Marika 13
13
Sa vakatakila ko Jisu na ca ena yaco ki Jerusalemi, kei na veika era na vosota ko ira sa dautukuna na lotu, 1-13; kei na ca ena yaco vei ira na kai Jutia, 14-23. Sa qai tukuna na nona lako mai me ia na veilewai, 34-37.
1IA ni sa lako tani ko koya e na vale ni soro, sa dua vei iratou na nona tisaipeli sa kaya vua, Vakavuvuli, raica, na veivatu, kei na veivale, sa rai vakaevei! 2A sa vosa ko Jisu, ka kaya vua, 0sa raica na veivale lelevu o qori, ne? ena sega ni vo na vatu me veitaqataqai, me kakua ni talaraki sobu. 3Ia ni sa tiko ko koya mai na ulu-ni-vanua ni veiolive sa donuya na vale ni soro, eratou sa vakatarogi koya lo ko Petero kei Jemesi kei Joni kei Adriu, 4Tukuna mai vei keitou, se na yaco ninaica na veika o qo; ia ka cava na kenai vakatakilakila ni sa kolai yaco na ka kecega o qo. 5Sa qai vosa vei iratou ko Jisu, ka vakatekivu me kaya, Raica vinaka de vakacalai kemudou e dua: 6ni ra na lewe vuqa era na lako mai e na yacaqu, ka kaya, Sai au; ia ka lewe vuqa era na vakacala. 7Ia ni dou na rogoca nai valu, kei nai rogorogo ni valu, dou kakua ni kidroa; ni sa kilikili me yaco; ia ka sa bera ga nai vakataotioti. 8Ni na veibolebolei na vanua e so, kei na matanitu e so; ia ena yaco na tavuki ni vanua e na yasana e vuqa, ena yaco talega na dausiga kei na ca: o qo nai vakatekivu ga ni ka rarawa.
9Ia dou raici kemudou vinaka: ni dou na soli yani ki na mataveilewai, kei na veivale ni lotu: dou na vakanakuitataki, dou na kau talega ki na matadra na turaga, kei ira na tui, e na vukuqu, mei vakadinadina vei ira. 10Ia ena vunautaki dina mada eliu nai tukutuku-vinaka e na veivanua kecega. 11Ia ni dou sa kau yani, ka soli me lewai, dou kakua ni lomaocaoca kiliu se cava mo dou kaya, dou kakua talega ni vakanananu; ia na ka kecega ena soli vei kemudou e na tiki-ni-siga ko ya, a ya ga mo dou vosataka: ni dou sa sega ni vosa koi kemudou, a ya ga na Yalo Tabu.
12Ia era na dui soli ira yani na veitacini me vakamatei, kei na tamana na luvena; ia era na tu cake na gone vei ira na nodra qase, ka vakavuna na nodra mate. 13Ia dou na cati vei ira na tamata kecega e na vuku ni yacaqu; ia ko koya ena vosota me yacova nai vakataotioti, ena vakabulai ko koya.
14Ia ni dou sa raica ni sa tu e na yasana sa tabu ni tu kina na ka vakasisila sa dauveivakarusai, a ya sa vosa kina ko Tanieli na parofita, (me vakananuma ko koya sa wilika,) me qai dro ki na veiulu-ni-vanua ko ira era sa tiko e Jutia; 15ia me kakua ni lako sobu ki vale ko koya sa tiko e delana, se curu kina, me kauta tani e dua na ka e na nona vale; 16ia me kakua ni lesu tale ko koya sa tiko e na were, me kauta na nonai sulu. 17Ka na ca vei ira sa bukete, kei ira era sa vakasucuma na gone, e na gauna ko ya! 18Ia dou masu me kakua ni yaco na nomudou dro e na vula i liliwa. 19Ni na yaco na ka rarawa e na gauna ko ya; sa sega ni vakakina mai nai vakatekivu ka ia kina na veibuli ko na Kalou ka yacova na siga o qo, ka na sega talega emuri. 20Ia kevaka sa sega ni vakalekalekataka na gauna ko ya na Turaga, sa sega na tamata me bula rawa: ia e na vukudra na digitaki, ko ira sa digitaka ko koya, sa vakalekalekataka ko koya na gauna ko ya. 21Kevaka ena qai kaya vei kemudou e dua, Raica, eke na Karisito; se, Raica, maikea; kakua ni dinata: 22ni na tubu mai na Karisito vakailasu e so, kei na parofita vakailasu e so, a ra na vakatakila mai na veivakatakilakila kei na veika e veivakidacalataki, me vakacalai ira kina na digitaki, kevaka e rawa. 23Ia dou raici kemudou vinaka: raica, au sa tukuna eliu vei kemudou na ka kecega.
24Ia e na gauna ko ya, ni sa oti mada na ka rarawa ko ya, ena qai vakabutobutotaki na mata-ni-siga; ena sega talega ni cila na rarama ni vula; 25ka na lutu mai na veikalokalo ni lomalagi, ka na veitosoyaki na veika kaukauwa ni lomalagi: 26ia era na qai raica na Luve ni tamata ni sa lako mai e na veio, e na kaukauwa levu kei nai ukuuku. 27Ena qai talai ira na nona agilose ko koya, ka vakasoqoni ira vata na nona digitaki mai na mata ni cagi e va, mai nai yalayala kei vuravura kei nai yalayala kei lomalagi. 28Mo dou kila mada na vosa vakatautauvata ni lolo: Ni sa qai lavovou na tabana, a sa tubu na drauna, dou sa kila kina ni sa voleka na vula i katakata: 29me vaka talega kina koi kemudou, ni dou sa raica ni sa yaco na veika o qo, dou kila ni sa voleka, io e katuba. 30Au sa kaya vakaidina vei kemudou, Ena sega ni takali mada nai tabatamata o qo, ena yaco eliu na ka kecega o qo. 31Ena takali ko lomalagi kei vuravura; ia na noqu vosa ena sega ni takali.
32Ia na siga ko ya kei na tiki-ni-siga ko ya sa sega e dua e kila, o ira na agilose mai lomalagi e segai, se na Luvena, a Tamaqu duaduaga.
33Dou raici kemudou vinaka; dou vakatawa, ka masu: ni dou sa sega ni kila na kena siga. 34Sa vaka e dua na tamata e lako ki na vanua tani, o koya sa biuta na nona vale, a sa lesia vei ira na nonai talatala me ra lewa, ka vei ira yadua na nodra cakacaka, a sa kaya vua nai vakatawa me vakatawa. 35O koya mo dou qai vakatawa: ni dou sa sega ni kila na tiki-ni-siga ena lako mai kina nai taukei ni vale; se e na yakavi, se na lomaloma-ni-bogi, se ni sa tagi na toa, se e na mataka; 36de lako vakasauri mai, ka kunei kemudou ni dou sa moce ga: 37ia na ka kaʼu sa kaya vei kemudou, kaʼu sa kaya vei ira kecega, Dou vakatawa.
Currently Selected:
Marika 13: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
