Yoane 14

Yesu Inyi Ekoi Ette Dou

1Hetebyaŋahi atajya hatai odyahai. Iruhoto tai jyo Hollum, iruhoto bwo fe jihoŋ. 2Ihaji Monyoŋ owoni amasik arryai. Obeŋ dwo ara ihwania eramak ni itai. Halo ni ihuhumyo amasik tetai. 3Al alo ni ihuhumyo amasik tetai, acohuno adi ni ifwotuniere itai ta ahwan hoŋ oŋida itoŋoti jyo amaji en etoŋori ni. 4Bwo fe imijana tai ekoi an alari ni. 5Ojo Tomaso jihonyi, Ebeŋ hohoi emijak aja ilo iye Hobu. ?Tania aŋai eremik hohoi rumana ekoi? 6Itarraŋ Yesu jihonyi ojo, Ani nekoi, bwo nelahode bwo nesu. Obeŋ obo ottu jyo Monyoŋ arari jihoŋ do. 7Kuyya dwo imijana tai ani, imijana dwo itai Monyoŋ bwo fe. Ati igonyuna tai ahana inyi bwo fe imijana tai inyi tulaŋ.

8Ojo Filipo, Hobu itahutak hohoi Monye bwo ette adi iremehina to hohoi. 9Ojo Yesu, Awon ni ikatai oŋitek arryai bwo iye Filipo, ?ibeŋ iye imijak ani? Alya al igonyu’to ani igonyu Monyoŋ. ?Aŋai ijo iye, itahutak hohoi Monye? 10?Ibyaŋata tai iruhoto jo awon ni itwa Monyoŋ bwo fe Monyoŋ itwa hoŋ? Nekyanitah un ekyana ni obyaŋara ani ta ahwan hoŋ ekyana ati ara Monyoŋ al itoŋo’to itwa hoŋ ikyana. Inyi igyama egyama honyi. 11Iruhoto ani jo awon ni itwa Monyoŋ bwo fe Monyoŋ itwa hoŋ. Kuyya iruhoto ani te egyamita hun ehanio ni.

12Eramak ni itai ahode ahode, jo alya al iyihi’to jihoŋ, ihanio adi inyi egyamita hun egyama ni bwo fe egyamita hun obolori’to agalihini huna igyama adi inyi, nyo alo adi ni jyo Monyoŋ. 13Erre daŋ hun ifiyete tai ta afure hoŋ ehanio adi ni jo oŋida Monye itahu to Lonyi. 14Erre daŋ hun ifiyete tai ta afure hoŋ ehanio adi ni.

Acoronia Honyi Oloyiri ol Olibo

15Al imunoti tai ani, igotyete adi itai efahita hoŋ. 16Bwo amojo adi ni jyo Monyoŋ ette adi inyi isyo jihatai obo alwahani al itoŋo adi ikatai tulaŋ. 17Inyi Oloyiri olo nelahode. Obeŋ afau oremik mojuna inyi nyo obeŋ afau inyi igonyu bwo obeŋ omijak. Ati imijana tai inyi nyo owon adi inyi ikatai bwo fe itwajin hatai.

18Abeŋ adi ni itai edehi ihwa ahohyo ati acohuno adi ni jihatai. 19Harasa kai bwo obeŋ adi afau inyyak igonyuna ani ati igonyuna adi itai ani. Nyo amanya adi ni fur bwo fe itai imanyati. 20To oloŋ tania imijana adi itai jo awon ni itwa Monyoŋ bwo itai itwa hoŋ bwo ni itwajin hatai. 21Lya al ifwotu’to efahita hoŋ bwo fe ogotyere isi omuno inyi ani. Bwo ol omuno’to ani, omuno adi inyi Monyoŋ bwo fe amuno adi ni inyi ette ni italeyehina ahwan hoŋ jihonyi. 22Ojo Yuda (obyaŋara Iskariote), Hobu, ?aŋai adi italeyehi iye ahwan hoi jihohoi bwo obeŋ jyo aati omuk? 23Itarraŋ Yesu ojo, Al omuno obo ani ogotyere inyi nekyanita hoŋ, ette Monyoŋ muno inyi ette hohoi fwan manya jihonyi. 24Ol obeŋ’to omuno ani obeŋ bu inyi ogotyere nekyanita hoŋ, ati nekyanita hun itaniŋuna tai obeŋi bu isi arai ahunoŋ ati arai ahuno Monyoŋ linya ifahu’to ani.

25Hodwo hirre ekyana ni jihatai hamanya ni ikatai. 26Ati Etalwahani, inyi Oloyiri ol Olibo al ifahu adi Monyoŋ ta afure hoŋ, inyi adi fe ottu ittiyenio itai nerre daŋ bwo itagiluta adi itai erre daŋ hunya ekyana ni jihatai. 27Abusak ni jihatai nelik tajya. Esyo ni jihatai nelik hoŋ. Abeŋ bu ni esyo nelik tajya jihatai ihwa an isyoryerek aati. Hetebyaŋahi atajya hatai odyahai bwo fe helahahi apapaŋi.

28Itayiruna tai nodwo hiram ekyana ni jihatai jojo, Alo ni bwo fe acohuno adi ni jihatai. Al imunoti tai ani imunoti adi itai nyo alo ni jyo Monyoŋ, bwo agalik Monyoŋ ani. 29Eramak ni itai eram ana hobeŋ ottu jo oŋida iruhoto tai lattu idwoŋ. 30Abeŋ adi ni ekyana omuk erre jihatai arryai, nyo lobu olo afau ana lyo hottu ati obeŋ adwaran honyi agalik ani. 31Oŋida ati aati omijani jo, amuno ni Monyoŋ bwo fe ehanio ni ihwa ninya ifahuniere Monyoŋ ani. Ottena, hafatta.

Currently Selected:

Yoane 14: LOT1969

Highlight

Copy