Luka 12

Eramyo Yesu te Enyabak

1Ninya lattubai laati hul olwaji bebe hul ifudai ette Yesu ikyana jyo leyiyanak honyi ojo, Ihumata irrirrya abula huno Farisei hun arai’to enyobita. 2Nyo erre daŋ hun imuhoni italeyehini adi, bwo erre daŋ hun idimani omijani adi. 3Tania erre daŋ hun ikyanati tai idumele, itayiruni adi ta afaŋan. Bwo erre hun ihahayati tai itwa haji iramani adi ihosyere wati.

Abaŋata Hollum

Mt 10:28-31

4Ajo ni jihatai illarak hoŋ, hebaŋata hya hul ottohori’to ahwattek wati ati lihalu obeŋi oremehini inyyak ihanio omuk erre. 5Ati eramak adi ni itai jo oŋida ibaŋata ŋai. Abaŋata Hollum ol owon iko adwaran ibironiere itai lihima ihalu attohoro honyi itai. Ajo ni jihatai abaŋata inyi. 6?Obeŋi itinyyaŋani aheny miet ta agurusi arrihai? Ati obeŋ Hollum ogworo obo olosi. 7Ara dwadi bu ofir hutto hosi hatai ihen Hollum daŋ. Tania hebaŋata, nyo igigilo Hollum tetai agalik aheny.

Iruhoto Kristo Ihosyere Wati

Mt 10:32-33; 12:32; 10:19-20

8Ajo ni jihatai jo, lya al iruk’to ani ihosyere wati, iruk adi bwo fe Lonyi tulo inyi ihosyere anjelohyen hulo Hollum. 9Lya al iha’to ani ihosyere wati, iha adi bwo fe Lonyi tulo inyi ihosyere anjelohyen hulo Hollum. 10Lya ol omwaŋa’to Lonyi tulo obusak adi Hollum inyi, ati lya ol omwaŋa’to Oloyiri ol Olibo, obeŋ adi obusanio. 11Al iyaŋunie itai lihasik imojiti ihosyere eleittaha kuyya bwo fe ihosyere okuma hebaŋata jo anyo adi itarraŋata tai. Kuyya anyo adi ijatta tai. 12Nyo ittiyenio adi Oloyiri ol Olibo itai jyo nasaa ania anyo adi an ijatta tai.

Narryamara ono Abarani al Isita’to

13Attati lobo teluluŋ jaran jihonyi ojo, Leittok, iramak illaŋ jo oŋida inyi ehor ikoŋ orutat. 14Ati ojo Yesu jihonyi jo, ?Ŋai ihanak ani ahaŋotoni bwo fe ahaharani hatai? 15Attati inyi jaran jihosi ojo, Ihumata helaha adaya ojiŋak itajya hatai nyo obeŋ amanya tulo owon ta alwaji hirre hun owoni’to jihonyi. 16Bwo inyi ette ikyana jihosi to obo arryamara ojo, Odo amana hasamani bebe. 17Attati inyi igigilo ta ahwan honyi ojo, ?Ehanio adi ni anyo nyo obeŋ amaji jihoŋ ihananiere ema hoŋ? 18Bwo inyi ette jaran, Ehanio adi ni ihwa ana, etattur adi ni amugwo hoŋ, ette duhonia nobo on obolo bwo ejuhok adi ni ema dia. 19Attati ni jaran jyo oloyiri hoŋ ojo, Olo, owoni erre jihoi ta aŋasi arryai. Itoŋoi dee, oŋiye, amatai bwo omunoi. 20Ati ojo Hollum jihonyi, Iye el isita’to, ta arwe ana ottu adi naye jihoi. ?Tania arai adi erre hun igyama iye hunia ahuno ŋai? 21Ara ihwania jyo lya ol ottunak’to ebariti honyi, obeŋ inyi abara ihosyere Hollum.

Hehawwati to Omuk Erre

Mt 6:25-34

22Attati Yesu jaran jyo leyiyanak honyi ojo, Ajo ni jihatai jo, hehawwati ta nesu hatai, ta nerre hun iŋiyete tai ara dwo bu ta aboŋojin hun iyyafatyete tai. 23Nyo agalik nesu aŋiyo, agalik ahwan aboŋojin. 24Ikemijyete olohuresi, obeŋi isi oyehini bwo fe obeŋi odeŋuni, obeŋi isi owoni iko omuk amugwo, ati Hollum itaŋiyo isi. Ati igigilo Hollum tetai agalik aheny. 25?Ŋai obo alatai ol oremik’to itabobolororo ahwan honyi te ehawwa honyi? 26Kuyya ibyaŋata tai iremehina ihanio erre hun omutari’to, ?nyo ilafuhoti tai te erre omuk? 27Ikemijyete ayaburita aŋai isuri isi. Obeŋi isi igyamai, obeŋi bwo fe ikaice, ati ajo ni jihatai jo obeŋi nya aboŋojin Solomone ilamani bebe ihwa ayaburita huna. 28Kuyya ibuya Hollum ayaburita hun isuruni’to ahana ifau bwo motye oswahini, ?obeŋ adi Hollum itiyyafak itai on oyyu agalik? Aii itai laati hul omuta neruk. 29Tania helafuhoti te erre hun iŋiyete adi itai kuyya hun imatati adi itai. 30Nyo ottifyai aati hutta fau erre huna daŋ, ati omijak Monyatai jo iwahata tai erre huna. 31Ati ottifyati ahosyere ekoi ono Hollum attati Hollum fonihina erre huna daŋ jihatai.

Ebariti Hutte Dou

Mt 6:19-21

32Akyoro hoŋ, hebaŋata, nyo awak Monyatai isyarana jihatai olobye. 33Itinyyaŋana erre hun owoni’to jihatai bwo isyatta agurusi hwa jyo alocaŋak. Ihuhumana akisi hun obeŋi adi imarwahi. Ottunana ebariti hatai idou jyo amaji on obeŋ’to opwak, nyo obeŋ olohoho teyya kuyya bu neyyu. 34Nyo igigiloi atajya hatai jyo amaji on ottunarik ebariti hatai.

Apiti Hul Irrirryai

35Iyyafana aboŋojin hatai bwo ijara allomohyen hatai owulori. 36Bwo fe irata ihwa aati hobu hul omijye ta acohuno honyi to olohomo. Al ottu inyi ette inninnaŋ ekat oŋida isi aŋahi jihonyi kwak. 37Hotomunohi legyamak hul onyurak hobu isi arrai ta attuna honyi. Ahode ajo ni jihatai iyyafak adi inyi aboŋojin honyi ette iloŋuna isi iŋiyo ette ’tuna isyarana isi aŋiyo. 38Hotomunohi legyamak hya hul onyurak hobu isi omijye ta acohuno honyi dwadi ara ta arwe. 39Ati omijana jo hara dwo omijak monye haji jo ottu adi olohoho lihaji honyi baya, omijo dwo inyi bwo fe obeŋ inyi obusak aji honyi owur olohoho ta arwe. 40Ihumata ’ra nyo ta asaa an ibyaŋata tai igigiloti, ottu adi Lonyi tulo.

Apit Oloyijo Kuyya bu Olorroho

Mt 24:45-51

41Attati Petro jaran jihonyi ojo, Hobu, ?ikyana iye arryamara ana jihohoi kuyya jyo hul omuk daŋ? 42Attati Yesu jaran ojo, ?Ŋai ati lapit ol oyyu’to bwo fe ilofyoro? Ihanak hobu inyi ihaji honyi isyoryere aŋiyo jyo laati ta asaa ono aŋiyo. 43Hotomunoi apit alya al ottu hobu honyi nyurana inyi ihanio egyama ana. 44Ahode ajo ni jihatai jo ihanak adi hobu apit alya eleittok hirre honyi daŋ. 45Ati kuyya orroho apit alya ette igigilo ta ataji honyi jo, illiŋya hobu hoŋ, ette itteryo bahyo legyamak lyawa iko negyamak ŋorwo bwo ette ŋiyo ette mata many orumari inyi, 46ilunyu adi hobu olo apit lya lunyuna ta asaa on obeŋ inyi omijak. Ette hobu bak inyi bebe ette ŋot jihonyi abahyo ono aati hul orrohoji’to. 47Bwo apit lya ol omijak’to awahan hobu honyi ette byaŋan ihanio obeŋ bwo fe inyi ihum imijo, abahi adi inyi ta allyoto edasita arryai. 48Ati lya ol otimo’to awahan hobu honyi, bwo ette iyyauna erre hun osiruni ta allyoto, abahye adi inyi kai. Al isyo Hollum jyo obo atulo erre arryai awak inyi ifwotuna jyo atulo alya arryai. Al isyo Hollum egyama on obolo jyo obo atulo awak inyi ifwotuna ayiji an agalik jihonyi.

Eyaŋuno Yesu Abwanya Ifau

Mt 10:34-36

49Attu ni inohyere eema ifau. Ati oyyu kuyya anyurak ni inyi awulo. 50Awon ni iko obo batisimo#12:50 batisimoIkyana Yesu ta adyaha iko naye honyi. an efwotu adi ni bwo fe odyaha ataji hoŋ many atuhoniere ni egyama ana. 51?Igigiloti tai jo attu ni ifau isyoryere nelik tajya? Eramak ni itai, obeŋ. Ati eyaŋuno ni abwanya. 52Kuyya owoni miet lihaji abotye obwanyai adi isi. Oliwarik adi hulo hunihoi hulo arrihai bwo fe arrihai oliwarik hulo hunihoi. 53Oliwari adi monye lonyi honyi bwo lonyi oliwari monye. Oliwari adi honye ŋarri bwo fe ŋarri honyonyi, bwo hamoni oliwari hamoni honyi bwo fe hamoni honyi jyo hamoni.

Amijana Oŋitek Huna

Mt 16:1-4; Mk 8:11-13

54Attati inyi jaran jyo eluluŋ wati ojo, Al igonyuna tai nedis ottu t’eddorro holoŋ ijatta tai jo ottu adi ahide, attati inyi ’tuna. 55Bwo fe al igonyuna tai jo ohut oyyami otto hani iŋet, ijatta tai jo onok adi oloŋ, ette nahan ahode. 56Itai enyabak, imijana tai erre hutte dou iko hutta fau, ?aŋai itimoti tai oŋitek huna?

Etabisana Eram iko Arrosoni

Mt 5:25-26

57?Bwo fe nyo ibyaŋata tai iŋocete on obis ta ahwattek hatai? 58Kuyya iyaro arrosoni obo alatai ihosyere lokiko oŋida lya opulok eram honyi kwak hebeŋ inyi afany ilokiko ŋadi iyaro inyi ihosyere aŋotoni hirre bwo isyo adi aŋotoni hirre inyi jyo oseŋer ifitaniere ibabus. 59Eramak ni itai jo obeŋ adi lya ohouno many odumari inyi daŋ.

Currently Selected:

Luka 12: LOT1969

Highlight

Copy