Luka 16

Narryamara ono Labusuti ol Orroho’to

1Attati Yesu ikyana jyo leyiyanak honyi ojo, Owon nya lobo abarani iko labusuti honyi. Itisyahini laati abusuti jyo abarani jo, Otuk inyi erre hoi asai. 2Bwo inyi ette iloŋuna abusuti ette jaran jihonyi ojo, ?Nyo etaniŋu ni erre hoi ihwania? Iramak jihoŋ negyama hoi ono nelobusi nyo atuhuno egyama hoi jihoŋ. 3Igigilo inyi ta ataji honyi ojo, ?Ehan ’tadi ni aŋai? Nyo eya eleittok hoŋ nelobusi hoŋ addi. Abeŋ ni aremik romo bwo fe eloriri ni atileŋita ihaŋitek wati. 4Amijak ni anyo adi ehanio ni jo oŋida isi omojuni ani ihasik hosi al atuhuno egyama ono elobusi hoŋ. 5Attati inyi iloŋuna aati horosi leittok honyi ette jaran jyo letteri ojo, ?Owoni asaŋ leittok hoŋ jihoi baya? 6Bwo inyi ette jaran jihonyi, Asofiahyen hiyali esiha abotye. Attati inyi jaran jihonyi, Itoŋoi, igyorok aduma hoi atomwana miet. 7Ojo inyi jyo lobo, ?Arai hunohoi omukaja? Bwo inyi ette jaran, Asofiahyen alif abotye huno ometi. Ojo inyi jihonyi, Itoŋoi, igyorok aduma hoi atomwana hottohunik. 8Attati eleittok jaran jyo labusuti ol orroho’to ojo, Oyiji ehanita hoi nyo ilofyoroji laduri hulo elahaji ana agalihini lonyirok afaŋan. 9Tania ojo Yesu jihosi ojo, Orrehuna orryahat hatai ta ahwattek hatai te ebariti hutta fau jo oŋida al atuhuno jihatai ifwotuni adi isi itai jyo amanya on osyo’to fur.

10Lya al ihanio’to on oyyu te erre hun omutari’to ihanio adi inyi on oyyu bwo fe te erre hun obolori’to. Bwo fe lya al ihanio’to on orroho te erre hun omutari’to ihanio adi inyi on orroho bwo fe te erre hun obolori’to. 11Tania kuyya ibeŋ iye ihanio on oyyu te ebariti hutte fau, ?ŋai adi isyo jihoi ebariti huno nelahode? 12Bwo fe al ibeŋ iye irrirrya on oyyu erre huno obo atulo, ?ŋai adi ottu isyarana jihoi erre hoi? 13Obeŋ obo atulo oremik igyama jyo eleittaha arrihai. Nyo oliwari adi inyi olobotye bwo fe omuno obotye. Kuyya bu awak adi inyi olobotye bwo fe omyana obotye. Ibyaŋata tai iremehina igyamari jyo Hollum bwo fe jyo ebariti.

Eram ono Efahita iko Olobye ono Hollum

14Bwo fe Farisei hul omunoi’to agurusi itaniŋuni erre huna ette isi suhotyere inyi. 15Bwo Yesu ette jaran jihosi ojo, Itai hul itahutana’to ehanita hatai hun oyiji ihomomite wati, omijak Hollum atajya hatai daŋ. Nyo oliwari Hollum erre hun itahabuye laati.

16Odulori nya nefahita huno Mose iko egyerita huno eyak sayyo many ottuniere Yoane Batista. Many ta asaa nya ittiyenie asayyo hun oyiji huno nolobye Hollum bwo ojiŋani aati dia ta agolon. 17Ilyaha jyo nedou iko nafau apwahan agalik apwahan ono obo ekyana abotye ono efahita.

Esyarana Yesu Efahi ono Apyaha

Mt 19:1-12; Mk 10:1-12

18Iyyau lya al ifuha’to ŋorwoi honyi bwo ette yemuna obo. Bwo fe iyyau lya al ayama’to aŋotte an ifuhari.

Eram Habarani iko Lasaro

19Owon nya lobo labarani ol iyyafatyo’to aboŋojin hun oyiji hun ogoli te enyyaŋa. Bwo fe obolo aŋiyo jihonyi oŋitek daŋ. 20Owon nya lobo atileŋani al anya’to Lasaro inya itaferehini likat habarani bwo owon inyi iko atoŋos. 21Awak nya inyi ŋiyo ebenyiti hun odouni’to to teremeja habarani. Bwo aŋohe ette fwanna iddiddala atoŋos honyi. 22Inya laye atileŋani alya, akafarai nya anjelohyen inyi many jyo Abramo; ihalu oye bwo fe abarani ette nuhana. 23Attati inyi itoŋo Hadese, imaji ono layak, ta adyaha on obolo bebe. Teyya ette inyi bonno ette igonyuna Abramo alamarai iko Lasaro ol oco isuhe Abramo. 24Attati inyi iloŋo ojo, Abramo monyoŋ, omehinie jihoŋ. Ifahu Lasaro jo oŋida inyi ottirok afyalai honyi itwa hari oŋida bati iyyak ’tuna itilik aŋadyef hoŋ nyo amuda ni lihima. 25Ati ojo Abramo jihonyi, Hito, oŋida iye igilu to oŋitek huno nesu hoi. Ifwotuta nya iye erre hun oyiji’to bwo Lasaro onyurak erre hun orrohoji’to, bwo ihwania omuno inyi bwo iye ittigemye. 26Bwo fe oŋida iye imijak jo owon awudori ihiji hohoi ikoye on obolo bebe. Jo hya hul owoni’to dini obeŋi oremehini ’laŋan dinia. Bwo hya hul owoni’to dinia obeŋi oremehini ’laŋuna dini. 27Attati inyi jaran ojo, Monye Abramo, amojo ni jo oŋida iye ifak Lasaro ihaji monyoŋ. 28Awon ni iko illarak miet oŋida inyi olo iramana jihosi ŋadi isi ofwonni jyo amaji hima ana. 29Ati ojo Abramo jihonyi, Owoni Mose iko eyak sayyo, ijara isi itaniŋye jihosi. 30Bwo inyi ojo, Obeŋ, monyoŋ Abramo. Nyo al olo atulo jihosi to ye, oniŋye adi isi. 31Bwo Abramo ette jaran jihonyi, Kuyya obeŋi isi itaniŋye jyo Mose iko eyak sayyo, obeŋi adi bwo fe isi itaniŋye ara dwadi bu ibuhu lobo to ye.

Currently Selected:

Luka 16: LOT1969

Highlight

Copy