Luka 15

Narryamara ono Aker on Olito’to

Mt 18:10-14

1Obo oloŋ ofwonni lamojok musuru iko leyyak jyo Yesu itayiryere nettiyenio honyi. 2Bwo Farisei iko legyorok ette mumwaŋa ojori, Iloŋuta atulo olo leyyak ette ŋiyo ikosi.

3Ette Yesu ikyana jihosi ta narryamara ana ojo, 4Kuyya owon obo alatai iko akyoro nesiha abotye bwo obo abotye olitohi, ?obeŋ adi inyi idehi huna atomwana hottoŋwan hohottoŋwan imur ette leten ’tittifyaru aker ania many onyuraniere inyi? 5Bwo fe al onyurak inyi naker nya olorok inyi ilohoho ta amuno. 6Lafany inyi imiji iloŋu inyi mottyarak honyi iko orryahat honyi ojo, Hamunoti ikoŋ nyo anyurak ni naker hoŋ odwo olitohi’to. 7Ajo ni jihatai jo owon adi amuno on obolo lidou ta leyyani abotye al iloit’to ataji honyi t’eyyata honyi, agalik jyo hul omuk atomwana hottoŋwan hohottoŋwan hul oyiji’to hul obeŋi’to iloiti atajya hosi.

Narryamara ono Agurus on Olito’to

8Kuyya owon obo aŋotte hatai iko agurusi atomwana ’tomon, bwo olitohi obo agurus abotye, ?obeŋ adi inyi inwok neema ette fyeyo afau haji ette ’tifya bebe many onyuraniere inyi? 9Al onyurak inyi inyi iloŋu inyi hutto onyihari honyi iko hutta haŋ honyi ette jaran jihosi ojo, Hamunoti ikoŋ nyo anyurak ni agurus hoŋ odwo olitohi’to. 10Ihwania ajo ni jihatai jo, Omunoi anjelohyen hulo Hollum ta leyyani abotye al iloit’to ataji honyi t’eyyata honyi.

Narryamara ono Lonyi ol Olito’to

11Bwo Yesu ette jaran, Owon nya obo atulo iko lonyirok arrihai. 12Bwo alahalu ette jaran jyo monyonyi ojo, Monyoŋ isyarak jihoŋ orutat hoŋ. Attati inyi harana jihosi ebariti honyi. 13Lihalu omuk oŋitek kai iddudduhu alahalu nerre honyi daŋ ette leten jyo obo afau an alama ette tuhonia erre honyi daŋ ta asilara honyi. 14Latuk inyi agurusi honyi, bwo ahure on obolo ette ’tuna jyo afau ania ette inyi ilocaŋ. 15Attati inyi leten itoŋo iko obo atulo ette atulo lya isyo jihonyi egyama ono eyyahatyo bataha. 16Bwo fe awak inyi ŋiyo aŋiyo bataha hun arai erre asai. Nyo obeŋ obo atulo isyo jihonyi aŋiyo. 17Ati ninya attu inyi igigilo on oyyu ojo inyi, Arai legyamak monyoŋ omukaja hul owoni’to iko aŋiyo on oŋiye isi ette fituna nobo, bwo ni aye dini iko ahure. 18Acaharu adi ni jyo monyoŋ bwo ajo adi ni jihonyi, Monyoŋ, eyyau ni ihosyere Hollum bwo fe ihomon hoi. 19Tania obeŋ osiru jihoŋ irari olonyi hoi. Ihanak ani ahegyamani hoi. 20Attati inyi dyoto ette leten jyo monyonyi. Ati halama inyi igonyu monyonyi inyi ette mehino jihonyi ette ŋyoron ette ifony inyi bwo fe ette hut ayyaha honyi. 21Ati ojo lonyi honyi jihonyi ojo, Monyoŋ, eyyau ni ihosyere Hollum iko ihomom hoi tania abeŋ ni asiru irari olonyi hoi. 22Ati iloŋo monye legyamak honyi ojo, Iyaŋuniete aboŋo an ilaman’to bebe itiyyafana inyi, bwo fe ihanak ahatim lihani honyi, iko amuha ihejek honyi. 23Iyaŋuniete atawwo ol ofir’to bebe bwo oŋototo, haŋiyete bwo fe hamunoti. 24Nyo aye nya lonyi hoŋ olo, bwo ihwania lisu. Olitohi nya inyi, bwo ihwania aleyo. Attati isi muno bebe.

25Owon nya lonyi honyi ahouti imana bwo hottu inyi ilyaha ihaji itayiru inyi nedolo iko ahya. 26Iloŋu inyi legyamani ette ifiyo jihonyi ojo, ?Anyo eram dia? 27Itarraŋ inyi ojo, Attu illa hoi bwo isyak monyohoi atawwo ol ofir’to nyo acohuno illa hoi ol oyyu. 28Tania iloŋojita nya inyi bebe ette hara ajiŋana lihaji. Attati monye jiŋuna jihonyi ette iloŋuna inyi. 29Bwo inyi itarraŋ jyo monyonyi ojo, Aii, egyama ni jihoi aŋasi arryai bwo fe abeŋ ni eha efahita hoi bwo iye ibeŋ isyo ani lobo naker an aŋot ni imunori iko orryahat hoŋ. 30Ati lattu lonyi hoi olo ol otuk agurusi hoi daŋ ta amanya iko aati asomok, bwo iye ittu isyahina inyi atawwo ol ofir’to. 31Attati monye jaran, Lonyi hoŋ, emanya iye ikoŋ aŋasi daŋ bwo fe arai erre hoŋ daŋ ahunohoi. 32Ati oyyu jihohoi imunori ahana nyo oye nya illa hoi olo, ati ihwania lisu; olitohi nya inyi, bwo ihwania aleyo.

Currently Selected:

Luka 15: LOT1969

Highlight

Copy