Luka 5

Enefuna Aham Arryai

Mt 4:18-22; Mk 1:16-20

1Ottidani laati Yesu nyo awahi isi itaniŋyo neram Hollum, ette inyi wotya iger hari Genesaret. 2Attati inyi igonyuna atogoli arrihai ahania nyo ofwoi ayafohok illillayere aboyo hosi. 3Isurok inyi itogol Simone ette leten to otifor kai, attati ittiyenio aati hul owotyai ilotifor bwo inyi itwa togol. 4Al atohu inyi ekyana ojo inyi jyo Simone, Iyaro atogol hoi jyo amaji on owudo bwo ibironia aboyo hatai iyafohuniere aham. 5Itarraŋ Simone ojo, Leittok eyafoho hohoi attari daŋ ebeŋ hohoi eyafohu omuk. Ati te ekyana hoi ebirok adi hohoi aboyo. 6Ninya ihanie isi ihwo nya ayafohuni isi aham arryai attati aboyo hosi jaran afuto. 7Ette isi itakodo jyo aati hutto togol ebotye oŋida olwahi isi. Ette isi itufutana atogoli many ojarik edyo itwa hari. 8Ninya igonyu Simone Petro ana ette inyi rigoŋi ihosyere hejek Yesu ette jaran, Hobu ilo jihoŋ addi, nyo ara ni aheyyani. 9Nyo illillihai isi daŋ ta ayafohuna hosi aham hun olwaji. 10Bwo fe illillihai Yakobo iko Yoane onyirok Sebedeyo hinya arai’to hutteluluŋ Simone. Attati Yesu jaran jyo Simone, Hebaŋ nyo ihalu iloŋo adi iye aati. 11Ninya iyaŋunie isi atogoli hosi ilotifor idehini isi erre daŋ ette jifaru Yesu.

Etaŋidaryo Yesu Atulo ’Tallulu

Mt 8:1-4; Mk 1:40-45

12To ninya to nya owon Yesu jyo obo amiji, ette obo atulo ’tallulu ’tuna jihonyi. Origoŋ inyi lihomon Yesu ette juru ifau ette jaran, Hobu, al iwak iye iremik iye itaŋida ani. 13Attati Yesu ihalamana ani honyi ette ’tir inyi ette jaran, Ihwa awak ni, toŋidara. Ette attallulu atulo alya ’turoro kwak. 14Attati Yesu ifahina inyi ojo, Heramak obo atulo eram ana, ati ilo itahutak ahwan hoi jyo ehumani ihaji imojit bwo fe iyaro ehumi ono aŋidari hoi ihwa iramak nya Mose jyo laati ihaniere te etamijani. 15Tania ette eram Yesu isarrahina imasik daŋ attati eluluŋ wati arryai ’tubanio itayiryere jihonyi bwo fe ifwotuniere aŋidari t’eŋwati hosi. 16Ati olo inyi limur imojori.

Etaŋidaryo Yesu Atulo ol Ogolyo Hwan

Mt 9:1-8; Mk 2:1-12

17To oŋitek hwa ninya ittiyeniere Yesu owoni Farisei iko ettiyanak hulo efahita aŋati. Ofwonni nya isi jyo amisik huno Galilea iko Yudea bwo fe to Yerusalem bwo owon agolon ono Hobu jyo Yesu itaŋidaryere laati. 18Attati aati kafuna obo atulo ol ogolyo hwan te ekafit, attati isi ’tifya ekoi iyaŋuniere atulo lya jyo Yesu. 19Ati obeŋi isi orumani ekoi itajiŋaniere inyi nyo ifudai aati. Tania odohi isi ihide haji ette ’tul aji attati ililyofonia inyi te ekafit honyi jyo Yesu ihiji wati. 20Ninya igonyu Yesu neruk hosi ojo inyi, Illaŋ, ahohinie eyyata hoi. 21Attati egyorok#5:21 egyorokArai isi laati hul ihenie bwo fe ittiyenie abuk ono Hollum. iko Farisei iŋuŋunita ojori, ?Ŋai alya al ikyana’to ekyana ono amoryo? Obeŋ tulo oremik hohina eyyata arari Hollum fe abotye. 22Ati omijak Yesu egigilita hosi ette inyi ifiyo isi ojo, ?Nyo igigiloti tai ta atajya hatai ihwania? 23?Anani an ilyaha’to, ajaran hoŋ jo, Ahohinie eyyata hoi, kuyya ajaran hoŋ jo, Totte, adahai? 24Ati oŋida itai imijana jo owon adwaran jyo Lonyi tulo ihohiniere eyyata wati hutta fau. Tania ojo inyi jyo atulo ol ogolyo hwan, Ajo ni jihoi, otte, obubunak ejotit hoi, ilo ihaŋ. 25Teyya ette inyi dyoto kwak tehiji hosi ette bubunana ejotit odwo oferyere inyi, ette leten ihaŋ hosi al itahabuyo Hollum. 26Tania ette isi daŋ illilliha, ette itahabuyo Hollum bwo fe ifuti isi iko abaŋi ette jaran, Egonyu hohoi ahana erre hun olufaji’to.

Eloŋuna Honyi Levi

Mt 9:9-13; Mk 2:13-17

27Ihalu ana alo Yesu alet ette nyurana lamojoni musuru al anya’to Levi. Itoŋo inyi ihaji on odumarik amusuru, attati Yesu jaran jihonyi, Ijifunie ani. 28Attati inyi dyoto ette ijifaru inyi.

29Attati Levi ihanana eyom on obolo ihaji honyi tenyi bwo fe olwaji eluluŋ wati iko lamojok musuru hul oŋiye iteremeja ikonyi. 30Attati Farisei iko egyorok ikikyana jyo leyiyanak hulo Yesu ojori, ?Nyo iŋiyete tai bwo fe imatati iko lamojok musuru iko leyyak? 31Attati Yesu itarraŋ jihosi ojo, Laati hul oŋidari’to obeŋi awahi afwatan jyo akim, ati hul oŋwai’to ofwoi isi jyo akim. 32Abeŋ ni attu iloŋori ayijok ati attu ni iloŋori leyyak, oŋida isi iloiti atajya hosi t’eyyata hosi.

Eram ono Aferuna#AferunaObeŋi isi oŋiye to omuk oŋitek nyo igigiloi isi itamuno ana Hollum.

Mt 9:14-17; Mk 2:18-22

33Attati isi jaran jihonyi, Oferutai eyiyanak hulo Yoane bwo fe omojoi gagaga bwo fe eyiyanak hulo Farisei ihanie ihwo nya, ati hulohoi oŋiye bwo fe amatai. 34Ifiyo Yesu isi ojo, ?Oferutai mottyarak hayamani al itoŋoi isi ikonyi? 35Ofwonni adi oŋitek hun iyarik ayamani t’ehiji hosi addi bwo to noloŋ to nya ette adi isi feruna. 36Iramak bwo fe inyi isi arryamara on ojo, Obeŋ obo atulo ogwasu aboŋo aŋejuk ette ’tafana jyo amarwani. Kuyya ihanio inyi ihwania ogwasaru adi aŋejuk addi ette ilak remehina jyo odwo. 37Bwo fe obeŋ obo ijuhok abalu aŋejuho itwa ihulo amarwani. Al ijuhok obo ihwania, obor adi abalu ehulo amarwani ette abalu iko ehulo byaŋan. 38Oŋida ijuhoni abalu aŋejuho itwa ihulo aŋejuho. 39Bwo fe obeŋ obo atulo al amat abalu amarwani inyyak wahan abalu aŋejuk nyo ojo inyi, Oyyu abalu amarwani.

Currently Selected:

Luka 5: LOT1969

Highlight

Copy