1 Samoela 7
7
1Tonga naka ny Vatamasin’ny TOMPO ny mponin’i Kiriata-Jeharîma ka nitondra azy ho ao an-tranon’i Abinadàba teo amin’ny havoana iray#7.1 Jereo 2 Sam 6.3.. Dia natokan’izy ireo ho mpiambina ny Vatamasin’ny TOMPO i Elihezera zanakalahin’i Abinadàba.
Resy ny Filistinina. Tonga filohan’i Israely i Samoela
2Hatramin’ny nitoeran’ny Vatamasin’ny TOMPO tany Kiriata-Jeharîma, dia andro maro no nifandimby, efa roapolo taona izao. Nalahelo te hiverina amin’ny TOMPO ny Israelita rehetra 3ka nilazan’i Samoela hoe:
–Raha amin’ny fonareo manontolo tokoa no hiverenanareo amin’ny TOMPO, dia atsaharo ny fanompoanareo andriamani-kafa sy fanompoanareo ny sampy Hastôreta; aoka hiraiki-po amin’ny TOMPO ianareo, ary aza manompo afa-tsy Izy irery ihany, fa hovonjeny tsy ho voagejan’ny Filistinina ianareo.
4Dia narian’ny Israelita ireo sampin’ny andriamani-dahy Bahala sy ny andriamani-bavy Hastôreta, ka ny TOMPO no hany notompoiny. 5Avy eo dia hoy i Samoela hoe:
–Aoka ho vory any Mitsepà#7.5 Mitsepà: tanàna tokony ho 12 km any avaratr’i Jerosalema. ny vahoaka Israely tsivakivolo, fa izaho hivavaka amin’ny TOMPO ho azy.
6Dia tafangona tao Mitsepà ny Israelita. Nanovo rano izy ireo, dia nararany tamin’ny tany teo anatrehan’ny TOMPO izany. Nifady hanina koa izy tamin’izany andro izany sady niaiky heloka hoe: «Efa nanota tamin’ny TOMPO izahay.» Tao Mitsepà no nahatonga an’i Samoela ho filohan’ny vahoaka Israely.
7Rehefa fantatry ny Filistinina fa nivory tany Mitsepà ny Israelita, dia tapa-kevitra ireo andriana dimy filohan’ny Filistinina fa hanafika azy. Nony ren’ny Israelita izany, dia natahotra ny Filistinina izy, 8ka nanao tamin’i Samoela hoe:
–Aza arianao izahay, fa mivavaha amin’ny TOMPO Andriamanitsika ho anay, mba hamonjeny anay tsy ho voagejan’ny Filistinina.
9Naka zanak’ondry mbola minono i Samoela ka nanolotra izany ho sorona dorana manontolo ho an’ny TOMPO; dia nitalaho tamin’ny TOMPO ho an’ny vahoaka Israely izy, ary ny TOMPO namaly ny vavaka nataony. 10Fa raha mbola nanatitra ilay sorona i Samoela, dia nandroso hanafika an’i Israely kosa ny Filistinina. Tamin’izay indrindra anefa ny TOMPO no nampirefotra kotro-baratra tamin’ny miaramila filistinina sy nampifanaritaka azy, ka resin’ny Israelita izy ireo. 11Niala tao Mitsepà ny tafik’i Israely ka nanenjika ny Filistinina hatrany ambanin’ny Bety-Kàra#7.11 Bety-Kàra: toerana tsy fantatra mazava ny misy azy. mandra-pandresiny azy tanteraka. 12Naka vato i Samoela ka natsangany teo anelanelan’i Mitsepà sy i Sèna izany ary nomeny anarana hoe Ebena-Hezera na «Vatom-pamonjena», fa hoy izy hoe: «Efa namonjy antsika hatretỳ ny TOMPO#7.12 Sèna: toerana tsy fantatra mazava ny misy azy. –Ebena-Hezera: toa toerana hafa noho ilay voateny ao amin’ny 4.1..»
13Menatra ny fahareseny loatra ny Filistinina, ka tsy sahy nitsofoka ny faritanin’i Israely intsony, satria ny TOMPO naneho ny heriny tamin’izy ireo nandritra ny andro rehetra niainan’i Samoela. 14Ary ireo tanàna izay nalain’ny Filistinina tamin’ny Israelita, teo anelanelan’i Hekrôna sy Gata#7.14 Hekrôna sy Gata: jereo 5.8, 10 sy nta., dia tafaverina soa aman-tsara tamin’ny Israelita; koa afaka teo an-tanan’ny Filistinina izany faritra izany. Ary dia nisy koa ny fandriampahalemana teo amin’ny Israelita sy ny Amôrita.
15I Samoela no filohan’ny vahoaka Israely mandra-pahafatiny. 16Isan-taona izy dia nandeha nitety an’i Betela sy i Gilgala#7.16 Betela: tanàna tokony ho 15 km any avaratr’i Jerosalema. –Gilgala: anaran-toerana maro ao amin’ny tanin’i Israely; mety ho ilay Gilgala akaikin’i Jerikao no voalaza eto (jereo Jos 4.19-20; 5.9-10). ary i Mitsepà ka nitsara tamin’ireo tanàna telo ireo. 17Rehefa izany, dia niverina nody tany Ramà#7.17 Ramà: jereo 1.1 sy nta. izay nisy azy izy; nitsarany ny Israelita koa tao sady nanorenany alitara anankiray ho an’ny TOMPO.
Currently Selected:
1 Samoela 7: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
