1 Samoela 8
8
Ny Israelita mangataka mpanjaka
1Rehefa antitra i Samoela, dia ireo zanany no nataony ho mpanapaka ny vahoaka Israely. 2I Jôela no anaran-janany lahimatoa ary i Abià no anaran’ny zandriny; tany Beèra-Sèba#8.2 Beèra-Sèba: tanàna tokony ho 70 km ao atsimo andrefan’i Jerosalema. izy ireo no nanao ny asa maha mpitondra azy. 3Nefa izy roa lahy tsy mba nanahaka izay nataon-drainy, fa nanjary tia vola ka nandray tsolotra sy namilivily ny marina. 4Noho izany, dia nivory ny loholona israelita rehetra, ka nankany amin’i Samoela any Ramà#8.4 Ramà: jereo 1.1 sy nta.. 5Hoy ireo taminy:
–Indro, efa antitra ianao izao, ry Samoela, nefa ny zanakao tsy mba nanahaka anao, koa anendreo mpanjaka izahay hitondra anay, tahaka ny an’ny firenen-kafa rehetra#8.5 Jereo Deot 17.14..
6Fa tsy nahafaly an’i Samoela izany nangatahan’izy ireo mpanjaka ho azy izany; koa dia nivavaka tamin’ny TOMPO izy. 7Nefa hoy ny TOMPO tamin’i Samoela:
–Ekeo ny fangatahan’ny vahoaka amin’izay rehetra lazainy aminao; satria tsy ianao akory no laviny, fa Izaho mihitsy no tsy tiany ho mpanjakany intsony. 8Nanomboka tamin’ny andro nanafahako azy tany Ejipta ka mandraka izao, dia tsy nitsaha-niodina tamiko izy fa nanompo andriamani-kafa; koa izay efa nataony tamiko no mbola ataony aminao koa ankehitriny. 9Noho izany, dia ekeo ihany ny fangatahany; kanefa aza misoron-teny aminy ianao fa atoroy azy ny zon’izay ho mpanjakany.
Ny zon’ny mpanjaka
10Dia nitatitra ny teny rehetra nataon’ny TOMPO i Samoela ka nilaza tamin’ireo vahoaka nangata-mpanjaka hoe:
11–Ireto avy no zon’izay ho mpanjakanareo: ny zanakareo lahy dia halainy ka hataony miaramila mpitondra kalesin’ady sy mpitaingin-tsoavaly, na hataony mpihazakazaka eo alohan’ny kalesiny; 12ny sasany hataony manamboninahitra mpibaiko rezimanta na vondron-tafika. Ny hafa hataony mpiasa ny taniny sy mpijinja ny vokany, na koa mpanefy fiadiana sy fitaovana momba ny kalesy. 13Halainy koa ny zanakareo vavy ka hataony mpamboatra ranomanitra na mpahandro hanina na mpanao mofo. 14Halainy ka homeny ny mpanompony izay tsara amin’ny sahanareo sy ny tanimboalobokareo ary ny taninôlivanareo; 15halainy koa ny ampahafolon’ny vokatry ny taninareo sy tanimboalobokareo ka homeny ny mpiasam-panjakàny sy ny manamboninahiny. 16Halainy ny mpanomponareo, ny matanjaka amin’ny tanoranareo, eny, hatramin’ny borikinareo aza, dia hampiasainy ho amin’ny tombontsoany. 17Halainy koa ny ampahafolon’ny biby fiompinareo. Raha bangoina, dia ny tenanareo mihitsy no hoandevoziny. 18Hitaraina amin’ny TOMPO ianareo amin’izany fotoana izay noho ny mpanjaka izay nofidinareo, saingy tsy nihaino anareo Izy.
19Tsy noraharahain’ny Israelita anefa ny tenin’i Samoela, fa hoy izy ireo hoe:
–Tsy ahoanay izany, fa mba mila mpanjaka koa izahay 20mba ho tahaka ireo firenen-kafa; ka ny mpanjakanay no hitsara anay sy ho mpitari-tafikay ary hiady hiaraka aminay.
21Nohenoin’i Samoela ny teny rehetra voalazan’ny vahoaka israelita ka notateriny tamin’ny TOMPO. 22Hoy kosa ny TOMPO tamin’i Samoela:
–Ekeo izay angatahiny aminao ka omeo mpanjaka izy.
Taorian’izany, dia nasain’i Samoela nody any amin’ny tanànany avy ny Israelita.
Currently Selected:
1 Samoela 8: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
