Yoane 13

Ellillayo Yesu Ejek Heyiyanak

1Ihwania hobeŋi itterye eyom ono Allaŋan Anjelo, omijak Yesu jo ilyaha noloŋ an adahari inyi jyo Monye. Omuno bwo fe inyi laati honyi hul owoni lifau bwo omuno adi inyi isi many lisidi fau. 2Ihwania, omijak Yesu jo ihanak Sitan itaji Yuda Iskariote lonyi Simone, awahan itinyyaŋaniere inyi jyo lamyorok. 3Bwo fe omijak Yesu jo isyo nya Monye nerre daŋ lihas honyi, omijak inyi bwo fe jo ottu inyi jyo Hollum bwo fe acaharu adi inyi jyo Hollum. 4Ninya atuhuno aŋiyo odyoto Yesu to loŋiyere, ifihak aboŋojin honyi, ette iduhuna obo aboŋo efufusi, ette tarana lihuluk. 5Attati inyi ijuhonia aari isyak ette itteryo illillayo nejek huno leyiyanak ette bwo fe ifufus ejek hosi to nodwo boŋo atarak inyi lihuluk. 6Afany inyi jyo Simone Petro. Ojo Petro jihonyi ojo, ?Hobu, iye illilla nejek hoŋ? 7Itarraŋ Yesu ojo, Hebeŋ iye itaniŋu ariŋ en ehanio ni ati ittu adi iye mijana lihalu. 8Ojo Petro jihonyi, Ibeŋ adi iye illilla nejek hoŋ mak. Itarraŋ Yesu ojo, Al abeŋ ni ellilla nejek hoi, ebeŋ iye ikoŋ etoŋo. 9Ojo Simone Petro jihonyi ojo, Hobu, hellilla nejek hoŋ hama, illilla bwo fe ahas iko nahou hoŋ. 10Ojo Yesu jihonyi, Lya al hetek’to huyoro oremik jihonyi ellillayo hejek honyi hama bwo olibo inyi daŋ. Iliboroto tai, ati ibyaŋata tai iliboroto daŋ. 11Omijak fe Yesu ŋai alya etinyyaŋani honyi. Ta neram ana ojo inyi, Ibyaŋata tai iliboroto daŋ.

12Al atuhuno ellillayo hejek hosi ette inyi iyyafana aboŋojin honyi ette caharu limaji loŋiyere attati jaran jihosi, ojo, ?Imijana tai nodwo riŋ ehanio ni jihatai? 13Iloŋoti tai nani Ettiyanani bwo fe Hobu. Ittenuna tai nyo ani fe alya. 14Nani Ettiyanani bwo fe Hobu, ellillayo ni nejek hatai jo oŋida itai bwo fe ifwatta illillayo nejek mottyarak hatai. 15Esyo ni netamijani, oŋida itai ihaniete ihwa nodwo ehaniere ni. 16Ahode ahode eramak ni itai obeŋ apit agalik eleittok honyi bwo fe al ifahuni obeŋ agalik al ifahu’to inyi. 17Al imijana tai erre huna bwo ihaniete isi imunoti adi itai. 18Abeŋ ni ekyana tetai daŋ. Amijak ni haŋai hul anyimu ni. Ati oŋida itasiruni egyeri on ojo, “Lya ol oŋiyo’to emune hoŋ oryehi ejek honyi ihwan hoŋ.” 19Ihwania eramak ni itai erre hobeŋi isi ofwonni, jo al idwoŋi isi oŋida itai iruhoto jo ani alya. 20Ahode ahode eramak ni itai, al ifwotu’to atulo el efak ni ifwotu inyi ani. Bwo fe alya al ifwotu’to ani ifwotu inyi lya al ifahu’to ani.

Ekiluna Yesu Etinyyaŋani Honyi

Mt 26:20-25; Mk 14:17-21; Lk 22:21-23

21Al ikyana Yesu ihwania ette ataji honyi dyaha bebe. Ojo inyi, Ahode ahode eramak ni itai ojo, obo alatai itinyyaŋak ani. 22Teyya ilafuhoi leyiyanak ette imimijyo ahwattek hosi ojori, ŋai ’tadi ojo inyi. 23Oco obo olo leyiyanak jihonyi ol omuno Yesu. 24Teyya ahahaya Petro jyo lya ojo, Ifya, ikyana inyi to ŋai. 25Tania oco lya ihwan Yesu bwo ojo jihonyi, ?Hobu ŋai attadi inyi? 26Itarraŋ Yesu, Inyi lya al esyo adi ni emune en edutu ni. Tania al idutu inyi emune ette inyi isyo jyo Yuda lonyi Simone Iskariote. 27Ihalu honyi ifwotuna emune ette Sitan jiŋana jihonyi. Ojo Yesu jihonyi, Ihanie kokwak ariŋ an ijo iye ihanio. 28Ihwania obeŋ obo itaniŋu anyo ikyana inyi jyo Yuda. 29Nyo omijani isi attunio Yuda agurusi, tania ojori omuk kuyya iramak Yesu inyi oŋida inyyaŋuno erre ta neyom kuyya bu isyarak jyo alocaŋak. 30Hefwotu Yuda emune ojiŋu inyi addi. Ara nya attari.

Efahi Aŋejuk

31Ihalu aleten Yuda, ojo Yesu jo, Itahabuye Lonyi tulo ihwania, bwo itahabuye Hollum tenyi. 32Itahabuhi adi Hollum inyi ihwan honyi. Itahabu adi inyi ihwania ihwania. 33Lonyirok hoŋ, ewon adi ni ikatai to omuk oŋitek kai. Ittifyati adi itai ani. Ihwa ajo nya ni jyo Yudea, jo amaji an alari ni ibyaŋata adi itai ifwanna, ajo ni jihatai ihwania bwo fe. 34Esyo ni jihatai efahi aŋejuk on ojo, Omunoti illarak hatai. Ihwa an amunori ni itai, omunoti bwo fe illarak hatai. 35Tania omijani adi laati daŋ jo itai leyiyanak hoŋ al imunoti tai illarak hatai.

Ekiluna Yesu Ehara Petro Inyi

Mt 26:31-35; Mk 14:27-31; Lk 22:31-34

36Ifiyo Simone Petro ojo, ?Aja ilo iye Hobu? Itarraŋ Yesu ojo, Jyo amaji an alari ni ibyaŋata tai iremehina ijifuno ani, ati ijifuniete adi itai ani ihalu. 37Ojo Petro jihonyi, ?Aŋai abeŋ ni aremik jifaru iye ihwania Hobu? Ajo ni esyarak adi ni nesu hoŋ teye. 38Itarraŋ Yesu ojo, ?Ijo iye iwak iye isyarana nesu hoi toni? Ahode ahode eramak ni iye, hobeŋ ahohoro ilok, iha adi iye ani eharita hunihoi.

Currently Selected:

Yoane 13: LOT1969

Highlight

Copy