1 Samoela 6
6
Naverin’ny Filistinina any Israely ny Vatamasina
1Tany amin’ny tanin’ny Filistinina nandritra ny fito volana ny Vatamasin’ny TOMPO. 2Farany dia nampaka ireo mpisorony sy mpimasiny ny Filistinina ka nanontany azy hoe:
–Hataonay ahoana ny Vatamasin’ny TOMPO? Ambarao anay izay fomba hamerenana azy any amin’ny toerany.
3Dia hoy ireo namaly:
–Raha hamerina ilay Vatamasin’ny Andriamanitr’i Israely ianareo, dia aza averina foana amin’izao, fa tsy maintsy hanateranareo fanonerana Izy; dia ho sitrana ianareo ary ho fantatrareo ny anton’ny namelezan’io Andriamanitra io anareo tamin’ny heriny.
4Hoy kosa ny Filistinina hoe:
–Fa inona àry no fanonerana haterinay aminy?
Dia hoy ny navalin’ny mpisorona sy ny mpimasy:
–Araka izay isan’ireo andriana filohan’ny Filistinina, dia mba anatero sarin-kitso volamena dimy sy totozy volamena dimy; fa aretina iray ihany no mahazo anareo rehetra mbamin’ny filohanareo. 5Koa manaova sarin’ny kitsonareo sy sarin’ny totozy mpandevona ny taninareo ary atolory izany ho fanomezam-boninahitra ny Andriamanitr’i Israely. Angamba mba hitsahatra tsy hanampatra ny heriny aminareo sy amin’ny andriamanitrareo ary amin’ny taninareo Izy. 6Nahoana no hihamafy fo tahaka ny Ejiptianina sy ny Farao ianareo? Tsarovy tsara ny nanaovan’Andriamanitra azy ireo ka nahatonga azy hamela ny vahoaka handeha, ka dia lasa izy. 7Koa manamboara sarety vaovao, dia makà ombivavy roa mitaiza sady tsy mbola nitondra zioga, ka rohizo amin’ny sarety, ary dia saraho aminy ho any am-balany ireo zanany. 8Halainareo ny Vatamasin’ny TOMPO, dia apetraho eo ambony sarety; hataonareo anaty vata kely eo anilany ireo sarin-javatra volamena izay aterinareo ho fanonerana amin’Andriamanitra. Avy eo dia alefaso izy handeha. 9Ho hitanareo tsara fa raha mihazo ny lalana mankany amin’ny tanin’i Israely ka mizotra ho any Bèty-Semesy#6.9 Bèty-Semesy: toerana tokony ho 25 km ao andrefan’i Jerosalema. ireo ombivavy, dia midika izany fa ny Andriamanitry ny Israely no nahatonga izao loza lehibe izao tamintsika; raha tsy izany kosa dia ho fantatsika fa kisendrasendra ihany fa tsy ny heriny akory no namely antsika.
10Dia araka izany no nataon’ny Filistinina. Naka ombivavy roa mitaiza izy, dia norohizany tamin’ny sarety; ary ny zanany nohidiany tao am-bala. 11Napetrany teo ambony sarety ny Vatamasin’ny TOMPO sy ny vata kely misy ny totozy volamena sy ny sarin-kitso.
12Avy hatrany dia nihazo ny lalana mankany Bèty-Semesy ireo ombivavy; ka sady nandeha tamin’izany izy no tsy nitsaha-nimamà, ary tsy nivilivily niankavanana na niankavia. Ary ireo filohan’ny Filistinina nanaraka ny sarety hatrany amin’ny fizaran-tanin’i Bèty-Semesy. 13Tamin’izay ny mponina tao Bèty-Semesy dia nijinja varim-bazaha tany an-dohasaha. Nahatazana ny Vatamasina izy ireo ka dibo-kafaliana nahita azy. 14Tonga tao an-tsahan’i Josoa, lehilahy avy ao Bèty-Semesy, ny Vatamasina ka nijanona teo akaikin’ny vato lehibe iray. Novakîna madinika ny hazon-tsarety, ary natao sorona dorana manontolo ho an’ny TOMPO ireo ombivavy.
15Nampidinin’ny Levita ny Vatamasin’ny TOMPO sy ny vata kely nisy ireo sarin-javatra volamena niaraka taminy, ary dia samy napetrany teo ambonin’ilay vato lehibe. Tamin’io andro io ihany dia nanao sorona dorana manontolo sy sorom-pihavanana ho an’ny TOMPO ny olona tao Bèty-Semesy. 16Tamin’io andro io koa, rehefa nahita izany ireo andriana dimy filohan’i Filistinina, dia niverina nankany Hekrôna.
17Toy izao ny amin’ireo kitso volamena izay naterin’ny Filistinina amin’ny TOMPO ho fanonerana: iray ho an’i Asdôda, iray ho an’i Gazà, iray ho an’i Askelôna#6.17 Ireo tanàn-dehibe dimy an’ny Filistinina no tanisaina etoana. I Gazà sy i Askelôna no tanàn-dehibe fahefatra sy fahadimy ka eo amorontsirak’i Mediteranea no misy azy (jereo 5.1, 8, 10 sy nta)., iray ho an’i Gata ary iray ho an’i Hekrôna. 18Ireo totozy volamena kosa dia natao araka ny isan’ny tanàna filistinina rehetra nentin’ireo filoha dimy, manomboka amin’ny tanànamimanda ka hatramin’ny tanàna kely eny ambanivohitra. Ny vato lehibe nametrahana ny Vatamasin’ny TOMPO no vavolombelon’izany; mandraka androany io vato io mbola ao an-tsahan’i Josoà, lehilahy avy any Betỳ-Semesy.
19Namely ny mponin’i Betỳ-Semesy ny TOMPO satria nojeren’ireo ny Vatamasina, ka lehilahy fitopolo sy biby fiompy vaventy dimampolo no maty#6.19 lehilahy fitopolo... dimampolo: misy dkt hafa hoe lehilahy fitopolo amin’ny fianakaviana dimampolo na hoe lehilahy fitopolo amin’ny mponina dimy alina. . Koa dia nisaona avokoa ireo olona sisa mbola velona satria namely azy mafy ny TOMPO. 20Ary hoy ny mponin’i Betỳ-Semesy:
–Iza no hahajanona eo anatrehan’io TOMPO Andriamanitra Masina io? Ary aiza no hampiakarantsika ny Vatamasiny hanalavitra antsika?
21Dia nandefa iraka ho any amin’ny mponin’i Kiriata-Jeharîma#6.21 Kiriata-Jeharîma: tanàna tokony ho 13 km any avaratra andrefan’i Jerosalema. izy ireo mba hilaza aminy hoe:
–Naverin’ny Filistinina ilay Vatamasin’ny TOMPO, koa tongava ianareo hampiakatra azy ho any aminareo.
Currently Selected:
1 Samoela 6: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
