1 Samoela 9
9
I Saoly sy ny borikivavy very
1Tamin’izany fotoana izany, dia nisy lehilahy tsongoin’olom-bolo avy amin’ny fokon’i Benjamîna natao hoe Kisy. Izy dia zanakalahin’i Abièla sy zafikelin’i Tserôra ary zafiafin’i Bekôrata sy zafindohalik’i Afia. 2Ary i Kisy nanan-janakalahy atao hoe Saoly izay tovolahy sady taviny no volony; tsy nisy teo amin’i Israely nihoatra azy tamin’ny hatsaran-tarehy, ary nanatombo halavana amin’ny olon-drehetra koa izy.
3Indray andro dia very ireo borikivavin’i Kisy rain’i Saoly; dia hoy i Kisy tamin-janany: «Ento miaraka aminao ny mpanompo iray, ka mandehana ianareo mitady ireo borikivavy». 4Nitety ny faritra be tendrombohitra any Efraîma aloha i Saoly sy ilay namany, avy eo ny faritanin’i Salisà, nefa tsy nahita na inona na inona; dia namakivaky ny faritanin’i Salima#9.4 Salisà sy Salima: faritra tsy fantatra mazava ny misy azy; ampit 2 Mp 4.42. indray izy ireo, nefa tsy mbola nahita ihany. 5Nony tonga teo amin’ny faritanin’i Tsofo#9.5 Tsofo: anarana samirery manondro toerana sa manondro olona (jereo 1.1). izy ireo, dia hoy i Saoly tamin’ilay mpanompo nanaraka azy:
–Andeha hitodi-doha hiverina isika, sao isika indray no mampanahy an’i Dada fa tsy ny borikivavy intsony.
6Hoy kosa ilay mpanompo taminy:
–Andraso fa misy izay lehilahin’Andriamanitra izay amin’irỳ tanàna irỳ; ary malaza tokoa izy, satria tsy misy tsy tanteraka izay rehetra ambarany. Koa aoka halehantsika any aminy izy, sao mba ho afaka hanoro antsika izay lalana mety hahitana ny borikivavy izy.
7Dia hoy i Saoly tamin’ny mpanompony:
–Raha mankany àry isika, dia inona kosa no mba homentsika ilay mpaminany? Efa lany manko ny mofo nentintsika, ka tsy misy fanomezana azo atolotra azy; tsy manana na inona na inona intsony isika.
8Fa hoy ny navalin’ilay mpanompo an’i Saoly hoe:
–Mbola manana vola madinika kely izay aho atỳ amiko atỳ; homentsika azy izany, mba hanoroany antsika izay lalana tokony haleha.
9-11Dia hoy i Saoly hoe:
–Marina ny anao; andeha àry isika ho any.
Ary lasa izy ireo nankany an-tanànan’ilay lehilahin’Andriamanitra. Teny an-dalana izy ireo dia sendra tovovavy nandeha hantsaka izay nanontaniany hoe:
–Ao ihany ve ilay mpahita izay?
(Fahiny teo amin’ny Israely dia fanaon’ny olona izay te hanontany mivantana an’Andriamanitra ny manao hoe: «Andeha isika ho any amin’ny mpahita.» Fa izay antsoina ankehitriny hoe «mpaminany» manko no nantsoina taloha hoe «mpahita.»)
12Dia hoy no navalin’ireo tovovavy hoe:
–Eny, ao izy, vao tonga talohanareo teo izy; koa faingàna ianareo, fa efa ao an-tanàna izy izao satria anio no andro fanateran’ny vahoaka sorona eo amin’ny toeram-panasinana. 13Ho hitanareo izy raha vantany vao miditra ny tanàna ianareo, mialoha ny hiakarany hisakafo ao amin’ny toeram-panasinana. Tsy hisy olona hihinana alohan’ny ahatongavany, satria izy no tsy maintsy mitsodrano ny sorona; dia aorian’izay vao hihinana ireo olona nasaina. Koa miakara amin’izay ianareo, fa ho hitanareo anio izy.
I Saoly mihaona amin’i Samoela
14Dia niakatra ny tanàna i Saoly sy ilay mpanompony; ary raha vantany vao tafiditra tao izy roa lahy, dia indro tafahaona tamin’i Samoela izay nivoaka indrindra ny tanàna hankeny amin’ilay toeram-panasinana.
15Fa indray andro tsy hahatongavan-dry Saoly, dia efa nilaza tamin’i Samoela ny momba izao fihaonana izao ny Tompo hoe: 16«Rahampitso, amin’ny ora toy izao, dia halefako ho atỳ aminao lehilahy iray avy amin’ny fokon’i Benjamîna; hatokanao ho filohan’ilay Israely vahoakako izy mba hanafahany azy amin’ny fahefàn’ny Filistinina. Fa efa hitako ny fahorian’ny vahoakako ary efa reko ny antso vonjiny.» 17Koa raha vao nahatazana an’i Saoly i Samoela, dia hoy ny TOMPO tamin’i Samoela: «Io ilay lehilahy voalazako taminao, izy no hitondra ny vahoakako.»
18Dia nanatona an’i Samoela teny am-bavahadin’ny tanàna i Saoly ka nanontany azy hoe:
–Azafady, tompoko, mba atoroy ahy ny tranon’ilay mpahita.
19Ary hoy ny navalin’i Samoela:
–Izaho no izy. Koa dia mialohava ahy any amin’ny toeram-panasinana ianao, fa hiara-misakafo amiko ianareo anio; ary rahampitso maraina, rehefa voalazako avokoa izay tianao ho fantatra, dia halefako mody ianareo. 20Ny amin’ireo borikivavy very hateloana, dia aza manahy intsony ianao, satria efa hita izy ireo. Ary iza moa ankehitriny no tena ilain’ny vahoaka israelita fa tsy ianao sy ny fianakavian-drainao ve?
21Dia hoy i Saoly hoe:
–Fa izaho ahoana? Izaho anie ka avy amin’i Benjamîna e, avy amin’ilay foko kely indrindra amin’ny fokon’ny Israely? Ary ny fianakavian-draiko moa ve tsy ilay fianakaviana vitsy indrindra amin’ny fokon’i Benjamîna? Koa ahoana no ilazanao zavatra toy izany amiko?
22Avy teo dia notarihin’i Samoela hiditra tao amin’ny efitra fisakafoana i Saoly sy ny mpanompony ka napetrany teo amin’ny toeram-boninahitra niaraka tamin’ireo vahiny nasaina miisa telopolo eo ho eo. 23Dia hoy i Samoela tamin’ny mpahandro: «Arosoy ilay didin-kena izay nomeko anao ka nasaiko hotehirizinao.» 24Nalain’ilay mpahandro ny fen’ondry miaraka amin’ny hofany ka narosony teo anoloan’i Saoly. Dia hoy i Samoela tamin’i Saoly:
–Indro eo anatrehanao ny anjara voatokana ho anao amin’izao andro lehibe izao, ka mihinàna miaraka amin’ireto vahiny nasaiko ireto.
Koa tamin’izay andro izay, dia niara-nihinana tamin’i Samoela i Saoly. 25Avy eo izy ireo, dia nidina avy teo amin’ny toeram-panasinana ka nankany an-tanàna, ary nifampiresaka teo an-tampon-trano.
Manokana an’i Saoly ho mpanjakan’i Israely i Samoela
26Nony ampitso dia nifoha maraina be i Saoly sy ny mpanompony. Rehefa nazava ratsy ny andro, dia niantso an’i Saoly avy teo an-tampon-trano i Samoela hoe:
–Miomàna ianao fa hateriko antsasa-dalana.
Dia nanaiky i Saoly, ary niara-nivoaka ny trano izy sy i Samoela. 27Nony mby teo amin’ny faran’ny tanàna izy ireo, dia hoy i Samoela tamin’i Saoly:
–Lazao ny mpanomponao hialoha antsika.
Rehefa lasa lavitra ilay mpanompo, dia hoy indray i Samoela hoe:
–Ary ianao kosa, mijanòna eto ankehitriny, fa tiako hampahafantarina ny tenin’Andriamanitra.
Currently Selected:
1 Samoela 9: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
