Luka 11

Ettiyenio Yesu Eram ono Amojo

Mt 6:9-15; 7:7-11

1Ati to obo oloŋ omojo Yesu jyo obo amaji. Latohu inyi amojo, ojori leyiyanak honyi jihonyi jo, Hobu ittiyenie hohoi amojo ihwa ninya ittiyeniere Yoane leyiyanak honyi. 2Attati inyi jaran jihosi ojo, Al imojoti tai ijatta, Monye hohoi ol owon lidou, hotokwata afure hoi, hetettu olobye hoi, hetehaniehe awahan hoi lifau ihwa ihanie lidou. 3Isyara hohoi ahana aŋiyo hohoi ottoloŋi. 4Ohohi eyyata hohoi ihwa an ehohiniere hohoi aati horosi hohoi. Heyaro hohoi jyo nesusuta ati itahoru hohoi jyo arrohojita.

5Attati inyi jaran jihosi, Kuyya olo obo alatai ihaji motte honyi ta arwe ette jaran, Illa, isyara jihoŋ emunio hunihoi, 6nyo hetek motte hoŋ ’tuna te ewatari honyi bwo obeŋ obo aŋiyo an esyo ni jihonyi. 7Bwo inyi ette itarraŋ ’totwa haji ojo, Hettigemyo ani, nyo awon ni iko aduri hoŋ ihwania lijotiti hohoi bwo fe ihyana ekat haji hoŋ. Abeŋ ni aremik dyoto isyoryere emunio jihoi. 8Eramak ni jihatai ara dwadi bu obeŋ inyi awak dyoto isyoryere motte honyi emunio, al odulo inyi amojo odyoto adi inyi ette isyo inyi erre daŋ hun awak inyi. 9Bwo fe ajo ni jihatai, ifiyete bwo isyo adi Hollum jihatai. Ottifyati, bwo inyurana adi itai. Inninnaŋata ekat bwo aŋahi adi inyi jihatai. 10Nyo lya al ifiyo’to jyo Hollum ifwotu adi, lya ol ottifya’to onyurak adi, bwo lya al inninnaŋyo’to ekat aŋai adi jihonyi. 11?Isyo adi obo monye lonyi amunu al omojo inyi ahami? Obeŋ. ?Kuyya omojo inyi emune isyo adi monyonyi amorwo? Obeŋ. 12?Bwo fe kuyya omojo inyi atelyo, isyo adi inyi eitoni? Obeŋ. 13Kuyya itai hul irrohojata’to omijana isyoryere erre hun oyiji jyo lonyirok hatai, ?obeŋ adi Monyatai ette dou isyo Oloyiri ol Olibo jyo hul ifiye’to inyi?

Yesu iko Belsebuli

Mt 12:22-30; Mk 3:19-27

14Ifuhak Yesu ajok jyo atulo ol obeŋ’to oremik ikyana ati al obusak ajok inyi ette inyi ikyana bwo illillihai laati bebe. 15Ati ojori omuk hulosi ojo, Ifuha inyi ajohin addi ta afure Belsebuli#11:15 BelsebuliAfure obo ono Sitan. hobu olo ajohin. 16Bwo omuk awahi kemyo inyi ette ifiyo inyi te etamijani on ottu’to t’edou. 17Ati omijak inyi egigilita hosi, ette jaran jihosi ojo, Al orryomonie laati hutto lobye ta ahwattek hosi itatturi adi olobye ania. Bwo al aŋalafai laati hutta haŋ ta ahwattek hosi itatturi adi awoyo hosi. 18Al ihiharak Sitan adwaran honyi, ?aŋai adi oremik olobye honyi itoŋo? Ijatta tai jo efuhak ni ajohin ta afure Belsebuli. 19Kuyya efuha ni ajohin addi ta afure Belsebuli, ?ta anani fure ifuhatai lejifak hatai isi? 20Ati kuyya efuha ni isi ta adwaran Hollum, oŋida imijana tai jo ottu olobye Hollum jihatai ahode. 21Al irrirrya olotir ahaŋ honyi ta afyara honyi itoŋoi erre honyi dee. 22Ati al ottu obo al agalik’to inyi ette bwarana inyi, ohoru adi jihonyi afyara hodwo iyihi inyi jo olwahye adi inyi ette hororo erre honyi daŋ. 23Lya el ebeŋ’to egyama ikoŋ inyi amyotoni hoŋ, bwo itisarrayo lya el ebeŋ’to eddudduha ikoŋ.

Acohuno ono Ajok on Orroho’to

Mt 12:43-45

24Al obusak ajok on orroho’to atulo adaha inyi ihotohoto ittifyari amaji yiri ati obeŋ inyi onyurak. Tania ojo inyi jo, Acaharo ni jyo atulo odwo edyehuno ni. 25Al afany inyi onyurak inyi ataji tulo alibo bebe bwo ilaman. 26Tania alo inyi rumana omuk ajohin hattarik hun orrohoji’to agalihini inyi ette isi jiŋana itwa tulo lya ette manya dia. Tania orroho ihwania jyo atulo alya agalik ninya hosyere.

Amuno an ara’to Ahode

27Ati hekyana inyi ekyana ana iloŋo obo aŋotte teluluŋ ette jaran jihonyi, Hotomunoi aŋotte an isiu iye bwo itadasyo. 28Attati Yesu jaran jihonyi, Hotomunohi hya hul itaniŋuni’to ekyanita huno Hollum ette niŋyo isi.

Attifya Nelahaji on Orroho’to Etamijani

Mt 12:38-42; Mk 8:12

29Ottubanie aati imaji abotye ette Yesu itteryo ikyana jihosi ojo, Orroho nelahaji ana. Ottifyai isi etamijani ati obeŋi adi itahutani jihosi obo etamijani arari etamijani ono Yona. 30Nyo ihwa ninya arari Yona ahetamijani jyo aati hutto miji Ninifa, ara adi bwo fe Lonyi tulo etamijani jyo nelahaji ana. 31Odyoto adi nobu otto ŋati ihorroŋ iŋocere nelahaji ana. Nyo ottu nya inyi to fau an alama’to itayiruniere olofyoro huno Solomone. Ati imijyete, owon dini obo al agalik’to Solomone. 32Odyotoi adi aati Ninifa iŋocere nelahaji ana nyo iloiti nya aati Ninifa atajya hosi ninya ittittoyere Yona jihosi. Ati imijyete, owon dini obo al agalik’to Yona.

Afaŋan ono Ahwan

Mt 5:15; 6:22-23

33Obeŋ obo atulo oswak allomo honyi ette dimana inyi kuyya imuhok ta agufa. Ati oyihak inyi allomo ihide jo oŋida afaŋan afaŋ jyo hul ojiŋuni’to itwa haji. 34Ara nonyek ihwa afaŋan ono nahwan tania al afaŋ inyi on oyyu ifut afaŋan daŋ ihwan tulo. Ati al orroho onyek iryok adi ahwan daŋ. 35Ihwania ihumata jo helaha afaŋan hatai ara edumele. 36Tania kuyya ifut ahwan daŋ iko afaŋan, obeŋ adi obo eryohi. Afaŋ adi inyi bebe ihwa afaŋan ’lomo on olibo’to bebe.

Esiŋyo Yesu Aŋotok Hirre iko Farisei

Mt 23:1-36; Mk 12:38-40; Lk 20:45-47

37Hekyana inyi iloŋo obo olo Farisei inyi iŋiyere ikonyi ette inyi leten ette itoŋo iger teremeja iŋiyere. 38Ati al igonyu olo Farisei ana illilliha inyi nyo hobeŋ Yesu ofinia ihosyere ŋiyo. 39Attati Hobu jaran jihonyi, Itai Farisei, italiboryete tai orwoŋ kos iko asahan bwo idehina atwa an ifut iko enyobita bwo fe arrohojita. 40Itai hul isitajata’to, ?obeŋ nya lya ol oyyeu’to orwoŋ oyyeu bwo fe atwa? 41Tania italiboroto atwa bwo olibori adi daŋ.

42Ati orroho bebe jihatai Farisei nyo isyatta tai aŋati etattomoni ono ema hatai iko aful, bwo erre ihwa huna jyo Hollum, ati ipwahata tai aŋoco on obis iko amuno jyo Hollum. Oŋida imunoti Hollum bwo fe isyatta esyorita jihonyi. 43Orroho bebe jihatai Farisei nyo imunoti tai itoŋori imasik huno etahabuyo itwa haji imojit bwo fe imunoti tai efonya wati hutto suk. 44Orroho bebe jihatai nyo irata tai ihwa elumyo hun obeŋi’to oleye bwo aati ette daha ihide hosi nyo obeŋi isi omijani.

45Attati lobo olo aŋotok hirre itarraŋ jihonyi ojo, Hettiyanani, ?isiŋyo iye hohoi bwo fe? 46Bwo fe Yesu ette jaran jihonyi ojo, Orroho bebe jihatai bwo fe aŋotok hirre nyo isyatta tai erre hun odiŋi’to jyo aati iwwahari, ati ibyaŋata tai ilwahata isi dwadi ta aani abotye. 47Orroho bebe jihatai nyo ibwahati nya itai elumyo huno eyak sayyo hinya ottohori hohonyok hatai. 48Iruhoto tai ehanita huno hohonyok hatai nyo ottohori isi eyak sayyo bwo itai iduhoti elumyo hosi. 49Tania ojo nya Hollum jo, Efak adi ni eyak sayyo iko lefahat bwo ottohori adi isi omuk hulosi bwo lomuk ittigemye. 50Tania oŋoti adi jyo nelahaji ana naye ono leyak sayyo hinya oyei’to many t’etteri fau. 51Isi laati many to ye Abele many jyo naye ono Sakaria linya ottohori tehiji etityek iko aji imojit eneittok. Eramak ni itai ahode ahode jo oŋoti adi nelahaji ana. 52Orroho bebe jihatai aŋotok hirre nyo ibyaŋata tai ittiyeniete aati ekoi ono olofyoro. Ibyaŋata tai ijiŋana ikoi Hollum ta ahwattek hatai bwo fe itihoto tai hya hul awahi’to jiŋana dia.

53Hojiŋu Yesu teyya ette aŋotok hirre iko Farisei wahan aŋalafa jihonyi bebe ette ikyana jihonyi on orroho te erre arryai. 54Nyo ottifyai isi omuk erre to hutuk honyi itisyahiniere inyi.

Currently Selected:

Luka 11: LOT1969

Highlight

Copy