ. 19Bwo fe ottifyai eluluŋ wati daŋ ittiryere inyi nyo ottu adwaran jihonyi itaŋidaryere isi daŋ.

Emuniti iko Arrohojita hun Ofwonni Adi

Mt 5:1-12

20Attati inyi mijo jyo leyiyanak honyi ette jaran, Omunoti itai alocaŋak, nyo ara Hollum a Hobu hatai.

21Omunoti itai hul iniamati’to ihwania nyo itifoŋ adi Hollum itai. Omunoti itai hul iyyoti’to ihwania nyo isuhotyete adi itai.

22Omunoti al oliwarik aati itai bwo fe al ihari isi itai; al ipice laati itai bwo al oliwarik isi afureta hatai te eram ono Lonyi tulo. 23Omunoti to oloŋ ania bwo fe isilihitati ta amuno nyo owon aduma hatai on obolo lidou nyo ihanie nya hohonyok hosi ihwo nya jyo leyyak sayyo.

24Ati orroho bebe jihatai abarak, nyo inyurana nya itai edumit hatai.

25Orroho bebe jihatai hul ifoŋata’to ihwania nyo iniamati adi itai. Bwo orroho bebe jihatai hul imunoti’to ihwania nyo ijiriŋati adi itai bwo fe iyyoti adi itai.

26Orroho bebe jihatai al itahabuye laati itai nyo ihanie nya hohonyok hosi ihwania jyo eyak sayyo hul ipali’to.

Omunoti Amyorok Hatai

Mt 5:38-48; 7:12

27Ati ajo ni jihatai hul itaniŋyete’to jo, Omunoti amyorok hatai, ihaniete on oyyu jyo hya hul oliwarik’to itai. 28Omunoti hya hul ipice’to itai, omojoti to hya hul ihanie’to on orroho jihatai. 29Lya al anaŋ’to iye amahalyo isyara bwo fe ebotye. Bwo fe lya al iyaro’to aboŋo hoi isyara bwo fe agamis hoi. 30Isyatta erre jyo hya hul omojoi’to, bwo fe hya hul iyarai’to erre hatai henyyahata mojuna isi. 31Ihaniete jyo laati ihwa iwahata tai isi ihanie jihatai.

32Kuyya imunoti tai aati hul omunoi’to itai, ?anyo adi ayiji jihatai? Ara dwadi bu eyyak omunoi isi hya hul omunoi’to isi. 33Kuyya ihaniete tai on oyyu jyo hya hul ihanie’to jihatai on oyyu, ?anyo adi ayiji jihatai? Nyo ihanie eyyak daŋ ihwo nya. 34Kuyya isyatta tai erre jyo hul igigiloti tai jo inyyahunie adi, ?anyo adi ayiji jihatai? Ara dwadi bu eyyak isyori jyo eyyak bwo fe ofwonni inyyak inyyahuna. 35Ati omunoti amyorok hatai, ihaniete on oyyu jihosi, isyatta jihosi bwo hegigiloti jo oŋida isi inyyahunie; obolo adi edumit hatai bwo irata adi itai olonyirok hulo lya al agalik’to daŋ. Nyo omehino inyi jyo hya hul obeŋi’to ojori humo, bwo fe jyo hul orrohoji’to. 36Omehiniete ihwa Monyatai ol owon’to iko amehino.

Eram ono Aŋoco

Mt 7:1-5

37Heŋototo laati bwo obeŋ adi Hollum oŋot itai. Heŋototo naye jyo laati bwo obeŋ adi Hollum oŋot aye jihatai. Obusana laati bwo obusak adi Hollum itai. 38Isyatta erre jyo laati bwo isyo adi Hollum jihatai ekemit on oyyu, an isihi bwo fe osyarai ilet. Nyo ekemit an isyatta tai inyyahuno adi Hollum jihatai.

39Inyyak inyi bwo fe iramana isi arryamara ojo, ?Oremik oloŋodo rihotyo aŋodok? ?Obeŋi adi isi okwahari iwure? 40Obeŋ obo eyiyanani agalik ettiyanani honyi, ati al ihum inyi ittiyenio ara adi inyi ihwa ettiyanani honyi. 41?Aŋai adi igonyu obo alatai alle honyek al awon jo illanyi bwo obeŋ inyi igigilo te etoi on obolo’to otto honyek honyi? 42?Kuyya aŋai ikyana adi obo alatai jyo illanyi jo, Hadi, agorotu ni alle honyek to honyek hoi bwo owon etoi on obolo’to otto ononyi? Ara olo ahenyabani. Oŋida ahosyere ogorotu inyi etoi on obolo’to otto honyek honyi attadi inyi iremehina igonyuna ligorotuniere alle honyek otto honyek illanyi.

Ayyani iko Aŋer Honyi

Mt 7:17-20; 12:34-35

43Nyo obeŋ ayyani on oyyu’to oremik ŋijuna aŋer hun orrohoji’to, obeŋ bwo fe ayyani on orroho’to oŋiju aŋer hun oyiji. 44Nyo omijani ayyanio daŋ ta aŋer hosi. Ittallihi laati huruna aŋer ŋaboli to hikwa bwo fe ittallihi isi huruna aŋer ajalaŋi te laŋi. 45Ojiŋuni erre hun oyiji’to totwa taji tulo ol oyyu’to, bwo ojiŋuni erre hun orrohoji’to to taji tulo ol orroho’to. Nyo to taji ofwonni erre hun ikyanai te etuk.

Aduhonia Hasik Arrihai

Mt 7:24-27

46?Nyo iloŋoti tai ani jo, Hobu, Hobu, bwo ibyaŋata tai ihaniete erre hun eramak ni itai? 47Hya daŋ hul ofwonni’to jihoŋ bwo itaniŋye ekyanita hoŋ bwo fe ihanie isi, etahutak ni itai jo arai isi ihwa baŋai. 48Arai isi ihwa atulo ol oduhok’to aji. Obwak inyi ifau ette ihanana etteri haji ihide morwoi bwo fe al ottu egura hari, obeŋ adi aji okwaharo nyo oduhoni inyi ihide morwoi. 49Bwo lya al itaniŋyo’to ekyanita hoŋ bwo fe obeŋ ihanio ara inyi ihwa atulo ol oduhok’to aji ifau bwo obeŋ ara ihide morwoi. Al ottu egura hari ette inyi kwaharu an atturo.

Currently Selected:

Luka 6: LOT1969

Highlight

Copy