Marika 12

Sa vunauci ira na kai Jutia ko Jisu, ni ra sa bese ni muria na vosa ni Kalou, 1-12. Sa vakavulici ira me ra solia na ka e dodonu vei Sisari, vua talega na Kalou, 13-17. Sa vakavulici ira nai tokani i Satoki, kei ira na vu-ni-vola, 18-40. Sa doka na yada sa solia na nonai yau kece, 41-44.

1A SA vakatekivu ko koya me kaya vei ira e na vosa vakatautauvata, Sa dua na tamata sa tea e dua na were-ni-vaini, a sa viribaita vakavolivolita, a sa kelia na keli-ni-waini, a sa tara na nodra vale nai vakatawa, a sa yalata vei ira e so nai vakatau-ni-were, a sa qai lako ki na vanua tani. 2Ia ni sa yaco na kena gauna, sa tala ko koya e dua nai talatala vei ira nai vakatau-ni-were, me kauta maivei ira nai vakatau-ni-were e so na vua ni were-ni-vaini. 3A ra sa taura, ka yaviti koya, ka vakatala tani wale. 4Sa qai tala tale vei ira ko koya e dua nai talatala tani; a ra sa virika e na vatu, ka lauta na uluna, ka vakatala tani ni sa vakamaduataki. 5A sa tala tale ko koya e dua tani; a ra sa vakamatei koya, kei ira na lewe vuqa tani; e so era sa yavita, ka so era sa vakamatea. 6A sa vo ga e dua bauga na luvena, na nona gone ni toko, a sa talai koya talega emuri vei ira, ka kaya, Era na vakarokorokotaka na luvequ. 7Ia ko ira nai vakatau-ni-were ko ya era sa kaya vakai ira, 0koya o qo nai taukei emuri; tou mai vakamatea, ena qai noda ga na vanua. 8A ra sa taura, ka vakamatea, ka biuta ki taudaku ni were-ni-vaini. 9A cava beka ena qai kitaka na turaga ni were-ni-vaini? ena lako ga mai ka vakamatei ira nai vakatau-ni-were, ka solia na were-ni-vaini vei ira e so tani. 10Ia dou sa sega beka ni wilika na tikina o qo ni Vola: A vatu era sa cata ko ira na matai ni vale, sa yaco mei teteki e na tutu-ni-vale: 11o qori na cakacaka i Jiova, a sa ka e veivakidacalataki e matada?

12A ra sa via tauri koya, ka ra sa rerevaki ira na lewe vuqa; ni ra sa kila ni sa vosataki ira ko koya e na vosa vakatautauvata ko ya; a ra sa qai biuti koya, ka lako yani.

13A RA sa tala vua e so na Farisi, kei nai tokani i Eroti, me ra corita na nona vosa. 14Ia ni ra sa yaco mai, era sa kaya vua, Vakavuvuli, keitou sa kila ni ko sa dina ga, ka sa sega ni rerevaka e dua; ni ko sa sega ni doka na matadra na tamata, ia ko sa vakatavuvulitaka vakaidina ga nai valavala sa vinaka vua na Kalou: sa tara me da solia na drawe vei Sisari, se segai? 15me da solia, se me da kakua ni solia? Ia ka sa kila ko koya na nodrai lawaki, a sa kaya vei ira, Dou sa dauveretaki au e na vuku ni cava? kauta mai vei au e dua nai lavo, meʼu raica. 16A ra sa kauta mai. A sa tarogi ira ko koya, A mata i cei o qo, kei na yaca sa volai tu? A ra sa kaya vua, A nei Sisari. 17Sa qai vosa ko Jisu, ka kaya vei ira, Mo dou solia vei Sisari na ka sa nei Sisari, vei koya talega na Kalou na ka sa nona na Kalou. A ra sa kidacalataki koya.

18Era sa qai lako mai vei koya e so nai tokani i Satoki, o ira era sa daukaya ni na sega ni tu cake tale na mate: a ra sa taroga, ka kaya, 19Vakavuvuli, sa vola ko Mosese vei keda, Kevaka sa dua na tamata sa mate na tuakana se tacina, ka biuta na watina, ka sega na luvena, erau na veiwatini kei na nona yada ko na tacina se tuakana, me vakaivakawa kina vua na tuakana se tacina. 20Sa tiko na mataveitacini eratou lewe vitu: a sa vakawati ko koya sa qase, a sa mate, ka sega na luvena: 21erau sa qai veiwatini kaya nai karua, a sa mate ga, ka sega na luvena: a sa vaka talega kina nai katolu: 22ia eratou sa veiwatini kaya ko iratou na lewe vitu, ka sega na luvedratou: sa qai mate talega emuri na yalewa: 23ia e na tu cake tale, ni ratou na tu cake tale, ena wati i cei vei iratou ko koya? ni ratou sa curuma ko iratou na lewe vitu.

24A sa vosa ko Jisu, ka kaya vei ira, O koya o qo dou sa sega li ni sese kina, ni dou sa sega ni kila nai Vola, se na kaukauwa ni Kalou? 25Ni ra na tu cake tale mai na mate, era na sega ni vakawati, se veimusumusukitaki me ra vakawati; ia era na vakataki ira ga na agilose mai lomalagi. 26Ia e na vuku ni ra na tu cake tale na mate, dou sa sega li ni wilika e nai vola i Mosese, ni sa vosa na Kalou vei koya, mai na kau, ka kaya, Oi au na Kalou i Eparaama, kei na Kalou i Aisake, kei na Kalou i Jekope? 27sa sega ni nodra Kalou na mate ko koya, a nodra Kalou ga era sa bula tiko: o koya o qo dou sa sese sara kina.

28Ia ka sa dua na vu-ni-vola, ni sa rogoca na nodra veileti, a sa kunea ni sa vosa vakavuku vei ira ko koya, sa qai lako mai ka tarogi koya, A cava sai matai ni vakaro kecega? 29A sa kaya vua ko Jisu, Sai matai ni vakaro kecega, Mo rogoca, na Isireli: O Jiova na noda Kalou sa ko Jiova e dua bau: 30ia mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kece, kei na nomu kaukauwa kece; o koya o qo nai matai ni vakaro. 31A sa tautauvata nai karua, sa vaka, Mo lomana na kai nomu me vakataki iko. Sa sega e dua nai vakaro sa uasivia ruarua o qo.

32A sa kaya na vu-ni-vola vei koya, E vinaka, vakavuvuli, o sa vosa dina; ni sa dua bauga na Kalou; a sa sega tale e dua me rau le rua kaya; 33ia me da lomani koya e na lomada taucoko, kei na noda vakasama kece, kei na yaloda taucoko, kei na noda kaukauwa kece, ka me lomana na kai noda me vakataki keda, o qori na ka levu, ia na ka lailai nai soro kama kecega, kei nai soro kecega. 34Ia ni sa raica ko Jisu ni sa vosa vakavuku ko koya, sa kaya vua, O sa sega ni yawa ki na matanitu ni Kalou. A sa sega e dua emuri sa doudou me vakatarogi koya.

35A sa vosa ko Jisu ni sa vakavuvuli tiko e na vale ni soro, ka kaya, Sa vakaevei ni ra sa kaya ko ira na vu-ni-vola ni sa luve i Tavita na Karisito? 36Ni sa kaya ko Tavita, ni sa vuna ko na Yalo Tabu, Sa kaya ko Jiova vua na noqu Turaga, Mo tiko e na ligaqu i matau, meʼu qisi ira mada na nomu meca mei tutu-ni-yavamu. 37Sa vakatokai koya kina ko Tavita me Turaga; sa qai luvena vakaevei? A ra sa lewe vuqa vei ira na tamata, sa vinakata me ra rogoci koya.

38A sa kaya vei ira e na nonai vakavuvuli, Dou raici ira na vu-ni-vola, era sa vinakata na lako voli e nai sulu balabalavu e so, kei na veikidavaki e na veirara ni veivoli, 39kei na veitikotiko ni qase e na veivale ni lotu, kei na veitikotiko vakaturaga e ua veisolevu; 40era sa kovea na nodrai yau na yada, a ra masu balavu tiko me veivakaisini; o ira o qo era na cudruvi vakalevu.

41A sa tiko ko Jisu e na yasana sa donuya na vale ni yau, a sa raici ira na tamata ni ra sa biuta nai lavo ki na vale ni yau: a ra sa lewe vuqa era sa vutuniyau era sa biuta vakalevu. 42A sa lako mai e dua na yada sa dravudravua, a sa biuta kina e rua na kena lailai sara ni lavo, a ya sa lailai sobu e na pene e dua. 43A sa kacivi iratou na nona tisaipeli ko koya, ka kaya vei iratou, Au sa kaya vakaidina vei kemudou, Na yada dravudravua o qo sa biuta vakalevu ki na vale ni yau, o ira kecega era sa biuta vakalailai ga: 44ni ra sa biuta kina e so ko ira kecega mai na nodra ka e vuqa: ia ko koya o qo, mai na nona dravudravua, sa biuta na nona ka kecega, io kecega na nona ka e bula kina.

Currently Selected:

Marika 12: FIJ1864

Highlight

Copy