Luka 13

Iloitoto Atajya Hatai Ŋadi Itai Iyeti

1Owoni omuk laati dia hul iramani jyo Yesu eram ono aati hulo Galilea hinya ifak Pilato ittohori isi ta asaa an isyoryerek isi ehumita hosi. 2Attati Yesu itarraŋ jihosi ojo, ?Igigiloti tai jo orrohoji aati Galilea hulya agalihini hul omuk nyo ittigemye isi ihwania? 3Ati ajo ni, obeŋ. Ati kuyya ibyaŋata tai irwejata t’eyyata hatai iyeti adi itai ihwo nya. 4Ara nya hya ’tomon hohottohunik hunya okwahino olobele ono Silom jihosi ette ’tohoro isi. ?Igigiloti tai jo arai isi aheyyak agalihini aati daŋ hutto miji Yerusalem? 5Eramak ni itai, obeŋ. Ati kuyya ibyaŋata tai irwejata t’eyyata hatai iyeti adi itai ihwo nya.

Aŋaboli on Obeŋ’to Oŋi

6Ikyana bwo fe Yesu arryamara ana ojo, Owon aŋaboli limana ono obo atulo ette inyi ’tuna ’tifya aŋer iŋaboli ania ati obeŋ inyi onyurak omuk. 7Ojo inyi jyo errirryani mana honyi ojo, Attifya ni aŋer jyo aŋaboli ana ta aŋasi hunihoi bwo abeŋ ni anyurak omuk. Ayafai inyi addi. ?Nyo itihok inyi afau oboijai? 8Ati itarraŋ errirryani mana ojo, Hobu, idehi do jyo neŋa ana abotye bwo arom adi ni awoyo honyi ette ihanana aworot jihonyi. 9Kuyya al oŋiju inyi aŋer, oyyu; kuyya al obeŋ oŋi, ayefu adi ni inyi addi.

Aŋotte on Okudo Hwan

10Ittiyenio nya Yesu ihaji imojit to oloŋ sabato. 11Owon nya obo aŋotte on okudo ahwan honyi ta aŋasi ’tomon hohottohunik, obeŋ inyi oremik itabisana ahwan honyi. 12Ninya igonyu Yesu inyi, iloŋu inyi aŋotte nya ette jaran jihonyi ojo, Hanioŋ, aŋida ahwan hoi ihwania. 13Attati Yesu iyyabana ahas honyi jihonyi. Teyya kwak abis ahwan atulo ania ette inyi itahabuyo Hollum. 14Ati iloŋojita eleittok olo aji imojit nyo itaŋida Yesu aŋotte to oloŋ sabato ette jaran jyo laati ojo, Owoni oŋitek ille hun igyamarik aati. To noŋitek hunia ifwanna ifwotuniete aŋidari, obyaŋara to sabato. 15Attati Hobu jaran, Itai enyabak, ?ibyaŋata tai daŋ ihohitati esuŋ hatai to bore to noloŋ sabato ittata tai iyaro ihari? 16?Ijatta tai jo oŋida ŋarri Abramo ana an ifitak Sitan ta aŋasi ’tomon hohottohunik obeŋi ohohini ta aŋwai honyi to noloŋ sabato? 17Likyana inyi nerre huna, ette laati daŋ hodwo iŋiŋyalai’to inyi iloriri. Bwo fe aati omuk ette muno te erre hun obolori’to hun ihanio inyi.

Narryamara ono Aŋeryo Bule

Mt 13:31-32; Mk 4:30-32

18Bwo fe Yesu ette ifiyo ojo, ?Ara olobye ono Hollum ihwa anyo? ?Etarrijohi adi ni inyi iko anyo? 19Orrijori inyi iko aŋeryo bule an iyaro atulo ette idulana imana honyi. Isuru inyi ette ’tuna ratan ayyani on obolo ette aheny hutte dou duho asik hosi litanata honyi.

Narryamara ono Abula

Mt 13:33

20Bwo fe inyyak inyi jaran jo, ?Etarrijohi adi ni olobye Hollum iko anyo? 21Orrijori inyi iko abula hun iduhu aŋotte ette iharrwahina iko efwa many ayafutarik daŋ.

Ekat ol Ottida’to

Mt 7:13-14, 21-23

22Bwo inyi ette leten ta atwajin misihi ette itittiyenaro aati many Yerusalem. 23Attati lobo ifiyo inyi ojo, Hobu, ?omutari adi hul italahunie? Bwo ojo inyi jyo laati daŋ, 24Ottifyati bebe ijiŋaniere te ekat ol ottida’to. Nyo olwaji hul ottifyai’to ijiŋaniere ati obeŋi isi oremehini jiŋana. 25Odyoto monye haji ette hyanana nekat haji bwo itai ifwanna inninnaŋyere nekat bwo ijatta tai, Hobu, Hobu, aŋahi hohoi nekat. Itarraŋ adi inyi jihatai ojo, Abeŋ ni amijak itai. ?Ifwanna tai tai? 26Ijatta adi itai jihonyi ojo, Eŋiyo nya hohoi bwo emata ikoye, bwo fe ittiyenio nya iye lilofirihi hohoi. 27Ati ojo adi inyi ojo, Eramak ni itai, abeŋ ni amijak itai. ?Ifwanna tai tai? Ifwatta addi, itai hul ihaniete’to erre hun orrohoji’to. 28Owon adi ayyo iko aŋutta hala iholoŋ an igonyuniete adi itai Abramo iko Isako ojo Yakobo iko eyak sayyo daŋ ilobye Hollum bwo itai irasati ilet. 29Bwo ofwonni adi laati t’ettedwoŋi holoŋ iko t’etteddorro holoŋ bwo fe ta aŋaco daŋ ette itoŋo ilobye Hollum. 30Ati aati huttehalu ofwoi adi ahosyere bwo huttohosyere ofwonni adi ihalu.

Ayyo Yesu ta Amiji Yerusalem

Mt 23:37-39

31Ofwonni omuk Farisei hul ojori jihonyi ojo, Ilo addi, nyo awak Erode ’tohoro iye. 32Attati inyi jaran jihosi, Ifwatta iramana olobeyok lya jo, etaŋidaryo ni laati bwo fe efuhatyo ni ajohin ahana iko motye bwo ara oloŋ itahunihi esidi hoŋ. 33Oŋida ani adaha ahana iko motye many oloŋ itahunihi nyo obeŋi oremehini ’tohoro eyani sayyo arari limiji Yerusalem. 34Yerusalem, Yerusalem, amiji an ittohyo’to leyak sayyo bwo fe irwoŋyo hya hul ifak Hollum jihoi. Awak ni ’tubana lonyirok hoi jihoŋ enyyahita arryai ihwa on ottubaniere ahohoro akiyehi honyi itwa hiwa honyi, ati iha iye. 35Ahode idehi Hollum aji hoi jihoi ahania. Bwo ajo ni jihoi, ibeŋ adi iye inyyak igonyuna ani many iholoŋ an ijo iye, Hotomunoi lya ol ottu’to ta afure ono Hobu.

Currently Selected:

Luka 13: LOT1969

Highlight

Copy