Yoane 12

Ejuhonia Maria Eyali on Oŋwo’to Gir Gir jyo Yesu

Mt 26:6-13; Mk 14:3-9

1Ihwania ottu Yesu Betania, imiji ba Lasaro linya itubuhu Yesu to ye. Arasai nya oŋitek ille ihosyere iyom ono Allaŋan Anjelo. 2Tania isyori aŋiyo jihosi bwo igyama Marta aŋiyo ania. Oŋiyo bwo fe Lasaro ikosi iteremeja. 3Tania iduhu Maria eyali on ogol enyyaŋa honyi bebe on okemye ta arotol abotye. Ijuhok inyi ihejek Yesu bwo ifufus to ofir honyi. Teyya oŋwo aji bebe arya. 4Ati ojo Yuda Iskariote, leyiyanani ol ottu adi itinyyaŋana Yesu, 5ojo, ?Nyo obeŋi itinyyaŋani arya ana ta arobia esiha arrihai bwo olwahyerek alocaŋak? 6Obeŋ bu inyi igigilo ta alocaŋak te ekyana honyi ania ati ara inyi olohoho bwo ara inyi ahattunani gurusi. Bwo fe al isyori jihonyi agurusi iyatta inyi omuk. 7Tania ojo Yesu jihonyi, Obusana inyi. Ijuhok inyi ana ihuhumaniere ani ta anuhana. 8Iwatta tai iko alocaŋak oŋitek daŋ ati abeŋ adi ni etoŋo ikatai fur.

Awahan Hosi ’Tohoro Lasaro

9Al omijani aati Yudea jo Yesu adia ette isi fwanna. Ati obyaŋara ta Yesu hama ati ofwonni isi imijyere Lasaro linya itubuhu inyi to ye. 10Bwo iwwahai eleittaha ojori, Ottohoro bwo fe Lasaro. 11Nyo ara te eram honyi an iharik aati hohoi bwo itterye iruk jyo Yesu.

Ajiŋana Yesu Yerusalem

Mt 21:1-11; Mk 11:1-11; Lk 19:28-40

12Nya motye itaniŋuni eluluŋ wati arryai hun ofwonni’to iyom ono Allaŋan Anjelo, jo ottu Yesu Yerusalem. 13Ette isi yafa atanata ’yanio bwo ofwoi irraŋyere inyi, iwuwoŋitai ojori, Itahabuyete Hollum. Hotomunoi lya ol ottu’to ta afure ono Hobu ara dwo bu Hobu olo Israele. 14Teyya orumak Yesu asigirya ette itoŋo ihide honyi ihwa igyoroni nya;

15“Hebaŋ ŋarri Sion.

Imijye Hobu hoi al attu

Itoŋo ihorwoŋ ŋarri sigirya.”

16Ihwania obeŋi leyiyanak honyi itaniŋuni erre hunia ati al itubuhuni Yesu ogiluni isi jo igyoroni nyadi erre huna tenyi, bwo fe ihanie isi ihwa igyoroni nya tenyi. 17Bwo fe eluluŋ wati hunya owoni’to ikonyi iholoŋ ninya iloŋori inyi Lasaro t’elume, bwo fe itubuhu inyi to ye, iramye isi etamijanita. 18Te eram tana ofwonni laati ’raŋuno inyi nyo itaniŋuni isi etamijani an ihanio inyi. 19Tania ojori Farisei ta ahwattek hosi, Imijyete, ebeŋ hohoi eremik ihanio obo ariŋ. Ijifatye laati daŋ inyi.

Attifya Omuk Hulo Grik Yesu

20Ihwania owoni dia omuk hulo Grik hul ofwonni imojo neyom ono Allaŋan Anjelo. 21Ofwonni hya jyo Filipo olo Beteseda amiji Galilea, ifiyere inyi ojori, Leittok, ewak hohoi mijo Yesu. 22Olo Filipo ette iramana Andrea ette isi fwatan iramaniere Yesu. 23Itarraŋ Yesu ojo, Attu oloŋ an itahuyerek Lonyi tulo. 24Ahode eramak ni itai ojo, Al obeŋ emai odohi ifau bwo fe obeŋ ifodura arasa inyi ta ahwan honyi hama ati al ifodura inyi oŋerik adi aŋer arryai. 25Ol omuno’to nesu honyi italitohi adi inyi. Bwo alya ol obeŋ’to igigilo ta nesu ono afau ana ottunak adi ononyi ta nesu on osyo’to fur. 26Al awak obo atulo igyama toni oŋida odulo ijifatyo ani bwo fe jyo amaji an awanari ni oŋida egyamani hoŋ owon dia bwo fe. Al igyama obo atulo toni itahabuyo adi Monye inyi.

Akafani Adi Lonyi Tulo Ahide

27Ihwania odyaha ataji hoŋ. ?Anyo adi ajo ni? Monyoŋ itahoru ani ta asaa ana. Ati te eram ana attu ni jyo asaa ana. 28Monyoŋ, ijara afure hoi itakwace. Teyya ottu nekyana t’edou on ojo, Etahwo nya ni afure hoŋ bwo ihalu enyyak adi ni itahwo inyi. 29Tania eluluŋ wati hul owoni’to dia itaniŋuni bwo ojori, Etitta hide ania. Ati ojori omuk, Ikyana anjelo jihonyi. 30Itarraŋ Yesu ojo, Obyaŋara ekyana ania te eram hoŋ ati ara ta arami hatai. 31Ihwania ara aŋoco ono afau ana bwo ifuhari adi hobu olo afau ana.#12:31 hobu olo afau anaAra Sitan lya. 32Bwo al akafani ani to fau, arihu adi ni aati daŋ jihoŋ. 33Ojo inyi ana itahutaniere jo aŋai oye adi inyi. 34Tania itarraŋi aati ojori, Etaniŋu hohoi te efahita jo amanya adi Kristo tulaŋ, ?anyo an ijo iye jo akafarai adi Lonyi tulo? ?Ŋai Lonyi tulo alya? 35Ojo Yesu jihosi, Harasa afaŋan ihiji hatai. Adahati hewatta tai ifaŋan ŋadi edumele itai etihok. Alya al adaha’to idumele obeŋ omijak aja olo inyi. 36Hewatta tai iko afaŋan iruhoto afaŋan jo oŋida irata tai lonyirok faŋan.

Abyaŋan Wati Yudea Iruhi

Ihalu ekyanita huna olo Yesu addi jihosi idimari. 37Ati ara dwo bu ihanio inyi etamijanita arryai lihomomite hosi arasai isi byaŋan iruk jihonyi. 38Oŋida itasiruni ekyana ono eyani sayyo Isaya on ojo,

“?Hobu, haŋai iruhi ekyanita hohoi?

?Bwo fe jyo ŋai itahutani adwaran ono Hobu?”

39Tania obeŋi isi iruhi nyo ojo Isaya bwo fe ojo,

40“Itaŋodo Hollum oŋite hosi

Bwo itagol atajya hosi,

Oŋida obeŋi igonyuni to oŋite hosi

Bwo fe obeŋi itaniŋuni ta ayyaha hosi,

Ette caha jihoŋ itaŋidaryere isi.”

41Ikyana Isaya ekyanita huna nyo igonyu inyi etahwo Yesu ette ikyana tenyi. 42Ara dwo bu te erre hunia iruhi eleittaha arryai jihonyi, ati obeŋi isi iramani obo atulo nyo abaŋi isi Farisei nyo ŋadi isi ifuhari to haji imojit addi. 43Nyo omunoi isi etahabuyo wati isi agalik etahabuyo ono Hollum.

Oŋot Ekyana Yesu Aati

44Ihwania ikyana Yesu on okwat ojo, Alya al iruk’to jihoŋ obeŋ iruk jihoŋ hama, ati iruk jyo lya al ifahu’to ani. 45Bwo fe al igonyu’to ani igonyu inyi bwo fe lya al ifahu’to ani. 46Attu ni ifau ihwa afaŋan jo oŋida obo al iruk’to jihoŋ obeŋ arasa idumele. 47Ati al itaniŋyo’to ekyanita hoŋ bwo fe obeŋ ifaha isi abeŋ ni aŋot inyi. Nyo abeŋ ni attu iŋocere aati ati italahuniere isi. 48Alya al iha’to ani bwo fe obeŋ ifwotu ekyanita hoŋ owon inyi iko aŋotoni, inyi nekyana en ekyana ni on oŋot adi inyi iholoŋ isidi fau. 49Nyo abeŋ ni ekyana ta awahan hoŋ ati Monyoŋ ta ahwan honyi al ifahu’to ani isyarak ani efahi iko ekyanita ikyanari. 50Bwo fe amijak ni jo ekyanita honyi isi nesu on osyo fur. Tania al ekyana ni, ekyana ni ihwa iramak Monyoŋ ani.

Currently Selected:

Yoane 12: LOT1969

Highlight

Copy